Auauna Atu
Vaavaai mo auala e faamanuia ai olaga o isi e ala i nai faatinoga faigofie o le auauna atu
Sa ta’ua ai e Peresitene Tavita O. MaKei ia Aperaamo Linikone e faapea, “O lo’u tagata atoa ua i ai i le taimi nei po o le ituaiga tagata ua ou faamoemoe ia avea ai, ua ou nofo aitalafu ai i lo’u tina agelu.”1 O nei upu ua faamatalaina lelei ai o’u lagona i lo’u lava tina. O Viola Jean Goates Snow, po o Jeannie lea sa iloa ai e i latou uma sa silafia o ia, na fanau i le 1929, ma sa maliu ina ua faatoa maea lona aso fanau lona 60 i le 1989. Sa ia aoaoina au ma faamalosiau mai ia te au. Sa ia faatalitonuina moni lava au e mafai ona ou ausia soo se mea ou te manao ai. Sa ia aoaiina foi au. E faapei foi o le faamatalaga a o’u atalii e uiga i lo latou tina, “E lelei tele o ia i le faamaasiasia o i matou pe a matou faia se mea sese.” O Mama o se tina ofoofogia, o se faaa’oa’o sili, ma toetoe ina a leai se aso ou te le mafaufau ai ia te ia ma misia o ia.
I ni nai tausaga a o lei maliu o ia, sa maua ai ua kanesa, o se ma’i sa ia tauivia ma le lototoa. Sa matou aoaoina o se aiga, i se tulaga ese, o le kanesa o se ma’i o le alofa. E maua ai avanoa e faamalolosia ai sootaga, e faatofa ai ma faaalia le alofa. I ni nai vaiaso a o lumanai le maliu o lo’u tina, sa matou talatalanoa ai i le potu faaleaiga i lo matou fale a o ou laitiiti. O Mama e lelei lana faautautaga ma e fiafia i mea mananaia. Sa moomoo foi o ia e faimalaga, ae sa ola lo matou aiga i se paketi faaleauau, ma sa le taunuu ai nei moomooga. Ina ua ou iloa lenei mea, sa ou fesili i lo’u tina pe i ai ni mea ua faanoanoa ai. Sa ou matua faamoemoe e faalogo faapea mai sa manao lava o ia i se fale tele, ma sili atu ona matagofie; po o se tala faanoanoa ma le le fiafia ona o le le i mafai lava ona alu malaga. Sa manatunatu o ia i la’u fesili mo ni nai minute ona aumai lea o le tali faigofie, “Maimau e pe ana tele atu sa’u auaunaga.”
Sa faateia au i lana tali. Sa taliaina e lo’u tina i taimi uma ni valaauga i le Ekalesia. Sa avea o ia ma se peresitene o le Aualofa a le uarota, faiaoga i le Aoga Sa, faiaoga asiasi faapea foi i le Peraimeri. A o matou laiti, matou te tilivaina e le aunoa ni kuka fefiloi, o siamu ma fualaau aina ua tuufagu i tuaoi ma tagata o le uarota. Ina ua ou faamanatu atu ia te ia nei mea uma, sa lei faatali o ia. “Sa tatau ona mafai ona ou faia nisi mea se tele,” na pau lea o lana tala. Sa ola lo’u tina i se olaga atoa o faaaoaoga. Sa alofagia o ia e aiga ma uo. E tele mea na ia ausia i se olaga sa masani ona faigata ma lea sa faapuupuuina e ma’i ma faama’i. E ui lava i nei mea uma, o lona faanoanoaga sili o le le lava lea o se auaunaga na ia tuuina atu. O lea, e leai so’u masalosalo ua talia e le Alii le osigataulaga a lo’u tina i le lalolagi, ma ua Ia taliaina o ia. Peitai, aisea na matua taua ai i lona mafaufau i nai aso a o lei maliu? O le a le auauna atu ae aisea foi e matua taua ai i le talalelei a Iesu Keriso?
