E Mafai e le Togiola Ona Faamautu Lou Filemu ma le Fiafia
O le fiafia moni tumau, faatasi ai ma le malosi, lototele, ma le gafatia e faatoilalo ai faigata maoae, o le a oo mai pe a e faatotonugalemuina lou olaga ia Iesu Keriso.
E finagalo lo tatou Tama o i le Lagi ina ia tatou olioli i le filemu ma le fiafia i le olaga faitino. Na aoao mai e lo tatou Matai, o Iesu Keriso, ma Ana perofeta le auala e maua ai lena filemu ma le fiafia, e ui i se lalolagi ua sili atu ona faigata, ma ua faateleina ai le fevatauai ma le malolosi o tofotofoga faatosina.
O le a ou faapupulaina atu le auala sese e saili ai le filemu ma le fiafia, ona sosoo atu lea ma le auala sa’o, e ala i le faaaogaina o se tala e faatusa i le a’ea’e i papa. E i ai i latou e taumafai e a’ea se mato papa i se auala e ta’ua o le “solo.” Latou te fe’a’ei na o i latou, e aunoa ma ni meafaigaluega, uo, po o se puipuiga mautu. Latou te faalagolago i lo latou lava atamai, ma le malosi. Latou te faia ma le sagisagi i le ola ai i le si’ui ma le maualuga o le tulaga lamatia. E faia tusa lava pe ono tula’i mai i se taimi, o le a pauu ai manunu’a tigaina ai pe uma ai foi o latou ola. E pei lava i latou o le toatele, o e feagai ma luitau ma faaosoosoga o le olaga e aunoa ma se puipuiga o le mulimuli i poloaiga a le Atua, e taialaina e le Agaga Paia. I le lalolagi faigata i ona po nei e toetoe lava ina a latou solia ma le mautinoa tulafono taua, faatasi ai ma taunuuga tiga, ma le faataumaoi. Aua ne’i e “alu na o oe” i lou olaga. E toetoe lava a mautinoa lou pau atu i solitulafono.
E i ai se auala saogalemu e a’ea’e ai i luga o papa. Afai e taumafai se paga fe’a’ei i se a’ega faigata, ona a’e lea o le taitai i se tafa ma faapipii taula pe ta’i futu le va. O lana maea e faamau i le taula i se faamau u’amea. E faamautinoa le saogalemu e se soa e faaigoa o le numera lua, o loo mau lelei i se tulaga mautu. E puipuia le taimua a o sai e le numera lua le maea i le papa, o lona uiga, e faafoeina ma le faaeteete le faasolosolo atu o le maea. O lena faiga e mautinoa ai le puipuiga o le taa’o a’e i luga. Afai ae te’i ua se’e faafuasei, o le a le matuia se pau ona o le taula. E le gata ina puipuia e le numera lua le ta’imua, ae avatu ai foi le faamalosiau, o faamatalaga, ma faailoilo, a’o fesootai atu le tasi i le isi. E saogalemu la la’ua sini, e faaosofia ai le poto masani e ala i le faatoilaloina o se luitau tele. La te faaaogaina auala ma meafaigaluega ua faataitaia ma faamaonia. O meafaigaluega taua e aofia ai se faagutu mautu, o se maea malosi, o ni taula eseese e faapipii i luga o le papa, o se taga pauta e faamau ai le pipii, ma ni seevae mamafa lelei po o ni seevae faapitoa e mafai e se ta’imua ona faaaoga e mau lelei ai i le matāpapa tifato.
Ua uma ona suesue le paga i tulafono ma le faiga o le a’ea’e i luga o papa. Sa la mauaina ni faatonuga mai au fe’a’ei ua i ai le poto masani, ma ua uma ona faata’ita’i ina ia masani i taga sa’o ma le faaaogaina o meafaigaluega. Ua uma ona la fuafuaina se auala ma ua iloa le auala o le a la galulue faatasi ai. A lava le mamao o le a’e a le ta’imua, ma maua se vaega faigofie e lava lona saogalemu, ona sai lea e ia o le maea i se papa a o aveina atu i luga le maea, a’o mulimuli atu le numera lua i le “faatautau” po o le umi o le maea lea na tuu mai. A taunuu atu i le ta’imua, ona toe fai foi lea o le mea lava lea e tasi. E tu le isi ma sai le maea, ae a’e le isi ma faapipii faavava taula pe tusa ma le futu e fai ma puipuiga ne’i te’i ua see faafuasei se isi. E ui ina foliga mai e lamatia ma matautia le a’ea o papa, o nei lapataiga e mautinoa ai le maua o se aafiaga faaosofia, ma e ausia lelei lava i le mulimulita’i i mataupu faavae sa’o.
