Lesona 16

O Mana Paia o le Fanauina Mai o Fanau

Folasaga

“Na poloai mai le Atua o mana paia o le foafoaina o fanau ua na o le va lava o le alii ma le tamaitai, ua faaipoipoina faaletulafono o se tane ma le ava e tatau ona faaaogaina ai” (“O le Aiga: O se Folafolaga i le Lalolagi,” Ensign po o le Liahona, Nov. 2010, 129). Mo fanau uma a le Atua, o le ola ai i le tulafono o le ola mama e manaomia ai i tatou ia mama aiai ia tatou amioga e faapena foi o tatou mafaufauga. O le faia valalata i le va o le tane ma le ava e matagofie ma paia, ma ua faauuina e le Atua mo le fanauina mai o fanau ma le faaalia o le alofa.

Faitauga Faaopoopo

• David A. Bednar, “Matou te Talitonu i le Nofomama,” Ensign po o le Liahona, Me 2013, 41–44.

• Dallin H. Oaks, “O Ponokarafi [tusi ma ata mataga],”Ensign po o le Liahona, Me 2005, 87-90.

• Linda S. Reeves, “Puipuiga mai Ponokalafi—o se Aiga e Taulai Atu ia Keriso,” Ensign po o le Liahona, Me 2014, 15–17.

• “Mama Atoatoa i Tulaga Feusuai,” Mo le Malosi o le Autalavou tamaitusi, 2011), 35–37.

Fautuaga mo le Aoaoina Atu

Salamo 24:3–4; Mataio 5:8; Iakopo 2:31–35; Alema 39:3–5, 9; Mataupu Faavae ma Feagaiga 42:22–24; 121:45–46

O le tulafono a le Alii o le ola mama

Tusi le fuaiupu lenei i le laupapa ma fai i tamaiti aoga pe o le a faapefea ona latou faaumaina:

“O le agasala faataumaoi a lenei augatupulaga o le .”

Faaali atu le fuaitau lenei mai ia Peresitene Ezra Taft Benson (1899–1994), ma valaaulia se tamaitiiti aoga e faitau leotele:

“O le agasala faataumaoi a lenei tupulaga o feusuaiga le mama. O lenei tulaga, na saunoa ai le Perofeta o Iosefa, o le a avea ma puna o isi mau faaosoosoga, isi tu’iga, ma isi faigata mo toeaiina o Isaraelu nai lo se isi mea” (Aoaoga a Peresitene o le Ekalesia: Ezra Taft Benson [2014], 245).

• E faapefea ona faaaoga le saunoaga a Peresitene Benson i lo tatou lalolagi i aso nei?

Faaali atu le saunoaga lenei mai le Mo Le Malosi o le Autalavou,, ma fai i se tamaitiiti aoga e faitau leotele. Ao latou faalogo, fai i tamaiti aoga e mafaufau pe faapefea ona latou faamatalaina le tulafono a le Alii i se fuaiupu se tasi.

“O le tulaga faatonuina a le Alii e uiga i le mama atoatoa i tulaga feusuai e manino ma e le masuia. Aua lava nei e faia ni sootaga feusuai a o le i faaipoipo, ma ia e faamaoni atoatoa i lou toalua pe a uma le faaipoipoga. …

“… A o lei faaipoipo, ia aua lava nei faia ni kisi faananau loto, pe taoto i luga o se isi tagata, pe tago i vaega lilo, po o itutino sa o se isi tagata, pe o fai ni ofu pe leai foi. Aua lava nei e faia soo se mea e faaosoina ai ni lagona feusuai. Aua nei e faaosofiaina na lagona i lou tino” (Mo Le Malosi o le Autalavou [tamaitusi, 2011], 35–36).

• O le a faapefea ona e tuuina atu le tulafono a le Alii o le ola mama i se fuaiupu se tasi? (Ao tali mai tamaiti aoga, faamamafa atu o le aoaoga faavae lenei mai le folafolaga i le aiga: “Na poloai mai le Atua o mana paia o le foafoaina o fanau ua na o le va lava o le alii ma le tamaitai, ua faaipoipoina faaletulafono o se tane ma le ava e tatau ona faaaogaina ai” [“O le Aiga: O se Folafolaga i le Aiga,” Ensign po o leLiahona, Nov. 2010, 129].)

