Ua Faasilasila mai le Autu Fou o le Mutuale mo le 2007

I le 2006 sa fefaasoaai ai e talavou o le Ekalesia a latou taleni ma molimau a o latou faaautuina ia gaoioiga i le autu a le Mutuale “Ina tutulai ia ma susulu atu, ina ia faia lo outou malamalama ma tagavai mo atunuu” (MFF 115:5).

I le 2007 e taulai atu ai le autu i le malosiaga faaleagaga o le tagata lava ia. O le autu fou o le Mutuale e sau mai se faaaliga i le Perofeta o Iosefa Samita i le taimi o lona tiga matuitui i le Falepuipui i Liperate: “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua” (MFF 121:45).

I se saunoaga tuufaatasi, na saunoa ai ia Au Peresitene Aoao o Tamaitai Talavou ma Alii Talavou e faapea o talavou o loo tauivi ma le le mautonu ma le masalosalo o le a maua le faamoemoe i le autu fou o le Mutuale. “O le faatuatua fai ifo ‘i luma o le Atua’ o le faatuatua moni,” o loo faapea mai ai le saunoaga. “Afai e te faatuatua i luma o le Atua, e mafai ona e lagonaina le faatuatua i le i ai i tafatafa o soo se tasi.”

Talu ai ona e “vaai Ieova i le loto” (1 Samuelu 16:7), o talavou e mama o latou manatu o le a faatuatua e taliaina i latou e le Alii ma o le a sili atu ai ona ola i ni olaga mama. E uunaia e Au Peresitene Aoao o Tamaitai Talavou ma Alii Talavou ia talavou ina ia sailia le taitaiga mo se olaga mama i totonu o le Mo le Malosi o le Autalavou (aitema nu. 36550 890).

E mafai faapefea e le autalavou ona teuteuina o latou manatu ia mama? Na saunoa ia Peresitene James E. Faust, Fesoasoani Lua i le Au Peresitene Sili, e faapea “o le amio mama e tele ona faauigaga, e pei o uiga mama, sa’o o mea e fai ma mafaufauga, o le amio solia, po o le legavia” (“O Le a Latalata i Agelu,” Liahona, Iulai 1998, 107).

“O le toatele lava o tagata e le malamalama atoatoa i le faauigaga o le uiga faaleatua,” na saunoa ai Peresitene Faust. “O se tasi o faauigaga masani o le legavia lea po o uiga mama, ae o le uiga faaleatua lava ia i lona atoaga, e aofia ai itu uma o le amiotonu lea e fesoasoani e fau ai a tatou amio” (“O Uiga Faaleatua o Afafine Amiotonu o le Atua,” Liahona ma le Ensign, Me 2003, 108).

Na faamatalaina e Elder Joseph B. Wirthlin o le Korama a Aposetolo e Toasefululua le auala e aafia ai lo tatou faatuatua fai ifo ona o le amiotonu: “Afai o le mea o loo tatou faia e sa’o, tatou te le lagonaina le matamuli po o le faalotolotolua e saili le taitaiga faalelagi. O le a tatou iloa e tali e le Alii a tatou tatalo ma fesoasoani ia i tatou i o tatou manaoga” (“Amio Sa’o Patino,” Liahona, Iulai 1990, 39).

O le ola i ni olaga uiga faaleatua e aumaia ai le mafutaga a le Agaga Paia, lea e oo mai ai musumusuga mai le Alii ma le faatuatua fai ifo i Ona luma.

I se tusi i le aso 1 Aokuso 2006, na faasilasila atu ai le autu o le Mutuale 2007, na uunaia ai e le Au Peresitene Sili ia taitai o Alii Talavou ma Tamaitai Talavou ina ia faamamafaina le autu i sauniga amata o le Mutuale ma isi gaoioiga a le autalavou.

O punaoa faaopoopo e faatatau i le autu o le a maua atu i le Liahona ma le New Era o Ianuari 2007.