O Lenei, ia Tuu Lenei Mea i o Outou Loto

Elder Larry W. Gibbons

O Le Au Fitugafulu

E le mafai ona tatou tuu le tasi vae i totonu o le Ekalesia ae tuu le isi vae i le lalolagi.

I le avea ai ma se tasi na aoaoina i vailaau faafomai, o le malamalama i le faigata ma le faatulagaina ma le ogatasi o le tino o le tagata ua faamalosia ai lou faatuatua i se foafoa. Ou te talitonu i le Atua. Ou te talitonu sa Ia foafoaina i tatou.

E ese mai i se talitonuga i se Foafoa o le talitonu lea e faapea o le olaga na amata mai i se tulaga faafuasei. Ou te le talitonu i lena mea.

Ma afai na faia i tatou e le Atua, e le o se mea talafeagai le faapea o le a Ia tuua na o i tatou. E talafeagai Lona tuuina mai ia i tatou o le taitaiga. O nisi o nei taitaiga na oo mai i le faatulagaga ua tatou taua o poloaiga.

E le’i tuuina mai poloaiga ina ia avea ma avega pe o ni tapulaa mo i tatou. Ae o ni taiala mai se Tama Faalelagi poto e taofia ai i tatou mai faafitauli, e aumaia ai ia i tatou le atoatoa o le fiafia i lenei olaga, ma toe avatu saogalemu ai i tatou e toe foi atu ia te Ia.

I se lauga i le Iunivesite o Polika Iaga i le 1994, na saunoa ai Rabbi Harold S. Kushner:

“O au o se Iutaia moni, ma ou te usitai i tulafono o le tusi paia e uiga i taumafa… . Ou te masalo o le toatele o outou e manatu, ou te fealuai i le aso atoa ma faapea ifo ia te au lava ‘Sole, ou te fia ai lava i fasipuaa, ae le faatagaina au e lena Atua leaga.’ E leai. O le mea moni, ou te fealuai i le aso atoa ma ou faapea: ‘Pe le maoae ea? E lima piliona tagata i luga o lenei fogaeleele ae e popole le Atua i la’u meaai o le aoauli [ma le] ituaiga gagana ou te faaaogaina.’

“ … Ou te le o vaivai i le tauina mai e i ai mea faapitoa e le mafai ona ou faia ona e sese. Ae ou te alualu ai i luma.”¹

Ae na sili atu le faaupuina e Elder Henry B. Eyring i le uluai faasalalauga faaleaoaoga a taitai i le lalolagi atoa: “Ua uma ona tuuina mai e le Alii ia i tatou Ana faatulagaga o le tauaogaina. Na te lei faia ina ia taofia ai i tatou mai ia te Ia, ae ina ia tosina atu ai i tatou ia te Ia.”²

Uso e ma tuafafine, o le tausia o poloaiga e faia ai se suiga tele i lenei olaga ma le olaga a sau. Ina ia agavaa mo le malo selesitila ma le olioli o loo i ai iina, e tatau ona tatou tausia poloaiga!

Na pau le faatulagaga e talafeagai mo soo se tasi o i tatou o se faatulagaga faaselesitila. I le Mataupu Faavae ma Feagaiga tatou te faitau ai: “Aua o lē lē mafai ona tausia le tulafono a se malo selesitila e le mafai foi ona nofo i se mamalu selesitila.”³ E faigofie lava! Ae, tatou te le tau faatali mo le mauaina o le olioli faaselesitila. O le ola i poloaiga e aumaia ai le olioli iinei i le taimi nei.

Ou te popole ona o le toatele o i tatou e le o i ai se tautinoga atoatoa e ola i poloaiga uma. O nei Au Paia lelei e le o mananao e tuuese atoa le lalolagi. O loo faatautau lava.

