O Sini e Tolu e Taialaina ai Oe

Peresitene Thomas S. Monson

Fesoasoani Muamua i le Au Peresitene Sili

O lau faatosinaga e i talaatu o oe lava ia ma lou aiga ma e pa’i atu i isi i le salafa o le kelope.

O le afiafi nei ua musuia lava i tatou. Ua faamanuiaina i tatou i musika matagofie ma savali musuia. Ua i ai le Agaga o le Alii i le mea nei.

Tuafafine Julie Beck, Silvia Allred, ma Barbara Thompson—faafetai i le lagi mo o outou tina ma tama faapelepele, o outou faiaoga, o outou taitai o autalavou, ma isi sa silafiaina mea o le a outou gafataulimaina.

Ina ia toe faaupu atu se manatu:

O le a e le iloaina lava le taua o se teineitiiti,
E tatau ona e faatali e te iloa ai;
Peitai e tulai mai tamaitai uma i se tulaga tamalii,
Mai le mea sa i ai.1

O se avanoa sili mo au lo tatou mafuta ai. Ua ou iloa e le gata ia te outou o loo potopoto i le Maota Autu mo Konafesi, ae e fiaafe foi i latou o loo maimoa ma faalogologo mai i nei taualumaga e ala i le satelite.

A o ou tautala atu ia te outou, o au o se tamaloa a le itu toagaogao, ma ua tatau ona ou matua faaeteete i a’u faamatalaga. Ua ou manatua ai se alii na savali atu i se faletusi ma fesili atu i le failautusi—o se tamaitai mo se fesoasoani: “E i ai se tusi e igoa o le “Tamaloa, o le Matai o Fafine?” Sa tilotilo sao atu le faatauoloa i mata o le alii ma fai atu ma le aamu, “Vaai le vaega o tala fatu!”

Ou te tautino atu ia te outou i le po nei, ou te faamamaluina outou, o tamaitai o le Ekalesia, ma ua ou iloa lelei, pei ona ta’ua e William R. Wallace e faapea, “o le lima na te luelueina le moega pepe o le lima lena na te pulea le lalolagi.”²

I le 1901 na saunoa ai Peresitene Lorenzo Snow: “O tamaitai o le Aualofa ua latou auauna atu ia i latou o puapuagatia, ua latou opo maia i o latou lima o le alofa i latou ua matuaoti ma fafine ua oti a latou tane, ma ua latou tausisia i latou ia le pisia mai le lalolagi. E mafai ona ou molimau atu e leai ni tamaitai e sili atu ona mama ma sili atu ona matatau i le Atua i le lalolagi, nai lo i latou e maua i totonu o vasega o le Aualofa.”³

E pei ona i ai i taimi o Peresitene Snow, o loo i ai iinei i le taimi nei, asiasiga e tatau ona fai, o faafeiloai e tatau ona tufa atu, ma agaga matelaina e tatau ona fafagaina. A o ou mafaufau i le Aualofa i le aso, ma faalotomaulaloina i lo’u avanoa ou te lauga atu ai, sa ou liliu atu i lo tatou Tama Faalelagi mo Lana taitaiga faalelagi.

I lena agaga, sa ou lagonaina ai e tatau ona tuuina atu i tuafafine taitoatasi o le Aualofa i le lalolagi atoa, ni sini se tolu ia ausia:

Suesue ma le maelega.
Tatalo faatauanau.
Auauna atu ma le naunautai.

Se’i o tatou manatunatu i nei sini taitasi. Muamua, suesue ma le maelega. Sa aoao mai e le Faaola o le lalolagi: “Ina saili atu ia outou i upu o le poto mai tusi sili ona lelei; ia saili i le aoao, e faapea foi i le suesue ma le faatuatua.”⁴ Sa Ia faaopoopo mai: “Ia suesue outou i tusi; aua ua outou manatu tou te maua ai le ola e faavavau: o tusi foi ia o loo molimau ia te au.”⁵

O se suesueina o tusitusiga paia o le a fesoasoani i a tatou molimau ma molimau a tagata o o tatou aiga. O loo ola ae a tatou fanau i le taimi nei ma siomia e leo o loo uunai ai i latou ina ia lafoai mea e tonu ae tulimatai atu faafiafiaga o le lalolagi. Sei vagana ua i ai so latou faavae mautu i le talalelei a Iesu Keriso, se molimau o le upumoni, ma se naunautaiga e ola amiotonu, e mafai ona aafia i latou i na faatosinaga i nei aafiaga. O lo tatou tiutetauave le faamalolosi ma puipuia i latou.

