Elder Walter F. González
O Le Au Peresitene o Fitugafulu

Ua i ai ia Elder Walter Fermín González se molimau maumaututu o le auauna atu e maua mai ai faamanuiaga. “Tatou te nofo aitalafu pea lava pea i le Alii, aua e tele atu le taui e maua nai lo soo se tautua tatou te faia i taimi uma,” na ia saunoa ai.

O le sauniuniga a Elder González e auauna atu, na vave ona amata i le olaga, a o lei avea o ia ma se tasi o le Ekalesia. Ina ua atoa lona iva tausaga, sa fautuaina o ia e lona tina e aoao le Igilisi. E ui lava e le o ni tagata o le ekalesia ona matua, ae na talitonu o ia o lona tina o se “meafaigaluega i aao o le Alii” i le sauniunia o ia mo valaauga o le a ia mauaina i se taimi.

“E leai se tasi na silafia o le a avea au ma se tasi o le Ekalesia i le iva tausaga mulimuli ane. E leai se tasi na silafia o le a i ai se aso, o le a valaauina ai au e avea ma se Pulega Aoao ma manaomia ona tautala i le Igilisi,” na ia saunoa ai.

Na soifua mai ia Victoria ma Fermín González i le aso 18 o Novema, 1952, i Montevideo, Iurukuei, ma sa papatisoina Elder González ina ua 18 ona tausaga. Sa faaipoipo i la’ua ma Zulma Anahir i Montevideo i le aso 28 o Fepuari, 1975. Sa faamauina i laua i le Malumalu o Uosigitone D.C. i le 1979, ma e toafa o la’ua alo. O loo faatalitali atu ma le naunautai i le fanau mai o le pepe muamua a le la fanau.

Sa a’oga Elder González i le Universidad de la República i Iurukuei, ma le Universidad de la Fraternidad i Atenitina, ma sa maua ai lona uluai tikeri mai le Iunivesite a Inidiana i Bloomington.

Sa lagolagoina Elder González i le Au Peresitene o Fitugafulu i le aso 6 o Oketopa, 2007. Sa avea talu ai nei ma Peresitene o Eria a Pasila i Matu ma Amerika i Saute i Sisifo, ma sa avea foi ma se fesoasoani i Au Peresitene o Eria a Amerika i Saute i Matu ma Pasila i Matu. Sa avea foi o ia ma se Fitugafulu Eria i le Eria a Amerika i Saute i Matu, o se peresitene o le misiona i Ekuatoa, o se peresitene o le siteki i Iurukuei, ma se faatonu o mataupu tau i le va i fafo i le Eria a Amerika i Saute i Matu.

Sa faigaluega o ia i le Ofisa o Aoga a le Ekalesia, e aofia ai le avea ma faatonu i le Eria a Amerika i Saute i Matu.