Siosiomia e Faavavau i Lona alofa
Ou te iloa e alofa [le Tama Faalelagi] ia i tatou, uso e, e pei foi o Lona Alo, o Iesu Keriso. O le a le suia lava lena alofa—e tumau.
Ina ua ou maua lenei valaauga, sa ou aioi atu i le Tama Faalelagi e fesoasoani mai ia te au, ia ou iloa mea o loo manaomia e uso o le Ekalesia. Sa ou maua se molimau malosi, o i tatou o Ona afafine, e manaomia ona tatou iloa e alofa o Ia i a te i tatou. E manaomia ona tatou iloa o loo silafia e Ia lo tatou lelei. O le lagonaina o Lona alofa e uunaia ai i tatou e fetuleni i luma, e faamautinoa ai o i tatou o Ana, ma faamautu ai Lona faapelepele ia i tatou tusa lava pe tatou te tautevateva ma feagai ma toatuga.
Sa faamautu mai ia te au lenei savali, ina ua tuuina atu la’u molimau i le sauniga i le afiafi o le Aso Sa i le konafesi aoao ia Aperila 2002. O lena taeao, na ta’u mai ai masalo o le a le mafai ona auai mai Elder David B. Haight i le konafesi. Afai e tupu lena mea, e lima minute e tuu atu ai la’u molimau. Sa atili ai ona ou tatalo malosi mo Elder Haight i lena aso. Sa ou matauina o ia o aga’i mai i le Maota o Konafesi i le taeao o le Aso Sa, ma sa amata ona ou to’a—seia oo lava i le taimi na toe ulufafo atu ai o ia a o usuina le viiga e le faapotopotoga. A o ou tu i le pulelaa i lena afiafi, sa leai se pepa tusitusia i lalo o le tioata faafoe otometi! Peitai, o le savali sa utu sau pea i lo’u mafaufau ma lo’u loto, o le, e ao i tamaitai ona lagonaina le alofa o le Alii i o latou olaga i aso taitasi. O le savali lea sa ou iloa e manaomia ona ta’u atu i lena aso, ma e faaauau pea ona avea ma a matou savali.
Ua faalotomaualaloina au ia outou tali mu’amu’a, patino i lenei matafaioi. Faafetai atu mo le faasoa mai o auala ua faamanuiaina ai lou olaga i lenei savali. O a outou upu ua faamautu mai ai, ua tofu i tatou ma le aia—ma e manaomia—ona lagonaina le alofa o le Alii i lona olaga i aso taitasi.
Sa alofa lo tatou Tama Faalelagi ia te i tatou ae tatou te le’i o mai i lenei lalolagi. Ou te iloa e alofa o Ia i a i tatou, uso e, e pei foi o Lona Alo, o Iesu Keriso. O le a le suia lava lena alofa— e tumau. E mafai ona e faalagolago i ai. E mafai ona tatou talitonuina.
E pei lava ona faamanatu mai ia i tatou e le anavatau a le Aualofa, “e le uma le alofa,” e tatau ona tatou talitonu e le uma le alofa o Keriso mo i tatou. O mea uma tatou te faia i le Aualofa, e ao ona atagia mai ai le alofa o lo tatou Faaola, ma le alofa o lo tatou Tama Faalelagi. O lena alofa sili, e ao ona avea ma faapogai o le faaosofia o i tatou e auauna atu i isi. E tatau ona avea ma o tatou tupuaga ma o tatou taunuuga!
Ou te iloa se tina talavou e toalima lana fanau, sa valaau atu i se uso matua, o lana faufautua taua, ma fesili i ai, “E mafai ona ta o e sopo?” Sa iloa e lana uo, o lona uiga ua manao e talanoa. Ina ua mavae se afa maila, sa oo ina fai atu le tina talavou lea, ‘‘Matuai ou le talitonu lava e alofa le Tama Faalelagi ia te au; tele a’u mea sese na fai i lo’u olaga. Ou te le iloa lava so’u agavaa mo Lona alofa; e mafai faapefea ona alofa mai o Ia ia te au?” Uso e, o se tamaitai lenei ua osi feagaiga i le malumalu, ma sa toaga foi i le lotu. Ae o lea lava na te lagona le le agavaa mo Lona alofa. Sa vave ona tali atu le uso matua, “E moni, e alofa o Ia ia te oe. O oe o Lona afafine.”
Pe tatou te teena soo ea le alofa o le Alii, lea Na te liligi sautualasi mai i o tatou luga nai lo le mea ua tatou naunau e talia? Pe tatou te manatu ea, e tatau ona tatou atoatoa ina ia mafai ai ona tatou agavaa mo lona alofa? A tatou tuu i tatou lava ia lagona “ua siosiomia e faavavau i aao o lona alofa,”1 tatou te lagona le saogalemu, ma tatou iloa ai e le manaomia lo tatou atoatoa loa lava. E tatau ona tatou faailoa atu o le atoatoaga, o se faagasologa. O le talalelei lenei o le alualu i luma e faavavau, ma e tatau ona tatou manatua, e talisapaia le malaga. Faavavau o lona uiga, ‘‘e leai se amataga po o se gataaga’’ o lea la, e i ai pea lava i aso uma le siosiomia e Lona alofa. Ia manatua e tumau—tusa lava pe tatou te le iloaina. Ou te fiafia lava i le faamatalaga a Nifae o lenei meaalofa sili: “O le alofa o le Atua … ua salalau i loto o le fanauga a tagata; o lea, e sili ona manaomia ai i mea uma … ma le fiafia silisili i le agaga.”2 Ou te molimau atu, e moni lena mea.