I se tulaga e faapopoleina ai, ua aoaoina a tatou fanau i aso nei e auala o faasalalauga, e aofia ai le Initoneti. I le Iunaite Setete, ua lipotia mai ai o le tamaitiiti e masani ai, e tusa ma le 4 itula e matamata ai i le televise i aso taitasi, ma o le tele lava o polokalama e tumu i amioga mataga ma le fasi tagata, o le faaaogaina o ava malosi ma fualaau oona, ma amioga feusuai. O le taimi e matamata ai ata tifaga ma le faia o taaloga vitio, e faaopoopo atu i le 4 itula.⁶ Ma e talitutusa lava le faitau faafuainumera ma isi atunuu tau atiae. O savali e faaalia i luga o le televise, o ata tifaga, ma isi ala o faasalalauga e masani lava ona matuai feteenai ma mea tatou te mananao e talia ma opogi e a tatou fanau. O lo tatou tiutetauave e le gata e aoao i latou ina ia atamamai i le agaga ma aoaoga faavae ae ia fesoasoani foi ia latou tumau ai i lena ala, e tusa lava po o a malosiaga mai fafo latou te fetaiai. O le a manaomia ai se taimi tele ma taumafaiga i la tatou pitolaau—ma ina ia mafai ona fesoasoani atu i isi, tatou te manaomia le totoa faaleagaga ma le amio mama e tetee atu ai i mea leaga tatou te vaaia i itu uma.

Ua tatou ola i le taimi o loo ta’ua i le 2 Nifae, mataupu e 9:

“E! o le faamaualuga, ma le vaivai, ma le valea o tagata! Pe a aoaoina i latou ua latou faapea ua popoto i latou, ua latou le faalogologo i le faatonuga a le Atua, aua ua latou tuu ese ai, ua manatu i latou ua iloa e i latou lava. O lenei, ua valea lo latou poto, ua le aoga ai ia te i latou. E malaia foi i latou.

“A e peitai, e lelei ona ia aoaoaina pe afai latou te faalogologo i faatonuga a le Atua.”⁷

E manaomia le lototele e taofimau ai o tatou tulaga faatonuina e ui lava i le taufaifai mai o le lalolagi. Na saunoa Peresitene J. Reuben Clark, Jr., o le sa tele ni tausaga o avea ma uso o le Au Peresitene Sili: “E i ai ni mea na tutupu e le mailoa lea na lagona ai e [i latou] o loo taumateina lo latou faatuatua e faapea talu ai ona o le tau faamautinoaina o lo latou faatuatua atoatoa e mafai ai ona oo mai ia i latou ia tauemuga a a latou paaga e le talitonu, o lea e tatau ai ona fesuiai pe faamatala sese lo latou faatuatuaga pe faafilogia foi i se auala e faaleaogaina ai. O ia ituaiga o tagata o ni tagata pepelo.”⁸

Ua oo mai ai i lo’u mafaufau fuaiupu mamana o loo maua i le 2 Timoteo, i le Feagaiga Fou, mataupu 1, fuaiupu e 7 ma le 8:

“Aua ua le foaiina mai e le Atua ia te i tatou le Agaga e mata’u ai; a o le Agaga e faamalosi ai, ma alofa ai, ma mafaufau tonu ai.

“O lenei, aua e te ma i le molimau i lo tatou Alii.”

E le gata i lo tatou suesueina o mataupu faaleagaga, e taua foi le aoao i le poto salalau. E tele lava ina le mailoa le lumanai; o le mea lea, e tatau ai ona tatou sauniuni mo mea e le o mautinoa. Ua faailoa mai i lipoti faafuainumera faapea e i ai nisi taimi, ona o le ma’i po o le oti o se tane po o se tulaga tatau ai faaletamaoaiga, e te tauaveina ai e oe lava ia le matafaioi o le sailia o tupe mo le aiga. Ua i ai nisi o outou o loo tauaveina nei lena matafaioi. Ou te fautuaina oe ina ia faaauau au aoga—pe afai e lei faia lava—ina ia saunia ai oe mo le matafaioi tau tupe pe a tulai mai ni tulaga faapena.

