Lesona 2: Ua Tautino Mai ma le Faamaoni Perofeta ma Aposetolo
Lesona 2
Ua Tautino Mai ma le Faamaoni Perofeta ma Aposetolo
Folasaga
“O Le Aiga: O Se Folafolaga i le Lalolagi” e amata i le fuaitau lenei: “O i matou, o le Au Peresitene Sili ma le Aufono a Aposetolo e Toasefululua o le Ekalesia a Iesu Keriso o le Au Paia o Aso e Gata Ai, matou te tautino atu ma le faamaoni …” (Ensign po o le Liahona, Nov. 2010, 129). O perofeta i tisipenisione uma lava ua i ai se tiutetauave e folafola atu le finagalo o le Alii ma lapatai atu i taunuuga o le agasala. O lenei lesona o le a fesoasoani i tamaiti aoga e malamalama i le matafaioi o perofeta o ni tagatavaai e lapataia i tatou i faalavelave ua muai vaaia.
Faaali atu i tamaiti aoga le ata o se olo matamata, ma fesili ia i latou pe mafai ona latou faailoa mai le fausaga i le ata. Faamatala atu faapea o le fausaga o se faataitaiga o se olo matamata anamua. (O se isi auala, afai e maua i lau gagana, faaali atu i le minute muamua le vitio “Watchman on the Tower,” lds.org/media-library.) Fesili i tamaiti aoga po o a ituaiga o mea e tau vaavaai i ai tagatavaai ma aisea e taua ai mo i latou le faia o o latou tiute.
Valaaulia tamaiti aoga e faitau le Esekielu 33:1-3 ma faailoa mai se tiutetauave a se tagatavaai.
O le a le tiutetauave a le tagatavaai? (Ia lapataia tagata i mala ua lalata mai.)
Fai i se tamaitiiti aoga e faitau leotele le Esekielu 33:4-7.
O le a le tiute na atofa atu e le Alii ia Esekielu?
E faapefea ona faapei perofeta o tagatavaai i luga o se olo? (Atonu e fesoasoani mo tamaiti aoga le faitauina o le Mataupu Faavae ma Feagaiga 1:4–5, 11, 14 e fesoasoani ia i latou e malamalama ai faapea o perofeta o aso nei e auauna atu o ni tagatavaai. E mafai ona e fautuaina tamaiti aoga e faafesootai nei fuaiupu i le Esekielu 33:4-7. Mafaufau e faasino atu faapea o Elder M. Russell Ballard o le Korama a Aposetolo e Toasefululua na folafola mai, “I le avea ai ma Aposetolo o le Alii o Iesu Keriso o lo matou tiute o le avea lea ma tagatavaai i le olo” [“Ia Faaeteete I Perofeta Pepelo ma Faiaoga Pepelo,” Liahona, Ian. 2000, 73].)
Molimau atu i le aoaoga faavae lenei: Ua valaaulia e le Tama Faalelagi perofeta o aso e gata ai e lapatai i tatou i mala ua lalata mai.
Ina ia faamamafaina lenei aoaoga faavae, faaali atu le saunoaga lenei a Peresitene Henry B. Eyring o le Au Peresitene Sili, ma fai i se tamaitiiti aoga e faitau leotele:
“E foliga mai e leai se gataaga i manaoga o le Faaola e taitai atu ai i tatou i le saogalemu. Ma o loo i ai le faamaoni i le ala ua Ia faaalia ai ia i tatou le ala. Na te valaauina e ala i auala e sili atu nai lo le auala e tasi ina ia oo atu ia i latou o e naunau e taliaina. Ma o na auala e masani ona aofia ai le auina atu o le savali e ala i fofoga o Ana perofeta i soo se taimi lava e agavaa ai tagata ina maua perofeta a le Atua ia te i latou. O na auauna ua faatagaina e masani ona poloaiina i latou na ia lapatai atu i tagata, ma tau atu i ai le ala e saogalemu ai” (“Mauaina o le Filemu i Fautuaga,” Liahona Iulai 1997, 24).
O le a le taimi na e lagona ai le puipuiga e ala i le mulimuli i le fautuaga faaperofeta?
O le a se fautuaga na e faalogo i ai mai aposetolo ma perofeta o aso nei e mafai ona aumaia ai le puipuiga i aiga?
O a auala ua avea ai le folafolaga i aiga o se leo o le lapataiga mai lo tatou Tama o i le Lagi?
