O Le Mana o se Molimau Patino

Elder Dieter F. Uchtdorf

O Le Korama a Aposetolo e Toasefululua

O a tatou molimau patino mausali, o le a faaosofia ai i tatou e suia i tatou lava, ona faamanuiaina ai lea o le lalolagi.

I le Tusi a Mamona, ua tatou faitau ai i le taulealea o Nifae, lea sa poloaiina e le Alii ina ia fau se vaa. Sa vave ona usitai o ia i lenei poloaiga, peitai, sa le talitonu ona uso. “Ina ua iloa foi e o’u uso o le a ou faia le vaa,” na ia tusia, “na amata ona latou muimui mai ia te au, ua faapea mai: O lo tatou uso o le vale ia, ua manatu o ia na te mafaia ona fau se vaa; ioe, ua manatu foi o ia na te mafaia ona alu i tala atu o ia vai e tele” (1 Nifae 17:17).

Peitai e le ‘i faavaivai ai Nifae. Sa leai sona poto masani i le fauina o vaa, peitai, sa ia te ia se molimau patino malosi “o le Alii … [o le a] saunia se ala … [e] faataunuu ai le mea ua ia poloaiina” (1 Nifae 3:7). Faatasi ai ma lenei molimau mamana ma le uunaiga i lona loto, o lea sa fauina ai e Nifae se vaa na latou sopoia ai vai e tele, e ui i se tetee malosi na faaalia e ona uso e leai ni faatuatua.

Se’i ou faamatalaina atu so’u aafiaga patino mai lo’u talavou, e uiga i le mamana o mafuaaga amiotonu.

Ina ua mavae le nunuvale o le Taua Lona Lua a le Lalolagi, sa i’u ina nonofo lo matou aiga i Siamani Sasae i le mea na nofoia e tagata Rusia. Ina ua ou alu i le vasega fa, sa tatau ona ou aoaoina le gagana Rusia, e avea ma a’u gagana ese muamua i le aoga. Sa ou iloa e fai lava si faigata ona o le pi faa-Siriliki, ae a o faagasolo aso, sa foliga o loo lelei la’u taumafaiga.

Ina ua atoa lo’u 11, sa tatau ona matou tuua vave Siamani Sasae, ona o le faiva faaupufai o lo’u tama. O le taimi lea, na ou aoga ai i Siamani Sisifo, i le mea na nofoia e tagata Amerika. O iina, e tatau ona aoao e tamaiti uma le faaPeretania ae le o le faaRusia. O le aoaoina o le faaRusia, sa faigata, ae o le faaPeretania, ou te le mafaia. Sa ou mafaufau e le’i faia lo’u gutu e tautala faaPeretania. Sa tauivi o’u faiaoga. Sa pologa nai o’u matua. Ma sa ou iloaina, o le faaPeretania, e le o sa’u gagana moni lea.

Peitai, sa i ai se mea na suia i lo’u olaga talavou. E toetoe o aso uma lava, ou te alu ai i la’u uila i le malaevaalele ma matamata i le masii a’e o vaalele ma le tulaueleele mai. Sa ou faitau, suesue, ma aoaoina mea uma sa mafai ona ou maua e uiga i mea tau vaalele. O lo’u naunautaiga sili lava, o le fia avea ma se avevaalele. Sa mafai ona ou vaai faalemafaufau ia te a’u lava ia i totonu o le potu o le avevaalele o se vaalele, po o totonu o se vaalele tau o se militeli. Sa loloto le lagona i lo’u loto, o le mea lea mo a’u!

Ina ua ou aoao e avea ma se pailate, e tatau ona ou tautala faaPeretania. E le’i umi, ae matua ofo tagata uma, aua sa foliga mai ua suia lo’u gutu. Sa mafai ona ou aoaoina le faaPeretania.. Sa manaomia lava se galuega tele, finafinau, ma le onosai, peitai, sa mafai ona ou aoaoina le faaPeretania!

Aisea? Ona o se mafuaaga amiotonu ma le malosi!

O a tatou mafuaaga ma mafaufauga e matua tosina ai lava a tatou faatinoga. O le molimau i le moni o le talalelei toefuataiina a Iesu Keriso, o se malosiaga aupito sili ona mamana lea i o tatou olaga. Sa faamamafaina mai pea lava pea e Iesu le mamana o mafaufauga lelei ma mafuaaga tatau: “Ia faalagolago ia te a’u i manatunatuga uma; aua le masalosalo, aua le fefe” (MFF 6:36).

