E Le Tatau Ea Ona Tatou Olioli?
O se lotu fiafia lenei, o se lotu o le faamoemoe, malosi, ma le faasaolotoina.
O lea lava ou te olioli i le agaga matagofie sa tatou lagonaina a o tatou lagiina faatasi i lenei taeao le pese:
Ia fiafia tatou i le aso o le faaola.
E le toe se lava tatou i lalo nei.
Ua alaga le tala fiafia i nuu uma.
(“Ia Fiafia Tatou,” Viiga, nu. 3).
O upu nei a Uso William W. Phelps e fai lava si vala mai le mafuli atu o le lalolagi e taulai i tala e le lelei. E moni, o loo tatou ola i se taimi na valoia e tusitusiga paia o aso o “taua, ma tala o taua, ma mafuie i lea mea ma lea mea” (Mamona 8:30), o le a “vavao le lalolagi atoa, ma e matata’u ma lotovaivai tagata” (MFF 45:26).
Ae e aafia ai faapefea i tatou o tagata O Le Ekalesia a Iesu Keriso o le Au Paia o Aso e Gata Ai? Pe o tatou nonofo ea ma le atuatuvale, fefefe, ma le popole? Po o le, e ui lava i le lotolotoi o o tatou luitau, pe ua le tatau ea ona tatou olioli?
Tatou te feagai uma lava ma aafiaga eseese o le olaga. O nisi aafiaga e tumu i le olioli, a o isi e tumu i le faanoanoa ma le le mautonu.
Ou te manatuaina se taimi sa lei foliga lelei ai le tulaga o lo matou aiga a o ou laitiiti. O le taumalulu i le 1944, lea sa aupito sili ona malulu i le taimi o le Taua Lona Lua a le Lalolagi. Sa oo ina taulalata mai au siitaua i lo matou taulaga, ma sa tatau ai i lo’u tina ona ave i matou le fanau e toafa, ae tuu uma a matou meatotino, ma faatasi atu i le faitau miliona o tagata sulufai sa sosola ese ma le atuatuvale e saili se nofoaga ia ola ai. O lo’u tama sa i ai i le Militeli, peitai sa malilie i laua ma Tina afai ae tuueseese i le taimi o le taua, o le a la taumafai e toefaatasia i le aai e nonofo ai o’u matua matutua. Sa lagona e i laua, o le nofoaga lea e maua ai le faamoemoega aupito sili mo se malutaga ma le saogalemu.
O le tu’ipomuina i le po ma osofaiga i le ea i le ao, sa umi ai se taimi faatoa matou taunuu i o’u matua matutua. O mea ou te manatua i na aso e na o le pogisa ma le matautia.
Sa toe foi mai lo’u tama e lei afaina, peitai sa matua faigata lo matou lumanai. Sa matou ola i toega o le taua i Siamani ma se lagona faatamaia o le leai o se faamoemoe ma le pogisa e uiga i lo matou lumanai.
I le totonugalemu o lenei atuatuvale, sa aoao ai lo matou aiga e uiga i le Ekalesia a Iesu Keriso o le Au Paia o Aso e Gata Ai, ma le savali faamalolo o le talalelei toefuataiina a Iesu Keriso. O le savali lenei na faia ai le eseesega uma; na siitia ae ai i matou i luga atu o lo matou faanoanoa i aso taitasi. Sa faigata pea lava le olaga ma matautia tulaga, peitai na aumaia e le talalelei le malamalama, faamoemoe, ma le olioli i o matou olaga. Sa faamafanafanaina e upumoni manino ma le faigofie o le talalelei o matou loto ma faamalamalamaina ai o matou mafaufau. Sa fesoasoani ai matou te tilotilo ifo ia i matou lava i ni mata e ese, ma mai se vaaiga e maualuga atu.
Ou uso e ma tuafafine pele, ua le tatau ea ona tatou olioli ona o le talalelei toefuataiina a Iesu Keriso, ma lo tatou auai i Lana Ekalesia?