O le a faalauteleina au taleni a o e suesue ma aoao. O le a mafai ona sili atu lau fesoasoani i ou aiga i a latou aoaoga, ma o le a toafilemu lou mafaufau i lou iloa ua e saunia oe lava mo tulaga e tatau ai atonu o le a oulua fetaiai i le olaga.

Ou te toe fai atu: Suesue ma le maelega.

O le sini lona lua ou te fia ta’ua: Tatalo faatauanau. Ua poloai mai le Alii, “Ia tatalo pea, o le a ou liligi atu lo’u Agaga i ou luga, ma o le a sili lou faamanuiaga.”⁹

Atonu e lei i ai lava se taimi sa tele atu ai ona tatou manaomia le tatalo ma aoao tagata o o tatou aiga e tatalo. O le tatalo o se puipuiga mai faaosoosoga. O le tatalo faatauanau ma mai le loto e mafai ai ona tatou maua faamanuiaga moomia ma le fesoasoani e tatau ai ina ia tatou ola amiotonu ai i lenei malaga faigata ma luitauina i nisi o taimi ua tatou faaigoaina o le olaga faitino.

E mafai ona tatou aoao atu le taua o le tatalo i a tatou fanau ma a latou fanau e ala i upu ma faataitaiga. Ou te fia faasoa atu se lesona i le aoao atu e ala i faataitaiga, e pei ona faamatalaina i se tusi a se tina ia te au e faatatau i le tatalo. “Lau Susuga Peresitene Monson: O nisi taimi ou te mafaufau ai pe ua ou faia se eseesega i olaga o lau fanau. Aemaise lava o au o se tina nofotoatasi e lua galuega e faigaluega ai ina ia faafeauautai ai le faasoa, o nisi taimi ou te sau i le fale ma feagai ma le le mautonu, ae e le uma ai lava lo’u faamoemoe.”

E faaauau lana tusi i le faamatalaina mai o lo latou matamataina ma lana fanau o le konafesi aoao, lea sa ou lauga ai e uiga i le tatalo. Sa fai se tala a lana tama tama, “Tina, ua uma ona e aoaoina i matou i le mea le la.” Sa fesili [le tina], “O le a le uiga o lau tala?” Sa tali lana tama, “Sa e aoaoina i matou ina ia tatalo ma sa e faaali mai le faiga, ae na i ai se po sa ou alu atu ai i lou potu ma maua atu oe i ou tulivae o loo e tatalo i le Tama Faalelagi. Afai la e taua o Ia ia te oe, o le a taua foi o Ia ia te au.” Sa faaiu le tusi, “Atonu e te le iloaina lava le ituaiga faatosinaga e te faia i se tamaitiiti sei vagana ua vaai le tamaitiiti o e faia e oe lava ia le mea sa e taumafai e aoao o ia e fai.”

I ni tausaga ua mavae, ina ua lata i le taimi ou te tuua ai Sate Leki mo fonotaga faaletausaga a Tama Sikauti a Amerika i Atlanta, i Georgia, sa tonu ai ia te au ou te aveina ia lava ni kopi o le New Era ina ia mafai ai ona ou faasoa atu i taitai o le Sikauti lenei lomiga maoae. Ina ua ou taunuu i le faletalimalo i Atlanta, sa ou tatalaina le afifi o mekasini. Sa ou iloa ai, e aunoa lava ma se faamatalaga o se mafuaaga, na tuu e la’u failautusi i totonu o le afifi ni kopi faaopoopo se lua o le lomiga o Iuni, o se lomiga sa faapitoa mo faaipoipoga i le malumalu. Sa ou tuua kopi na e lua i le potu o le faletalimalo, ae tufatufa isi kopi e pei ona sa fuafuaina ai.

I le aso mulimuli o fonotaga, ou te le’i fia auai i le taumafataga na fuafua mo le aoauli ae sa uunaia lava au ou te toe foi i lo’u potu. Ou te ulufale atu o tatagi le telefoni. O se tagata o le Ekalesia sa faalogo o la ou te i ai i Atlanta. Sa ia faailoa mai o ia ma fesili mai pe mafai ona ou faia se faamanuiaga o lana tama teine e 10 tausaga. Sa vave ona ou ioe atu i ai, ma sa ia faailoa mai o le a latou malaga mai loa lava ma lona toalua, o le la afafine ma le la atalii, i lo’u potu o le faletalimalo. A o ou faatalitali, sa ou tatalo mo se fesoasoani. Sa suia le patipatia o le fonotaga i lagona o le toafilemu na aumaia e le tatalo.