• E mafai faapefea e lapataiga ua otootoina atu i le palakalafa lona lua o le upusii mai le Mo Le Malosi o le Autalavou ona fesoasoani e taofia se tasi mai le solia o nisi agasala e sili atu le matuia o le ola mama?

Kopi le siata lenei i luga o le laupapa. Vaelua le vasega ma valaaulia le vaega e tasi e suesue fuaitau i lalo o le autu “taunuuga” ma le isi vaega e suesue vaega na i lalo o le autu o “faamanuiaga”. Uunaia tamaiti aoga e vaai i vaefaamatalaga ao latou suesue.

Taunuuga o le solia o le tulafono o le ola mama:

Iakopo 2:31–35

Alema 39:3-5, 9

MF&F 42:22-24

Faamanuiaga o le ola i le tulafono o le ola mama:

Salamo 24:3-4

Mataio 5:8

MF&F 121:45-46

A maea se taimi talafeagai, talanoaina ma le vasega mea na latou aoaoina. Fai atu fesili e pei o fesili nei:

• E faapefea e taunuuga o le solia o le tulafono o le ola mama ona faaalia ai le taua o le tausia o lenei poloaiga?

• Ua faapefea ona e mauaina faamanuiaga i le usiusitai i le tulafono o le ola mama?

Faaali atu le upumoni lenei mai le folafolaga i le aiga:

“Matou te ta’utino atu o le ala ua foafoaina ai le ola faitino, ua faatuina i le finagalo paia” (“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129).

• O le a le uiga o lenei fuaitau ia te oe?

Faaaoga saunoaga nei a Elder Jeffrey R. Holland ma David A. Bednar o le Korama a Aposetolo e Toasefululua e fesoasoani e faateleina ai le malamalama o tamaiti aoga i lenei upumoni. Fai i se tamaitiiti aoga e faitau leotele ia fuaitau ao faalogo le vasega mo mafuaaga e faavavau ai le taua o le tulafono o le ola mama.

“O le tino o se vaega taua o le agaga. O lea aoaoga taua ma tulaga ese a le Au Paia o Aso e Gata Ai e faamamafaina ai le mafuaaga e matuai ogaoga ai le agasala faalefeusuai. Matou te tautino atu o se tasi na te faaaogaina le tino o soo se tasi na tuuina mai i le Atua e aunoa ma se faatagaina Paia, ua ia faasaunoa pe faia faatautala le faamoemoega autu ma faatulagaga o le olaga, ‘o le autu lena’ i le ola, e pei ona taua e Peresitene Boyd K. Packer i se tasi taimi. I le faaaogaina o le tino o le isi tagata—o lona uiga o le faaaogaina foi lea o lona agaga—ua faaleagaina e ia le Togiola a Keriso lea na laveaiina ai lena agaga ma maua ai le meaalofa o le ola faavavau” (Jeffrey R. Holland, “O le Mama o le Tagata Lava Ia,” Liahona, Ian. 1999, 90).

“O le faaipoipoga i le va o le tane ma se tamaitai o le alafua faatagaina lea, e ulufale mai ai agaga o le muai olaga i le olaga nei. O le faafitia atoatoa o feusuaiga a o lei faaipoipo ma le faamaoni a’ia’i i totonu o le faaipoipoga, e puipuia ai le paia a’ia’i o lenei alafua paia.

“O le mana o le foafoaina o fanau e matuai taua faaleagaga. O le faaaoga sese o lenei mana e faatoilalo ai faamoemoega o le fuafuaga a le Tama ma lo tatou i ai i le olaga nei. O lo tatou Tama Faalelagi ma Lona Alo o tufuga ia ma ua faamatuu mai ia i tatou taitoatasi se vaega o lo La’ua mana foafoa. … O o tatou lagona e uiga i ai ma le faaaogaina o lena mana faalelagi, o le a fuafua ai se fuataga tele o lo tatou fiafia i le olaga nei ma lo tatou taunuuga i le faavavau” (David A. Bednar, “Matou te Talitonu i le Nofomama,” Ensign po o le Liahona, Me 2013, 42).

• Aisea e faavavau ai le taua o le tulafono o le ola mama?

