Seminare ma Inisitituti
Lesona 1: O Le Oo Mai o ‘O Le Aiga: O Se Folafolaga i le Lalolagi’

Lesona 1

O Le Oo Mai o “O Le Aiga: O Se Folafolaga i le Lalolagi”

Folasaga

Ia Setema 1995 na faasalalauina ai e le Au Peresitene Sili ma le Korama a Aposetolo e Toasefululua se folafolaga i le Ekalesia ma le lalolagi e faaautuina “O Le Aiga: O se Folafolaga i le Lalolagi” (Ensign po o le Liahona, Nov. 2010, 129). O lenei folafolaga faaperofeta ua aoaoina mai le matafaioi paia a le aiga i le fuafuaga e faavavau a le Atua. O lenei lesona o le a fesoasoani i tamaiti aoga ia malamalama atili ai pe aisea na faasalalauina ai e perofeta, tagatavaai, ma tali faaaliga o aso e gata ai lenei tusiga musuia.

Faitauga Faaopoopo

Fautuaga mo le Aoaoina Atu

Mosaea 8:15–17; Mose 6:26–27, 31–36; 7:16–21

“O Le Aiga: O Se Folafolaga i le Lalolagi” sa tusia e tagatavaai

Fai i se tamaitiiti aoga e faitau leotele le Mose 6:26-27, ma valaaulia le vasega e mulimuli i le faitauga, ma vaavaai mo mea na tau atu e le Alii e uiga i loto, taliga, ma mata o tagata.

  • Na faapefea ona faamatalaina e le Alii le amioleaga o tagata?

  • O le a le uiga ina “ua solo malo loto [o tagata], ma ua feū o latou taliga e faalogo, ma ua lē mafai ona vaai mamao o latou mata”?

Fai i se tamaitiiti aoga e faitau leotele le Mose 6:31-34.

  • Ana faapea o oe o Enoka, o le a se mea e semanu e te maua ai le faamautinoaga i upu a le Alii?

  • O a mea ua aoao mai e nei fuaiupu e uiga i le ala e faamalosia ai e le Alii Ana perofeta?

Tuu atu i tamaiti aoga sina taimi e faitau ai le Mose 6:35-36.

  • O le a le mea na mafai ona vaai i ai Enoka ina ua ia fufulu ese eleele mai ona mata?

  • O le a le mea e mafai ona suitulaga i le eleele? (O eleele e mafai ona avea o se faatusa o le faalelalolagi. Fai i tamaiti aoga e mafaufau i mea e mafai ona latou vaaia pe afai e fufulu ese mea o le lalolagi mai o latou mata.)

  • E faapefea e le fuaiupu 36 ona fesoasoani e faamatala po o le a le tagatavaai? (O tali e tatau ona aofia ai le upumoni lenei:O se tagatavaai e mafai ona vaai i mea e le iloa e mata o tagata. Mafaufau e fai i tamaiti aoga e faafesootai lefuaiupu 36 ma le Mosaea 8:15-17.)

Ina ia faamatalaina atili se tagatavaai, faaali atu le saunoaga lenei a Elder John A. Widtsoe (1872–1952) o le Korama a Aposetolo e Toasefululua, ma fai i se tamaitiiti aoga e faitau leotele:

Elder John A. Widtsoe

“O se tagatavaai o se tasi e vaai i mata faaleagaga. Na te silafia le uiga o mea ia e foliga nenefu i isi; o lea la, o ia o se tagata faamatalaupu ma faamanino upumoni e faavavau. … O ia o se tasi e vaai, e savali i le malamalama o le Alii ma ni mata matala [tagai Mosaea 8:15–17]” (Evidences and Reconciliations, arr. G. Homer Durham [1960], 258).

Fautuaina tamaiti aoga e tusi nisi o nei faamatalaga i a latou tusitusiga paia i tala ane o le Mose 6:35-36. Faamatala atu faapea o tagatavaai o ni perofeta foi.

