O Se ‘Olo ma se Sulufaiga
Tatou te talanoa i le Ekalesia i le avea ai ma o tatou ‘olo ma o tatou sulufaiga. O loo i ai le saogalemu ma le puipuiga i totonu o le Ekalesia.
I le aso 26 Iulai, 1847, o le tolu ai lea o o latou aso i le vanu (o le aso lona lua o le Aso Sa lea), sa feaei atu ai Polika Iaga, ma uso o le Toasefululua ma isi, i se tumutumu mauga pe tusa ma le tasi ma le afa maila mai le mea o loo ou tu ai nei. Sa latou manatu o se nofoaga lelei lea e faatu ai se tagavai mo atunuu. Sa fusi le ao o Heber C. Kimball i se ieie samasama. Sa latou nonoaina i le tootoo o Uiliata Risati ma talotalo maualuga, o se tagavai mo atunuu. Sa faaigoa e Polika Iaga lea tumutumu o le Tumutumu o le Tagavai.1
Ona latou o ifo lea i a latou taavale solofanua malepelepe, na o ni nai mea na latou tauaveina i le 2,000 maila, faapea i latou na mulimuli mai ia i latou ua mafatia ma vaivai. E le o mea na latou umiaina na latou maua ai le malosi ae o le mea na latou iloa.
Sa latou iloa o i latou o Aposetolo a le Alii o Iesu Keriso. Sa latou iloa o le perisitua na auina mai e avefeau mai le lagi. Sa latou iloa sa ia i latou ia poloaiga ma feagaiga e tuuina atu ai le avanoa mo le faaolataga e faavavau ma le faaeaga mo tagata uma. Sa latou mautinoa sa ia i latou musumusuga a le Agaga Paia.
Sa latou gaoioi e suotosina ia togalaau, faatutu ia malutaga e tatali ai le malulu e le o toe mamao ae oo mai. Sa latou tapena mo isi o loo i luga o le ala, o loo mulimuli mai ia i latou i lenei nofoaga fou e faapotopoto ai.
O se faaaliga, na tusia i le iva tausaga na muamua atu, na poloaiina ai i latou e “tutulai ia ma susulu atu, ina ia faia lo outou malamalama ma tagavai mo atunuu;
“Ina ia faia foi ma ‘olo, ma sulufaiga mai le afa, ma le ita pe a liligi ifo e le faafefiloia i le lalolagi atoa, le faapotopotoina faatasi i le laueleele o Siona, ma ona siteki” (MFF 115:5–6).
E ao ona avea i latou ma “malamalama,” ma “tagavai.”
O le tagavai, na faatuina e ala i faaaliga, o loo aofia i totonu o tusitusiga paia e oo i aoaoga autu o le talalelei a Iesu Keriso. O mataupu faavae o le olaga faaletalalelei tatou te mulimuli ai e faavae i aoaoga autu, ma o faatulagaga e o faatasi ma mataupu faavae. Ua noatia i tatou i faatulagaga e ala i feagaiga, e pei ona tuuina mai e ala i sauniga o le talalelei e i latou ua mauaina le perisitua ma ki o le pule.
O na Uso faamaoni sa lei saoloto, ma e tatou te le o saoloto foi, e fesuiai faatulagaga pe le amanaiaina. E ao ona tatou ola ai.
E le o se fofo po o se tulaga lelei le na ona faapea ane e le afaina. Ua tatou iloa uma e aoga, aua o tagata uma ua “lava le aoaoina ua latou iloa ai le lelei ma le leaga” (2 Nifae 2:5).
Afai o loo tatou faia le mea sili tatou te mafai, e le tatau ona tatou lotovaivai ai. Afai tatou te toilalo a o tatou faatinoina, pe tautevateva, lea e mafai ona tatou oo i ai, e i ai pea lava le vaifofo o le salamo ma le faamagaloga.
E ao ona tatou aoao a tatou fanau i le tagavai o amioga, o le aloese mai soo se ituaiga o amioga le mama. O mana taua o loo i totonu o o latou tino faaletino “ua na o le va lava o le alii ma le tamaitai ua faaipoipoina faaletulafono, o se tane ma le ava e tatau ona faaaogaina ai.”2 E tatau ona tatou faamaoni atoatoa i le faaipoipoga.
