Faauta O A Outou Fanau
O le lalolagi i nei ona po, o le a manaomia … i tatou taitoatasi e puipuia, aoao, ma alolofa ia te i latou.
A o o’u galue ai i lenei valaauga, sa ou maua ni uo fou. O Eliza e mafai ona ia usuina le tele o pese a le Peraimeri. O Lucas o loo aoaoina Mataupu Faavae o le Faatuatua i le faaSipaniolo. O Caitlyn e matamuli ae na te fia iloa lava. Sa ou nofo i tafatafa o Martha i le Peraimeri, ma sa tago lave mai lona lima i lo’u lima. O nei tamaiti o loo susulu ai le malamalama o le talalelei i o latou foliga.
O ai tamaiti i lou aiga po o lou tuaoi? Vaavaai atu ia te i latou. Mafaufau ia te i latou. Ua aoao mai i tatou e le Faaola, ina ia mafai ona ulufale atu i le malo o le Atua, e tatau ona avea i tatou e faapei o se tamaitiiti, “e usitai, ma agamalu, ma faamaulalo, ma onosai, [ma] ua tumu i le alofa” (Mosaea 3:19).
Peitai po o le a lava le tumu o fanau e o mai ia i tatou i le faatuatua, latou te feagai lava ma luitau o se lalolagi pau. O le a se mea e fesoasoani ai i nei fanau ina ia tausisia le malamalama o le faatuatua i o latou mata? Ua tatou iloa e leai se mea e mafai ona suitulaga i se aiga amiotonu i le olaga o se tamaitiiti. Peitai o le lalolagi i nei ona po, o le a le gata ina manaomia e fanau se tina ma se tama faamaoni, ae o le a latou manaomia i tatou taitoatasi e puipuia, aoao, ma alolofa ia te i latou.
Uso e ma tuagane, o le puipuia o fanau o lona uiga tatou te saunia se siosiomaga e valaaulia ai le Agaga i o latou olaga ma faamautu ai i o latou loto. O lena mea e otometi ai lava ona aveesea soo se ituaiga o faiga faaleogalua, tuulafoa’i, faatautala, saua, po o le soonafai.
E ui foi ina ua matuia tele tulaga o le amioleaga, ae tatou te puipuia foi fanau mai le tulaga e foliga mai e le faatama’ia ai, e pei o faamoemoega ua maualuluga tele pe maualalalo tele foi, o le faaloloto, o le ova atu o mea e fuafua e fai, ma le manatu faapito. Soo se ituaiga soonafai lava, e faapogisa ai lava le tomai o le tamaitiiti na te iloa ai, faatuatuaina, ma taialaina ai e le Agaga Paia.
E sili atu ona gauai atu tamaiti i upumoni o le talalelei, nai lo se isi lava taimi, ma o le puipuia o le olaga faatamaitiiti o se avanoa moni e na o le faatasi i le olaga, e aoao ai ma faamalolosia le fanau ina ia filifili le mea sa’o.
E faigofie ona iloa mea e aoao atu. Ua manino tusitusiga paia ma o tatou perofeta, e uiga i mea tatou te aoao atu ia tatou fanau. Na aoteleina e Nifae i le fuaiupu lenei, “Ua matou tautalatala ia Keriso, ua matou olioli ia Keriso, ua matou tala’i atu Keriso, ua matou vavalo atu foi ia Keriso … ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 23:26).
I le iloa ai tatou te aoao atu Keriso ma Lana talalelei, e faapefea ona tatou faia? Amata e ala i le mulimuli i le fautuaga a o tatou perofeta, ma faaavanoa se taimi i o tatou aiga mo lotu faaleaiga, suesue i tusitusiga paia ma afiafi faaleaiga. Pe ua taatele ea ona tatou faalogo atu i lena fautuaga, ua foliga mai ai ua faigofie tele? Pe ua tatou pisi tele ea, ua foliga mai ai ua matua’i faigata tele pe a toe faaopoopo atu foi se isi mea se tasi? Ou te molimau atu tusa lava pe foliga mai e faale-lelei tele a tatou tapuaiga faaleaiga, ae na o le usitai lava ia e valaaulia ai faamanuiaga a le Alii.
O le mea moni, o le usitai o le tagata ma faataitaiga, i soo se vaega o o tatou olaga, o le lesona taua lava lena o le talalelei mo le fanau. O le mea lea, suesue, ia iloa ma faaaoga le talalelei. E le mafai ona tatou aoao atu mataupu faavae tatou te le iloa ma tatou te le o ola ai. O ai i tatou, ma pe o a foi mea oi o tatou loto, e vave atu ona iloa e tamaiti nai lo mea ua tatou manatu ai.
O le mea lea, alolofa i tamaiti. Ou te manatua le alofagia o a’u a o laitiiti, ma o lena mea, na faigofie ai ona ou talitonu e alofa foi le Faaola ia te a’u. E manuia fanau i se aiga e malamalama matua o lo latou “tiute paia le tausia o fanau i le alofa ma le amiotonu” (O Le Aiga : O Se Folafolaga i le Lalolagi,” Liahona, Oke. 2004, 49).
