Le Faavae Malosi
E mafai ona tatou faamalolosia o tatou faavae o le faatuatua, o a tatou molimau o le upumoni, ina ia tatou le tautevateva, ma o le a tatou le toilalo lava.
O’u uso e ma tuafafine pele, e le gata i e o loo ou vaai atu i ai ae faapea e o faapotopoto i le lalolagi atoa, ou te talosagaina lo outou faatuatua ma tatalo a o o’u tali atu i le tofiga ma le avanoa e lauga atu ai ia te outou.
I le 1959, e lei leva lena talu ona amata la’u galuega o se peresitene o le Misiona a Kanata, sa faauluulu i Toronto, Ontario, Kanata, sa ou feiloai atu ai ia N. Eldon Tanner, o se Kanata lauiloa o le sa valaauina mulimuli ane i ni nai masina e avea ma se Fesoasoani i le Korama a Aposetolo e Toasefululua, ona sosoo ai lea ma le Korama a le Toasefululua, ona sosoo ai foi lea ma le avea ma se fesoasoani i Peresitene e toafa o le Ekalesia.
I le taimi na ou feiloai atu ai ia te ia, sa avea Peresitene Tanner ma peresitene o le kamupani tele a le Trans-Canada Pipelines, Ltd., ma o le peresitene o le Siteki a Kanata i Calgary. I le gasologa o lena uluai feiloaiga, sa ma talanoaina ai, faatasi ai ma nisi o mataupu, le malulu o taumalulu o Kanata, o fea e oso mai ai afa, o le tau e mafai ona oo i lalo o le mea e gata ai le malulu mo ni vaiaso i nisi taimi, ma vaega e sili atu ai ona maualalalo fua o le malulu pe a agi mai matagi aisa. Sa ou fesili ia Peresitene Tanner pe aisea e malolosi ai pea auala ma alatetele i Kanata i sisifo i le taimi o taumalulu faapena, e tau leai pe leai foi ni foliga vaaia o ni ta’eta’ei pe motusia, ae o luga o auala i le tele o eria e le malulu tele, e i ai ta’etama motusia, faapea ma omoomo.
Fai mai a ia, “O le tali o loo i le loloto o le pito i lalo o mea o loo faaaogaina e ta ai. Ina ia mafai ona tumau malosi ma lē faaleagaina, e moomia ona matuai faaloloto i lalo le faavae. Afai e le loloto le faavae, e le mafai e le pito i luga ona tatalia le maatiati o le tau.”
I le gasologa o tausaga e masani ai ona ou mafaufau i lenei talanoaga ma le faamalamalamaga a Peresitene Tanner, aua ua ou iloaina i ana upu se faatatauga taua mo o tatou olaga. I se faaupuga faigofie, afai e le loloto se faavae o lo tatou faatuatua ma se molimau mausali o le upumoni, e mafai ona faigata ia i tatou ona tatalia ia afa malolosi ma le matagi aisa a le tiapolo lea e faamoemoe e oo mai ia i tatou taitoatasi.
O le olaga faaletino o se taimi e suesueina ai, o se taimi e faamaonia ai lo tatou agavaa e toe foi atu i le afioaga o lo tatou Tama Faalelagi. Ina ia suesueina i tatou, e ao ona tatou feagai ma luitau ma faigata. E mafai e nei mea ona faatoilaloina i tatou, ma e mafai ona mafatia ai o tatou agaga—pe afai o le faavae o lo tatou faatuatua, o a tatou molimau o le upumoni e le o matuai loloto ma mautu i totonu o i tatou.
E mafai ona tatou faalagolago i le faatuatua ma molimau a isi mo sina taimi. Ae o le taunuuga, e ao lava ona i ai so tatou lava faavae malosi ma le loloto ua faataatia, a leai o le a le mafai ona tatou tatalia ia afa o le olaga, ia o le a oo mai. O ia afa e foliga eseese uma. E mafai ona tatou feagai ma le faanoanoa ma le loto nutimomoia ona o se tamaitiiti ua silisili le faalogogata ua liliuese mai le ala e tau atu i le upumoni faavavau, ma ui atu i ala maseesee o mea sese ma le tiga. E mafai ona taia i tatou po o e pele i ma’i, e oo mai ai mafatiaga ae o nisi taimi o le oti. O faalavelave e mafai ona i ai ni o latou faailoga matautia e manatuaina pe faaumatia ai foi lava le ola. E oo mai le oti i e ua loa le soifua a o latou savavali i vae tautevateva. E oo mai foi le oti ia i latou o e lei ausia le afa o le faigamalaga i le olaga, ma e masani foi ona faafilemuina le talie a fanau laiti.