Po o fea lava o e nofo ai i lenei fogaeleele ma pe o le a lava le tulaga o i ai lou olaga, ou te tautino atu o le talalelei a Iesu Keriso ua i ai le mana paia, e sii ae ai oe i se mea e maualuga atu mai mea e foliga mai i nisi taimi o se avega e le magafatia po o vaivaiga. Ua silafia e le Alii ou tulaga ma ou luitau. Na fetalai o Ia ia Paulo ma i tatou uma, “O lo’u nei alofa tunoa e lava lea e fesoasoani ia te oe.” E faapei foi o Paulo e mafai ona tatou tali atu: “Ua tele lo’u fiafia i le mitamita i mea ua ou vaivai ai, ina ia tumau i ou luga le mana o Keriso” (2 Korinito 12:9).
O le avea ai ma tagata o le Ekalesia a Iesu Keriso, ua mafai ai ona tatou aia i faamanuiaga ua folafola mai i feagaiga ma sauniga sa tatou mauaina ina ua tatou talia le talalelei a Iesu Keriso.
O Le A le Talalelei a Iesu Keriso?
O le talalelei a Iesu Keriso, o le tala e lelei, e olioli ai, ma le tele o isi mea. O le savali o le faaolataga e pei ona faasilasila mai faafia e Iesu Keriso ma Ana aposetolo ma perofeta. O lo’u talitonuga mautu, o upumoni uma ma malamalama e afua mai i le Atua, ua i ai lea i totonu o le talalelei a Iesu Keriso.
O le Atua, lo tatou Tama alofa i le Lagi, na tulei mai o Lana galuega ma le mamalu “o le faataunuu o le faaofuina o le tagata i le tino ola pea ma le ola faavavau” (Mose 1:39). O le Atua le Tama o le tupuga o le talalelei; o se vaega autu o le fuafuaga a le Atua o le faaolataga, po o le fuafuaga o le togiola. Ua taua o le talalelei a Iesu Keriso aua o le Togiola a Iesu Keriso ua mafai ai ona maua le togiola ma le faaolataga. O le Togiola e togiolaina ai alii uma, ma tamaitai, atoa ai ma tamaiti mai le oti faaletino e aunoa ma ni tuutuuga, ma o le a togiolaina foi tagata uma mai a latou lava agasala i luga o le tuutuuga latou te taliaina ma usiusitai i le talalelei a Iesu Keriso (tagai MFF 20:17–25; 76:40–42, 50–53; Mose 6:62).
O le talalelei a Keriso ua pau lea o le talalelei moni, ma “e leai se tasi igoa e foaiina mai po o se tasi ala e oo mai ai le olataga i le fanauga a tagata, ua na o le suafa lava o Keriso, le Alii e pule aoao” (Mosaea 3:17; tagai foi i le Galuega 4:12).
O elemene autu o le savali o le talalelei o loo maua i tusitusiga paia, ae e sili atu ona manino le aumaiga i le Tusi a Mamona ma faaaliga i le Perofeta o Iosefa Samita. O loo tautino manino mai ai e Iesu lava Ia Lana aoaoga faavae ma Lana talalelei, lea e tatau ona usitaia e fanau a le Atua ina ia “maua ai le olaga faavavau” (MFF 14:7; tagai foi i le 3 Nifae 11:31–39; 27:13–21; MFF 33:11–12).
E manino lava ma malamalama le talalelei. E tali ai le tele o fesili lavelave o le olaga, e oo lava i se tamaitiiti e mafai ona malamalama ai ma faaaoga. E pei ona fai mai Nifae: “Ua olioli lo’u agaga i le malamalama, aua foi e faapenei ona galue le Alii le Atua i le fanauga a tagata. Aua ua foai mai e le Alii le Atua le malamalama i le mafaufau, aua foi ua tautala mai o ia i tagata i o latou mafaufau e tusa ma la latou gagana, e tusa ma lo latou malamalama” (2 Nifae 31:3).
Sa mulimuli le Perofeta o Iosefa Samita i le mamanu lava lea e tasi o le manino ma le malamalama ina ua ia faamatala mai i le lalolagi i se ala puupuu lava ia “muai mataupu faavae ma sauniga o le Talalelei” (Mataupu Faavae o le Faatuatua 1:4), lea e tatau ona tatou talia ina ia maua ai faamanuiaga faavavau o le talalelei:
Muamua: faatuatua i le Alii o Iesu Keriso—talitonu i le Togiola, le Alo o le Atua, “ma le faatuatua e le mafaagaeetia ia te ia, o loo faalagolago lava i le galuega a Le faamalosi i faaola” ona “[fetaomi] atu ai lea i luma ma le faamaoni ia Keriso, … o fiafia i le afioga a Keriso” (2 Nifae 31:19–20).
