Ia Maua Folafolaga Silisili Ese ma le Aoga
Ua faia e le Alii ni folafolaga agaalofa, ma ua Ia faamaonia mai foi o le a Ia le laa ese lava mai nei folafolaga.
Ou te momoli atu alofaaga ma faamanuiaga a le Au Paia faamaoni i le Pasefika i Saute.
O le mataupu faavae muamua o le talalelei o le faatuatua i le Alii o Iesu Keriso. E aofia ai le faatuatua i Lona soifua paia mai ma le tofi faalelagi ma le faatuatua e faapea, o le taitaiga a Lona Tama, na Ia faia ai le lalolagi ma mea uma o i ai (tagai Ioane 1:10; Mosaea 3:8). I le totonugalemu o lo tatou faatuatua ia Keriso, o loo i ai le faamautinoaga o Lana taulaga togiola, e ui lava o a tatou “agasala e ono pei o ofu mumu, e mafai ona sisina e pei o le kiona” (tagai Isaia 1:18).
O le faatuatua ia Keriso e aofia ai le malamalama e faapea, na sosoo Lona Faasatauroga ma Lona Toetu mai le tuugamau, ma o Lona togiola ua mafai ai e tagata uma ona toe ola mai (tagai 1 Korinito 15:21–23). O le faatuatua ia Keriso o le faamautinoaga lea na faaali atu o Ia ma Lona Tama Faalelagi i le taulealea o Iosefa Samita, e saunia ai le ala mo le Toefuataiga o mea uma i le tisipenisione o le atoaga o taimi. O Iesu Keriso o le ao o le Ekalesia lea o loo tauaveina Lona suafa paia.
E iloa lo tatou faatuatua i le Alii o Iesu Keriso pe a tatou talitonu i Ana aoaoga ma maua Ana “folafolaga o mea e silisili ese lava ma le aoga” ma “tofusia faatasi ai i le amioatua” (2 Peteru 1:4). E le masino folafolaga ua fofoga mai e Ana perofeta, ma ua faamautinoa mai ia i tatou e le Alii, “E le mavae atu lava a’u upu, a o le a faataunuuina lava, pe fai atu i lo’u lava leo po o le leo o a’u auauna, ua tusa lava ia” (MFF 1:38).
Ua faailoa mai e le Alii i nei aso e gata ai, “pe a tatou maua foi soo se faamanuiaga mai le Atua, e maua ai i le usiusitai i le tulafono lea e autu ai” (MFF 130:21). Ua faia e le Alii ni folafolaga agaalofa, ma ua Ia faamaonia mai foi o le a Ia le laa ese lava mai nei folafolaga, aua na fetalai o Ia, “Ua noatia a’u le Alii, pe a outou faia mea ou te fai atu ai; a e pe a outou le faia mea ou te fai atu ai, e leai sa outou folafolaga” (MFF 82:10).
Folafolaga Silisili ma le Taua
O le anoanoai o folafolaga silisiliese ma le taua a le Alii o loo aofia ai le faamagaloina o a tatou agasala pe a tatou “ta’uta’u atu ma lafoaia” (MFF 58:43; tagai MFF 1:32). O le toina mai o pupuni o le lagi o se folafolaga e maua e i latou o e totogiina se sefuluai faamaoni (tagai Malaki 3:10), ma o le mauaina o “oa sili o le malamalama” e faateleina atu ia i latou o e tausia le Upu o le Poto (MFF 89:19).
O le tausi atili ia mama mai le lalolagi o se folafolaga ia i latou o e tausia le Sapati ia paia (tagai MFF 59:9; Esoto 31:13). O le taitaiga mai le lagi ma musumusuga ua folafolaina atu ia i latou o e “fiafia i afioga a Keriso” (2 Nifae 32:3) ma ē “faatatau tusi paia uma” ia i latou lava (1 Nifae 19:23).
Na folafola mai foi le Alii “o mea uma e tatau tou te ole atu ai i le Tama i lo’u igoa, ma le faatuatua tou te maua ai, faauta, e foaiina mai ai ia te outou” (3 Nifae 18:20). Ua folafola mai ia i tatou e faapea o le a avea le Agaga Paia ma a tatou soa tumau pe a teuteuina [o tatou] manatu i le mama e le aunoa,” (tagai MFF 121:45–46). E mafai ona tatou mauaina le folafolaga faamalosiau o le anapogi, lea o le a “tatalaina ai “fusi na faia i le amioleaga,” tatalaina a tatou “fusi o le amo,” ma “gausia amo uma lava” (Isaia 58:6).
O i latou o e ua faamauina i totonu o malumalu paia ma o loo tausia faamaoni a latou feagaiga o le a mauaina le mamalu o le Atua, “o le mamalu lea o le atoatoa ma le fanafanau pea lava pea e faavavau faavavau lava” (MFF 132:19).
O nisi taimi, ona o lo tatou le onosai faalelalolagi, e mafai ai ona aluese la tatou vaai mai folafolaga taua a le Alii ma motusia ai lo tatou usiusitai mai le faataunuuina o nei folafolaga. Ua folafola mai e le Alii:
“Po o ai ea a’u, ua faapea mai ai le Alii, ua folafola atu ae le faataunuuina?”
“Ou te poloai atu ae le usiusitai tagata: ou te tatalaina ma latou le maua le faamanuiaga.
“Ona latou faapea ifo ai lea i o latou loto: E le o le galuega lenei a le Alii, aua e lei taunuu ana folafolaga. Ae oi talofa i se faapea, aua o loo faatali mai i lalo lo latou taui, ae le mai luga” (MFF 58:31–33).