E ao ona tatou tausia le tulafono o le sefuluai. Tatou te auai atu i o tatou tiutetauave i le Ekalesia. Tatou te faapotopoto i vaiaso taitasi mo le sauniga faamanatuga e faafouina ai a tatou feagaiga ma maua ai folafolaga o loo i totonu o na tatalo faigofie ma le paia o le areto ma le vai. E ao ona tatou faamamalu i le perisitua ma ia usiusitai i feagaiga ma sauniga.
O na Uso i luga o le Tumutumu o le Tagavai sa iloa e ao ona latou ola i ni olaga e masani ai ma ia faatumauina foliga o Keriso i o latou mata (tagai Alema 5:14).
Sa latou malamalama o siteki e ao ona avea ma ‘olo ma se sulufaiga, ae o le taimi lena e leai ma se siteki e tasi i luga o le fogaeleele. Sa latou iloaina o la latou misiona o le faavaeina lea o siteki o Siona i atunuu uma o le lalolagi.
Atonu sa latou tau manatunatu po o le a le ituaiga ita po o le afa lea e mafai ona liligi ifo ae latou te le iloaina. Sa latou onosaia ia faigata matuitui, o sauaga, ma faiga faatupu faalavelave. Sa susunuina o latou fale, ma ave faamalosi o latou fanua. Sa tutuliesea i latou mai o latou fale mai lea taimi i lea taimi. Sa latou iloaina ai iina, e pei ona tatou iloa nei, e leai se mutaaga o faigata. O lona natura e suia, ae le mafai ona muta. O le a leai se mutaaga i ituaiga luitau na feagai ma uluai Au Paia. O le a i ai luitau fou e tulai mai, ae mautinoa lava e le itiiti ifo, nai lo luitau ia na latou sao mai ai.
O lenei ua faitau afe siteki o Siona ma ua i ai i le lalolagi atoa. Ua faitau miliona tagata o le ekalesia, ma o loo faatupulaia pea. E leai ma se tasi o nei mea e mafai ona taofiofia, aua o le galuega lenei a le Alii. O lenei ua i ai tagata o le ekalesia i atunuu e 160 ma e tautatala i gagana e silia ma le 200.
E i ai nisi o le ekalesia o loo ola ma le fefefe e le mafaamatalaina, i mea o loo faatalitali maia i tatou ma le Ekalesia i le lalolagi. E faateteleina le pouliuli i amioga le mama ma le faaleagaga. Afai o le a tatou potopoto mai i le Ekalesia, ma tatou ola i mataupu faavae faigofie o le talalelei, ma ola i ni olaga mama, tausi le Upu o le Poto, gauai atu i o tatou perisitua ma isi tiute, ona le moomia lea ona tatou ola i le fefe. O le Upu o le Poto o le ki lea i le ola maloloina faaletino ma faaaliga. Aloese mai le lauti, kofe, ava malosi, tapaa, ma fualaau faasaina.
E mafai ona tatou ola i mea tatou te mananao e ola ai, i le faia lea o le mea sili tatou te mafaia ina ia tausia ai le ola, e tusa lava pe faatauvaa pe anoanoai. Ua saoloto i tatou e faia mea tatou te mananao ai i o tatou olaga, ia mautinoa ua faamaonia tusa lava foi pe faasalavei mai le Silisiliese, ia talitonu i le taiala faifai pea faaleagaga.
O siteki taitasi e avea o se ‘olo ma se sulufaiga ma se tagavai. O se siteki o loo aofia ai mea uma o loo moomia mo le faaolataga ma le faaeaga o i latou o e o aafia ai i ona aafiaga, ma malumalu ua sili ona latalata atu.
E leai se iuga o mea faigata. O loo i ai ni faamatalaga sese ma ni faauigaga sese o i tatou ma lo tatou talafaasolopito, o nisi o ia mea e uigā ma e mautinoa lava le feteenai i aoaoga a Iesu Keriso ma Lana talalelei. O nisi taimi e faatautee mai ai failotu ia i tatou, e oo lava i faapotopotoga a faifeau. Latou te faia mea e le taitai ona tatou faia. Tatou te le osofaia pe faitioina pe tetee atu i isi e pei ona latou faia ia i tatou.
E oo lava i aso nei o loo i ai lava ni tala faalumaluma sa faamatalaina soo i le tele o taimi latou te talitonu i ai. O se tasi o ia tala e faapea o Mamona e fai o latou seu.
I tausaga ua mavae, sa ou i ai i se faatasiga i se kolisi i Oregon. Sa auai se epikopō Katoliko, o se faifeau Iutaia, o se faifeau lotu faaAposetolo, o le faifeau Evagelia, o se failotu o Lotu Tuufaatasi, ma lo’u tagata.