O perofeta ma aposetolo e fesoasoani ia i tatou e malamalama ai i le silasila a le Alii i aiga
Faasoa atu le saunoaga lenei a Elder M. Russell Ballard o le Korama a Aposetolo e Toasefululua. Fai i tamaiti aoga e vaavaai mo auala ua silafia ai e perofeta mala i le lalolagi o aso nei.
“Ua ou faalogo e manatu nisi tagata e le iloa e taitai o le Ekalesia le mea moni o loo tutupu i le lalolagi. O le mea e galo ia i latou, o i matou o alii ma tamaitai ua lava le poto masani, ma ua matou ola i le tele o nofoaga ma galulue faatasi ma le tele o tagata mai tulaga eseese. O a matou tofiga faale-Ekalesia o i ai nei matou te malaga ai i le lalolagi atoa, lea matou te feiloai ai ma taitai faaupufai, faalelotu, faapisinisi, ma taitai o galuega alofa i le lalolagi. E ui ina matou asiasi atu i le Maota Paepae i Uosigitone, D.C., faapea ai ma taitai o malo ma [isi lotu] i le lalolagi atoa, ae ua matou asiasi atu foi i [aiga ma tagata] sili ona limavaivai i le lalolagi. …
“A outou mafaufau loloto i o matou olaga ma auaunaga, o le a outou ioeina lava ua matou vaaia ma tofo i le lalolagi i auala ua oo foi i ai isi. O le a outou iloaina e tele atu mea o loo tutupu ua matou vaaia i le lalolagi i lo le toatele o isi tagata. …
“… O loo i ai se mea e uiga i le atamai o le tagata toatasi ma le atamai tuufaatasi o taitai o le Ekalesia ia e tatau ona outou maua ai sina mafanafana. Ua matou oo uma i ai, e aofia ai taunuuga o tulafono ma aiaiga faavae eseese faalemalo, faanoanoaga, faalavelave, ma maliu i o tatou lava aiga. E le o tāvavaeeseina i matou mai i o outou olaga” “Nofo i Totonu o le Vaa ma Pipii Mau!” Ensign po o le Liahona, Nov. 2014, 90).
E mafai faapefea ona fesoasoani aafiaga lautele a taitai o le Ekalesia ia i latou i o latou matafaioi o ni tagatavaai?
Faamatala atu faapea o perofeta ua oo i le tulaga e sili mamao atu le taua nai lo le aafiaga o le olaga e fesoasoani ia i latou e faataunuu o latou tiute paia ua tofia i ai. Fai i se tamaitiiti aoga e faitau leotele le Amosa 3:6-7. Faasino atu i tamaiti aoga faapea o le Faaliliuga a Iosefa Samita ua suia le upu “faia” i le “iloa” i le fuaiupu 6 ma le upu “ae” i le “seia” i le fuaiupu 7 (vaai i vaefaamatalaga i nei fuaiupu e lua). O lenei talanoaga atonu o se avanoa sili lea mo oe e uunaia ai tamaiti aoga e faaaoga vaefaamatalaga i taimi o a latou suesuega patino i tusitusiga paia .
O le a le mea ua aoao mai e le Amosa 3:6-7 e uiga i perofeta?
Faasoa atu le faamatalaga lenei i tamaiti aoga: O se perofeta o “se tagata ua valaauina e, ma saunoa mai mo le Atua. I le avea ai o se avefeau a le Atua, o se perofeta e maua poloaiga, valoaga, ma faaaliga mai le Atua. … O se perofeta e fetuuina le agasala ma valoia ona taunuuga” (Guide to the Scriptures, “Prophet,” scriptures.lds.org).
Kopi le ata lenei i luga o le laupapa:
Faataga tamaiti e mafaufau loloto mo ni nai minute ma talanoaina le ata. Atonu e te manao e faamatala faapea o le ata ua faaalia ai le silasila a le Atua i le aiga e aofia ai le muai olaga, olaga faitino, ma le olaga pe a mavae le oti. E ala mai faaaliga, e maua e perofeta se vaaiga e lautele atu, ona latou fesoasoani lea ia i tatou e faateleina la tatou vaaiga ma le malamalama.
E mafai faapefea e lenei ata ona faaalia le mafuaaga e tatau ai ona tatou popoto ma suesue le folafolaga i le aiga? (Tusi i le laupapa le mea lenei: E ala i le suesueina o le folafolaga i le aiga, e mafai ai ona tatou aoaoina le silasila a le Tama Faalelagi i le aiga.)