Ou te iloa atonu e i ai nisi, e faigata ona manatu pe faapeī Lona alofa. Mafaufau i se tina ma sana pepe faatoa fanau mai. O le mafanafana, saogalemu, faapelepele ma le filemu o le opo a se tina, e mafai ona fesoasoani tatou te malamalama ai i le lagona o le siosiomia i aao o Lona alofa. Sa tusia e se uso talavou o le Aualofa, “Na o le alofa lava o lo’u tina, ou te tau malamalama ai i le tele ma le mamana o le alofa o le Faaola.”
Tina, o mafai ona outou iloa lo outou taua i le aoaoina atu o lenei upumoni i a outou fanau? A e siosiomia lau fanau i lou alofa, o le a latou pu’eina ni vaaiga o Lona alofa. Ua uunaia i tatou e Peresitene Gordon B. Hinckley ina ia “alolofa i le Alii lo [tatou] Atua, ma alolofa i Lona Alo, ma ia tumu i le faafetai i lo La’ua alolofa mo i tatou. Soo se taimi e mou atu lo tatou alofa, o le a i ai pea lena alofa susulu, ofoofogia, ma le faavavau o le Atua mo i tatou taitoatasi, ma le alofa o Lona Alo, o lē na ofoina mai Lona soifua”3 mo i tatou.
O se tina na te iloa lo la faiā ma le Atua, e fesoasoani i lana fanau ia iloa o Ia ma siosiomia i Lona alofa. Sa ootia lo’u loto i faamatalaga a se tama teine na faasoa i le maliu o lona tina ua 100 tausaga le matua: “A o ou talavou, ma taumafai e fai le lisi o a’u vasega, ou te sau i le umukuka i le mea e fai ai le auli a Tina. Ou te ta’u atu i ai vasega ou te filifili ai. E faalogologo mai o ia i mea uma lava. Ma te talatalanoa i mea e mafai ona fai, ona faapea mai lea, ‘Ia, Cathy, ua e tatalo mo lena mea?’ E fai ai lava si o’u matamuli, ona ou faapea atu lea, ‘E tatau ona e tatalo mo mea uma lava?’ E faigofie lava lana tali, ‘Ioe.’”4
Sa faalogo lenei tina. Sa ia faasoa atu lona faatuatua i le Alii; sa ia faia se faataitaiga; sa ia faasoa atu ona faamoemoega mo lana tama, ina ia foi atu pea lava pea i le Alii. A tatou faalatalata atu i le Alii, tatou te lagonaina lo tatou felata’i atu i Lona alofa. Tina, aoao a outou fanau ina ia faaaofia e le aunoa le Alii i o latou olaga, ma fesoasoani ia latou iloa Lana uunaiga alofa.
Na maua faatasi o ma’ua faamanuiaga faapeteriaka ma lo’u tina. Ua 20 lena o o’u tausaga, a o lo’u tina ua 49. E le mafai ona galo ia te a’u lena aso—ina ua tuu e le peteriaka ona lima i luga o le ulu o lo’u Tina ma ta’u atu iai, le tele o taimi e faasaoina mai ai lona ola mai le fiva rumatika, ma’i fatu, ma le tele o isi ma’i. Sa ia auiliili maia lona olaga, ma le anoanoai o taimi na te faamanuia ai isi. Sa ta’u atu e le peteriaka i lo’u tina, e i ai mea o loo teuina e le Alii mo ia, ma faamatala atu ai le taiala i mea e tatau ona ia fai. Sa ou iloaina le olaga o lo’u tina; ma sa ou faalogologo a o faamatala mai e lenei peteriaka le olaga o lo’u tina, ae le masani i la’ua. O lea aafiaga o se molimau lea ia te au, o loo soifua le Atua, ma e alofa o Ia ia te i tatou, ma Na te silafia i tatou taitoatasi. Sa ou lagonaina le alofa o le Alii i lo’u tina—ma a’u foi—i lena aso e le galo.
O le faamaoniga silisili o le alofa o lo tatou Faaola mo i tatou, o Lana Togiola lea. E taumasuasua lona alofa i le alofa tunoa, onosai, faapalepale, alofa mutimutivale, ma le lotofaamagalo.
Nei la ua tinamatutua, e i ai sa tatou matafaioi paia e siosiomia fanau a a tatou fanau i le alofa. A tautalaitiiti se teineitiiti e tolu tausaga, ona aoao lea e lona tinamatua, “Aua e te tautala faapena i lou tinamatua, aua o le a ta uo mo le miliona ma miliona o tausaga.” Pe ua le sili ea le avea ai ma tinamatua? Manatua, uso e, o le alofa ma feagaiga e fusia ai faatasi i tatou o ni aiga faavavau.
