Ua Maliu Elisa Young Rogers Wirthlin

O Elisa Young Rogers Wirthlin, le faletua o Elder Joseph B. Wirthlin o le Korama a Aposetolo e Toasefululua, na maliu i le aso 16 Aokuso, 2006 ona ua afu le soifua.

Sa saunoa Elder Wirthlin e uiga i lana soa e faavavau talu ai nei i le sauniga i le afiafi o le Aso Toonai o le konafesi aoao (tagai i. 28): “Na avea o ia ma o’u malosiaga ma o’u fiafiaga. Ona o ia, ua avea ai au ma se alii, tane, ma se tama sili atu… . E tele mea ou te nofo aitalafu ai i lo’u toalua, e le mafai e upu ona faamatala. Ou te le iloa pe na i ai se mea e ta’u o se faaipoipoga atoatoa, ae, i lo’u lava manatu, sa atoatoa le ma [faaipoipoga]… . I le avea ai o Elisa ma ou fiafiaga sili, o lenei, o lona maliu ua avea ma ou faanoanoaga sili.”

O Elisa Rogers, o le uii o le fanau e toafa, sa soifua mai i le aso 22 o Iuni 1919, i le Aai o Sate Leki. Sa faaipoipoina i laua ma Elder Wirthlin i le Malumalu o Sate Leki i le aso 26 o Me 1941, e Tavita O. MaKei, a o avea lena ma se fesoasoani i le Au Peresitene Sili. Na valaauina Elder Wirthlin e avea ma se Aposetolo i le 1986.

O Sister Wirthlin e tupuga sao lava mai paionia Iuta. O lona tama, o Orson Madsen Rogers, o le tama a le tama a Aurelia Spencer Rogers, le uluai peresitene o le Peraimeri, na faavaeina i Iuta i le 1878. O lona tina, o Bernice Iaga, o le afafine o le atalii o Iosefa Iaga, le uso o Peresitene Polika Iaga.

Sa faauu mai le Iunivesite o Iuta ma se faailoga i aoaoga mo pisinisi, sa galue Sister Wirthlin o se failautusi i le ofisa o le pulega o le iunivesite seia oo ina ua maua lana tama muamua. Mulimuli ane sa ia fesoasoani i lona toalua i galuega faafailautusi i lo latou fale a o ia puleaina le pisinisi a le aiga.

O Elder ma Sister Wirthlin o ni matua o se fanau teine e toavalu ma se atalii e toatasi. O a la fanau uma sa aooga i le Aoga Tulagalua a Uintah, o le Aoga Faaleogalua a Roosevelt, ma le Aoga Maualuga a East—o aoga lava ia sa aoga ai Sister Wirthlin a o talavou. A o aooga lana fanau, sa malosi lava o ia i le PTA, ma o se sui auai o le kalapu pese taitoatasi ma sa ia aoaoina se vasega pese mo tamaiti.

Sa le masani ona malaga soo o ia a o laiti le fanau, ma o lana uluai malaga lava i le vaalele o le taimi ua 50 ma ona tupu ona tausaga. Talu mai lena taimi sa faimalaga o ia i le tele o atunuu faatasi ma lona toalua i tofiga o le Ekalesia. E lima tausaga sa nonofo ai le aiga o Wirthlin i Siamani, lea sa tupu ai lona alofa mo le atunuu ma ona tagata.

I le taimi o lana auaunaga i ausilali o le Ekalesia, sa matuai ootia lava o ia pe a ia maua avanoa e fesoasoani atu ai i aiga sa mafatia i ma’i po o isi manaoga. Faatasi ai ma le manatu faapea po o fea e te i ai o le nofoaga sili lena e auauna atu ai, sa ia olioli ai i soo se avanoa e tuuina atu ia te ia.

I se nofoaga faapitoa i lona fale o loo i ai se nofoa ua leva sa tuuina atu ia Sister Wirthlin e lona tina. Sa masani ona ia nofonofo ai i lena nofoa ma faitau ia tusitusiga paia ma isi mea mo le faamafanafanaga, faamalosiauga, ma le fiafia. O isi mea e fiafia i ai sa sailia e Sister Wirthlin e aofia ai le taalo tenisi, lalaga ie, ma le savalivali. Sa fiafia foi o ia i fegalegaleaiga sa la maua ma lona toalua pe a mafuta ma le la fanau e toavalu, o fanau a fanau e 46 ma fanau a fanau a fanau e 49.