Tulai Ia, Outou Tagata o le Atua
E aumai faatasi ma lenei perisitua se matafaioi tele ina ia agavaa ai.
Uso e, ua pei outou o se perisitua lima ofutino. Ua foliga mai ua outou laei papae uma, ma ua outou sauni e galulue. Ma ua oo mai foi le taimi e galulue ai.
E maeu lenei vaaiga. Ua matuai faatumulia lenei Maota Autu o Konafesi i le mea e gata ai, ma ua faasalalau atu foi a matou upu i le salafa o le lalolagi. Atonu o le faapotopotoga sili lenei ona toatele o tagata o le perisitua ua i ai. Ou te faamalo atu, i lo outou faatasi mai i lenei afiafi.
Sa ou faalogologo talu ai nei i luga o le televise i se konafesi a le Aufaipese a Alii o le BYU. Sa latou usuina se pese faagauloto e ta’ua “Tulai ia, Outou Tagata o le Atua.” Sa tusia i le 1911 e William P. Merrill, ma o se fetuunaiga o lea pese o loo maua i la tatou tusi o viiga.
O loo momoli mai e upu le agaga o viiga faaPeretania anamua sa tusia e Sale Uesele ma isi. E faitauina upu:
“Tulai ia, Outou tagata o le Atua!
Tuuese mea e le aoga.
Tuu atu le loto ma le agaga ma le mafaufau ma le malosi atoa
E tautua ai le Tupu o Tupu.
Tulai ia, Outou tagata o le Atua!
I le faapotopotoga atoa e tasi.
Amata ona galulue o se usoga
Ma faamuta le vaitau o mea sese.
Tulai ia, Outou tagata o le Atua!
O loo faatali le ekalesia mo outou,
E le o lava lona malosi mo le galuega;
Tulai ia ma faamalosia o ia!
Tulai ia, Outou tagata o le Atua!
Mulimuli i ana faataitaiga.
O ni uso o le Atalii o le Tagata,
Tulai ia, Outou tagata o le Atua!
(“Hymns, no. 324; third verse in The Oxford American Hymnal, ed. Carl F. Pfatteicher [1930], no. 256).
E matuai manino tusitusiga paia i lo latou faatatauina ia i tatou taitoatasi, o’u uso e. Mo se faataitaiga, na sii mai e Nifae mai ia Isaia e faapea: “E! ana e usiusitai i la’u poloaiga—po ua tusa ma se vaitafe lou filemu, po ua tusa foi lau amiotonu ma peau o le sami” (1 Nifae 20:18; tagai foi i le Isaia 48:18).
O upu a Liae o se valaau manino i alii ma taulelea uma o le perisitua. Sa ia faapea mai ma le naunau tele: “Ina ala maia, o’u atalii e; ia oofu i le ofutau o le amiotonu. Ina lulu ese ia filifili uamea ua noatia ai outou, ma ia o mai nai le pouliuli, ma ia tutulai nai le efuefu” (2 Nifae 1:23).
E leai se alii po o se taulealea i lenei faapotopotoga tele i lenei afiafi e le mafai ona faaleleia lona olaga. Ma e moomia ona tupu lena mea. I le faaiuga o mea uma, ua tatou umia le perisitua a le Atua. Afai o tatou o taulelea o e ua mauaina le Perisitua Arona ua tatou maua le aia i asiasiga a agelu e taialaina ma faatonutonuina, e faamanuia ma puipuia i tatou. O se mea ofoofogia ma le matagofie lena. Afai ua uma ona faaeeina mai i o tatou luga le Perisitua Mekisateko, ua uma ona tuuina mai ia i tatou ia ki o le malo lea o loo tauaveina ai mana e faavavau. O nei mana na fetalai ai le Alii ina ua Ia faaee Ona aao i luga o ulu o Ona soo.
E aumai faatasi ma lenei perisitua se matafaioi tele ina ia agavaa ai. E le mafai ona tatou faatagaina mai ni mafaufauga eleelea. E le tatau ona tatou matamata i ponokalafi. E le tatau lava ona tausalaina i tatou i le faasaunoa i soo se ituaiga. E tatau ona tatou tutu maualuga ae mai na mea. “Tulai ia, Outou Tagata o le Atua!” ma tuuese nei mea i o outou tua ma o le a avea le Alii ma o outou taiala ma lagolago.
Fai mai le perofeta o Isaia, “Aua e te fefe; aua ou te ia te oe: aua le fetepatepai; aua o a’u lou Atua: ou te faamalosia oe; e moni, ou te fesoasoani ia te oe; e moni, ou te taofia oe i lo’u lima taumatau e i ai le amiotonu” (Isaia 41:10).
