O Loo Soifua Maloloina Pea ia Peresitene Hinckley ma le Ekalesia
I le gasologa o le Lona 176 o Konafesi Aoao Faaleafatausaga, na lipotia mai ai e Peresitene Gordon B. Hinckley e faapea o loo soifua maloloina lelei lava le Ekalesia e faapena foi o ia.
“Ou te lagona lava le malosi,” na saunoa ai le perofeta ua 96 tausaga le matua. “O loo lelei lava lo’u ola maloloina.”
Na sii mai e Peresitene Hinckley le faamatalaga a ana fomai e tusa ai ma lona toe manuia mai le taotoga ia Ianuari ma isi togafitiga na sosoo mai ai, o se “vavega.” A oo atu i le amataga o Novema, o le a avea ai Peresitene Hinckley ma Peresitene sili ona matua i le talafaasolopito o le Ekalesia toefuataiina. Na maliu Peresitene Tavita O. MaKei (1873–1970) i le matua e 96 tausaga ma aso e 132. Na faamanatuina le lona 96 o tausaga o le soifua o Peresitene Hinckley i le aso 23 o Iuni.
E silia ma le 100,000 tagata sa auai i sauniga o le konafesi i le Maota Autu o Konafesi i le Aai o Sate Leki, ma le fia miliona sa maimoaina i le lalolagi atoa. Sa faaliliuina lauga o le konafesi i gagana e 85, faatasi ai ma le gagana Take lea e aupito lata mai lona faaopoopo i ai.
I le sauniga i le taeao o le Aso Toonai, na lipotia mai ai e Peresitene Hinckley le alualu i luma o le Ekalesia. “E mafai ona ou lipotiina atu faapea ua matua faamanuiaina lava e le Alii Lana Ekalesia,” na saunoa ai Peresitene Hinckley. “O lo tatou tiute o le faia o mea uma tatou te mafaia e tulei ai i luma.”
O malumalu lona 123 ma le 124 o le Ekalesia sa faapaiaina talu ai nei i Sacramento, Kalefonia, ma Helsinki, Finelani. Na faailoa mai e Peresitene Hinckley e faapea ua umia nei e le Ekalesia ia satelite e 6,066 o loo mauaina i atunuu e 83, e faatusatusa i le na o le 300 i le 1982.
Na faamatala mai foi e Peresitene Hinckley e faapea o le Tapeneko i Sate Leki, le fale o loo i le Lotoa o le Malumalu lea sa masani ona faaaoga e le Aufaipese a le Tapeneko mo faasalalauga faalevaiaso o le Musika ma le Afioga Tulei, o loo faafouina nei. O le a toe tatalaina le fale i le tautotogo o le 2007, o lana faamatalaga lea. Sa faasalalau mai le aufaipese mai le Maota Autu o Konafesi i le taimi o galuega toe faaleleia.
I le gasologa o le sauniga i le afiafi o le Aso Toonai, na faamaloloina ai uso e toavalu o le Korama Lona Lua a Fitugafulu mai le auaunaga o le avea ma ni Pulega Aoao o le Ekalesia. O i latou na faamaloloina o Elder Ronald T. Halverson, Elder Dale E. Miller, Elder H. Bryan Richards, Elder Donald L. Staheli, Elder David R. Stone, Elder H. Bruce Stucki, Elder Robert J. Whetten, ma Elder Richard H. Winkel.
E faaopoopo atu i ai, o Erich W. Kopischke, 49, o Frankfurt, Siamani, na valaauina o se Fitugafulu Eria. E toatolu Fitugafulu Eria sa faamalolo mai foi i le Aso Toonai: o Elder Cesar A. S. Milder, Elder Hyae-Kee Min, ma Masayuki Nakano.
O le tausaga e 2006 e faailoga ai le 150 o tausaga talu ona taunuu atu ia paionia ma taavaletoso i le Vanu o Sate Leki.
“O lo latou faatuatua o lo tatou tupuaga lea,” na saunoa ai Peresitene Hinckley e uiga i paionia. “O lo latou faatuatua o se faamanatu lea mo i tatou, o le tau sa latou totogiina mo le taugamalie ua tatou sapi ai nei.” I le faaiuga na ia saunoa ai: “I … lenei galuega tele, o le faatuatua faateleina o le mea lea ua sili ona tatou manaomia. A leai lena faatuatua, o le a to’a le galuega. A i ai le faatuatua, e leai se tasi e mafai ona ia taofia le alualu i luma [o le Ekalesia].”