I le olaga moni, o taula o tulafono ia a le Atua lea e maua ai le puipuiga mai luitau uma o le a oulua feagai. O maea ma faamau u’amea e faamau ai le maea i taula ua faatusa i ai le usiusitai i na poloaiga. Afai e te iloa na poloaiga, ia faaauau ona faata’ita’i i ai, ma fai sau fuafuaga e aloese ai mai tulaga matautia, o le a i ai sau auala mautu e maua ai le puipuiga mai faaosoosoga a Satani. O le a e atiina ae le malosi o lou tagata o le a puipuia ai oe mai soligatulafono. Ne’i te’i ua e faia se mea sese, e le tatau ona i ai ni faafitauli tumau, aua o loo i ai le puipuiga po o se fesoasoani e te maua e ala i lou salamo.
Ia avea le Faaola ma ou “ta’imua” i le olaga. Na Ia fetalai, “O au … o le Papa o le Lagi … ; soo se tasi e ui mai i le faitotoa ma alu ae ia te au, e le pau lava ia.”1 O le Togiola o le a Ia taitai saogalemu oe mai toatuga e sili ona faigata o le olaga. O Ana tulafono o ni taula mausali o le puipuiga, e tuliesea le fefe ma mautinoa ai le manumalo i se lalolagi matautia. O lena ituaiga o olaga, e mautinoa lava lou maua ai o le filemu ma le fiafia.
O le fiafia moni tumau, faatasi ai ma le malosi, lototele, ma le gafatia e faatoilalo ai faigata aupito matautia, o le a oo mai pe a e faatotonugalemuina lou olaga ia Iesu Keriso. O le usiusitai i Ana aoaoga e maua ai le a’ea’ega mautu i le malaga o le olaga. E manaomia ai se taumafaiga. E ui ina leai se faamaoniga o ni taunuuga vavave, ae e i ai le mautinoa, o le a oo mai tali, i le taimi o le Alii, o le a i ai le filemu, ma o le a avea foi le fiafia mou.
O luitau lua te feagai, o aafiaga o le tuputupu a’e lua te fetaia’i, ua faamoemoe o ni vaaiga lē tumau o loo faatino i se olaga o le filemu ma le fiafia faifai pea. O le faanoanoa, o le lototiga, ma le le fiafia, o mea ia e tutupu i le olaga. E le o faamoemoe e avea ma autu o le olaga. Ou te le o ta’u faalaitiitia le faigata e mafai ona oo i ai nisi o nei mea. A oo ina taua tele se lesona e tatau ona e aoaoina, e mafai ona faaopoopo atu tofotofoga mo se taimi umi, peitai e le tatau ona faatagaina e avea ma mea e taulai atu i ai mea uma e te fai. E mafai ma e tatau lava ona matagofie taui o lou olaga. O lou malamalama ma le faaaogaina o tulafono a le Atua, o le a avatu ai le faamoemoega mamalu o lou olaga, a’o e a’e i luga ma faatoilalo faigata o le olaga. O lena vaaiga e taofiofia ai luitau i o latou nofoaga tonu—o laasaga ia e saga tuputupu a’e ai ma ausia.
O loo tulimata’i e le Alii lou tuputupu a’e patino ma lou atiina ae. E faateleina lou alualu i luma pe a e faatagaina ma le naunautai o Ia e taitai oe e ala i aafiaga tuputupu a’e uma lua te fetaia’i, e tusa pe e te taliaina le aafiaga pe leai. Faatuatua i le Alii. Ole atu ina ia taitai oe e le Agaga ina ia e iloa Lona finagalo. Ia e naunau e taliaina. Ona e agavaa ai lea mo le fiafia silisili ma mea aupito sili e ausia mai lenei aafiaga faaletino.
O le filemu ma le fiafia o fua taua ia o se olaga amiotonu. Ua na o le Togiola a Iesu Keriso e mafai ai ona maua. O le a ou faamatalaina atu.
Tatou te faia uma lava mea sese i le olaga. E afua ai ona lepetia tulafono e faavavau. O le faamasinoga tonu o le itu lena o le fuafuaga o le fiafia a le Tama o i le Lagi, e faatumau ai le faatulagaina lelei. E pei o se kalave i se a’e papa, e i ai pea lava. O se uo pe afai e tausisia tulafono e faavavau. E tali atu i lou tiga pe afai e le amanaiaina. O le faamasinoga tonu e faamaonia ai o le a e mauaina faamanuiaga o lou taui ona o le usitai i tulafono a le Atua. O le faamasinoga tonu foi e manaomia, le faamalieina o tulafono uma na lepetia. A e usitai i tulafono a le Atua, e faamanuiaina oe, peitai e leai se togi faaopoopo na maua, e mafai ona faasaoina e faamalie ai le tulafono na e lepetia. Afai e le foiaina, e mafai e tulafono ua lepetia ona afua ai le faanoanoa o le olaga, ma taofia ai oe mai le toe foi atu i le Atua. Na o le soifuaga, o aoaoga, aemaise o le Togiola a Iesu Keriso e mafai ona tatalaina oe mai lenei tulaga faalumaina.