Otooto le Mose 7:16-21 e fesoasoani ai i tamaiti aoga ia malamalama i le mea na tupu ia i latou na taliaina Enoka o se tagatavaai ma mulimuli i ana upu.

  • E faapefea e nei fuaiupu ona faaalia le taua o le faalogo i perofeta ma talifaaaliga o aso nei? (Ia mautinoa ua malamalama tamaiti aoga i le aoaoga faavae lenei: E fesoasoani perofeta ia i tatou ia iloa mea mai le silasila a le Atua, ma e faamanuiaina i tatou ao tatou talitonu ia latou upu.)

Faitau le saunoaga lenei a Elder M. Russell Ballard o le Korama a Aposetolo e Toasefululua:

Elder M. Russell Ballard

“Uso e ma tuafafine, o le tausaga lenei e atoa i ai le 10 o tausaga talu ona tuuina mai le folafolaga i le lalolagi i le aiga, e le Au Peresitene Sili ma le Korama a Aposetolo e Toasefululua i le 1995 [tagai ‘O Le Aiga: O Se Folafolaga i le Lalolagi,’ Ensign po o le Liahona, Nov. 2010, 129]. Sa avea ma o loo avea nei ma se valaau manino ina ia puipuia ma faamalolosia aiga. …

“O le folafolaga o se faamatalaga faaperofetaga, e le gata na tuuina mai e perofeta, ae na muamua mai nai lo le taimi o loo tutupu ai. O loo lapataia ai le tetee atu i le tele o mea ua faamata’uina ma osofaia ai ia aiga i le gasologa o le sefulu tausaga ua mavae ma valaau mai ai mo le faamuamua ma le faamamafa o loo moomia e aiga pe afai e faasaoina i se siosiomaga lea e foliga mai ua faaleagaina i faaipoipoga faaleaganuu ma le va o matua ma fanau.

“O le gagana manino ma le faigofie o le folafolaga o loo tu matilatila e faatusatusa i manatu fenumiai ma le faigata o se lalolagi lea e le mafai ona malilie i se faauigaga o le aiga” (“O Le Mea e Sili Ona Taua E Sili Atu Foi Ona Umi,” Ensign po o le Liahona, Nov. 2005, 41).

  • O le a sou manatu i le uiga o le saunoaga a Elder Ballard e faapea o le folafolaga i le aiga na “muamua mai nai lo le taimi o loo tutupu ai”?

  • E faapefea e le folafolaga i le aiga ona faamautinoaina lou talitonuga faapea o le Au Peresitene Sili ma Aposetolo e Toasefululua o ni perofeta, tagatavaai ma talifaaaliga?

Molimau atu faapea ona e alofa le Tama Faalelagi ia i tatou ma e finagalo ia avea i tatou faapei o Ia, ua Ia auina mai ai ia i tatou perofeta ma tagatavaai.

“O Le Aiga: O Se Folafolaga i le Lalolagi”

O le oo mai o le folafolaga i le aiga

Ia mautinoa o tamaiti aoga uma ua maua se kopi o “O Le Aiga: O se Folafolaga i le Aiga” (lds.org/topics/family-proclamation). (Atonu e te manao e saunia se kopi ua lolomiina mo tamaiti aoga e manaomia.) Uunaia tamaiti aoga e aumai se kopi lolomi pe faanumera o le folafolaga i le aiga i vasega taitasi i le kosi atoa. Faamatala atu faapea “O Le Aiga: O se Folafolaga i le Lalolagi” na tuuina atu muamua lava i le Ekalesia e Peresitene Gordon B. Hinckley (1910–2008) ia Setema 23, 1995, i se sauniga aoao a le Aualofa.

  • O le a le mea ua tau mai e le autu ia i tatou e uiga i tagata ua faamoemoeina e faitauina lenei folafolaga?