O le molimau a Iesu Keriso ma le talalelei toefuataiina, o le a fesoasoani ia i tatou i o tatou olaga, e aoao ai i le fuafuaga patino a le Atua mo i tatou ona tatou faatino ai lea e tusa ai. Tatou te maua ai le faamautinoaga o le moni, upumoni, ma le agalelei o le Atua, o aoaoga ma le Togiola a Iesu Keriso, ma le valaauga paia o perofeta o aso e gata ai. O la tatou molimau e faaosofia ai i tatou e ola amiotonu, ma o le ola amiotonu foi o le a afua ai ona tupu malosi la tatou molimau.

O Le A se Molimau?

O se tasi o faauigaga o le molimau “o se faamaoniga paia o le moni o se mea,” e faapogai mai le upu Latina o le testimonium ma o le uiga o le upu testis, o le “molimau” (“Testimony,” http://www.reference.com/browse/wiki/Testimony; Merriam-Webster’s Collegiate Dictionary, 11th ed. [2003], “testimony,” 1291).

Mo tagata O Le Ekalesia a Iesu Keriso o le Au Paia o Aso e Gata Ai, o le upu molimau o se upu manaia ua masani ai i a tatou faamatalaga faalelotu. E mu’amu’a ma suamalie. E i ai pea lava pea i lena upu, se tulaga paia mautinoa. A tatou talanoa e uiga i le molimau, tatou te faasino i lagona o o tatou loto ma mafaufau, ae le o se faupu’ega o ni mea moni, talafeagai, ma mama. O se meaalofa a le Agaga, o se molimau mai le Agaga Paia e moni ni konasepi po o ni manatu autu patino.

O se molimau o le malamalama mautu po o le faamautinoaga mai le Agaga Paia, o le upumoni ma le paia o le galuega a le Alii i nei aso e gata ai. O se molimau, o le “talitonuga maumaututu tumau, ola ma le faagaeetia, o upumoni ua faaalia mai i le talalelei a Iesu Keriso” (Marion G. Romney, “How to Gain a Testimony,” New Era, Me 1976, 8; emphasis added).

A tuuina atu a tatou molimau, tatou te tautino atu le moni a’ia’i o le savali o le talalelei. E i ai taimi e toatele nisi e manatu i le upumoni o se mea e le moni, o se tautinoga o se upumoni a’ia’i e le lauiloa tele, e le foliga foi e sa’o i se tulaga faapolotiki po o se taimi talafeagai. O molimau i “mea i lo latou moni a’ia’i” (Iakopo 4:13) e mao’i, e moni ma taua aua e faavavau o latou taunuuga mo le tagata. E le afaina ia Satani pe a tatou tautino atu la tatou savali o lo tatou faatuatua ma aoaoga faavae o le talalelei, pe a fetuutuunai e tusa ai ma tulaga e i ai. O lo tatou talitonuga maumaututu i le moni o le talalelei, o se taula lea i o tatou olaga; e tumau ma faatuatuaina e pei o le Fetu i Matu. O se molimau e matua patino lava, ma e ono fai si eseesega laitiiti mo i tatou taitoatasi, aua e tulaga ese tagata taitasi uma. Peitai, o se molimau i le talalelei toefuataiina a Iesu Keriso, o le a aofia ai i taimi uma nei upumoni manino ma le faigofie:

O loo soifua le Atua. O Ia o lo tatou Tama alofa i le Lagi.
O Iesu Keriso o le Alo o le Atua soifua, ma le Faaola o le lalolagi.
O Iosefa Samita o le perofeta a le Atua lea na auala mai ai le toefuataiina mai o le talalelei a Iesu Keriso i aso e gata ai.
O le Tusi a Mamona o le afioga ia a le Atua.
O Peresitene Gordon B. Hinckley, o ona fesoasoani ma uso o le Korama a Aposetolo e Toasefululua, o perofeta, tagatavaai, ma tali faaaliga i ona po nei.

A tatou mauaina se malamalama loloto atu i nei upumoni ma le ata o le faaolataga e ala i le mana o le meaalofa a le Agaga Paia, e mafai ona tatou “iloa le moni o mea uma” (Moronae 10:5).

E Faapefea Ona Tatou Maua se Molimau?