O Le Iloa Mamao Atu o Folafolaga
O vaega taua o le faatuatua e i ai le onosai, faapalepale, ma le tumau e oo i le iuga. Na toe faamatalaina e le Aposetolo o Paulo le faatuatua o Apelu, Enoka, Noa, Aperaamo, ma Sarai, ma faaiuina ai e faapea, “na oti i latou nei uma lava o faatuatua, e lei maua mea na folafolaina, a ua iloa ai e i latou a e mamao, na mautinoa foi, ma latou talia ma le fiafia, ma latou tautino mai o tagata ese i latou ma aumau i le lalolagi” (tagai Eperu 11:4–13). O nei Au Paia faamaoni sa latou iloa o lenei olaga o se faigamalaga, ae le o lo latou taunuuga lea.
Ina ua 75 tausaga o Aperamo na folafola atu ai e le Alii ia te ia, “Ou te faia oe ma nuu tele”—ae o le t aimi lena e leai se la fanau ma Sarai (Kenese 12:2). O le 86 o ona tausaga na fanau ai e Akara le auauna a Sarai “o Isamaeli le atalii o Aperamo’ (Kenese 16:16).
Ma na suia e le Alii le igoa o Aperamo ia Aperaamo ma le igoa o Sarai ia Sara, ma ina ua toeitiiti selau ona tausaga ae ua 90 lona toalua sa folafola atu loa ia i laua e faapea o le a fanauina e Sara se tama e faaigoa ia Isaako. (tagai Kenese 17:17, 19). O lo la le talitonu na fesili atu ai le Alii: “E i ai ea se mea e faigata i le Alii?” (Kenese 18:14). Ma “ua to foi Sara, ua fanau e ia se atalii mo Aperaamo, ina o toeaina o ia” (Kenese 21:2), ma na folafola atu le Alii: “Ou te matua faatoateleina lava lau fanau e pei o fetu o le lagi, e pei o le oneone foi i le matafaga” (Kenese 22:17).
Na tupu ae Isaako ma avea ma tagata matua, ma ina ua 40 ona tausaga sa ia faaipoipo atu loa ia Repeka. “Ua faatoga atu Isaako i le Alii mo lana ava, aua ua pa o ia: ua faafofoga foi le Alii ia te ia, ona to ai lea o lana ava o Repeka” ma fanauina ai se masaga tama, o Esau ma Iakopo, ina ua 60 tausaga le matua o lo la tama (tagai Kenese 25:20–26).
Ina ua matua Iakopo ma faasolo i ona tausaga e tatau ai, sa auina atu loa o ia e ona matua i le aiga o Lapana, o iina o le a latou feiloai ai ma afafine e toalua o Lapana, o Lea ma Rasela. Na ta’u atu e Iakopo ia Lapana, “Ou te auauna ia te oe i tausaga e fitu ona o Rasela lou afafine itiiti… . Ona auauna ai lea o Iakopo i tausaga e fitu ona o Rasela; ua peiseai o nai aso itiiti ia i lona manatu, ona o lona manao tele ia te ia” (Kenese 29:18–20).
O le a outou manatuaina le auala na olegia ai e Lapana le taulealea o Iakopo ina ia faaipoipo muamua ia Lea ona sosoo ai lea ma Rasela. “Ua silafia e le Alii ua inosia Lea, ona faagaaufanauina lea o ia e ia: a o Rasela ua pa ia” (Kenese 29:31). Ona fanauina ai lea e Lea o Reupena, sosoo ai ma Simeona, ona sosoo ai lea o Levi, ma Iuta. Ae o le taimi lea e le’i maua lava se tama a Rasela (tagai Kenese 29:32–35).
Faatasi ai ma le faateleina o le mataua ma le popole tele, na poloai atu ai Rasela ma le le fiafia i se tasi aso ia Iakopo, “Au mai ia ni tama ia te au, a leai ona ou oti ai lea” (Kenese 30:1). Mulimuli ane ona fanauina ai lea e Lea isi tama tama se toalua ma se tama teine e toatasi.
E le Faatalale le Alii i Ana Folafolaga
Na folafola mai e le Aposetolo o Peteru e faapea “e le faatuai mai le Alii i le mea na folafolaina mai, faapei o le manatu o isi tagata i le faatuai; ae peitai ua onosai mai lava o ia” ia i tatou (2 Peteru 3:9). I nei tupulaga o le tasi le itula e faamamago ai le tagamea, tasi le minute o meaai e vave kukaina, e i ai taimi e foliga mai ai ia i tatou ua sese le mea ua tuu i ai e se Tama Faalelagi alofa o tatou folafolaga taua pe ua Ia taofia, pe ua tuuina foi i lalo o se isi igoa sese. O lagona na sa oo ia Rasela.
Ae i le gasologa o taimi, tatou te tau atu ai i nisi o upu e sili ona matagofie i totonu o tusi paia: “Ua manatua foi Rasela e le Atua.” (Kenese 30:22). Ma sa faamanuiaina o ia i le fanau mai o Iosefa faapea ma Peniamina mulimuli ane. E faitau miliona i latou o loo i le lalolagi i aso nei o e tupuga mai ia Iosefa o e sa taliaina le folafolaga faaAperaamo e faapea o a latou taumafaiga “e manuia ai aiga uma o le lalolagi, i faamanuiaga o le Talalelei, o faamanuiaga lava ia o le olataga, ma le ola e faavavau” (Aperaamo 2:11).
Afai e foliga mai i nisi taimi e mamao ia folafolaga a le lagi, ou te tatalo atu ia i tatou taitoatasi ina ia opogi nei folafolaga silisili ese ma le aoga ma aua lava nei lafoaia. E faapei foi ona manatua Rasela e le Atua, o le a faapena foi ona manatua oe e le Atua. Ou te molimau atu ai i le suafa o Iesu Keriso, amene.