O Mea Vaivai ma le Faigofie a le Ekalesia
E leai se tagata o le ekalesia, e leai foi se valaauga e manatu i ai le Alii faapea e sili atu pe faaletaua nai lo se isi.
Tatou te faamamaluina Peresitene James E. Faust. Ua tatou misia o ia. O loo tatou mafuta i lenei taeao ma lona faletua pele, o Ruth, ma e faailoa atu o tatou alofaaga mo ia. E faafeiloai atu foi ia i latou ua tofia i tofiga e pei ona fofogaina mai e Peresitene Hinckley.
O i tatou uma o e sa lagolagoina i le aso, ua tatou tautino atu e faia le mea aupito silisili tatou te mafaia ina ia agavaa ai mo le faatuatuaga ua tuuina mai ia te i tatou.
Ua uma ona tatou lagolagoina le au ofisa aoao o le Ekalesia, i se faatulagaga faavae e mamalu, ma paia. O lenei faatulagaga faavae masani i soo se taimi e valaau ai taitai po o faiaoga pe faamalolo foi mai se tofi, po o soo se taimi foi e i ai se toe faatulagaga o se siteki po o se uarota po o se korama po o ni ausilali (tagai MFF 124:123, 144; tagai foi MFF 20:65–67; 26:2). E tulaga ese lava i le Ekalesia a Iesu Keriso o le Au Paia o Aso e Gata Ai.
Tatou te iloa lava i taimi uma po o ai ua tofia e taitai pe faiaoga ma maua le avanoa e lagolago ai pe tetee foi i le gaoioiga. O lenei faiga e lei afua mai i se tagata ae na faamalamalama mai i faaaliga: O le a le tuuina atu se tasi e alu atu e tala’i la’u talalelei, pe atiina ae la’u ekalesia, vagana ua faauuina o ia e se tasi o i ai le pule, ma e lauiloa e le ekalesia o ia te ia le pule ma ua uma ona faauuina i le ala e masani ai, e i latou o e taitai i le ekalesia” (MFF 42:11; faaopoopo le faamamafa). O lea faiga, e puipuia ai le Ekalesia mai soo se tagata taufaasese e manao e pulea le korama, uarota, siteki, po o le Ekalesia.
O loo i ai se isi mataupu faavae tulaga ese i le Ekalesia a le Alii. O tofiga uma e faiaoga ma taitai, e faatumuina e tagata o le Ekalesia. Ua faamalamalama mai foi lea tulaga i tusitusiga paia. O loo ta’u mai i se fuaiupu e tasi i le Mataupu Faavae ma Feagaiga le faatulagaga o le taitaiga i le Ekalesia mo taimi uma. E le mafaatusalia, o le mea moni e le o se tu masani a ekalesia Kerisiano i lena taimi po o le taimi nei foi:
“O le mea lea, o A’u le Alii, ina ua iloa le malaia o le a oo mai i luga o tagata o le lalolagi, na ou valaauina ai la’u auauna o Iosefa Samita, le Itiiti., ma ua ou tautala atu ia te ia mai le lagi, ma ua tuuina atu ia te ia poloaiga; …
“O le a oo mai mea vaivai a le lalolagi ma lepetia i lalo mea sili ma le malolosi, …
“… Ia mafai ona taitoatasi le tagata ma tautala atu i le suafa o le Atua le Alii, o le Faaola lava o le lalolagi.
“Ina ia mafai ona faalauteleina foi le faatuatua i le lalolagi;
“Ina ia mafai ona faatuina la’u feagaiga faavavau;
“Ina ia mafai ona folafola atu le atoatoa o la’u talalelei e e vaivai ma lotomaulalo e oo i tuluiga o le lalolagi, ma luma o tupu ma faipule.
“Faauta, o au o le Atua ma ua fai atu ai; o a’u poloaiga lava nei, ma ua ou tuuina atu i a’u auauna i lo latou vaivai, e tusa ma le uiga o la latou gagana, ina ia mafai ona latou maua le malamalama” (MFF 1:17, 19–24).
Ua ou matua faafetai lava ona o nei mau, ia o loo faamalamalama mai ai o le a faaaoga e le Alii “mea vaivai a le lalolagi.”
Ua i ai i tagata taitoatasi o le ekalesia le matafaioi e talia ai le valaauga e auauna atu.
Na saunoa Peresitene J. Reuben Clark Jr. e faapea: “I le galuega a le Alii, e le taua po o fea e te galue ai, ae taua le auala e te auauna atu ai. O Le Ekalesia a Iesu Keriso o le Au Paia o Aso e Gata ai, e galue le tagata i le mea e tofia i ai, o lea foi tulaga e le sailia e se tasi pe teena foi” (i le Conference Report, Apr. 1951, 154). E leai ni faifeau faapolofesa o le Ekalesia. O le valaauga i tulaga faaleautaitai i le lalolagi atoa, e tofi mai lava i le faapotopotoga. E leai ni aoga faafaifeau e aoao ai faapolofesa ia taitai.