E mafai ona faamalieina le poloaiga o le faamasinoga tonu mo tulafono ua lepetia, e ala i le alofa mutimutivale, lea e maua i lou salamo pea lava pea ma le usitai i poloaiga a le Atua. O lena salamo ma le usiusitai e matua manaomia lava mo le Togiola ina ia faatino atoa ai lana vavega i lou olaga. E mafai e le Togiola ona totogi uma au aitalafu taitasi i le faamasinoga tonu, ma tuuina atu le faamagaloga e ala i le alofa mutimutivale i lou salamo. E ala i le Togiola e mafai ai ona e ola i se lalolagi lea e faamautinoa ai e le faamasinoga tonu faapea o le a tumau pea ia te oe mea sa e ausia ona o lou usiusitai. E ala atu foi i Lona alofa mutimutivale, e mafai ai ona e foia taunuuga o tulafono ua lepetia.
O le Togiola o se aga le manatu faapito o le taunuuga e le i’u, na faataunuuina toatasi ma le faigata tele e le Alo o le Atua. 2 O le Togiola, na motusi ai e le Faaola noataga o le oti. Ua faamaonia ai le faamasinoina o i tatou e le Faaola. E mafai ona puipuia ai se faavavau mai le pulega a le Satani. E tatalaina ai faitotoa i le ola faavavau mo i latou uma ua agavaa mo le mauaina o le faamagaloga e ala i le salamo ma le usiusitai.
I le manatunatu loloto ai i le maoae o le Togiola e mapuna mai ai lagona aupito maoae o le maofa, o le faafetai tele, ma le lotomaulalo loloto. O na uiga e mafai ona e maua ai le uunaiga mamana e tausia Ana poloaiga ma salamo e le aunoa mai mea sese, ma maua ai le filemu ma le fiafia e sili atu.
Ou te talitonu pe o le a lou taumafai ma le maelega, e le mafai i lou mafaufau faaletagata ola ona malamalama atoatoa i le taua faavavau o le Togiola, e le mafai foi ona e malamalama atoatoa, pe faapefea ona ausia. E na ona mafai lava ona tatou talisapaia i se fuataga e aupito itiiti le mea na oo i ai le Faaola i tiga, ma mafatiaga, po o le faigata foi i lo tatou Tama i le Lagi le silasila atu i Lona Alo o feagai ma faigata e le mafaatusalia o Lana Togiola. E ui i lea, e tatau ia te oe, ona e suesue ma le loto faamaoni i le Togiola ina ia malamalama ai i le mea sili e te mafaia. E mafai ona e aoao pe o a mea e manaomia e tausia ai Ana poloaiga, ia olioli ai i le filemu ma le fiafia i le olaga nei. E mafai ona e agavaa, faatasi ma tagata usiusitai o le aiga, e ola faatasi ma Ia ma lou Tama o i le Lagi e faavavau.
Na aoao e Liae lona atalii o Iakopo: “E le mafai ona nonofo tagata faatasi ma le Atua, sei iloga ona o le taui, ma le alofa mutimutivale ma le alofa tunoa o le Mesia Paia.”3
O ia Iesu Keriso le taui e le mafai e se tasi ona maua. Sa avea o Ia ma Atua, o Ieova, a o le’i fanau mai o Ia i Peteleema. E le gata ina tuuina atu ia te Ia e Lona Tama pele Lona tino agaga, ae o Iesu foi o Lona Atalii Pele e Toatasi i le tino. Sa soifua lo tatou Matai i se soifuaga atoatoa e leai se agasala, ma o lea foi na saoloto ai o ia mai poloaiga a le faamasinoga tonu. E atoatoa o Ia i soo se uiga, e aofia ai le alofa, agaalofa, onosai, usiusitai, faamagalo atu, ma le lotomaualalo. O Lona alofa mutimutivale ua totogi ai la tatou aitalafu i le faamasinoga tonu, pe a tatou salamo ma usitai ia te Ia. Tusa lava pe o a lava a tatou taumafaiga aupito sili ina ia usiusitai i Ana aoaoga, o le a tatou sasi lava, ma ona o Lona alofa tunoa, o le a “faaolaina ai i tatou pe a uma ona faia mea uma tatou te mafaia.”4
Ou te molimau atu o puapuaga ma mafatiaga e le mafai ona mafaufauina i le mafaufau i se tau e le mafuatia, na maua ai e le Faaola Lana aia tatau e avea ai ma o tatou Fautua, o lo tatou Togiola, ma lo tatou Faamasino Mulimuli. Ou te iloa o loo soifua o Ia ma e alofa o Ia ia te oe. Ia avea pea lava pea o Ia ma ou “ta’imua” i le olaga. O taula mautu o Ana tulafono o le a mautinoa ai le saogalemu ma le faamanuiaina, a o e a’ea luitau o le a oulua fetaia’i. O le a e pau atu i se solitulafono matuia. O lou olaga, o se olaga o le filemu ma le fiafia, e faapaleina i le faaolataga i le malo selesitila. I le suafa o Iesu Keriso, amene.