Sa tali faaaloalo le peresitene o le a’oga, o Dr. Bennett, i se taumafataga o le taeao. Sa fesili mai se tasi po o lē fea toalua na ou aumaia. Sa ou fai atu ia i latou e na o le tasi lava lo’u toalua. Sa ou mafaufau mo sina minute, ma ou manatu ua tulituli lava a’u ina ia faamaasiasia ai. Ona fesili lea o se tasi i le epikopō Katoliko pe na alu atu ma avatu lona toalua.
O le isi fesili a Dr. Bennett ia te au: “Pe sa’o e fai ni seu o Mamona?”
Sa ou ataata ma faapea atu, “Ou te seluina lo’u ulu, ina ia le mafai ona iloa mai ai.”
O Dr. Bennett, o lē e selemole lona ulu, sa tuu ona lima i luga o le ulu ma faapea mai, “Oi! E le mafai ona ou liliu i le faaMamona!”
Ae o le mea e sili ona ofo ai, o isi tagata atamamai e fai mai e le o tatou o ni Kerisiano. E faaalia mai ai e laitiiti pe leai foi se mea latou te iloa e uiga ia i tatou. O se mataupu faavae moni e faapea e le mafai ona e siitiaina lou tagata i luga e ala lea i lou tuuina o isi i lalo.
Na manatu nisi o a tatou faatulagaga maualuluga o le a feteenai ai le faatupulaia. Ae ua faafeagai. O faatulagaga maualuluga o se maneta. O i tatou uma o fanau a le Atua, ua tosina atu i le upumoni ma faia mea lelei.
O loo tatou feagai ma luitau i le tausiga o aiga i totonu o le lalolagi i ao pogisa o le amioleaga. O nisi o o tatou tagata lotu e le o mautonu ma o nisi taimi e manatunatu ai: Pe i ai se isi nofoaga e mafai e se tasi ona sola ese atu i ai mai nei mea uma? Pe i ai se isi taulaga po o se setete po o se atunuu e saogalemu atu, lea e mafai e se tasi ona maua ai se sulufaiga? O le tali aoao o le leai. O le puipuiga ma le sulufaiga o loo i mea o loo nonofo ai nei o tatou tagata lotu.
Na valoia mai e le Tusi a Mamona, “Ioe, ona amata ai lea le galuega e le Tama i atunuu uma i le teuteuina o le ala, ina ia faapotopotoina lona nuu i le laueleele o lo latou tofi” (3 Nifae 21:28).
O i latou o e o ese mai le lalolagi ma o mai i totonu o le Ekalesia, e tausia poloaiga, faamamalu le perisitua, ma amata ona toaaga, ua mauaina le sulufaiga.
I nai vaiaso ua tuanai i se tasi o a matou fonotaga, na faamanatu mai ai e Elder Robert C. Oaks, o se tasi o Peresitene e toafitu o le Au Fitugafulu (o se taitaiau e fa faafetu ua litaea, ma o se taitai o le fua vaalele a le NATO i Europa Tutotonu), se maliliega na sainia e atunuu e 10 i luga o le vaatau o le Misuri i le Vaifagaloa o Tokyo i le aso 2 o Setema, 1945, lea na faamutaina ai le Taua Lona II o le Lalolagi. O nisi o i matou sa i Asia i lena taimi. Na saunoa ia Elder (Taitaiau) Oaks, “E le mafai ona ou mafaufauina se tulaga i le taimi nei pe afai e mafai e se fonotaga faapena po o se maliliega faapena ona sainia, ina ia faamutaina ai le taua e tetee atu ai i tagata faatupu faalavelave ma le amioleaga lea o loo tatou aafia ai. E le o le ituaiga taua lena.”
E le tatau ona tatou fefefe, e ui lava o se lalolagi o le a le muta ai le fetaua’i. O le taua o feteenaiga sa valoia i faaaliga o loo faaauauina pea lava i aso nei. E ao ona tatou fiafia ma ia fai mea lelei. E le tatau ona tatou fefefe. O le fefe o le faafeagai lea o le faatuatua.
Ua tatou iloa o le toaaga i le Ekalesia, e totonugalemu i le aiga. Po o fea lava e i ai tagata o le ekalesia i le lalolagi, e tatau ona latou faavaeina se aiga e taliaina ai fanau ma faapelepele ai e pei o se “tofi mai le Alii” (Salamo 127:3). O se aiga agavaa o le Au Paia o Aso e Gata Ai, o se tagavai lea i le lalolagi.