O mea uma lava e faia i le Ekalesia—o le taitaiga, o valaauga, o tatalo, o pesega, o le sauniuniga o le faamanatuga, o apoapoaiga, ma isi mea uma lava—e faia e tagata masani o le ekalesia, “o mea vaivai o le lalolagi.”
Tatou te vaaia ekalesia Kerisiano o taumafai malosi e faatumu o latou tulaga manaomia o ni faifeau. E le o i ai se faafitauli o lena mea ia i tatou. A uma loa lava ona folafola atu le talalelei ma faatulaga le Ekalesia, o loo i ai se sapalai e le muta o uso ma tuafafine faamaoni o e ua i ai molimau ma ua naunau e tali atu i le valaau e auauna atu. Latou te tautino atu i latou lava i le galuega a le Alii, ma ola i tulaga faatonuina e manaomia mo i latou.
Ua faaee atu i tagata le Agaga Paia pe a uma o latou Papatisoga (tagai MFF 33:15; 35:6). O le a aoao ma faamafanafanaina i latou e le Agaga Paia. Ona latou saunia ai lea e maua le taiala, taitaiga, ma le faasa’oga, i soo se mea e moomia i o latou tulaga ma manaoga. (Tagai Ioane 14:26; MFF 50:14; 52:9; 75:10.)
O le mataupu faavae lea ua ese ai le Ekalesia mai isi ekalesia Kerisiano uma i le lalolagi. E tulaga ese lava i tatou i le i ai o se sapalai e le uma o faiaoga ma taitai, i atunuu uma o ituaiga ma gagana atoa ma tagata, i le lalolagi atoa. O loo i ai se tulaga ese o le laugatasia i tagata o le ekalesia. E leai se tasi o i tatou e manatu ua sili a’e ia lava nai lo se isi. (Tagai MFF 38:24–25.) “E le faailoga tagata le Atua: A e peitai o le mata’u ia te ia i nuu uma lava, ma fai le amiotonu ua talia i latou e ia” (Galuega 10:34–35; tagai foi Roma 2:11; MFF 1:35; 38:16).
A o ou talavou, sa avea au o se faiaoga o aiga i se tuafafine olomatua. Sa ia aoaoina au mai aafiaga o lona olaga.
A o teineitiiti o ia, sa sau Peresitene Polika Iaga i le Aai o Polika, o se sauniga tele i le taulaga sa faaigoa ia te ia. Ina ia faamamaluina o ia, sa faaitualalua tamaiti o le Peraimeri, sa ofu papae uma, i le agai mai i le taulaga, sa tofu tamaiti ma se ato fugalaau e faasalalau i luma o le taavale a le Peresitene o le Ekalesia.
Sa i ai se mea sa le fiafia ai o ia. Nai lo le tauai atu o ana fugalaau, sa ia aaina se maa i luma o le taavale ma faapea atu, “E le sili atu lava o ia i lo’u Tamamatua o Lovelund.” Sa lagona mai lena mea, ona matua otegia ai lea o ia.
Ou te matua talitonu, o Peresitene Polika Iaga, o le tagata muamua lea e ioe faatasi ma le teineitiiti o Janie Steed. O le a na le manatu ifo ia te ia lava, faapea ua sili atu i lo Tamamatua Lovelund po o se isi lava tagata agavaa o le Ekalesia.
Na matua manino lava le fetalaiga a le Faaola lava Ia: “O se fia muamua foi ia te outou, ia fai o ia ma a outou tautua” (Mataio 20:27). “O le ua faauuina e le Atua ma auina atu, o ia lava lea ua filifilia ia sili, a e ui i lea, o ia e aupito itiiti ma o se auauna i tagata uma” (MFF 50:26).
I tausaga ua mavae, ina ua ou faatoa mauaina se tofiga lea na mafua ai ona i ai so’u ata i le nusipepa, sa faalogoina ai se tala a se tasi o ou faiaoga i le aoga maualuga, lea e iloa lelei lona maofa, o faapea, “Ua faamaonia lelei ai lava i i e le mafai ona e iloa le maualuga o le oso a se lane i le na o le tilotilo i ai!”
O foliga o lena lane, o nofonofo i le palapala ae le osooso, e faapupula mai ai lagona o lo’u matuai le gafataulimaina lava o tiutetauave na oo mai ia te au.