I le sauniga a le au perisitua i se konafesi faarisone, sa matou usuina ai i le viiga “Outou Faifeau o Isaraelu.” O le tali o loo i ai se laina “Papelonia, Papelonia, tofa soifua.”⁴ Ina ua maea le usuina o le pese, sa saunoa Elder Neal A. Maxwell ma faailoa mai le manatu e faapea o le faatofa atu ia Papelonia o se tasi lea o o tatou luitau moni lea e toatele i tatou e fiafia e tuu pea se fale o le taumafanafana iina.⁵

E le mafai ona tatou tuu le tasi vae i totonu o le Ekalesia ae tuu le isi vae i le lalolagi. O se tasi o mafuaaga ona o le lalolagi ma le Ekalesia ua televave le agai i auala eseese. O le a tatou pauu ai.

Ua tatou iloa “e leai se na te mafaia ona auauna i ni alii se toalua.”⁶ Ou te popole, ona o nisi o loo taumafai e fai le mea na taua e Peresitene Marion G. Romney, o le taumafai lea e “auauna i le Atua e aunoa ma le faaitaina o le tiapolo.”⁷

Na aoao mai le Faaola: “O outou o le masima o le lalolagi: a e afai e magalo le masima, pe se a se mea e faamai ai? e leai se mea e toe aoga ai, na ona lafoaiina i fafo, ma soli e tagata.”⁸

E faapefea ona tatou magalo? O se tasi o auala o le tuu lea o lo tatou [avea ma tagata] e ese mai le lalolagi. E toatele [tagata] i le Ekalesia ua faaopeopea atu i le ala o le lalolagi ma ua foliga ma saga avea atili ai e pei o le lalolagi. E tatau ona tuu lo tatou faaopeopea.

Na saunoa Elder Robert D. Hales: “I le avea ai ma Au Paia o Aso e Gata Ai, e le manaomia ona tatou foliga faapei o le lalolagi. E le manaomia ona tatou faafiafia e pei o le lalolagi. E tatau ona ese a tatou mausa patino. E tatau ona ese a tatou mea faafiafia.”⁹

I lenei vaitaimi i le le mautonu i le mea e sao po o le mea e sese e tatau ai ona tatou saunia e tutulai ma faapea atu “O le mea lea e sao, ae sese le mea lea.” E le mafai ona tatou faataitai i isi! O lea, ou te le o faapea atu, e tatau ona tatou siitia atu i le togavao ma tapunipuni a tatou faitotoa. E mafai lava ona tatou i ai i le lalolagi, o i aoga, o i galuega, auai i faapotopotoga aoga i alalafaga, ma isi lava mea. Ae e tatau ona tatou taofimau pea i faatulagaga a le Alii.

E i ai sau uo lelei lava o se fomai faaaloalogia. E masani ona ia tusia se tusitusiga a le malo e faatatau i le soifua maloloina. E masani lava o lana autu e faatatau i taumafa tatau. Ae i ai sona faafitauli. E fiafia lava i tonati; e manaia, ae e le masani ona taua o se tasi o taumafa e sili ona paleni a le lalolagi.

Ina ia foia lenei faafitauli, na ia saunia ai le mea na ia taua o lana auala e 80:20 e uiga i taumafa tatau. E faapea lenei manatu afai e te lelei tele i le 80 pasene o le taimi, e mafai ona e taumafa i se mea e te manao i ai i le isi 20 pasene o le taimi.

Ia, atonu e le afaina lava lenei mea i taumafa tatau, ae o le aoaoga o le 80:20 e le taliaina i mea e pei o le poka, ponokalafi, po o le le faamaoni. Uso e ma tuafafine, pe o avea ea i tatou ma tagata o le Ekalesia e 80:20 i nisi taimi?

Mafaufau i le tamaitai e faapaiaina le aso Sapati, sei vagana ua ia manaomia se mea mai le faleoloa. Po o le alii e faamaoni i ana fegalegaleaiga uma seia oo ina le mafai ona ia tuua le uunaiga e faatelē ana lafoga aua na te sefeina ai le silia i le $1000. Po o le tama e agalelei ma agamalu i lona toalua ma tamaiti sei vagana ua i ai sona aso le lelei i le ofisa.