Ua tatou iloa uma e faigofie atu ona talanoa e uiga i se molimau, nai lo le mauaina o se molimau. O le faiga e maua ai se molimau, e faalagolago i le tulafono o le seleselega: “Aua o le mea e luluina e le tagata, o le mea lava lea e seleseleina mai ai e ia” (Kalatia 6:7). E leai se mea lelei e maua mai e aunoa ma se taumafaiga ma se osigataulaga. Afai e tatau ona tatou galulue malosi ina ia maua se molimau, o le a malolosi atili ai i tatou ma a tatou molimau. Ma a tatou faasoa atu a tatou molimau, o le a tupu.

O le molimau o se oa aupito taua lea, aua e le na o se mafuaaga tatau e maua mai ai, e le mafai ona faatauina i oa faalelalolagi, ma e le mafai foi ona tuuina mai o se meaalofa po o se tofi mai o tatou augatama. E le mafai ona tatou faalagolago i molimau a isi tagata. E ao ona tatou iloaina mo i tatou lava latou. Na saunoa Peresitene Gordon B. Hinckley, “Ua i ai i Au Paia taitasi o Aso e Gata Ai, le matafaioi e iloa ai mo ia lava, faatasi ai ma se mautinoa e aunoa ma se masalosalo, o Iesu o le Alo soifua toetu o le Atua” (“Fear Not to Do Good,” Ensign, Me 1983, 80).

O le faapogai o lenei malamalama mautinoa ma le talitonuga maumaututu, o le faaaliga mai le lagi, “aua o le agaga o le valoaga o le mau lea ia Iesu” (Faaaliga 19:10).

Tatou te mauaina lenei molimau pe a saunoa mai le Agaga Paia i le agaga o i totonu ia i tatou. O le a tatou maua se mautinoa toafilemu ma le le fetotoa’i, o le a avea ma faapogai o a tatou molimau ma talitonuga maumaututu, tusa lava pe o a a tatou aganuu, lanu, gagana, ma tulaga o le tamaoaiga. O na uunaiga a le Agaga, ae lē na o le faautautaga faaletagata, o le faavae moni lea o le a fausia ai a tatou molimau.

O le autu o lenei molimau o le faatuatua lea e le aunoa, ma le malamalama ia Iesu Keriso ma Lana misiona paia, lea o loo ta’ua i le mau e faatatau ia te Ia lava, “O au nei le ala, le upumoni, ma le ola” (Ioane 14:6).

E faapefea la ona tatou maua se molimau patino ua mauaa i le molimau a le Agaga Paia? O loo otooto mai i tusitusiga paia le mamanu:

Muamua: Manao e talitonu. Ua uunaia i tatou e le Tusi a Mamona: “Afai [tou te] ala mai ma fagua o outou mafaufau, e oo i le tofotofo i a’u upu” ma “faaaoga sina faatuatua itiiti lava, … tusa lava pe afai [tou te] le mafaia se mea e sili i le manao i le fia faatuatua” (Alema 32:27). Atonu e faapea mai nisi, “E le mafai ona ou talitonu; E le o au o se tagata lotu.” Tau lava ina e mafaufau, ua folafola mai e le Atua ia i tatou le fesoasoani faalelagi, tusa lava pe ua na o so tatou manao ia talitonu, ae tatau o se manao moni, ae le o se manao e na ona faafoli.

Lona lua: Suesue i tusitusiga paia. Ia i ai ni fesili; sailiili i ai; saili i tusitusiga paia mo ni tali. Ou te toe fai atu, ua i ai i le Tusi a Mamona ni fautuaga lelei mo i tatou: “Afai [tou te] tuuina mai se mea e totoina ai se fatu i o outou loto” e ala i le suesue ma le ma’elega i le afioga a le Atua, “o le a amata ona tupu ai i totonu o outou fatafata” pe afai tou te le teena ona o le le talitonu. O lena fatu lelei o le a “faateleina ai [lou] loto” ma “faamalamalamaina ai [lou] mafaufau” (Alema 32:28).

Lona tolu: Fai le finagalo o le Atua, tausi i poloaiga. E le lava lo tatou ulu atu i se felafolafoaiga o manatu, pe afai tatou te fia iloa mo i tatou lava ua toefuatai mai le malo o le Atua i le fogaeleele. O le suesue faasamasamanoa, e le lava foi lena. E tatau ona tatou faatinoina e i tatou lava, ma o lona uiga, o le aoao ona faia ai lea o le finagalo o le Atua.