Muamua, ua poloaiina i tatou e auauna atu le tasi i le isi. O le poloaiga muamua o le alofa atu i le Atua. “E faapena foi [le] lona lua, E te alofa atu i le lua te tuaoi, ia pei o oe lava ia te oe.”2
Tatou te faailoa atu lo tatou alolofa pe a tatou fesoasoani ma auauna atu le tasi i le isi.
Ua saunoa Peresitene Gordon B. Hinckley: “E leai se tagata e mafai ona avea ma se Au Paia [moni] o le Au Paia o Aso e Gata Ai ae le faituaoi, o se e le aapa atu e lagolago ma fesoasoani i isi. O se uiga moni o le natura tonu o le talalelei, o le agalelei. O’u uso e ma tuafafine, e le mafai ona tatou ola mo na o i tatou lava.”3
Sa aoao atu e le Faaola Ona soo lenei mataupu faavae taua i le Mataio:
“… Le Alii e, o anafea na matou iloa ai oe ua fia’ai, ma matou fagaina [oe]? po o fia inu, ma matou avane [e te] inu ai?
“O anafea foi na matou iloa ai oe o le tagata ese, ma matou talia [oe]? Pe o le le lavalava, ma matou faaofuina [oe]?
“O anafea foi na matou iloa ai oe ua ma’i, po o i le falepuipui, ma matou o atu ai ia te oe?
“Ona tali atu ai lea o le Tupu, ua faapea atu ia te i latou, E moni, ou te fai atu ia te outou, aua na faia e outou [na mea] i le tasi o e aupito itiiti o o’u uso nei, o a’u lea na outou faia [i ai].”4
E tatau ona tuuina atu ma le le manatu faapito lena auaunaga, e aunoa ma se mafaufau ia maua ai se mea a se tagata po o se taui. E ao ina tuuina atu pe a manaomia ai, ae le seiloga e avanoa. O avanoa e auauna atu ai, e ono le manino mai i taimi uma, aua o le natura faaletagata soifua o le popole i mea tatou te mananao ma manaomia e i tatou lava. Ua tatau ona tatou teena na uiga ae vaavaai mo avanoa e auauna atu ai. A tatou asiasi atu ia i latou o e mafatia i ma’i, o e ua maliliu ni e pele ia i latou, po o isi mea e nutimomoia ai le loto, e le lava le na ona fai atu, “Telefoni atu pe a i ai se mea e mafai ona ou faia.” Ae, vaavaai mo auala e faamanuia ai olaga o isi e ala i nai faatinoga faigofie o le auauna atu. E sili atu le faia o nai mea iti e le taua tele, nai lo le le faia lava o se mea.
Lona lua, e i ai sa tatou matafaioi o ni tagata o le Ekalesia e talia ai valaauga e auauna atu i le fausiaina o le malo o le Atua i le fogaeleele. A o tatou galulue i o tatou valaauga eseese, tatou te faamanuiaina olaga o isi. I le galuega faafaifeautalai, e suia olaga a o aoaoina e tagata le talalelei a Iesu Keriso ma maua se molimau i lona moni. O le galuega paia i totonu o le malumalu tatou te faamanuiaina ai olaga o i latou ua maliliu. I le auauna atu i le talalelei, tatou te maua ai le avanoa e aoao atu isi, e faamalolosia le autalavou, ma faamanuia olaga o fanau iti a o latou aoaoina upumoni faigofie o le talalelei. I le auauna atu i le Ekalesia, tatou te aoao ai e ofoina atu o tatou tagata ma fesoasoani i isi.