O le alofa o le Alii e masani ona aumaia e ala mai i isi, a o latou tali atu i uunaiga a le Agaga. Pe o tatou faalogo ea ma mulimuli i na uunaiga?
Ona o tauiviga ma mea tautupe, o lea sa masii ese ai se tasi uso mai lona aiga e pele ia te ia ma lana uarota, ina ua mavae le 22 tausaga o nofo ai. O se mea tiga tele lena mea. I lona Aso Sa muamua i lana uarota fou, sa ia fai mai: “Sa ou lagona lo’u matuai tuulafoaiina, e ui lava ina sa ou masani i ni nai tagata. O a’u o se tasi na muamua i le Aualofa i lena taeao. Sa ou nofonofo iina ma matau uso o gasolo atu ma nonofo i lalo. Sa foliga latou te manaomia uma o latou lava laina nofoa, e le na o nofoa. E le’i nofo le tasi i tafatafa o le isi, ma e le’i nonofo foi se isi i o’u autafa. Sa pei a’u o se motu.” Uso e, tatou te faia ea i se a lena mea i isi?! Sa faaauau le tala a lea uso: “Ona sau ai lea o Lisa i totonu. Sa susulu ona foliga ina ua vaai mai ia te au, ma sa agai mai ia te au, saofai ifo i o’u tafatafa, tago mai fusi atu a’u ma sogi mai. E maeu le uiga o si na tama’i taga. O lona mafanafana”—ma ou te faaopoopo atu na i ai ma lona alofa—“ma na tafieseina ai lo’u lagona tuulafoaiina.”
Ou te popole o nisi taimi, e na o mea tetele e tutupu i o tatou olaga tatou te vaai ai i le alofa o le Alii; e tatau foi ona tatou vaaia Lona alofa i nai mea aupito iti. Aua e te manatu faatauvaa i lou tomai, e faasoa Lona alofa i si taga faatauvaa, ae faamaoni, e pei o le nofo i tafatafa o se isi uso ina ia lagona ai e ia o loo talia o ia.
Pe o e lagonaina ea le alofa o le Alii i lou olaga? O lo’u lagonaina o Lona alofa, atonu e ese mai lou lagonaina. O le ki, o le malamalama lea pe faapefea ona e lagonaina lena alofa. O le taimi lava e te lagonaina ai, ia e naunau e faasoa atu.
I le avea ai ma se au peresitene, sa matou asiasi i le Faga i le Talafatai, ina ua tuanai le Afa o Katrina. I se tasi afiafi i se faeasaite, sa ou tu ai i le pulelaa ma sa ou lagonaina le uunaiga, o loo manaomia e uso uma i le potopotoga se aapa moni atu e faamalosia ai i latou, ia pa’itino atu lava. Ina ua maea le sauniga, sa tofu i matou ma Sister Hughes, ma Sister Pingree ma se faitotoa e opo atu ai uso taitoatasi a o agai atu i fafo. Sa na ona matou mananao e ta’u atu ai lo matou alolofa ia i latou. I soo se tasi o na uso o loo faalogologo mai i lenei po, sa matou tuua lo outou falelotu ma le lagona ua faafouina, ona o le alofa o le Atua sa outou faasoa mai ia i matou. Faafetai atu mo le tausiga e le tasi o le isi—ma i matou e toatolu!
I a’u tatalo i le taeao, ou te ole atu i le Tama Faalelagi, ina ia faatumulia a’u i Lona alofa, ina ia mafai ai ona ou faia Lana galuega, ma le loto faamaoni. Ou te iloa ua faamanuiaina au ona o lenei olega i aso taitasi. I le avea ai ma uso o le Aualofa, e tatau ona tatou taumafai ia faaalia le alofa o Keriso, o lē e saili e le aunoa e faamalie Lona Tama e ala i le faia o Lona finagalo. Uso e, e tatau ona tatou faia taumafaiga uma e mulimuli ai i Lana faataitaiga aoao—e faaalia lena alofa e ala i o tatou manatu, o a tatou tala, o a tatou faatinoga—i mea uma tatou te faia ma o tatou tagata foi. E le tatau ona tatou faatagaina le faamaualuga po o le tuinanau, manatu faapito po o o tatou faafitauli faaletagata e aveesea ai lo tatou aapa atu i isi i le alofa. I se ala faigofie ae matagofie, e tatau ona tatou muai faatagaina i tatou lava e siosiomia i le alofa o le Atua. O le ala sili tatou te faia ai lena mea, o le taliaina lea o le Togiola faavavau a le Faaola. Ona mafai ai lea ona tatou faalautele atu lena li’o e faaaofia mai ai lo tatou aiga ma isi tagata uma. O lena li’o, o le lagi lava lea.
O’u uso pele, ia faamanuia outou e le Atua, ina ia outou lagonaina Lona alofa i aso taitasi a’o outou tausia a outou feagaiga, faaali atu le alofa mama ma faamalolosia aiga. I le suafa o Iesu Keriso, amene.