O nisi o outou alii talavou ua foliga mai e fiafia i laei e faaletalafeagai. Ou te iloa o se mataupu maaleale, peitai ou te talitonu e le talafeagai i alii talavou o e ua faauuina i le perisitua paia a le Atua. O la tatou gagana i nisi o taimi ua fetaui i o tatou laei. Ua tatou faaaogaina upu masoa, ma ta’u fua le suafa o le Alii. Na matuai manino lava le fetalai mai o le Atua e tetee i lenei mea.
Ou te mautinoa ua outou faalogo i le tala lenei ia Peresitene Spencer W. Kimball, ae ua ou filifili e toe faamatala atu. Sa faia sona taotoga i le falemai. Sa tuu e se alii tausimai talavou o ia i luga o se fata e tosoina ma ave atu ai o ia. Ina ua oo atu i totonu o le lifi sa taia e le tausimai le fata ma tautala ai i se upu sa faaaoga ai le suafa o le Alii.
Sa faapea atu Peresitene Kimball, e lei malamalama atoatoa, “Faamolemole, Faamolemole! O lo’u Alii lena ua e faaaogaina sese lona suafa.”
Sa matuai leai se pisa, ona musumusu atu lea o le alii talavou i se leo malu, “Ua ou sese.” (Tagai The Teachings of President Spencer W. Kimball, ed. Edward L. Kimball [1982], 198.)
Ou te fia faatepa outou i se isi mataupu o loo o’u matuai popole ai lava. I le faaaliga na poloaiina ai e le Alii nei tagata ina ia maua ia aoaoga uma latou te mafaia. Sa manino lelei o ia i lenei mea. Ae o loo i ai se suiga faalelelei o loo tupu. Na fautua mai ia Uso Rolfe Kerr, le Komesina o Aoga a le Ekalesia e faapea, i totonu o le Iunaite Setete e latalata i le 73 pasene o tamaitai talavou e faauu mai aoga maualuga e faatusatusa i le 65 pasene o alii talavou. E foliga mai e le uma aoga a alii talavou nai lo tamaitai talavou.
Pe tusa ma le 61 pasene o alii talavou o loo lesitala i le kolisi i le taimi lava e maea ai le aoga maualuga, e faatusatusa i le 72 pasene o tamaitai talavou.
I le 1950, o le 70 pasene o i latou sa lesitala i kolisi o alii ma le 30 pasene o tamaitai; a ua fuafuaina e oo atu i le 2010 o le a 40 pasene alii ae o le a 60 pasene tamaitai.
Ua toatele atu tamaitai ua maua faailoga o le tagata malaga [BA] nai lo alii i tausaga taitasi talu mai le 1982 ma le tele atu o faailoga o le matua o faiva talu mai le 1986.
E matuai manino mai lava i nei fuainumera o loo sili atu ia tamaitai talavou nai lo alii talavou i le sailia o polokalama faaleaoaoga. Ma o lea ou te fai atu ai ia te outou alii talavou, ina tutulai ia ma puleaina o outou tagata ma faaaoga tatau ia avanoa faaleaoaoga. E te manao e te faaipoipo i se teine e sili mamao atu ana aoaoga nai lo oe? Tatou te talanoa i le “tauave tutusa.” Ou te lagona, e faatatau lena i le tulaga tau aoaoga.
E le gata i lea, o lau aoaoga o le a malosi ai lau tautua i le Ekalesia. Na faia se suesuega i nai tausaga ua mavae lea na faailoa mai ai e faapea o le maualuga lava o le aoaoga o le tele foi lena o le faatuatua ma le auai i gaoioiga faalelotu.
Sa ou taua muamua ia ponokalafi. E faigofie lava ona avea ma se ituaiga mausa sili ona leaga. Sei o’u faitauina atu se tusi na ou mauaina mai se tasi na aafia ai:
“Ou te fia faasoa atu se mea ia te oe lea e lei mafai ona ou faasoaina atu lava i soo se tasi. O au o se alii e 35 tausaga le matua. O le tele o lo’u olaga faatagata matua sa avea ai ponokalafi ma a’u vaisu. Ou te maasiasi e tautino atu lenei mea, … ae o le tele lava, o la’u vaisu sa moni lava, e pei o se tagata ua fai le ava malosi po o fualaau oona ma ana vaisu… .