E i ai taimi e foliga mai ai ua leai se mutaaga i o tatou faafitauli. Tatou te lagonaina le siomia o i tatou e tiga o le loto nutimomoia, o le faanoanoa, o miti ua le taulau, ma le lotovaivai i faamoemoega ua le tini. Tatou te aufaatasi i le olega faatusi paia, “E leai ea ni pulu pasama i Kiliata?” (Ieremia 8:22). Tatou te matele e vaai atu i o tatou lava faigata i se tulaga e foliga mai ua sili atu le leaga nai lo le mea o loo i ai. Tatou te lagona le tuulafoaiina, loto nutimomoia, ma le tuuatoatasi.
E mafai faapefea ona tatou fausia se faavae e lava le malosi e tatalia ai tulaga le manuia faapena o le olaga? E mafai faapefea ona tatou tausisia le faatuatua ma le molimau lea o le a moomia, ina ia mafai ona tatou iloaina ai le olioli ua folafolaina mai i e faamaoni? E moomia taumafaiga faifai pea ma le mautu. O le toatele o i tatou ua iloaina le malosi o musumusuga lea e oo mai ai loimata i o tatou mata ma se naunautaiga ina ia tumau pea i le faamaoni. Ua ou faalogo i le faamatalaga, “Afai e mafai ona ou teuina pea nei lagona ia te au e le aunoa, o le a leai lava se faigata ia te au o le faia o le mea e tatau ona ou faia.” Ae peitai, o lagona faapena, e mafai ona i ai mo sina taimi. O musumusuga tatou te lagonaina i nei sauniga o konafesi e mafai ona mou atu ma galo, a o fotuai mai le Aso Gafua ma tatou feagai ma galuega, aoga, ma le vaaia o o tatou fale ma aiga e pei ona masani ai. O mea faapena e mafai ona faigofie ona aveeseina ai o tatou mafaufau mai mea e paia i mea faalelalolagi, mai mea e faamalamalamaina ai i tatou i mea o le a ‘ati’ati malie ese ai lava a tatou molimau, o o tatou faavae malolosi, pe afai tatou te faatagaina.
E moni tatou te le o ola i se lalolagi e le na o le faaleagaga e oo i ai, ae e mafai ona tatou faamalolosia o tatou faavae o le faatuatua, o a tatou molimau o le upumoni, ina ia tatou le tautevateva, ma o le a tatou le toilalo lava. Ae, e mafai ona e fesili ifo, pe mafai ona tatou mauaina ma faatumauina le lelei o le faavae e moomia ina ia faasaoina ai faaleagaga i le lalolagi o loo tatou ola ai?
Ou te fia tuuina atu ni taiala se tolu e fesoasoani ai ia i tatou i la tatou taumafaiga.
Muamua, faamalosi lou faavae e ala i le tatalo. “O le tatalo o moomooga moni o le agaga, e memumemu pe le faaleoina” (Tatalo o Moomooga Moni o le Agaga,” Viiga, un. 80).
Pe a tatou tatalo, ia tatou matuai fesootai moni atu i lo tatou Tama o i le Lagi. E faigofie ona avea a tatou tatalo ma upu e tautu i ai, o le faaleoina lea o upu e tau leai po o le leai foi o se mafaufau o i ai. Afai tatou te manatua o i tatou uma o se atalii po o se afafine agaga o le Atua, o le a tatou iloaina e le faigata ona tatou faalatalata atu ia te Ia i le tatalo. Na te silafia i tatou; e finagalo o Ia mo le mea sili ona lelei mo i tatou. Ia tatou tatalo ma le faamaoni ma ia i ai le uiga, ia tuu atu a tatou faafetai ma ole atu mo mea na tatou te manaomia. Ia tatou faalogo mo Ana tali, ina ia mafai ona tatou iloaina pe a oo mai. A tatou faia, o le a faamalolosia ma faamanuiaina i tatou. O le a tatou iloaina ai o Ia ma Ona moomooga mo o tatou olaga. O le iloaina o Ia, o le faatuatuaina o Lona finagalo, o le a faamalolosia ai faavae o lo tatou faatuatua. Afai e i ai se tasi o i tatou o loo faatuai ona gauai atu i le fautuaga ina ia tatalo e le aunoa, e leai se isi itula sili ona lelei e amata ai nai lo le taimi nei. Na faailoa mai e William Cowper, “E tetemu Satani pe a ia vaai atu i le tagata aupito vaivai o le au paia o i ona tulivae.” (in William Neil, comp., Concise Dictionary of Religious Quotations [1974], 144).