E le gata e ao ona tatou faatumauina le maualuluga o tagavai, ae o i tatou uma taitoatasi e ao ona avea ma se tagavai, o se puipuiga, ma se sulufaiga. E ao ona “pupula atu lo [tatou] malamalama i luma o tagata, ina ia latou iloa a [tatou] galuega lelei, ma vivii atu ai i lo [tatou] Tama o i le lagi” (Mataio 5:16; tagai foi 3 Nifae 12:16).
O tauiviga ma taumafaiga uma a augatupulaga ua mavae, ua aumaia ai ia i tatou i o tatou aso le atoatoaga o le talalelei a Iesu Keriso, o le pule e faia ai le galuega. Ua oo uma mai lava i lenei tisipenisione o le atoatoaga o taimi lea o le a faamaeaina ai le faaatoatoaina o mea uma ma saunia le lalolagi mo le afio mai o le Alii.
O i tatou o se vaega o lenei galuega e pei o na alii na tatalaina lena solosolo samasama mai le tootoo o Uiliata Risati ma o ifo mai le Mauga o le Tagavai. O lena solosolo, sa talotalo maualuga, e faailoa mai ai le faapotopotoina tele lea na valoia i tusitusiga anamua ma ona po nei.
Tatou te talanoa i le Ekalesia i le avea ai ma o tatou ‘olo ma o tatou sulufaiga. O loo i ai le saogalemu ma le puipuiga i totonu o le Ekalesia. E faaautu i le talalelei a Iesu Keriso. E aoaoina le Au Paia o Aso e Gata Ai ina ia vaai i totonu ia i latou lava ina ia iloa ai le mana togiola o le Faaola o tagata uma. O mataupu faavae o le talalelei o loo aoaoina i totonu o le Ekalesia ma aoaoina mai tusitusiga paia, e avea ma se taiala mo i tatou taitoatasi faapea ma o tatou aiga.
Ua tatou iloa o aiga tatou te faavaeina, faapea a tatou fanau, o le a avea ma sulufaiga o loo tautalagia i faaaliga—o le “malamalama,” o le “faatulagaga,” o le “tagavai” mo atunuu uma, ma le “sulufaiga” mai le afa (Tagai MFF 115:5–6; Isaia 11:12; 2 Nifae 21:12).
O le tagavai e ao ona tauaveina e i tatou uma o Iesu Keriso le Alo o le Atua, le Alo Pele e Toatasi na Fanaua e le Tama, o lana Ekalesia lenei ma o loo tatou tauaveina lona suafa, o loo tatou umiaina foi lana pule.
Tatou te tulimatai atu ma le faatuatua. Ua tatou vaaia le tele o mea e tutupu i o tatou olaga ma e tele mea o le a tutupu o le a luitauina ai lo tatou lototele ma faamalolosia ai lo tatou faatuatua. E ao ona tatou “olioli, ma fiafia lava: aua o i le lagi [lo tatou] taui e tele” (Mataio 5:12).
Ia naunau e puipuia le talafaasolopito o le Ekalesia, ma aua e “te ma i le talalelei a [Iesu] Keriso: aua o le mana lava lea o le Atua e ola ai i latou uma o e faatuatua” (Roma 1:16).
O le a tatou feagai ma luitau, aua e le mafai ona tatou aloese mai ai, ma aoao atu le talalelei a Iesu Keriso, ma aoao atu o Ia o lo tatou Faaola ma lo tatou Sulufaiga, ma lo tatou Togiola.
Afai na lava le lelei o se solosolo samasama ua leva ona faaaoga e avea ma se tagavai i le lalolagi, e mafai foi la e alii e pei ona masani ai o e o loo umia le perisitua ma tamaitai e pei ona masani ai ma fanau e pei ona masani ai i aiga e pei ona masani ai, o loo ola i le talalelei i le mea sili latou te mafaia i le lalolagi atoa, ona pupula atu e avea ma faatulagaga, ma se ‘olo, ma se sulufaiga e tetee atu ai i soo se mea e liligi ifo i luga o le lalolagi.
“Ua matou talatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 25:26).
O le a uluola lenei Ekalesia. O le a manumalo. Ou te matuai mautinoa lava lenei mea. Ou te tuuina atu ai lenei molimau i le suafa o Iesu Keriso, amene.