Fai i tamaiti aoga e avane a latou kopi “O Le Aiga: O se Folafolaga i le Lalolagi.” Faamamafa atu le fuaitau amata: “O i matou, O Le Au Peresitene Sili ma le Aufono a Aposetolo e Toasefululua O Le Ekalesia a Iesu Keriso o le Au Paia o Aso e Gata Ai, matou te tautino atu ma le faamaoni. …” Tuu atu i tamaiti aoga ni nai minute e suesue ai le folafolaga i le aiga, ma vaavaai mo faamaoniga faapea o le silasila a le Atua i le faaipoipoga ma le aiga e ese mai le vaaiga a le lalolagi. Valaaulia tamaiti aoga e faasoa mai mea latou te maua, ma lisi tali a tamaiti aoga i le laupapa.
O le mulimuli i le fautuaga a perofeta o loo i le folafolaga i le aiga o le a tausia ai i tatou i le saogalemu
Valaaulia tamaiti aoga e suesue le Mataupu Faavae ma Feagaiga 90:1-3 e faailoa ai mea na tuuina atu e le Alii i le Perofeta o Iosefa Samita.
O a mea na tuuina mai e le Alii ia Iosefa Samita? (O ki o le malo, ia e suitulaga i aia tatau o le au peresitene, po o le pule e taitai ai le malo o le Atua i le lalolagi.)
O ai o loo umia na lava ki i aso nei? (O sui taitasi o le Au Peresitene Sili ma le Korama a Aposetolo e Toasefululua.)
Valaaulia se tamaitiiti aoga e faitau leotele le Mataupu Faavae ma Feagaiga 90:4–5. Fai i le vasega e vaavaai mo mea na folafola mai e le Alii o le a oo mai i le Ekalesia e ala mai le Perofeta. (Na fetalai mai le Alii o le a maua e le Ekalesia “faaaliga.” Tau atu i tamaiti aoga o “faaaliga” o lona uiga “o faaaliga.”)
O le a le lapataiga na tuu mai e le Alii i le Au Paia i le fuaiupu e 5?
O le a le mataupu faavae e mafai ona tatou aoaoina mai i lenei lapataiga? (O tali e tatau ona atagia mai ai le malamalama i le mataupu faavae lenei: Afai tatou te taulimaina ma le manatu mama ia faaaliga e tuuina mai e le Atua e ala i Ana perofeta, o le a tatou tautevateva ma pauu. Mafaufau e tusi le mataupu faavae lenei i luga o le laupapa.)
Faaali atu saunoaga nei a Sister Carol F. McConkie o le au peresitene aoao a Tamaitai Talavou ma Elder M. Russell Ballard o le Korama a Aposetolo e Toasefululua:
“E mafai ona tatou filifili ia lē amanaiaina, manatu faatauvaa i ai, le ano i ai, pe fouvale foi i afioga a Keriso ua saunoa i ai Ana auauna faauuina. Ae ua aoao mai le Faaola e faapea o i latou o e faia ia mea o le a vavaeese mai Lona nuu o le feagaiga [tagai 3 Nifae 20:23]” (Carol F. McConkie, “Ola e Tusa ma Upu a Perofeta,” Ensign po o le Liahona, Nov. 2014, 79).
“Ua ou iloaina i lau galuega o i latou e faasolo ina leiloloa ma fenumiai e masani lava o i latou ia e tele ina … galo ia i latou a saunoa loa le Au Peresitene Sili ma le Korama a Aposetolo e Toasefululua i se leo autasi, o le siufofoga lava lea o le Alii mo lena taimi. Ua faamanatu mai e le Alii ia i tatou, ‘Pe i lo’u lava leo po o i le leo o a’u auauna, ua tutusa lava’ [MF&F 1:38]” (M. Russell Ballard, “Nofo i Totonu o le Vaa ma Pipii Mau!” 90).
O a nisi o mea e faaalia ai o nisi o loo manatu mama i le fautuaga o loo maua i le folafolaga i le aiga?
O a faamanuiaga ua e maua po o ua maua foi e isi i le faalogo i le fautuaga i le folafolaga i le aiga?
O a ni manatu ma lagona ua e maua e tusa ai ma perofeta o aso e gata ai e mafai ona e faasoa mai i le vasega?
Molimau atu faapea o le folafolaga i le aiga o se folafolaga musuia mai le siufofoga tuufaatasia o perofeta e toasefululima, tagatavaai, ma tali faaaliga. Uunaia tamaiti aoga e faaaoga le avanoa i lenei kosi atoa e tatalo ai mo se molimau e malosi atu o upumoni o loo maua i le folafolaga i le aiga.