Lua: salamo, lea e aofia ai se suiga o le mafaufau, ma avatu “se taulaga … [o le] loto momomo ma se agaga salamo”; ma lafoai le agasala ae avea “e faapei o se tamaitiiti” (3 Nifae 9:20, 22) ia agamalu ma lotomaulalo.
Tolu: papatisoina e ala i le faatofuina mo le faamagaloga o agasala ma osia se feagaiga e tausia poloaiga a le Atua ma tauaveina i o tatou luga le suafa o Keriso.
Fa: o le faaee atu o lima mo le meaalofa o le Agaga Paia, lea ua lauiloa foi o le papatisoga i le afi, lea e faapaiaina ai i tatou ma avea ai i tatou o ni “tagata fou,” ua fanauina i la le Atua (tagai Mosaea 27:26; tagai foi 1 Peteru 1:23).
O le meaalofa o le Agaga Paia, mo i tatou mai lo tatou Tama Faalelagi, ma sa tuuina mai e se tasi ua i ai le pule, e aofia ai le folafolaga e tumu i le alofa: “Afai tou te ui atu i le ala ma talia le Agaga Paia, na te faaali ia te outou mea uma e tatau ona faia” (2 Nifae 32:5). O le mafutaga faifai pea ma le Agaga Paia, e mafai ai e tagata uma o le Ekalesia ona maua sa’o mai “afioga a Keriso” (2 Nifae 32:3), i soo se taimi po o se nofoaga. E fesoasoani lenei taiala patino paia ia i tatou e tumau ai le totoa i le molimau ia Iesu Keriso ma tumau seia oo i le iuga o o tatou aso. Pe le ofoofogia ea lenei mea!
E le tatau ea ona tatou olioli?
O Le A Le Uiga o le Tumau e Oo i le Iuga?
Ua aoao mai i tatou e tusitusiga paia, a tatou maua loa lava le sauniga o le papatisoga ma le faamauga, o la tatou matafaioi loa e sosoo ai o le “tumau e oo i le iuga” (2 Nifae 31:20).
A o ou tamaitiiti, o le “tumau e oo i le iuga” o lona uiga autu lava ia te au o lo’u taumafai malosi lea ou te mataala seia uma a matou sauniga faale-Lotu. Mulimuli ane ina ua ou talavou, sa na o sina faaopoopoga laitiiti sa i ai lo’u malamalama i lenei fuaitau faatusi paia. Sa ou faafesootaia ma le malamalama faatalavou i taumafaiga a nai tagata matutua pele e tumau pea le faamaoni, seia iu lo latou soifua.
Tumau e oo i le iuga, po o le tumau le faamaoni i tulafono ma sauniga o le talalelei a Iesu Keriso i o tatou olaga uma, o se tulaga manaomia taua lea mo le faaolataga i le malo o le Atua. O lenei talitonuga ua tulaga ese ai le Au Paia o Aso e Gata Ai mai le tele o isi lotu Kerisiano o loo tala’ia faapea, ua tuuina atu le faaolataga i tagata uma o e ua na ona talitonu ma tautau o Iesu o le Keriso. Ua tautino manino mai e le Alii, “Afai e te tausi i au poloaiga ma tumau e oo i le iuga o le a e maua le olaga faavavau, o le meaalofa sili lea i lo meaalofa uma a le Atua” (MFF 14:7).
O le mea lea, o le tumau e oo i le iuga e le na o se mataupu o le onosaia o tulaga faigata o le olaga po o le “ola ai pea i faigata.” O la tatou ekalesia, o se lotu e toaaga, e fesoasoani ai i fanau a le Atua i le ala sa’o ma le vaapiapi e atiina ae lo latou agavaa atoa i lenei olaga ma toe foi atu ai ia te Ia i se aso. Mai le vaaiga lenei, o le tumau e oo i le iuga e faaeaina ma viia, e le nenefu ma puaoa. O se lotu fiafia lenei, o se lotu o le faamoemoe, malosi, ma le faasaolotoina. “Na pau Atamu ina ia i ai tagata; ua ola tagata ina ia latou maua le olioli” (2 Nifae 2:25).