  • Aisea i lou manatu na faasalalauina atu ai lenei folafolaga i le lalolagi nai lo le na o tagata lava o le Ekalesia? (Ao tali mai tamaiti aoga, tusi le upumoni lenei i le laupapa: E valaau e le Atua perofeta e folafola atu Ana upumoni i Ana fanau uma.)

Faamatala atu faapea talu ona faatuina le Ekalesia, e na o le lima folafolaga ua faasalalauina atu e taitai o le Ekalesia. O le tasi na faasalalauina e le Au Peresitene Sili, o le tasi e le Korama a Aposetolo e Toasefululua, ma isi na faasalalauina faatasi e le Au Peresitene Sili ma le Korama a Aposetolo e Toasefululua. O folafolaga e faasaoina o ni faamatalaga e maoae le taua. (Afai e fesili tamaiti aoga e uiga i nei folafolaga e lima, faasino i latou i le Encyclopedia of Mormonism, 5 vol. [1992], “Proclamations of the First Presidency and the Quorum of the Twelve Apostles,” 3:1151, eom.byu.edu.)

Tau atu i tamaiti aoga faapea ao lei faitauina le folafolaga i le aiga, na tuuina atu e Peresitene Hinckley nisi o mafuaaga na uunaia ai taitai o le Ekalesia e lolomi lenei tusiga taua. Faaali atu le saunoaga lenei a Peresitene Hinckley, ma valaaulia se tamaitiiti aoga e faitau leotele:

Peresitene Gordon B. Hinckley

“Ou te le manaomia le faamanatu atu ia te outou o le lalolagi o loo tatou i ai o se lalolagi o le faasoesa, o fesuiaiga o tulaga faatauaina. O leo ii leoleoa o loo valaau mai mo se mea se tasi po o le isi e taufaasese i taimi e faamaonia ai tulaga o amio. O taula o le mama o lo tatou sosaiete ua matuai oo lava i se tulaga leaga” (“Stand Strong against the Wiles of the World,” Ensign, Nov. 1995, 99).

  • O le a sou manatu i le uiga o le saunoaga a Peresitene Hinckley faapea “o taula o le mama o lo tatou sosaiete ua matuai oo lava i se tulaga leaga”? (Atonu e te manao e faasino atu faapea o taula o ni maea ia po o filifili na e taofia faatasi ni mea.)

  • O le a faapefea ona e faamatalaina le mea ua tupu i “taula o le mama” o le sosaiete talu mai le 1995, ina ua saunoa mai Peresitene Hinckley e uiga i le tulaga matautia o le leaga o le tulaga mama?

Faaali atu le parakalafa lenei mai le lauga a Peresitene Hinckley. Tuu atu i tamaiti aoga se taimi e faitau ai ma tusia upu ma fuaitau e faamatalaina atili ai faafitauli o loo vaaia ai e taitai o le Ekalesia i le lalolagi ma mafuaaga na latou faasalalauina atu ai lenei folafolaga.

Peresitene Gordon B. Hinckley

“Faatasi ai ma le tele o le tuusaoloto ua faaigoa faafoliga e faapea o mea moni, faatasi ai ma le tele o le taufaasese e faatatau i faatulagaga faatonuina ma mea e faatauaina, faatasi ai ma le tele o faatauanauga ma faatosinaga ina ia talia lemu le pisia mai le lalolagi, ua matou lagonaina le tatau ona fautua atu ma lapataiina. I le faateleina o lenei tulaga, o i matou o le Au Peresitene Sili ma le Aufono a Aposetolo e Toasefululua ua tuuina atu nei se folafolaga i le Ekalesia ma le lalolagi o se faalauiloaga ma se toe faamautuina o tulaga faatonuina, aoaoga faavae, ma faatinoga e faatatau i le aiga ia ua faaleoina so’o atu e perofeta, tagatavaai, ma talifaaaliga a lenei ekalesia i le faagasologa o lona talafaasolopito” (“Stand Strong against the Wiles of the World,” 100).