• E faapefea e lo tatou faaaogaina o le mana o le fanauina o fanau ona aafia ai lo tatou fiafia i le ola faitino ma le faavavau?

Tuu atu i tamaiti aoga se taimi e tusi ai i lalo ni puipuiga e tatau ona latou faia e fesoasoani ia i latou e usiusitai ai i le tulafono o le ola mama.

Mataio 5:27–28; Roma 8:6; Mataupu Faavae ma Feagaiga 63:16

O le matautia o ponokalafi

Fai i tamaiti aoga e faitau fuaiupu nei: Mataio 5:27–28; Roma 8:6; ma le Mataupu Faavae ma Feagaiga 63:16. Mafaufau e fai i tamaiti aoga e faataitai le tomai tau suesuega faaletusitusiga paia o le fatuina o filifili o mau i le amataina i le fuaitau muamua, tusiaina o se mau fesootai e sosoo ai, ma faaauau ai pea seia oo i le fuaitau mulimuli.

• O a amioga ua faasa mai e nei fuaitau? (O le tasi amioga e tatau ona faailoa mai e tamaiti aoga o le faaaogaina o ponokalafi.)

• O a taunuuga o le vaavaai pe faitau i ponokalafi ua faailoa mai e nei mau?

Faaali atu saunoaga nei a Elder Dallin H. Oaks ma Richard G. Scott o le Korama a Aposetolo ma Sister Linda S. Reeves, le fesoasoani lua i le au peresitene aoao o le Aualofa. Fai i tamaiti e faitau leotele, ma valaaulia le vasega e vaai mo taunuuga faaopoopo o le faaaogaina o ponokalafi.

“O ponokarafi e faaleagaina ai le malosi o se tasi e fiafia ai i se mafutaga masani faalelagona, alofa, ma le faaleagaga ma se tagata o le isi itupa” (Dallin H. Oaks, “O Ponokarafi [tusi ma ata mataga],” Ensign po o le Liahona, Me 2005, 89).

“Ua matua atamai lava Satani i le faaaogaina o le mana faavaisu o ponokalafi e faaitiitia ai le malosi faaletagata e taitaia ai e le Agaga. O le osofaiga a ponokalafi i ona ituaiga feai, inosia, faataumaoi uma ua afua ai faanoanoaga tele, o mafatiaga, lototiga, ma ua faatamaia ai ulugalii” (Richard G. Scott, “Ia Maua le Taitaiga Faaleagaga,” Ensign po o le Liahona, Nov. 2009, 8).

“[O fanau ma talavou] e tatau ona latou iloa le matautia o ponokalafi ma le auala na te puleaina ai olaga, lea e mafua ai le aluese o le Agaga, lagona lē mautonu, taufaasese, faatamaiaina ai mafutaga, leai ai se loto pulea, ma le toetiiti faaalu atoa ai le taimi, mafaufau, ma le malosi” (Linda S. Reeves, “Puipuiga Mai Ponokalafi—O se Aiga e Taulai Atu Ia Keriso,” Ensign po o le Liahona, Me 2014, 15).

Uunaia tamaiti aoga o loo tauivi ma le faaaogaina o ponokalafi po o isi ituaiga ola le mama e asiasi i o latou epikopo po o peresitene o paranesi. Faamautinoa i latou faapea latou te toe maua le ala i le filemu ma le fiafia e ala i le salamo. Molimau atu i le upumoni lenei: O le aloese mai ponokalafi o le a taitai atu ai i le fiafia sili atu i lenei olaga ma le faavavau. Mafaufau e lisi uepisaite a le Ekalesia nei i le laupapa e fesoasoani ai i tamaiti aoga ua aafia i le faaaogaina o ponokalafi

overcomingpornography.org

addictionrecovery.lds.org

Kenese 2:21-24

O le matafaioi o le sootaga vavalalata i le faaipoipoga

Manatua: Ona o le maaleale o le natura o lenei vaega o le lesona, faalagolago i aoaoga faaperofeta ma aloese mai le aoaoina i tua atu o mea ua maua iinei, e aofia ai le faasoaina atu o faamatalaga e uiga i lau faia ma lou toalua.

Molimau atu faapea o le sootaga vavalalata e paia, talafeagai, ma faapitoa pe a faia i totonu o le sootaga o le faaipoipoga, le auala ua tusia mai e le Alii.