O nei lagona e faalotomaulaloina ai se tagata, ina ia le manatu faasausili ai lava se tasi, soo se tasi lava.
Sa umi se taimi, sa i ai se tasi mea sa ou le mautonu ai. E fasefuluono tausaga talu ai, sa avea ai au ma se supavaisa e 37 tausaga le matua i le Seminare. O lo’u valaauga i le Ekalesia o se faiaoga fesoasoani i se vasega a le Uarota a Lindon.
Sa ou matua te’i lava, ina ua valaauina au ma te fono ma Peresitene Tavita O. MaKei. Sa ia uuina o’u lima uma e lua ma tofia au e avea ma se tasi o le Au Pulega Aoao, ma se Fesoasoani i le Korama a Aposetolo e Toasefululua.
I ni aso mulimuli ane, sa ou sau ai i le Aai o Sate Leki e feiloai ma le Au Peresitene Sili ina ia vaetofia ai au o se tasi o le Au Pulega Aoao o le Ekalesia. O le taimi muamua lenei ua ou feiloai ai i le Au Peresitene Sili—o Peresitene Tavita O. MaKei ma ona fesoasoani, Peresitene Hugh B. Brown ma Peresitene Henry D. Moyle.
Sa faamalamalama mai e Peresitene MaKei, o se tasi o tiutetauave o se Fesoasoani i le Toasefululua o le tutu faatasi lea ma le Korama a Aposetolo e Toasefululua, o se molimau faapitoa ma molimau atu o Iesu o le Keriso. O lana tala na sosoo ai na faalofituina ai au: “Ae tatou te lei agai atu e vaetofia oe, ou te talosagaina oe e tuuina mai lau molimau ia te i matou. Matou te fia iloa pe ua ia te oe lena molimau.”
Sa ou faia le mea sili sa ou mafaia. Sa ou tuuina atu la’u molimau, e pei lava ona ou tuuina atu i se sauniga anapogi ma molimau i la’u uarota. Sa ou ofo, aua sa foliga mai na fiafia le Usoga a le Au Peresitene ma faaauau loa ona faaee mai le tofi i o’u luga.
Na matua ou le iloa faavasega, aua sa ou manatu o se tasi i sea tofi e i ai se molimau e le taatele, ma e tulaga ese, ma maoae ma se mana faaleagaga.
Na umi se taimi o o’u le mautonu ai lava, seia iu lava ina mafai ona ou vaaia ua leva ona nofofale ia te au le mea sa manaomia: o se molimau mausali i lo’u loto e uiga i le Toefuataiga o le atoaga o le talalelei e ala mai i le Perofeta o Iosefa Samita, ma e i ai so tatou Tama Faalelagi, ma o Iesu Keriso o lo tatou Togiola. Atonu ou te lei iloa uma, ae sa i ai lava sa’u molimau, ma sa ou naunau e aoao.
Atonu e leai se eseesega o au ma i latou o loo ta’ua i le Tusi a Mamona: “Ai se sau foi ia te au ma le loto momomo ma le agaga salamo, ou te papatisoina o ia i le afi ma le Agaga Paia, e pei o sa Lamana, ona o lo latou faatuatua ia te au i le aso o lo latou liliu mai, sa papatisoina i latou i le afi ma le Agaga Paia, a ua latou le iloa ai” (3 Nifae 9:20; faamamafa faaopoopo).
Ina ua mavae tausaga, sa oo ina ou iloa le taua mamana o lena molimau faatauvaa. Ua oo ina ou malamalama o lo tatou Tama Faalelagi o le Tama o o tatou agaga. O Ia o se tama ua i ai le alofa mutimutivale uma o se tama. Na fetalai Iesu, “Aua e alofa mai lava le Tama ia te outou, ina ua outou alofa mai ia te au, ma ua outou talitonu o au nei ua ou sau mai le Atua” (Ioane 16:27).
I ni nai tausaga ua mavae, sa ma i ai ma Peresitene Marion G. Romney i se fono faatasi ma peresitene o misiona ma o latou faletua i Sineva, i Suitiselani. Sa ia faamatala atu ia te i latou, i le 50 tausaga ua mavae, a o avea ma se taulealea faifeautalai i Ausetalia, i se tasi afiafi na alu ai i le faletusi e suesue ai. Ina ua savali atu o ia i fafo, ua pogisa. Sa tilotilo ae i le lagi sa faatumulia i fetu, ma o iina na tupu ai. Sa pa’i atu le Agaga ia te ia ma sa tupu ae ai se molimau mautinoa i lona agaga.