A o faasoa mai e tamaiti aoga mea na latou iloaina, tusi a latou tali i le laupapa. E mafai ona foliga faapea le laupapa:

O a faafitauli na vaaia e taitai o le Ekalesia i le lalolagi?

O le faafoliga e faapea o le upumoni

Taufaasese e faatatau i tulaga faatonuina ma tulaga faatauaina

Faatauanauga ma faatosinaga ina ia talia lemu le pisia mai le lalolagi

O a nisi o mafuaaga na faasalalauina ai e taitai o le Ekalesia lenei folafolaga?

Fautua atu ma lapataiina

Faalauiloaga ma se toe faamautuina o tulaga faatonuina, aoaoga faavae, ma faatinoga e faatatau i le aiga ua faaleoina so’o atu e perofeta, tagatavaai, ma talifaaaliga a lenei ekalesia

  • O Le a Le “faafoliga”? (O le faafoliga o le faauigaga sese e faapea o se upumoni.) Ua faapefea ona e vaaia ni manatu sese ua aoaoina faapea e sao i le fesootaiga ma le aiga? (E mafai ona e sue i le MF&F 89:4 o se faataitaiga o le faafoliga.)

  • O a mea e mafai ona tatou aoao e uiga i tiutetauave a perofeta ma aposetolo o aso e gata ai mai le saunoaga a Peresitene Hinckley? (O tali a tamaiti aoga e tatau ona aofia ai le upumoni lenei: O perofeta o loo i ai se tiutetauave paia e folafola atu “tulaga faatauaina, aoaoga faavae, ma faatinoga e faatatau i le aiga a le Alii.”)

Tofi tamaiti aoga e faaalu ni nai minute e faitau ai le folafolaga i le aiga ma faailoa mai nisi o tali ua ia saunia i fesili o aso nei e uiga i le aiga. A maea se taimi talafeagai, fai i tamaiti aoga e faasoa mai mea na latou maua. Ona o isi lesona e aofia ai faamatalaga o le folafolaga, aua le faaaluina le tele o taimi i lenei gaoioiga.

Molimau atu i upumoni nei: O le folafolaga i le aiga e tumu i tali musuia i faafitauli o le lalolagi. O le folafolaga o se taula mautu mo tagata ma aiga i se lalolagi e fesuisuiai tulaga faatauaina.

Faamatala atu faapea ina ua uma ona faitau e Peresitene Hinckley le folafolaga i le aiga, na ia folafola mai:

Peresitene Gordon B. Hinckley

“Matou te fautuaina tagata uma e faitauina ma le faaeteete, manatunatu, ma le agaga tatalo i lenei folafolaga. O le malosi o soo se atunuu e faavae i totonu o puipui o ona aiga. Matou te uunaia o tatou tagata i soo se mea e faamalosia o latou aiga i le (“Stand Strong against the Wiles of the World,” Ensign, Nov. 1995, 101).

  • O le a le uiga ia te oe o le faitau ma le agaga tatalo le folafolaga i le aiga?

  • O a ni auala ua faatosina ai ou lagona e mataupu faavae o loo maua i le folafolaga i le aiga e uiga i le faaipoipoga ma le aiga?

Fesoasoani i tamaiti aoga e mafaufau ma faasoa mai pe faapefea ona latou mafai ona faaaoga le uunaiga a Peresitene Hinckley e aoao ma faaaoga aoaoga ma mataupu faavae o loo maua i le folafolaga i le aiga (mo se faataitaiga, taulotoina o vaega o le folafolaga). Tusi tali a tamaiti aoga i le laupapa, ma valaaulia i latou e mafaufau ma le agaga tatalo pe faapefea ona latou faamalosia i latou lava ma o latou aiga i le faaaogaina o “nei tulaga faatauaina o taimi faamamaluina.”

Faitauga a Tamaiti Aoga