O le tumau e oo i le iuga, o se faagasologa e faaaoga ai minute uma o lo tatou olaga, o itula uma, aso uma, mai le oso ae o le la seia goto. E ausia i le amio pulea faaletagata ma mulimuli i poloaiga a le Atua.
O le talalelei toefuataiina a Iesu Keriso o se ala o le ola. E le mo na o le Aso Sa. E le o se mea e mafai ona tatou faia tau lava o se amio po o se tu masani, pe afai tatou te mananao e selesele ona faamanuiaga uma ua folafola mai. “Aua nei faaseseina outou, e le ulagia le Atua aua o le mea e luluina e le tagata, o le mea lava lea e seleseleina mai ai e ia” (Kalatia 6:7).
O le tumau e oo i le iuga e ta’u mai ai “e tumau pea i galuega lelei” (Roma 2:7), ma taumafai e tausi poloaiga (tagai 2 Nifae 31:10), ma faia galuega o le amiotonu (tagai MFF 59:23). E manaomia ai le ositaulaga ma le galue malosi. Ina ia tumau e oo i le iuga, e manaomia lo tatou faalagolago i lo tatou Tama i le Lagi ma faia filifiliga atamai, e aofia ai le totogi o a tatou sefuluai ma taulaga, faamamaluina a tatou feagaiga o le malumalu, ma auauna atu i le Alii ma le tasi i le isi ma le naunautai ma le faamaoni i o tatou valaauga ma tiute i le Ekalesia. O lona uiga o le malosi o le amio, e le manatu faapito, ma lotomaulalo; o lona uiga o le amiosao ma le faamaoni i le Alii ma o tatou uso a tagata. O lona uiga ia avea o tatou aiga ma nofoaga malolosi o le puipuiga ma se sulufaiga mai mea leaga o le lalolagi; o lona uiga o le alolofa ma ava i o tatou taitoalua ma fanau.
O le faia o le mea sili tatou te mafai e tumau ai e oo i le iuga, o le a oo mai ai i o tatou olaga se suiga matagofie. O le a tatou aoao ai e “agalelei atu i e ua inoino mai ia te [i tatou]” (Mataio 5:44). O faamanuiaga tatou te maua mai le tumau e oo i le iuga o lenei olaga, e moni ma e sili ona maoae, ma e le oo i ai lo tatou malamalama i le olaga a sau.
E Finagalo Iesu Keriso Ia E Manuia
O’u uso e ma tuafafine, o le a i ai aso ma po tou te lagona ai le lofituina, pe a faaatu o outou loto ma faagaugau i lalo o outou ulu. Ona, manatua lea faamolemole ia Iesu Keriso, le Togiola, o le Ao o lenei Ekalesia. O Lana talalelei lenei. E finagalo o Ia ia e manuia. Na pau lava lea o le faamoemoega na Ia ofoina mai ai Lona soifua. O Ia o le Alo o le Atua soifua. Ua Ia folafola mai:
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28).
“Aua e mavae atu atumauga, e aveeseina foi mauga iti, a e le mavae atu lo’u alofa ia te oe, pe aveeseina le feagaiga a lo’u nuu, o loo fetalai mai ai le Atua, o Le alofa ia te oe” (3 Nifae 22:10). ”Ou te alofa atu ia te oe, ua fetalai mai ai le Atua lou Togiola” (3 Nifae 22:8).
Au uo pele, e faamalolo e le Faaola le loto ua momomo ma fusifusia e ia o outou manua (tagai Salamo 147:3). Po o a lava ou luitau, pe o fea foi e te nofo ai i lenei lalolagi, o lou faamaoni i le avea ai o oe ma se tasi O Le Ekalesia a Iesu Keriso o le Au Paia o Aso e Gata Ai ma le mana paia o le talalelei a Iesu Keriso, o le a faamanuiaina ai oe ina ia e tumau fiafia e oo i le iuga.
Ou te molimau atu ai i lenei mea, faatasi ma lo’u loto atoa ma le mafaufau atoa i le suafa paia o Iesu Keriso, amene.