O Le Ala Sili o le Fiafia
E pei lava ona manaomia e se i’a le vai, e te moomia le talalelei ma le mafutaga a le Agaga Paia ina ia matuai fiafia moni ai.
A o avea a’u ma se tiakono e pei o le toatele o outou alii talavou, sa alu ai le ma sopo ma lo’u tama i se vaitafe o loo i le mauga e fagota ai ni sesele. A o faamaulu e lo’u tama le maunu i le lave i le pito o lana seleloi fagota, sa ia ta’u mai ia te au, e moomia ona ou faamauina le lave i le gutu o le i’a pe a taumafai e u le maunu, a leai o le a sola ese. Ou te le’i malamalama i le uiga o le faamau o le lave, o lea na ia faamatalaina mai ai ia te au faapea, e moomia ona matuai mau lelei le lave i le gutu o le i’a pe a u le maunu ina ia le mafai ai ona ia faamamulueseina le lave, ma o le a matuai mau lava le lave pe afai e vave ona ou tosoina ese le ofe pe a taumafai le i’a e u le maunu. Ua ou manao nei e pu’e se i’a, o lea sa ou tu ai i augutu o le vai ua matuai saunia lelei, o musele uma ua tetete, e faatalitali le minoi o le pito o le ofe lea e faailoa mai ai le taumafai o le i’a e u le maunu. Ina ua mavae ni nai minute, sa ou matauina le gaoioi o le pito o la’u ofe, o le taimi lava lena, na ou tataeseina mai ai le ofe ma lo’u malosi atoa, ma faamoemoe i se fetauiga tele ma le i’a. O le mea na ou ofo ai, sa ou vaaia lenei sesele— ma le lave ua matuai mau lelei i lona gutu—o lele ese mai le vai i luga a’e o lo’u ulu, ma pa’u atu i luga o le pa’umatu ma fiti solo i o’u tua.
E lua mea na ou matauina mai lena aafiaga: Muamua, e matuai pagatia lava se i’a e le o i totonu o le vai. E ui o ona fuilauvi, apaapa, ma le siusiu e lelei tele i totonu o le vai, ae leai ma se aoga i luga o le laueleele. Lona lua, o le i’a le laki lea na ou mauaina i lena aso na fano ona sa vaavaai i se mea e foliga mai e aoga ae matuai matautia lava— e mate ai—pe faamaonia foi le na ona vaavaai lava i ai pe na o sina tofo i ai.
O’u uso pele o le Perisitua Arona, e i ai ni lesona se lua e aoaoina mai lenei mea: Muamua, o se faamoemoega autu o lou olaga, e pei ona aoao mai Liae, o le “maua lea o le olioli” (2 Nifae 2:25). Ina ia maua le olioli, e moomia ona e malamalama, i le avea ai ma se atalii o lou Tama Faalelagi, ua e mauaina uiga faalelagi ma manaoga faaleagaga—ma e pei lava ona manaomia e se i’a le vai, e te moomia le talalelei ma le mafutaga a le Agaga Paia ina ia matuai fiafia moni ai. Talu ai ona o oe o se atalii o le Atua (tagai Galuega 17:28), o lea e le fetaui ai i lou natura faavavau ona faia mea sese ma lagonaina le sao. E le mafai ona faia. O se vaega o lou DNA faaleagaga, e pei ona sa i ai, o lena filemu, olioli, ma le fiafia o le a avea ma oe pe afai lea e te ola i le talalelei.
A faatusatusa i ai, afai e te filifili e te le ola i le talalelei, o le a e matuai faanoanoa lava e pei o se i’a e le o i totonu o le vai (tagai Mosaea 4:30). E pei ona fai atu o Alema i lona atalii o Korianetona:
“Faauta, ou te fai atu ia te oe, o le amioleaga e le o le fiafia lea.
“O lenei foi, lo’u atalii e, o tagata uma … ua faaletino, … ua aunoa i latou ma le Atua i le lalolagi, ua o ese foi i latou ai mea a le Atua; o le mea lea, ua i ai i latou i le tofi e le i ai se fiafia” (Alema 41:10–11).
Ia matau o le aunoa ma le Atua i le lalolagi—i nisi upu, o le musu e ola i Lana talalelei ma o lea e le maua ai le mafutaga a le Agaga—o le i ai lea i se tulaga e ese mai nai lo le natura o le fiafia. O le talalelei a Iesu Keriso o le mea moni lava o le—ia matauina e segila le upu lenei, o lona uiga e na o le—“ala sili o le fiafia” (Alema 42:8). Afai e te filifili se isi lava ala o le olaga, po o le taumafai e ola na o ni vaega o le talalelei lea e foliga mai e faigofie, o se filifiliga o le a matuai faaseseina ai lava oe, mai le atoatoaga o le olioli ma le fiafia mamalu lea na fuafuaina ai oe e lou Tama oi le Lagi ma Lona Alo.
O le lesona lona lua mai lo’u aafiaga i le fagotaga: e pei lava ona tatau i se i’a i se vai i le mauga le tatau ona faaeteete i mailei o loo tuuina i lona ala ina ia aloese ai mai le tosoeseina mai le vai, e tatau foi ia te oe ma a’u ona ta atamamai ina ia aloese ai mai le tosoeseina mai se olaga fiafia e faaautuina i le talalelei. Ia manatua lena mea, e pei ona matauina e Liae, o loo saili le tiapolo “ina ia malaia tagata uma e pei o ia lava” ma maua “le mana e toso ifo” ai i tatou (2 Nifae 2:27, 29) pe a tatou faa-aafia i tatou lava i mea e le mama ma leaga. O lea, aua ne’i faaseseina outou e oo lava i le tofo i ni mea e le mama, aua ua saunia Satani e faamau le lave. O le tulaga matautia lea o le lave ua saunia ma le atamai pe faafuaseia lea na faailoa ma lapatai mai ai le perofeta anamua o Moronae—o le na vaaitino lava i o tatou aso (tagai Mamona 8:35)—ia te outou ma au ia “aua le papa’i atu i le mea alofa leaga, po o le mea ua le mama” (Moronae 10:30; ua faatusilima mea e faamamafa).