Peitai e mafai e i tatou uma lava ona fesoasoani. Matau tamaiti na e siomia oe, ma aoao ia iloa o latou igoa. Ona valaaulia lea, faalogo, faamautinoa, taiala, atiina ae, tautua, ma faasoa atu i ai molimau. E mafai e lou alofa ona fesoasoani e aumaia ai se tamaitiiti i le alofa o le Faaola.
O Vasily o se tamaitiiti e tele lona taimi e faaalu i magaala, ma e le lagolagoina e ona matua i lana sailiga o le upumoni. Na maua e ia se paranesi laitiiti o le Ekalesia i lo latou aai, ma sa alu o ia i gaoioiga uma lava e fai ai i le lotu. Na ia aumaia foi ona uso laiti e toatolu i le lotu, ma na o mai ai foi ma isi ana uo i le Peraimeri. O le mea moni, na i ai se taimi, o le Peraimeri aupito toatele i lena eria, lea na i ai nei tamaiti laiti e le o ni tagata o le Ekalesia. Na tosina atu i latou i le upumoni, ma sa amata ona sulugia mai i o latou foliga le malamalama o le talalelei. Sa taliaina i latou, puipuia, aoao ma alofagia e tagata uma o lena paranesi laitiiti, e aofia ai le autalavou, talavou matutua, faifeautalai, faiaoga, ma taitai perisitua. Mafaufau i tamaiti o lo outou pitonuu po o le vasega o le Peraimeri. O ai tamaiti o lau paranesi po o le uarota? Pe o i ai se tasi, e pei o Vasily, o loo manaomia oe?
A ou mafaufau i nei tamaiti ma isi tamaiti e pei o i latou, ou te maua se faamoemoega tele mai le tala i le asiasiga a le Faaola i le konetineta o Amerika. Manatua a o le’i afio mai le Faaola, sa i ai matagi malolosi, o mafui’e, o afi, o asiosio ma aso e tolu o le pogisa tele. (tagai 3 Nifae 8). E tele taimi ou te mafaufau ai i tamaiti, na oo i na tulaga. Ma, e mafai ona ou manatu i le atuatuvale ma le popolega i loto o matua.
Ona afio ifo lea o le Faaola ma poloaiina le motu o tagata “ia aumaia o latou tamaiti” ia te Ia (3 Nifae 17:11). Ai se naunau o na matua e avatu a latou fanau i le Faaola. Ona latou matamata lea a o tutulu le Faaola i luga o a latou fanau, ma faamanuia i latou taitoatasi, tatalo atu i le Tama mo i latou, ma poloaiina agelu ina ia latou auauna atu ia te i latou (tagai 3 Nifae 17: 21, 24). Ua faamanatu mai e lenei tala ia i tatou, o le Faaola o le leoleo sili, o le faiaoga sili ma le faapogai e faavavau o le alofa ma le faamalologa.
A o siomia foi i tatou e le pogisa o nei aso, ua poloaiina foi i tatou e aumai a tatou fanau i le Faaola, ma e faapei foi ona faamanatu mai ia i tatou e Elder Ballard, “o i tatou ia ua tofia e le Atua e siosiomia fanau o nei aso, i le alofa ma le afi o le faatuatua ma se malamalama pe o ai i latou” (“Behold Your Little Ones,” Tambuli, Oct. 1994, 40; Ensign, Apr. 1994, 60).
Uso e ma tuagane, i le avea ai o se tina ma se taitai o le Peraimeri, ua ou iloa e le faigofie lenei galuega ma fanau. O le puipuia, aoaoina ma alolofa i tamaiti e mafai ona faigata, e tele foi taimi e lagona ai le faavaivai, o nisi foi taimi e mafatia, e i ai foi taimi e tuai mai ai lava ni fua o a tatou taumafaiga. Peitai e mafua ona e le faigofie ona aumai tamaiti i le Faaola, o lea e tatau ai ona tatou o mai i tatou lava ia te Ia.
A o tatou saili atu ia te Ia ma Lona Agaga e fesoasoani ia i tatou, o le a tatou vaaia se vavega. O le a tatou iloaina o tatou lava loto ua suia, ma o i tatou foi ua oo ina “usitai, ma agamalu, ma faamaulalo, ma onosai, [ma] ua tumu i le alofa” (Mosaea 3:19). O i tatou foi, o le a susulu atu ai le malamalama o le talalelei i o tatou lava foliga. O le a oo ina tatou malamalama i nei upu a le Faaola: “Ai se talia se tamaitiiti faapenei ona o lo’u igoa, ua ia talia a’u” (Mataio 18:5).
Ou te alofa i le Faaola ma ou te molimau atu i Lona mana togiola mo oe ma a’u ma a tatou fanau, i le suafa o Iesu Keriso, amene.