“O le autu o la’u tusi atu ina ia ta’u atu ia te oe faapea e tele lava mea e mafai ona faia e le Ekalesia e fautuaina ai ona tagata auai ina ia aloese mai ponokalafi. Na muamua faailoa mai ia te au nei mea a o o’u laitiiti. Sa faia ni uiga mataga ia te au e so’u tausoga tama e matua atu, ma sa faaaoga ai ponokalafi e faatosina mai ai au. Ua ou talitonu o lenei oo atu i feusuaiga ma ponokalafi i le laitiiti o tausaga, o le faapogai lea o la’u vaisu i aso nei.
“Ou te manatu ua iloagofie, le faapea o i latou o loo lagolagoina le pisinisi o ponokalafi, o se mataupu o le saolotoga o manatu. E leai so’u saolotoga. Ua leai sa’u faitalia aua ua le mafai ona ou faaaogaina e faatoilaloina ai lenei mea. O se mailei mo au, ma ua foliga mai e le mafai ona ou aluese mai ai. Faamolemole, faamolemole, faamolemole, ia aioi atu i le usoga a le Ekalesia, ia le gata ina aloese ai, ae ia aveeseina foi faapogai o mea tau ponokalafi i o latou olaga. E le gata i lea o mea e iloga e pei o tusi ma mekasini, e moomia foi ona latou tineia alaata o tifaga i o latou fale. Ua ou iloa le toatele o loo mauaina nei tautua ma ua faapea mai o loo mafai ona latou vaimamaina ese mea leaga, ae e le moni lena mea… .
“O ponokalafi ma le faasa’oina o mea sese ua taatele i o tatou olaga ma o le faapogai o nei mea ua taatele i soo se mea. Sa ou mauaina ni mekasini ponokalafi i autafa o le auala ma lapisi. E moomia ona tatou talanoa atu i a tatou fanau ma faamalamalama atu i ai le leaga o nei mea ma uunaia i latou ina ia aloese mai le matamata i ai pe a latou tau atu i ai… .
“Ma le mea mulimuli, Peresitene Hinckley, tatalo mo au faamolemole ma isi i le Ekalesia o e faapei o au o loo maua le lototoa ma le malosi e faatoilaloina ai lenei mafatiaga matautia.
“Ua le mafai ona ou sainia lo’u igoa, ma ou te faamoemoe o le a e malamalama.”
O le komepiuta o se meafaigaluega maoae pe a faaaogaina lelei. Ae afai e faaaoga e taulimaina ai ponokalafi po o le mea ua ta’ua o talanoaga faalilolilo, pe mo se isi lava faamoemoega e tau atu ai i faiga faatiapolo po o mafaufauga leaga, ona tatau lea ona lava se loto pulea, e tape ai.
Ua folafola mai e le Alii: “Ia outou faateaeseina le amioleaga o loo ia te outou; ia faapaiaina outou lava i o’u luma” (MFF 43:11). E leai se tasi e mafai ona aveseseina le uiga o na upu.
Na Ia toe fetalai mai foi: “O elemene o le tino lea o le Atua; ioe, o le tagata o le maota lea o le Atua, o malumalu lava; a e soo se malumalu e faaleagaina, o le a faaumatia lena malumalu e le Atua” (MFF 93:35). E le o i ai se faauigalua o iina. Ua matuai manino le fetalaiga a le Alii e tatau ona tatou tausia lelei o tatou tino faaletino ma ia aloese mai soo se mea e faaleagaina ai.
Ua Ia tuuina mai ia i tatou taitoatasi se folafolaga. Ua Ia fetalai mai, “Ia e loto maualalo; ona taitaiina ai lea o oe e le Alii lou Atua, ma tali atu i au talosaga” (MFF 112:10).
Ma le isi: “O le a tuuina atu e le Atua ia te outou le malamalama i lona Agaga Sa, ioe, i le mea alofa le matalatalaina a le Agaga Paia, e lei faaalia lava talu ina i ai le lalolagi seia oo mai nei” (MFF 121:26).
O le a manuia i tatou uma lava pe a suesueina le soifuaga o le Matai ma taumafai e faataitai i Ana afioga ma mea na fai. O le a faapena foi ona manuia i tatou i le suesueina o le soifuaga o le Perofeta o Iosefa. Mai lana faataitaiga, e mafai ai e i tatou taitoatasi ona aoaoina ni mea se tele e faatatau i a tatou lava amioga.
O’u uso e, ou te molimau atu i le moni o nei uiga e faavavau. Ou te molimau atu afai o le a tatou faia se taumafaiga ina ia faaleleia o tatou olaga, o le a iloga mai se taunuuga. Ia faamanuia outou e le Atua, outou taitoatasi, o’u uso pele. Ou te molimau atu ai i nei mea, ma le lotomaulalo ma le agaga faafetai, i le suafa paia o Iesu Keriso, amene.