E tele naua mea leaga ma le eleelea o loo i ai i musika, o le Initoneti, tifaga, mekasini, ava malosi, ma fualaau faasaina, ma le tapaa. E pei ona i ai i soo se mea e leaga ma le mama, au uo talavou e, aua ne’i outou papa’i atu i ai! O le taufaasese i mea faapena e pei o se lave ua saunia ma le atamai ma le matuai faafuaseia lava nai lo le mea tou te lei mafaufauina—ma e mafai ona avea ma se faiga e sili ona matuitui ma tiga le aveeseina o le lave. Na faamatalaina e Alema e faapea, o le faagasologa o le salamo ia te ia sa “tali oo i le oti” (Mosaea 27:28); e moni lava, na ia ta’ua e faapea “e leai se mea e [mafai ona] silisili ma oona e tusa ma o’u tiga” (Alema 36:21).
Atonu e i ai nisi o outou o e ua aafia i mea e leaga ma le eleelea. Ia maua le faamoemoe i le aoaoga ma le mea moni na tupu e faapea, o le faatuatua o Alema i le Alii na taitaiina ai o ia i le salamo, ma o se taunuuga o lona salamo sa ia maua ai se fiafia faapea e ala i le mana o le Togiola a Keriso, e pei o ana upu, “e le mafai ona silisili ma malie se tasi mea e tusa ma lo’u olioli” (Alema 36:21). O le a faapena ou aafiaga a o e saili i le Alii e ala i le salamo.
E moomia ona tatou salamo uma. Ina ia salamo o lona uiga o le faia lea o ni suiga moni i lou olaga e finagalo le Faaola e te faia mo lou fiafia. O le salamo o le mataupu faavae sili lea o le talalelei: afai o lou faatuatua i le Alii e faatupuina ai ni suiga patino, o na suiga ia te oe, e pei ona fai mai Helamana, “ua ala mai ia te [oe] le mana o le Togiola, e iu i le faaolaina o [outou] agaga” (Helamana 5:11). A o e saili ina ia suia, ia manatua o lo tatou Faaola, e pei ona fai mai Alema, o loo i ai “mana uma e faaola ai tagata uma o e faatuatua i lona suafa ma fua mai i galuega e tatau ma le salamo” (Alema 12:15). O se aoaoga faavae mamana, aoga, ma faamoemoeina lenei!
Na aoaoina e le Perofeta o Iosefa Samita mai se aafiaga patino na oo i ai e faapea, e faamoemoe le Alii ina ia tatou aloese mai faigata e ala lea i le ola ai i Lana talalelei ma e finagalo ina ia tatou malamalama e mafai ona tatou salamo. Ina ua leiloloa ia te ia itulau e 116 o le tusiga o le faaliliuga o le Tusi a Mamona e ala lea i le gauai atu i faatosinaga a tagata, sa faanoanoa Iosefa. Na tau atu e le Alii ia te ia: “Na tatau ona e faamaoni; semanu ua faaloaloa atu e le [Atua] lona aao ma tausia oe mai u fanafana mu a le fili; ma semanu ua faatasi o ia ma oe i taimi faigata uma” (MFF 3:8). E faapena le tulaga mo outou uma alii talavou: ia faamaoni, ma o le a lagolagoina oe e le aao o le Atua. Ona faamanatu atu lea i le Perofeta e faapea—e pei o i tatou taitoatasi—e faamagaloina o ia pe afai na te salamo. Mafaufau i le olioli sa ia lagonaina ina ua fetalai atu le Alii, “A e manatua, e alofa mutimutivale le Atua; o le mea lea, ia salamo ai i lena mea ua e faia ua le tusa ma le poloaiga lea na ou tuuina atu ia te oe, ma ua filifilia pea oe” (MFF 3:10).
O la’u valaaulia ia te outou i le afiafi nei ia ola i le talalelei ina ia fiafia moni ai, aloese mai le tiapolo ma mea leaga na te aumaia, ma afai ua e aafia i le tiapolo po o se mea e le mama, ia faia suiga o loo finagalo le Alii e te faia mo lo oe lava fiafia—ma e ou te molimau atu o le a Ia faamalosia oe ina ia faamanuiaina e ala i lona mana e le mafaatusalia.
A o e taliaina lenei valaaulia, o le a e seleseleina le fiafia tumau ma fausia le faavae o lou olaga i luga “o le papa o lo tatou Togiola,” ma a oo mai ave a le tiapolo ma osofaia oe e matagi o le olaga, e pei ona aoao mai Helamana, o le a “le mafai e le tiapolo ona toso ifo ai oe i le vanu o le puapuaga ma le auega e le gata, ona o le Papa ua atiina ae ai oulua, o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou” (Helamana 5:12; ua faatusilima mea e faamamafa). E tuuina atu la’u molimau maelega i le Alii o Iesu Keriso: o Ia o le Papa, le faavae mautu e tasi mo le fiafia ma le faamaloloina. O loo soifua o Ia, o loo i ai le mana uma i le lagi ma le lalolagi, silafiaina lou igoa, ma e alofa o Ia ia te oe. I le suafa paia o le Alii o Iesu Keriso, amene.