O Se Perisitua Tau Tupu
Atonu e sui taimi, atonu foi e fesuiai tulaga, ae o uiga o le e umia moni le perisitua a le Atua, e tumau e le liua.
Uso e, a o o’u vaavaai atu mai le tasi itu i le isi itu o lenei maota ofoofogia, e mafai ona ou faapea atu, o se vaaiga musuia lava outou. E ofoofogia le iloa, o loo i ai isi o outou—o e umia le perisitua a le Atua—o loo mauaina lenei faasalalauga, i le fiaafe o falelotu i le lalolagi atoa e ala i le satelite. E eseese atunuu ma e tele gagana, ae o loo fusia faatasi i tatou i se filo masani. Ua faatuatuaina i tatou e tauave le perisitua, ma galulue ai i le suafa o le Atua. O i tatou o e ua mauaina se faatuatuaga paia. E tele mea ua faamoemoe mai ia i tatou.
O i tatou o e ua umia le perisitua a le Atua ma faamamaluina, o nisi o i latou sa faapolopolo mo lenei vaitau faapitoa i le talafaasolopito. Sa faamatala mai e le Aposetolo o Peteru i le mataupu lona lua o le 1 Peteru, i le fuaiupu e iva: “A o outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou tautau atu ona lelei na ia valaau ia te outou nai le pouliuli e oo i lona lava malamalama e matua ofo ai.”
E mafai faapefea ona faaagavaaina oe ma au mo lena faalagiga, “o se perisitua tau tupu”? O a uiga o se atalii moni o le Atua soifua? O le po nei ou te manao ina ia tatou mafaufau i nisi o na lava uiga.
Atonu e sui taimi, atonu foi e fesuiai tulaga, ae o uiga o le e umia moni le perisitua a le Atua, e tumau e le liua.
Sei ou fautuaina atu muamua e faapea, o i tatou uma lava ia atiina ae le uiga o le vaai mamao. Fai mai se tasi o tusitala, o faitotoa o le talafaasolopito e taofiofi e ni taofi laiti, ma e faapena foi i olaga o tagata. Afai tatou te faatatauina lena alagaupu i o tatou olaga, e mafai ona tatou faapea o i tatou o taunuuga o le tele o ni faaiuga laiti. O le mea moni, o i tatou o taunuuga o a tatou filifiliga. E ao ona tatou atiina ae le gafatia e manatua ai le taimi ua tuanai, e iloilo ai le taimi nei, ma vaai atu ai i le lumanai ina ia mafai ona ausia i o tatou olaga mea o loo finagalo le Alii tatou te faia.
O outou na alii talavou o loo umia le Perisitua Arona e tatau ona i ai le gafatia e vaai faalemafaufau ai i le aso o le a e umiaina ai le Perisitua Mekisateko ma faapea ona saunia ai outou lava o ni tiakono, o ni aoao, o ni ositaulaga ia maua le Perisitua Mekisateko paia a le Atua. Ua ia te oe le matafaioi e sauni ai, pe a e maua le Perisitua Mekisateko, e tali atu i se valaau e auauna atu o se faifeautalai e ala lea i le taliaina ma le faataunuuina [o le valaau]. Ou te matuai tatalo ina ia maua e tama uma ma alii uma le uiga o le vaai mamao.
O le mataupu faavae lona lua ou te fia faamamafaina o se uiga o le e umia moni le perisitua a le Atua, o le uiga o le taumafai. E le lava le na o le manao e fai se taumafaiga ma fai mai o le a tatou taumafai. E ao moni lava ona fai le taumafaiga. O le faia, ae le na o le mafaufau i ai, e mafai ai ona ausia a tatou sini. Afai tatou te tolopoina i taimi uma a tatou sini, o le a le mafai lava ona tatou vaai o faataunuuina. Na faaupuina e se tasi faapenei: A e ola mo na o taeao, [o lona uiga] o taeao o le a na o ni ananafi maimau.1
O Iulai o le 1976, na naunau ai le [alii] tamoe o Kali Pokalani ina ia agavaa mo le Au o le Olimipeka a le Iunaite Setete i le tuuga o le 10,000 mita o le a faia i le Olimipeka i Montreal. Ae peitai, o le afa o le tuuga faigata e agavaa ai, na pau ese ai lona seevae agavale. O le a se mea e te faia ma ou faia pe a na faapea o le mea lena e tupu ia i tatou? Ou te manatu e mafai lava ona ia togi le solo ma nofo loa. E mafai ona ia tuuaia lona le manuia ma misi ai le avanoa e auai ai i le tuuga aupito maoae o lona olaga; peitai, e lei faia e lenei tagata taalo siamupini lena tulaga. Sa tamoe pea o ia e aunoa ma lona seevae. Sa ia iloaina o le a tatau ona momoe ia saoasaoa atu nai lo se isi lava taimi na tamoe ai i lona olaga. Na ia iloaina, ua i ai nei se mea ua sili atu ai isi tagata taufetuli lea e le’i i ai i le amataga o le tuuga. Sa tamoe o ia i luga o lena auala maamaā, ma le seevae tasi, ma na tulaga tolu ma agavaa ai mo le avanoa e auai i le tuuga mo le pine auro. O lana lava taimi na tamoe ai o le taimi aupito lelei lea na ia ausia. Sa ia faia se taumafaiga talafeagai ina ia ausia ai lana sini.
