E Faaalia le Mana o le Amioatua i Malumalu o le Atua
O loo faaalia ai le mana o le amioatua i tagata uma o e … osia feagaiga paia ma lo tatou Tama Faalelagi
O’u uso e ma tuafafine pele, o se tasi o mea e sili ona ou faafetai ai i lo’u Tama Faalelagi, o le avanoa sa ou maua ou te faigaluega ai mo le 15 tausaga o se tusitalafaamaumau i le Malumalu o le Aai o Mekisiko i Mekisiko. I totonu o lenei nofoaga paia, e faapei foi o malumalu uma, e faia ai sauniga mo e o soifua ma e ua maliliu e ala i le mana o le Perisitua. I le 1832, sa maua ai e le Perofeta o Iosefa Samita se faaaliga e uiga i le Perisitua:
“O lenei foi Perisitua sili e taitaiina le talalelei ma taofia le ki o mea lilo a le malo, o le ki lea o le poto o le Atua.
“O lea, i sauniga o i ai, ua faaalia ai le mana o le amioatua.” (MFF 84:19–20)
Sa ou maua ni aafiaga matagofie lava i totonu o le malumalu e faamaonia ai lenei mea.
I le 1993, ina ua maea ona avea au o se peresitene o le Misiona a México Tuxtla Gutiérrez, sa matou malaga o se aiga e vaai o’u matua sa nonofo i Mekisiko i matu. I le taimi o le malaga, sa matou talanoa e uiga i le olioli o le auauna i le Alii ma vaai i le suiga i tagata, o e sa taliaina le talalelei i le tolu tausaga lea na matou i ai i le misiona. Sa matou talanoa e uiga i tagata sa papatiso, ma faamau, ma maua le Perisitua, ma i latou na matou iloa sa ulu i le malumalu ma faamauina ai o latou aiga mo le faavavau.
Sa fai e lo’u atalii laitiiti se fesili sa afua ai ona ou mafaufau: “Papa, ua faamau oe i ou matua?” Sa ou tali atu, ona e tele tausaga e le o malosi lo’u tama i le lotu, o lea sa lei faamauina ai i la’ua ma lo’u tina i le malumalu. Ina ia fesoasoani e faatoaga mai o ia, sa ou mafaufau ai i se fuafuaga. E aofia ai la’u fanau ma sa ou faamatala atu ia te i latou le faiga: O Aso Sa uma lava e ala po ai lo’u tama e ave lo’u tina ma lo’u tuafafine i le lotu, ona toe foi mai lea i le fale, ma faatalitali ai se’i uma le lotu, ona toe alu lea e piki mai. O lea sa ou tofia ai la’u fanau latou te o ma fai atu, “Tamamatua, e mafai ona e faia le mea lea mo matou?” Sa ou iloa o le a tali mai, “Soo se mea lava tou te mananao ai, la’u fanau.” Ona latou fesili atu lea i ai pe mafai ona latou o ma ia i le lotu ma latou nonofo ai, ina ia mafai ai ona faalogologo i a latou molimau. O le Aso Sa muamua o le masina. Sa ou iloaina foi, o le a fai e lo’u tama soo se ‘alofaga e le alu ai, o lea sa ou fuafua ai e ulufale atu i le potu e fesoasoani i la’u fanau e faagauai mai o ia.
E lei pine ae oo mai le taimi e faataunuu ai le fuafuaga. Sa talanoa atu lo’u afafine o Susana i lo’u tama ma fesili atu i ai e uiga i le mea na te faia. E sa’o lava, na fai atu i ai lo’u tama, na te faia soo se mea lava na te mafaia mo i latou. Ona sosoo mai ai lea ma le valaaulia e o i le lotu, ma e pei lava ona matou muai mafaufauina, o lana ‘alofaga lenei: “E le mafai aua ou te lei taele.” O iina na ma feei atu ai ma lo’u toalua i le mea sa ma lalafi ai i tua o le faitotoa: “O le a matou faatali mo oe!”
Ina ua matou iloaina e lei faia sana faaiuga, sa ma ulufale atu loa ma lo’u toalua i le potu ma matou taufai tauanau atu loa ma le ma fanau: “Taele! Taele!” Ona tupu ai loa lea o le mea sa matou faamoemoe i ai. Sa matou o ma lo’u tama i le lotu, ma sa nofo ai i sauniga uma, sa faalogologo i molimau a la’u fanau, sa faamaluluina lona loto, ma na amata mai i lena Aso Sa, na te lei toe misia lava se lotu. I ni nai masina mulimuli ane, i le 78 o ona tausaga, sa faamauina i laua ma lo’u tina, ma sa faamauina ai foi i matou o lana fanau ia i laua.
Ua ou iloa lena mea, ma faafetai i le mana o le amioatua o loo faaalia i sauniga o le malumalu, ua mafai ai nei ona matou toe faatasi ma o’u matua, mo le faavavau atoa, pe a mavae le oti.
E tele taimi tatou te le malamalama ai i le uiga o sauniga o le malumalu i lo latou atoatoa, sei vagana ua tatou feagai ma puapuaga po o le ui atu foi i aafiaga e ono matua faanoanoa ai, e aunoa ma se malamalama i le ata o le faaolataga.