Sa ia faamatala atu i na peresitene o misiona, na te lei toe iloaina se isi mea e sili atu i lena taimi i le avea ai ma se uso o le Au Peresitene Sili, o loo soifua le Atua; o Iesu o le Keriso, le Alo o le Atua, le Alo e Toatasi o le Tama, ma ua toefuatai mai le atoaga o le talalelei, nai lo le taimi sa avea ai o se faifeautalai talavou i le 50 tausaga ua mavae i Ausetalia. Fai mai a ia, na suia lana molimau, ua sili atu ona faigofie ona maua se tali mai le Alii. Ua latalata tele atu le Alii, ma ua sili atu lona silafia o le Alii, nai lo le 50 tausaga ua mavae.
E i ai lava le uiga masani e vaavaai atu ia i latou o e ua lagolagoina i tofiga pulefaamalumalu, e mafaufau i ai e maualuluga atu ma e sili atu ona taua i le Ekalesia po o o latou aiga nai lo se tagata masani. I se tasi foi itu, tatou te lagona e sili atu lo latou taua i le Alii nai lo i tatou. E le faapena ona faia i le Ekalesia!
O le a matua le fiafia lava i maua ma lou toalua pe a faapea e i ai se tasi o le ma fanau e mafaufau faapea, e sili atu le taua o i maua i le aiga po o le Ekalesia nai lo i latou, pe mafaufau foi e sili atu se tasi valaauga o le Ekalesia nai lo se isi, pe i ai foi se valaauga e faapea e itiiti sona taua.
Talu ai nei, sa lagolagoina ai se tasi o o ma atalii e fai ma taitai misiona a le uarota. Sa faamatala mai e lona toalua, sa matua faagaeetia lava o ia i lona valaauga. E fetaui lelei lava ma le mamafa o lana galuega. E ia te ia le agaga o faifeautalai, ma o le a faaaoga lelei ai lana faaSipaniolo, lea sa ia tausia faalelei mai lava i aso o lana misiona. Sa ma matua fiafia lava foi i lona valaauga.
O mea o loo faia e lo’u atalii ma lona toalua ia la’ua fanau laiti e sili atu ona taua nai lo se isi lava mea e mafai ona la faia i le Ekalesia po o fafo atu. E leai se auaunaga e mafai ona la tuuina atu e sili atu ona taua i le Alii, nai lo le faamaoni la te tuuina i le tasi ma le isi ma la la’ua fanau laiti. Ma e faapena foi i a tatou fanau uma. O taunuuga faaiu o gaoioiga uma i le Ekalesia, e totonugalemu uma lava i le aiga ma le auaiga.
I le avea ai ma Pulega Aoao i le Ekalesia, e tutusa lava i matou ma outou, ma e tutusa lava foi outou ma i matou. Ua ia te outou le aia tutusa i mana o faaaliga mo o outou aiga ma a outou galuega ma o outou valaauga e faapei foi o i matou.
E moni foi e i ai le faatulagaina lelei i mea o le Ekalesia. A valaauina oe i se tofiga, ona e maua lea o faaaliga e tatau ai ma lena tofi, ma o le a le tuuina atu i isi.
E leai se tagata o le Ekalesia, e leai foi se valaauga e manatu i ai le Alii faapea e sili atu pe faaletaua nai lo se isi. E le faapena ona faia i le Ekalesia! Manatua o Ia o se tama—o lo tatou Tama. E “le faailoga tagata” le Alii.
E le sili atu lo tatou tauaogaina mo le alualu i luma o le galuega a le Alii nai lo Uso ma Tuafafine Tuotai Paletu’a i Nuku’alofa, Toga; po o Uso ma Tuafafine Carlos C. Fuentes i Santiago, Chile; po o Uso ma Tuafafine Peter Dalebout i Netalani; po o Uso ma Tuafafine Tatsui Sato o Iapani; po o le fiaselau o isi ua ou feiloai i ai a o ou malaga taamilo i le lalolagi. E le faapena ona faia i le Ekalesia.
Ma o lea e agaigai pea i luma le Ekalesia. E tauaveina i tauau o tagata agavaa o le ekalesia e ola i ni olaga masani i aiga masani, e taialaina e le Agaga Paia ma le Malamalama o Keriso lea o loo i totonu ia te i latou.
Ou te tuuina atu la’u molimau e moni le talalelei, ma e taua le aoga o agaga i le silafaga a le Atua—agaga uma lava—ma ua faamanuiaina i tatou i le avea ai ma tagata o le Ekalesia. Ua ia te au le molimau ou te agavaa ai mo le valaauga ua ou umia. Na ou mauaina lava talu ona ou feiloai atu i le Au Peresitene Sili i le tele o na tausaga ua mavae. Ou te tuuina atu ai ia te outou i le suafa o Iesu Keriso, amene.