Aua nei o tatou tuulafoaia a tatou tatalo faaleaiga. O se puipuiga lelei lea mai le agasala, ma o se auala sili lea e maua ai le olioli ma le fiafia. E sa’o lava le faaupuga anamua: “O le aiga e tatalo faatasi e mafuta faatasi foi.” O le tuuina atu o se faataitaiga o le tatalo i a tatou fanau, o le a tatou fesoasoani ai foi ia i latou ina ia amataina o latou lava faavae loloto o le faatuatua ma molimau, lea o le a latou moomia i o latou olaga atoa.
O la’u taiala lona lua: Ia tatou suesueina ia tusitusiga paia ma “mafaufau i ai i le ao atoa ma le po,” e pei ona fautua mai ai le Alii i le tusi a Iosua (Iosua 1:8).
I le 2005, e fia selau afe le Au Paia o Aso e Gata Ai na taliaina le luitau a Peresitene Gordon B. Hinckley ina ia faitauina le Tusi a Mamona a o lei oo i le faaiuga o le tausaga. Ou te talitonu o Tesema 2005 na faatuina ai se matatia i le olaga atoa mo itula na tuuina atu ina ia ausia ai le luitau i le taimi atofaina. Sa faamanuiaina i tatou ina ua tatou faamaeaina le galuega; sa faamalolosia a tatou molimau, faateleina lo tatou malamalama. Ou te uunaia i tatou uma ina ia faaauau pea ona faitau ma suesueina ia tusitusiga paia, ina ia mafai ona tatou malamalama i ai ma faaaogaina i o tatou olaga lesona tatou te mauaina ai iina. Ou te toe faaupuina atu le solo a le tusisolo o James Phinney Baxter:
O le e aoao ma aoao ae le malamalama lava
E pei o le tagata e suotosina ma suotosina ae leai lava se seleselega.
(“The Baxter Collection,” Baxter Memorial Library, Gorham, Maine)
O le faaaluina o le taimi i aso taitasi i le suesueina o tusitusiga paia, o le a le masalomia le faamalolosia ai o faavae o lo tatou faatuatua ma molimau o le upumoni.
Tatou toe manatua faatasi le olioli na oo ia Alema a o ia malaga mai le nuu o Kiteona i le itu i saute i le nuu o Maneti ma feiloai ai ma atalii o Mosaea. Ua fai si leva e lei toe feiloai Alema ma i latou, ma sa matuai sili atu lona fiafia ina ua ia iloaina, o loo avea pea “i latou ma ona uso i la le Atua; ioe, ma ua tutupu malolosi i latou i le malamalama o le upu moni; aua o i latou o tagata mafaufau lelei, ma ua latou suesueina tusi paia ma le filifiliga, ina ia latou iloa ai le afioga a le Atua” (Alema 17:1–2).
Ia mafai foi ona tatou iloa le afioga a le Atua ma taitaia ai o tatou olaga e tusa ai.
O la’u taiala lona tolu mo le fausia o se faavae malosi o le faatuatua ma le molimau e aafia ai le auaunaga.
A o ou sau i la’u taavale i le ofisa i se tasi taeao, sa ou pasia se fale ta lavalava o loo i ai se faailoilo i luga o le faamalama. E faitauina, “O Le Galuega e Taulia.” O le savali a lea faailoilo sa le mafai ona alu ese ma lo’u mafaufau. E lei pine ae ou iloaina le mafuaaga. O le mea moni lava o le galuega e taulia—o le galuega a le Alii.