Fai atu i se tamaitiiti aoga e faitau leotele le Kenese 2:21-24.

• E ui e le o faapitoa le ta’uaina, o le a le faamoemoega o le sootaga vavalalata faaletino ua faatatau i ai nei fuaiupu i le va o le tane ma le ava? (Ina ia tasi ma o tatou taitoalua.)

Faaali atu le saunoaga lenei a Elder Jeffrey R. Holland:

“O le alofa molitino mo se ulugalii faaipoipoina aua o le faailoga sili lea o le tuufaatasiga, o se atoatoa ma se tuufaatasiga ua faauuina ma faauigaina e le Atua. Mai le Faatoaga o Etena agai mai i luma, o le faaipoipoga na faamoemoe e faaatoaina ai le faatasiga o se alii ma se tamaitai o o laua loto, o faamoemoega, o le alofa, o le aiga, o le lumanai, ma mea uma” (“O le Mama o le Tagata Lava Ia,” Liahona, Ian. 1999, 90).

• E faapefea e le saunoaga a Elder Holland ona fesoasoani ia te oe e malamalama atili ai i faamoemoega o le sootaga vavalalata faaletino i le va o le tane ma le ava? (E tatau ona malamalama tamaiti aoga i le vaega lenei: O le sootaga vavalalata i totonu o le faaipoipoga e faamalosia ai sootaga faaleagaga ma faalelagona i le va o le tane ma le ava.

Mafaufau e tufa atu saunoaga nei i se pepa e tufa atu. Saunia se kopi mo tamaiti taitoatasi, ma fai i tamaiti aoga e vase faamoemoega o le sootaga vavalalata i le faaipoipoga.

“O le tuufaatasia o itupa, tane ma le ava (ma na o le tane ma le ava), sa mo le faamoemoega autu lava o le aumaia o fanau i le lalolagi. O aafiaga faalefeusuaiga e lei fuafuaina lava e le Alii e avea ua na o se mea taalo pe na ona faamalieina ai o manaoga ma tuinanau” (Spencer W. Kimball, “The Lord’s Plan for Men and Women,” Ensign, Oke. 1975, 4).

“O Le Ekalesia a Iesu Keriso o le Au Paia o Aso e Gata Ai e i ai se tulaga faatonuina e tasi, e mausali o le ola mama faalefeusuaiga: o sootaga mafana felata’i e na o le va lava o se alii ma se tamaitai i le sootaga o le faaipoipoga ua faatonu mai i le fuafuaga a le Atua, e tatau i ai. O na sootaga ua le na o se naunau e fiailoa, se manaoga ia faamalieina, po o se ituaiga o taaloga po o faafiafiaga e tulimatai ma le manatu faapito. … Ae, ua latou i ai i le olaga faitino o se tasi o faailoaga taua o lo tatou natura paia ma gafatia, ma o se auala o le faamalolosia o noataga faalelagona ma faaleagaga i le va o le tane ma le ava” (David A. Bednar, “Matou te Talitonu i le Nofomama,” Ensign po o le Liahona, Me 2013, 42).

Talanoaina po o a faamoemoega na vaseina e tamaiti aoga.

Valaaulia tamaiti aoga e mafaufau loloto i mea na latou aoaoina e uiga i le tulafono o le ola mama ona tusi lea o tali i fesili nei i a latou api talaaga:

• E faapefea e le malamalama i le tulafono o le ola mama ona faamalosia lou naunau e ola i se olaga e mama aiai?

• O a mafuaaga e te ola ai i le tulafono o le ola mama?

Faaiu i le faasoa atu o lau molimau e uiga i mataupu faavae na talanoaina i le vasega.

Faitauga a Tamaiti Aoga

• Kenese 2:21–24; Salamo 24:3–4; Mataio 5:8, 27–28; Roma 8:6; Iakopo 2:28, 31–35; Alema 39:1–9; Mataupu Faavae ma Feagaiga 42:22–24; 63:16; 121:45–46.

• David A. Bednar, “Matou te Talitonu i le Nofomama,” Ensign po o le Liahona, Me 2013, 41–44.

• “Mama Atoatoa i Tulaga Feusuai,” Mo le Malosi o le Autalavou (tamaitusi, 2011), 35–37.