Sa saunoa Peresitene Spencer W. Kimball, o se faaaoaoga maoae o le auauna atu e faapea: “E silafia i tatou e le Atua, ma ua ia leoleo mai ia i tatou. Peitai, e masani ona ia faataunuu mea tatou te manaomia e ala mai i se tasi tagata. O le mea lea, e taua ai lo tatou auauna atu o le tasi i le isi i le malo.”5 E ui o lea, o le tiutetauave o le auauna atu i le Ekalesia, e le faamalolo mai ai i tatou mai lo tatou tiutetauave e auauna atu i o tatou aiga ma o tatou tuaoi. Sa faaauau le saunoaga a Peresitene Kimball e lapatai mai ai, “E le tatau ona i ai se tasi o i tatou e pisi tele i ona tofiga faaleEkalesia ma faapea ai e leai se avanoa o totoe e auauna faaKerisiano atu ai ma le le faalaua’iteleina i o tatou tuaoi.”6
Ma le mea mulimuli, e i ai so tatou tiutetauave e tuuina atu ai le auaunaga i o tatou nuu ma alaalafaga. E ao ina tatou galulue e faaleleia o tatou pitonuu, o a tatou aoga, o o tatou aai, ma o tatou taulaga. Ou te faamalo atu ia i latou o i lo tatou lotolotoi, o e tusa lava po o a o latou tulaga faapolokiki, ae galulue lava i lo tatou lotoifale, setete ma pulega faalemalo e faaleleia o tatou olaga. E faapena foi ona ou faamalo atu ia i latou o e ofo fua atu lo latou taimi ma punaoa e lagolagoina ai galuega alofa ma le tauaogaina a nuu ma alaalafaga, lea e faamanuia ai olaga o isi ma avea ai le lalolagi ma nofoaga e sili atu. Na aoaoina a’u e lo’u tamamatua i lo’u laitiiti, “O le auaunaga tatou te tuuina atu i tagata lautele, o le totogi lena o le mea ua tatou nonofo ai i le fogaeleele.”
O le auauna atu e manaomia ai le le manatu faapito, o le fetufaai, ma le foai atu. Sa ma aoaoina ma lo’u toalua se lesona taua i le taimi sa ma i ai i Aferika. Sa tofi i maua i se konafesi faaleitu i Jinja, Uganda. I le taeao po a o lei amataina a matou fonotaga, sa ma faaaogaina le avanoa ma te taamilo ai e matamata i se falelotu fou i le eria. Ina ua ma taunuu atu i le fale, sa faafeiloai i maua e se tamaitiiti e tolu i le fa tausaga le matua. Sa sau o ia i le lotoa o le Ekalesia e vaai po o a mea la e fai ai. O le fiafia tele o Sister Snow i lona mataataata, sa tago ifo ai o ia i lana ato ma tuu atu ia te ia se lole afifi malo. Sa fiafia le tamaitiiti.
Sa ma faaaluina ni nai minute e matamata taamilo ai i le falelotu a o lei toe foi atu i fafo. Sa faafeiloaia i maua e le silia ma le sefululua tamaiti mataataata, o e sa tofu mananao e feiloai i le tamaitai fou fai lole o le pitonuu.
Sa momomo le loto o Phyllis aua o le toe lole lava lea na ia tuuina i le tamaitiiti muamua. Sa faailoa atu e ia ma le faanoanoa i tamaiti, ua leai se mea o totoe. Ona tago lea o le tamaitiiti lea sa muai faafeiloaia i ma’ua, ua toe tuu le lole ia Sister Snow ma faailoa atu e tago e tatala. Sa tatalaina e Phyllis ma le misialofa, ma le manatu o le a togi atoa e le tamaitiiti le lole i lona gutu a o matamata atu i ai ana uo moomoo.
Nai lo lena, sa ma matuai maofa lava, na alu atu o ia i ana uo taitasi o ē sa faaeto mai o latou laulaufaiva ma sa tofu ma se eto manaia. Sa faataamilo le tamaitiiti i le li’o, ma sa etoeto foi ia i nisi taimi, seia iu ina ua uma le lole.
Ia, e mafai ona faapea mai se tasi, o lenei faatinoga o le fetufaai e le saogalemu mo le ola maloloina, peitai e leai se tasi e mafai ona faafinau i le faataitaiga na faia e lenei tamaitiiti. O le le manatu faapito, fetufaai, ma le foai atu e taua mo le auauna atu. Sa aoaoina lelei e lenei tamaitiiti lena lesona.
Ou te faamoemoe ma tatalo ia mafai e i tatou uma ona tele atu mea tatou te faia e auauna atu ai. Afai tatou te le auauna atu, tatou te le mauaina foi le atoaga o avanoa ma faamanuiaga o le talalelei toefuataiina. I le suafa o Iesu Keriso, amene.