I le Tusi a Mamona tatou te faitau ai i le Tupu mamalu o Peniamina. I le lotomaulalo moni o se taitai musuia, na ia toe manatua ai lona manao e auauna atu i lona nuu ma taitai i latou i ala o le amiotonu. Na ia folafola atu ai ia i latou:
“Faauta, ou te fai atu ia te outou, ona ua ou fai atu ia te outou ua ou faaaogaina o’u aso i le auauna atu ia te outou, ou te le fia mitamita ai, aua ua na ona ou i ai i le galuega a le Atua.
“Faauta foi, ou te fai atu nei mea ia te outou ina ia outou aoao i le poto, ina ia outou iloa lenei mea, pe a i ai outou i le galuega a o outou uso, ua na ona i ai outou i le galuega a le Atua” (Mosaea 2:16–17).
O le galuega lenei e taulia, le galuega ua valaauina ai i tatou uma: le galuega a le Alii o Iesu Keriso.
I lau savaliga i le ala o le olaga o le a e matauina ai e le na o oe le tagata malaga. O loo i ai nisi latou te manaomia lau fesoasoani. O loo i ai vae ua tautevateva, o lima e ao ona uu mai, o mafaufau ia faamalolosia, o loto ua musuia ma agaga ia lavea’ia.
I le sefulutolu tausaga talu ai sa ou maua ai le avanoa e tuu atu ai se faamanuiaga i se tamaitai talavou lalelei e 12 tausaga le matua, o Jami Palmer. E lei leva ona maua o ia i le kanesa ma sa fefe ma lē mautonu. Sa fai sona taotoga ma sa mafatia i ni togafitiga matuitui. O le taimi nei ua leai se kanesa mai ia te ia, ma o se tamaitai fiafia, ma le lalelei ua 26 tausaga le matua o le ua ausia le tele o mea i le olaga. I se taimi ua mavae, sa ou iloaina ai i ona taimi tiga, pe a foliga mai ua leai se faamoemoe i le lumanai, sa ia iloaina ai o lona vae sa i ai le kanesa o le a moomia ni taotoga se tele. O se savaliga sopo ua leva ona fuafuaina faatasi ma lana vasega a Tamaitai Talavou i luga o le auala i le Ana o Timpanogos—e i luga o Mauga o le Wasatch pe tusa ma le 40 maila i saute o le Aai o Sate Leki, Iuta—sa le fesiligia, o lona mafaufau lea. Sa ta’u atu e Jami i ana uo o le a alu le latou sopo e aunoa ma ia. Ou te mautinoa sa pei e gau lona leo ma sa faanoanoa lona loto. Ae peitai sa tali faamalosi atu isi tamaitai talavou, “E leai, Jami, matou te o faatasi ma oe!”
“Ae le mafai ona ou savali,” o lana tali atu lea ma le tiga.
“O lona uiga la, Jami, o le a matou fafaina oe i luga!” Ma sa latou faia lava.
O le taimi nei, o le sopo ua avea ma mea e manatuaina, ae o le mea moni lava ia e sili atu. Na faailoa mai e James Barrie, le tusisolo Sikotilani: “Ua tuu mai e le Atua ia i tatou mea e manatuaina, ina ia tatou maua ni rosa o Iuni i Tesema o o tatou olaga” (paraphrasing James Barrie, in Laurence J. Peter, comp., Peter’s Quotations: Ideas for Our Time [1977], 335). E leai se tasi o na tamaitai talavou peleina o le a faagaloina lena aso galo gata ina ua silasila ifo ai se Tama Faalelagi alofa ma soisoi ifo ma le fiafia ma le faamalieina o lona finagalo i lena mea.
A o Ia valaauina i tatou i Lana galuega, ua Ia valaaulia i tatou ina ia faalatalata atu ia te Ia, ma e tatou te lagonaina Lona agaga i o tatou olaga.
A o tatou faatuina se faavae mautu mo o tatou olaga, ia tatou manatuaina taitoatasi Lana folafolaga taua:
Ia aua le fefe ou te i ai ia te oe,
O A’u lou Atua e fesoasoani pea.Ou te faamalosi ma faamanuia oe,
I lou aao ua amiotonu, mamana naua.
(“Le Faavae Malosi,” Viiga, nu. 45)
Talosia ia agavaa i tatou taitoatasi mo lenei faamanuiaga, ou te tatalo faamaualalo atu ai, i le suafa o Iesu Keriso, amene.