Uso e ma tuafafine, ia tatou faatauese atu lena fale o le taumafanafana o loo i Papelonia. Aua nei o tatou faapea sei “toeitiiti” ae ia avea i “tatou uma” ma Au Paia o Aso e Gata Ai.

I le Faaliliuga a Iosefa Samita o le Luka 14:28 o loo fetalai mai ai le Alii: “O le mea lea, ia e faamautu lenei mea i lou loto, o le a e faia mea o le a ou aoao atu ma poloaiina ai oe.” Ou te fiafia i lena fasifuaitau “faamautu lenei mea. Uso e ma tuafafine, ou te tatalo ia tatou “faamautu. O loo i ai faamanuiaga taua lea na o le pau le ala e oo mai ai, o le gauai atoa atu o le loto o se tagata i le Atua.

Na saunoa Peresitene Heber J. Grant: “E na o le tasi lava le auala saogalemu i le Au Paia o Aso e Gata Ai, o le a faaolaina ai oe ma au, ma o le auala lena o le tiute. E le o se molimau, e le o ni faaaliga ofoofogia, e le o le iloaina e moni le Talalelei a Iesu Keriso, e le o le iloaina moni o le Faaola o le Togiola, ma o Iosefa Samita o Lana perofeta, ae o le tausia o poloaiga a le Atua, o le ola i se olaga o se Au Paia o Aso e Gata Ai.”¹⁰

O lenei, alii ma tamaitai talavou, a o amata ona outou faatulagaina mea e tatau ona faamuamua i le olaga, ia manatua, e pau lava le saogalemu moni i le olaga o le ola lea i poloaiga. O le saogalemu tautupe ma tulaga lauiloa e leai se taua pe a aunoa ma le amiotonu. Ou te folafola atu ia te outou lena mea.

Sa outou nonofo ma lo outou Tama Faalelagi i le muai olaga. Sa outou i ai iina faatasi ma Ia. Ua iloa e o outou agaga le tulaga e ola ai i le malo selesitila. E le mafai ona e maua le fiafia moni i se siosiomaga e le faaselesitilaina. E tele mea ua outou iloa. O se tasi lena o mafuaaga mo outou, o le amioleaga e le o le fiafia lea.¹¹ O se mea manaia tele le filifili mo le taimi mulimuli ma lē toe suia le mea o le a e faia ma le mea o le a e lē faia e faatatau i le faamaoni, tauagafau, legavia, Upu o le Poto, ma le faaipoipoga faalemalumalu.

Uso e ma tuafafine, tumau i le ala sao ma le vaapiapi. Leai, tumau i le ogatotonu o le ala sao ma le vaapiapi. Aua le faaopeopea, aua le feosoosofai, aua le faataalo, ia faaeteete.

Ia manatua, aua le faatafai i le tiapolo. Aloese mai le teritori a le tiapolo. Aua nei tuuina atu ia Satani se avanoa e manumalo ai. O le ola i poloaiga o le a aumaia ai ia te outou le fiafia, lea o loo sailia e le toatele i isi nofoaga.

E pei ona aoao mai e Elder Nelson i le taeao nei, o le atoatoaga lenei o le talalelei a Iesu Keriso. O Lana Ekalesia lenei. Na tupu lava le toefuataiga! E leai lava se mafuaaga e toe faatautu ai.

Ou te iloa o Peresitene Gordon B. Hinckley o le perofeta a le Alii i aso nei. Ou te faafetai i lo’u i ai faatasi ma ia ma faafetai ia te ia mo ana aoaoga, o lana taitaiga, ma lana faataitaiga matagofie o le malosi. Ou te iloa o loo soifua le Atua. Ou te molimau atu o Iesu o le Keriso. I le suafa o Iesu Keriso, amene.