E manaomia lo tatou o mai ia Keriso ma mulimuli i Ana aoaoga. Sa aoao mai le Faaola: “O la’u mataupu, e le o sa’u lava, a o lana na auina mai a’u. Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u” (Ioane 7:16–17; faamamafa faaopoopo). Ma sa Ia fetalai mai, “Afai tou te alolofa mai ia te au, ia outou tausi mai i a’u poloaiga” (Ioane 14:15).

Lona fa: Mafaufau loloto, anapogi, ma tatalo. Ina ia maua le malamalama mai le Agaga Paia, e tatau ona tatou fesili atu i le Tama Faalelagi mo lena malamalama. E tatau ona tatou faatuatuaina e alofa le Atua ia i tatou, ma o le a fesoasoani o Ia ia tatou iloa uunaiga a le Agaga Paia. Ua faamanatu mai e le Tusi a Mamona ia te i tatou:

“Pe a [outou] faitau nei mea; ia outou manatua le finagalo alofa o le Atua [i le] fanauga a tagata, e afua i le faiga o Atamu, a e oo lava i le aso [tou te] maua ai nei mea, ina ia mafaufau i ai i o outou loto.

“… Ia ole atu i le Atua, le Tama Faavavau, i le suafa o Iesu Keriso, pe moni … nei mea; ma afai [tou te] … ole atu ai ma le loto faamaoni,ma le manatu tonu i ai, ma le faatuatua ia Keriso, na te faaalia le tonu ia te outou, i le mana o le Agaga Paia” (tagai Moronae 10:3–4).

Na saunoa mai foi le perofeta o Alema:

“Ou te molimau atu ia te outou, ua ou iloa ua moni lava nei mea uma. Pe ni a fa [outou] i le ala ua ou iloa ai ua moni nei mea?

“… Faauta, na ou anapogi ma tatalo … ina ia ou iloa nei mea mo a’u lava. Ua faaalitino ia te au e le Alii le Atua i lona Agaga Paia; o le Agaga foi lea o le faaaliga” (Alema 5:45–46).

O’u uso e ma tuafafine pele, sa maua e Alema lana molimau e ala i le anapogi ma le tatalo i le silia ma le 2,000 tausaga ua mavae, ma e mafai foi ona tatou maua lena lava aafiaga paia i le taimi nei.

O Le a Le Mea e Lelei Ai se Molimau?

O se molimau e maua ai le vaaiga tonu, uunaiga, ma se faavae mautu e fausia ai se olaga o faamoemoega ma le tuputupu a’e patino. O se faapogai faifai pea o le mautinoa, o se soa moni ma le faamaoni i taimi lelei ma taimi leaga. O se molimau e aumaia ai mo i tatou se mafuaaga mo le faamoemoe ma le fiafia. E fesoasoani e atiina ae ai se agaga o le faamoemoe ma le fiafia ma e mafai ai ona tatou olioli i le matagofie o le natura. O se molimau e faaosofia ai i tatou e filifili le mea sa’o i taimi uma, ma i tulaga uma. E faaosofia ai i tatou e faalatalata atili atu i le Atua, ma faataga ai foi o Ia e faalatalata atili mai ia i tatou (tagai Iakopo 4:8).

O a tatou molimau patino, o se talita lea mo le puipuiga, ma e pei o se ai u’amea, na te taialaina i tatou ma le saogalemu i le pogisa ma le fenumia’i.

O le molimau a Nifae na maua ai e ia le lototele e tu atu ma faitaulia o se tasi e usitai i le Alii. E le’i muimui o ia, pe masalosalo, pe fefe, tusa lava pe o a tulaga. A i ai taimi e fefeu ai, fai mai a ia, “Ou te alu ma fai ia [mea] [ua] poloaiina e le Atua, aua ua ou iloa o le Alii … e saunia le ala … [e] faataunuu [ai]” (1 Nifae 3:7).

E faapei lava foi ona silafia Nifae e le Alii, e faapena foi ona silafia ma alofa mai le Atua ia te i tatou. O lo tatou taimi lenei; o o tatou aso nei. Ua tatou i ai nei i le mea o loo faatino ai. O a tatou molimau patino mausali, o le a faaosofia ai i tatou e suia i tatou lava, ona faamanuiaina ai lea o le lalolagi. Ou te molimau atu i nei mea, ma tuuina atu a’u faamanuiaga mo outou, i le avea ai ma se Aposetolo a le Alii, i le suafa o Iesu Keriso, amene.