I le avea ai ma e umia le perisitua, e iu ina tatou iloa e i ai taimi i o tatou olaga o le a tatou tautevateva ai, pe a tatou vaivai pe lelavava, pe o le a tatou mafatia i le le fiafia po o se lototiga. Pe a tupu mai lena mea, ou te faamoemoe o le a tatou lava papale faatasi ma taumafai malosi atu i la tatou sini.
Atonu e i ai se taimi i o tatou olaga o le a valaauina ai i tatou taitoatasi e faataunuu se valaauga i le Ekalesia, a le o se peresitene o le korama a le au tiakono, o se failautusi a le korama a le au aoao, o se faufautua a le au perisitua, o se faiaoga i se vasega, po o se epikopo. E mafai ona ou taua nisi mea se tele, ae ua outou malamalama i le uiga o lau tala. Sa na o le 22 ou tausaga ina ua valaauina au e avea o se epikopo o le Uarota Onosefulufitu i le Aai o Sate Leki. Faatasi ai ma le 1,080 tagata o le uarota, sa manaomia ai se taumafaiga tele ina ia mautinoa o vaega uma sa manaomia ona taulimaina sa faataunuuina, ma ia lagona e tagata uma o le uarota le faaaofia ai ma tausia. E ui lava ina sa faigata tele lenei tofiga, ae ou te le’i faatagaina le tofiga e lofituina au. Sa ou galue, e pei ona faia e isi, ma fai mea uma na ou mafaia e auauna atu ai i le mea sili sa ou mafaia. E mafai foi e i tatou uma taitoatasi ona faia lea lava tulaga, e tusa lava po o le a le valaauga po o le tofiga.
O le tausaga ua tuanai sa ou filifili ai e vaai pe toe fia ni fale o loo i ai pea mai le taimi na avea ai au ma se epikopo. Sa ou tietie lemu faataamilo i atufalega taitasi lea sa masani ona aofia i le uarota. Sa ou tei i le iloa i lau suesuega e faapea, mai fale uma ma fale mautotogi na nonofo ai le 1,080 o tagata o le matou uarota, e na o le tolu lava fale o loo totoe ai. I se tasi o na fale, ua maualuga le ola a le vao ma laau ua le teuina, ma e leai se tasi na ou maua o nofo ai iina. O isi fale e lua na totoe, e tasi na punipuni atoa i laupapa ma tuufua, ae o le isi fale ua faaaoga e fai ai se tamai pisinisi.
Sa faatu la’u taavale, tape le afi, ma [ou] saofai ai mo se taimi umi. Sa mafai ona ou vaai faalemafaufau i fale taitasi ma atufalega o fale mautotogi, ma tagata taitoatasi sa nonofo ai iina. E ui ina ua leai ni fale o aiga ma fale mautotogi, ae sa manino lelei lava le manatua o aiga na nofoia ia nofoaga taitasi. Sa ou mafaufau i upu a le tusitala o James Barrie, o le na tusia e faapea, na aumai e le Atua ia i tatou mea e manatuaina, ina ia tatou maua ni rosa o Iuni i Tesema o o tatou olaga.2 Oka sou agaga faafetai mo le avanoa e auauna atu ai i lena tofiga. E faapena ni faamanuiaga mo i tatou taitoatasi pe a tatou tuuina atu a tatou taumafaiga aupito sili ona lelei i o tatou tofiga.
O le uiga o le taumafai e manaomia mai ia i latou uma ua umia le perisitua.
O le mataupu faavae lona tolu ou te fia faamamafa atu o le uiga o le faatuatua. E tatau ona tatou faatuatua ia i tatou lava ma faatuatua i le mana o lo tatou Tama Faalelagi e faamanuia ma taitaia i tatou i a tatou taumafaiga. I tausaga e tele ua mavae, na tusia ai e se fai salamo ia se upumoni matagofie: “O le faatuatua ia Ieova e sili lea i le faalagolago i tagata. O le faatuatua ia Ieova e sili lea i le faalagolago i alii.”3 I nisi faaupuga, ia tuu lo tatou faatuatua i le mana o le Alii e taitaia i tatou. Ua tatou iloa, o faauoga e mafai ona femoumouai ma fesuiai, ae o le Alii e tumau pea e le liua.