Ona tuitui mai ai lea o le faitotoa ma oo mai ai so’u avanoa e feiloai ai ma se aiga filifilia. Sa savali mai le teineitiiti e 10 tausaga i ni tootoo. Talu ai ona o le kanesa, o lea na manaomia ai le tipiese o lona vae tauagavale: ae ui i lea, sa susulu ona foliga, sa le maluelue lona faalagolago i le Atua. Sa tuuina atu se faamanuiaga. Sa tootutuli le tina ma le atalii i tafatafa o le moega a o faaee atu o ma’ua lima ma le tama i luga o si teineitiiti. Sa taitaiina i maua e le Agaga o le Atua. Sa faalotomaulaloina i maua i lona mana.

Sa ou lagonaina le tafe ifo o loimata i o’u alafau ma sisina ifo ai i luga o o’u lima a o taatitia i luga o le ulu o lena afafine lalelei o le Atua. Sa ou ta’ua sauniga e faavavau ma le faaeaina o le aiga. Sa musuia au e le Alii e uunai lenei aiga e ulufale atu i le malumalu paia o le Atua. I le faaiuga o le faamanuiaga, sa ou iloa ai ua uma ona fuafua lena malaga i le malumalu. Sa tuuina mai ni fesili e uiga i le malumalu. Ou te lei faalogoina se leo mai le lagi, ou te lei vaaia foi se faaaliga. Ae na manino le oo mai i lo’u mafaufau o upu, “Vaai i le New Era.” Sa ou tilotilo atu i le pusatu, o taatitia mai ai kopi faasili e lua o le lomiga o le New Era e faatatau i le malumalu. Sa tuuina atu le kopi e tasi i le afafine, a o le isi i ona matua. Sa matou iloiloina faatasi.

Sa faamavae mai le aiga, ma sa toe toafilemu foi le potu. Sa faigofie ona oo mai se tatalo o le lotofaafetai, ma e toe fai atu foi, ia fai se faaiuga ia avea le tatalo ma se vaega o le olaga.

O’u tuafafine pele, aua tou te tatalo mo ni galuega e fetaui ma o outou tomai, ae tatalo mo tomai o le a fesoasoani ia te outou e faataunuu ai a outou galuega. Ona le avea lea o le faatinoga o au galuega ma vavega, a o oe lava o le vavega.

Tatalo faatauanau.

O le mea mulimuli, auauna atu ma le naunautai. O oe o se malosiaga maoae mo le lelei, o se tasi o malosiaga aupito mamana i le lalolagi atoa. O lau faatosinaga e i talaatu o oe lava ia ma lou aiga, ma e pa’i atu i isi i le salafa o le kelope. Ua outou aapa atu i o outou uso ma tuagane i isi ituala, o isi itu o aai, o malo, o konetineta, ma atuvasa. Ua outou faatinoina le anavatau a le Aualofa: “E le uma le alofa.”

E moni lava, ua siosiomia outou e avanoa mo auaunaga. E mautinoa lava e i ai taimi tou te vaaia ai le tele naua o na avanoa, ma ono lagona ai le lofituina. O fea e te amata ai? E mafai faapefea ona e faia uma? E faapefea ona e filifili, mai tulaga manaomia uma ua e vaaia, o fea ae pe faapefea foi ona fai?

E masani lava o nai faatinoga laiti o le auauna atu ona pau na o mea o loo moomia e siitia ai ma faamanuia se tasi: o se fesili e faatatau i le aiga o se tagata, o upu faatopetope o le faamalosiauga, o se faamalo mai le loto, o sina faaupuga laitiiti o le faafetai, o se valaau puupuu atu i le telefoni. Afai tatou te mataitu ma iloa, ma afai tatou te faatino i uunaiga ia e oo mai ia te i tatou, e mafai ona tele mea lelei tatou te faataunuuina. O nisi taimi, ioe, e tele atu mea e manaomia.

Sa ou aoaoina talu ai nei se auaunaga alofa na tuuina atu i se tina a o laiti lava lana fanau. E ala faalausosoo i le vaeluapo e taulima manaoga o lana fanauiti, e pei ona faia e tina. E masani ona o ane lana uo ma lona tuaoi i le isi ituala i le aso e sosoo ai ma faapea atu, “Sa ou vaai mai o mumu lou moli i le vaeluapo ma sa ou iloa ai o loo outou feala ma lau fanau. O le a ou aveina lau fanau i lo’u fale mo ni nai itula ae sei e malolo.” Fai mai lenei tina lotofaafetai: “Sa ou matua faafetai mo lana ofo alofa, ae ina ua tele taimi e tupu ai lenei mea, sa ou iloaina ai afai sa ia iloa mai le mumu o o’u moli i le vaeluapo, o lona uiga o la foi sa ala o ia ma se tasi o lana fanau, ma na te manaomia foi se malologa e faapei foi o au. Sa ia aoao mai ia te au se lesona tele, ma talu mai lena taimi sa ou taumafai ai ia ou mataala foi e faapei o ia e vaavaai mo avanoa e auauna atu ai i isi.”

E le mafaitaulia faatinoga o le auaunaga ua faia e le toatele o faiaoga asiasi o le Aualofa. I ni nai tausaga talu ai, sa ou faalogo ai i ni faiaoga asiasi se toalua sa fesoasoani i se tina faavauvau ua oti lana tane, o Angela, o le afafine a se tasi o so’u tausoga. Sa o le toalua o Angela ma sana uo e tietie faasee i le kiona, ma sa maliliu ai ina ua solo ifo i ai le kiona ma tanumia ai. Na tuua e i lua ni taitoalua o loo maito uma—o Angela, o le la tama muamua lea, a o le isi, e le gata o la e maito ae o loo pepe foi lana tama matua. I le falelauasiga o le toalua o Angela, sa lipoti mai ai e le epikopo e faapea, ina ua faalogo i le faalavelave matautia, sa faataalise atu loa i le fale o Angela. Na toetoe lava o le taimi na taunuu ai, sa tatagi ai le logo o le faitotoa. Sa matala mai le faitotoa, ma vaaia ai faiaoga asiasi e toalua a Angela. Fai mai le epikopo sa ia mataituina a o la faailoa atu ma le loto faamaoni lo laua alolofa ma le agalelei ia Angela. Sa fetagisi faatasi nei tamaitai e toatolu, ma sa manino lava le loloto o le amanaia o Angela e nei faiaoga asiasi lelei e toalua. Atonu lava e na o tamaitai e mafaia, sa la tauina atu ma le le gaoia—e aunoa ma le talosagaina—le fesoasoani tonu lava o le a la saunia. Sa iloagofie o le a sauniuni e fesoasoani atu po o le a lava le taimi e manaomia ai i laua e Angela. Sa faaalia e le epikopo lana faafetai o’oo’o i le iloaina lea, o le a avea i laua ma puna moni o faamafanafanaga ia te ia i le lumanai.

O na aga o le alofa ma le agalelei o loo faia pea lava pea e faiaoga asiasi maoae o lenei Ekalesia—e ui lava e le o taimi uma i ni tulaga maoae ae tutusa lava i le faamaoni aiai.

Ou te faamalo atu ia te outou o ē, o loo popole ma le agaalofa ma le agalelei, fafaga i e fia aai, faalavalava i e ua le lavalava, ma tausi i e ua leai ni mea e nonofo ai. O Lē ua silafia le pau o le manuiti o le a le faagaloina lena lava auaunaga. O le manao e siitia i luga, o le naunau e fesoasoani, ma le agatamalii e foai atu, e mai i se loto ua tumu i le alofa. Auauna atu ma le naunautai.

Na saunoa lo tatou perofeta pele, o Peresitene Gordon B. Hinckley, e uiga ia te outou, “Na totoina e le Atua i totonu o tamaitai se uiga paia lea e aliali mai ai le malosi le leoa, i le tausaafia, i le filemu, i le lelei, i le mama, i le faamaoni, i le alofa.”¹⁰

Ou tuafafine pele, ia faamanuia atu lo tatou Tama Faalelagi ia te outou taitoatasi, o e ua faaipoipo pe nofofua, i o outou fale, i o outou aiga, i o outou lava olaga—ia outou maua le faaaloalo mamalu a le Faaola o le Lalolagi: “Ua lelei ia, le auauna lelei e, ma le faamaoni,”¹¹ ou te tatalo atu ai, a o o’u faamanuia atu ia te outou faapea le faletua pele o James E. Faust, o lana pele o Ruth, o loo faatasi ma i tatou i le po nei o loo i le laina nofoa pito i luma, ma lo la aiga, i le suafa o Iesu Keriso, amene.