O Siekisipia, i lana tala faatino o le King Henry the Eighth, na aoaoina lenei upumoni e ala ia Cardinal Wolsey—o se alii sa fiafia i le tulaga maoae ma le faamaualuga ona o le la faigauo ma le tupu. Ina ua muta le faigauo, sa aveesea le pule a Cardinal Wolsey mai ia te ia, ma iu ai ina aveese le lauiloa ma le maoae. O ia o se tasi sa maua mea uma ona toe aveeseina uma ai lea. I le faanoanoa o lona loto, sa ia talanoa atu ai i se mea moni i lana auauna o Kolomueli [Cromwell]:
Oi Kolomueli, Kolomueli e!
Maimau e pe a na ou tautua lotonuu i lo’u Atua
Ina ua ou tautuaina lou tupu, semanu ou te toeaina,
Na te le tuua au o se mea noa i luma o ou fili.4
Ou te mautinoa o le a tatou maua le uiga o le faatuatua i loto uma o i tatou ua mafuta mai i lenei afiafi.
Ou te faaopoopoina i la’u lisi le uiga o le mama. Ua fetalai mai le Alii e tatau ona teuteuina o tatou manatu i le mama e le aunoa.5
Ou te manatua se sauniga perisitua na faia i le Tapeneko i le Aai o Sate Leki, a o ou umia le Perisitua Arona. Sa saunoa mai le Peresitene o le Ekalesia i le au perisitua, ma na ia saunoa ai i se faamatalaga e lei galo lava ia te au. Sa saunoa o ia ma le faamaoni e faapea, o alii o e solia le agasala feusuai po o isi agasala latou te le faia lea tulaga i le emo o le mata. Sa ia faamamafaina e faapea, o a tatou amioga e muamua ai o tatou mafaufauga, ma o lo tatou faia o se agasala, sa muamua ona tatou mafaufau e faia lena lava agasala. Ona folafola mai lea e le Peresitene e faapea o le ala e aloese ai mai le agasala o le faatumauina lea o o tatou mafaufauga ia mama. Fai mai le mau e pei ona tatou manatu i o tatou loto, ua faapena lava i tatou.6 E tatau ona tatou maua le uiga o le mama.
Afai o le a avea i tatou ma faifeautalai i le malo o lo tatou Tama Faalelagi, e tatau ona tatou agavaa mo le mafutaga a Lona Agaga Paia, ma ua ta’u sao mai ia i tatou o le a le afio Lona Agaga i nofoaga le mama pe le paia.
O le mea mulimuli, sei ou faaopoopo atu i ai le uiga o le tatalo. O le naunau o se tagata e talanoa ma lona Tama Faalelagi o se uiga lea o se e umia moni le perisitua a le Atua.
A o tatou tuuina atu i le Alii a tatou tatalo faaleaiga ma a tatou tatalo faaletagata lava ia, ia tatou faia ma le faatuatua ma le faalagolago ia te Ia. Ia tatou manatua le poloaiga a le Aposetolo o Paulo i Eperu: “Aua e tatau i le alu atu i le Atua ona talitonu o loo soifua o Ia, o Ia foi na te tauia mai o e matua saili ia te Ia.”7 Afai e i ai se tasi o i tatou o loo faatuai ona gauai atu i le fautuaga ina ia tatalo e le aunoa, e leai se isi itula sili ona lelei e amata ai nai lo le taimi nei. Na tautino mai e Viliamu Kupa, “E tetemu Satani pe a ia vaai atu i le tagata aupito vaivai o le au paia o loo i ona tulivae.”8 O i latou o e manatu e faapea o le tatalo e ono iloa ai le vaivai faaletino e tatau ona toe mafaufau e le mafai e se tagata ona tu maualuga atu nai lo le taimi e i ai o ia i ona tulivae.
Tau ina ia tatou manatua i taimi uma:
Tatalo o moomooga moni o le agaga,
O uunaiga,
A se afi lilo
Le loto e ootia ai… .
A tatou atiina ae le uiga o le tatalo, o le a tatou maua faamanuiaga o loo i ai i le Tama Faalelagi mo i tatou.
I le faaiuga, tau ina ia i ai sa tatou vaai mamao. Tau ina ia tatou tuu i ai le taumafai. Tau ina ia tatou faaalia le faatuatua ma le mama ma ia avea i taimi uma le tatalo o se vaega o o tatou olaga. Ona avea moni ai lea o i tatou ma se perisitua tau tupu. O la’u tatalo lena, o la’u tatalo patino i lenei afiafi, ma ou te ofoina atu mai lo’u loto i le suafa o Iesu Keriso, amene.