Ina ua faatoa tasi le tausaga ma le afa talu ona ma faaipoipo ma lo’u toalua, sa sauni lo’u toalua mo le fanauina o la maua uluai pepe. Sa tonu ia i maua e ola o ia i le Pitonuu o Chihuahua, i le mea sa fanau ai o ia. O le taimi lena, sa ou faigaluega ai i le Aai o Mekisiko ma sa tonu ia i maua, e tatau ona taunuu o ia iina pe tasi le masina a o lei oo i le aso e fanau ai le pepe. Sa ou fuafua ou te faatasi atu i ai i se taimi mulimuli ane.
Na oo mai le aso e fanau ai. Sa ou faigaluega ae telefoni atu le tama o lo’u toalua. O se tala fiafia: “Octaviano, ua fanau lou toalua, ma ua i ai nei lou afafine aulelei.” O lea, i lo’u fiafia, sa amata ai ona ona ou faamatala atu i a’u uo ma a’u paaga faigaluega lenei mea, ma sa liliu mai ma fai mai e avatu ni sukalati e sami ai le fanau mai o lo’u afafine.
O le aso na sosoo ai, sa amata ai ona ou tufatufaina sukalati i fogafale uma e fa o le matou fale faigaluega. Ina ua ou taunuu atu i le fogafale lona lua, sa ou toe mauaina se isi telefoni mai le tama o lo’u toalua. O le taimi la lea, ua ese le tala: “Octaviano, lea e manuia lou toalua, ae ua maliu lou afafine. O le aso e falelauasi ai, ma e le lava se taimi e te sau ai. O le a lau mea a fai?” Sa ou talosaga atu ou te fia talanoa i lo’u toalua, o Rosa, ma sa ou fesili atu ia te ia pe o manuia. Sa tali mai o ia o la e manuia, e fuafua lava i o’u lagona. Ona ma talanoa lea i le ata o le faaolataga, ma manatua ai le mau:
“Sa ou vaaia foi o tamaiti uma lava o e oti a o lei taunuu atu i tausaga e malamalama ai, e faaolaina i le malo selesitila i le lagi” (MFF 137:10).
Sa ou fesili atu ia te ia: “E te talitonu i lena mea?” Sa fai mai o ia: “Ioe, ou te talitonu.” Ona ou tali atu lea: “Ua tatau la ona ta fiafia. Ou te alofa ia te oe, ma afai ua e fiafia i ai, o le a ave o’u aso malolo i le lua vaiaso, ta te mafuta faatasi ai ma toe foi mai ai i Mekisiko.”
Sa ma iloaina o le a i ai se aso, o le a toe tuufaatasia ai i matou ma lo ma afafine aua ua uma ona faamauina i matou i le mana o le perisitua i le malumalu. Sa faauma la ma talanoaga i le telefoni, ae toe faaauau le tufatufaina o sukalati i lo matou falefaigaluega.
I le vaaia o au o ou faia lenei mea, sa ofo se tasi o a’u paaga faigaluega ma fesili mai pe mafai faapefea ona ou faia lenei mea, a o lea faatoa maea atu se tala faavauvau. Sa ou tali atu, “Afai e maua sou tolu itula, e mafai ona ou faamatala atu le mafuaaga ou te le o faanoanoa tele ai, ma lo’u iloa i le mea e tupu pe a mavae le oti.” E lei maua sona tolu itula i le taimi lea, peitai na maua mulimuli ane. Na iu ina fa itula o ma talanoa. Sa ia taliaina le talalelei ma sa papatisoina o ia faatasi ma lona tina ma lona uso, i le Ekalesia ina ua maea a latou lesona.
Ua ou iloa lena mea, faafetai i le mana o le amioatua o loo faaalia i sauniga o le malumalu, o le a mafai ona ou iloa lo’u afafine. O le a ou opoina o ia, ma o le a matou faatasi ma ia e faavavau, e faapei ona matou i ai nei ma le ma fanau e toatolu o loo soifua.
Ou te fiafia i upu a Malak:
“Faauta, ou te auina atu ia te outou o Elia le perofeta, a o lei oo mai le aso o Ieova e sili, ma le matautia:
“Na te faaliliuina loto o matua i fanau, ma loto o fanau i o latou matua, ne’i ou alu atu ma ou taia le nuu i le faafanoga” (Malaki 4:5–6).
O le perisitua lenei ua mafai ai ona faavavau aiga. Ua mafai ai e a’u, o se atalii, ona liliu atu lo’u loto i lo’u tama, lea na maliu i le tausaga na te’a nei, ma toafilemu ai i lo’u faamoemoe, e ala i le Faaola, o le a ou toe vaai ia te ia. O le perisitua lenei ua mafai ai e a’u, o se tama, ona liliu atu lo’u loto i la ma fanau e toalua na maliliu a o pepe meamea, ma toafilemu ai i lo’u faamoemoe, e ala i le Faaola, o le a ou iloa ai i la’ua, ma o le a la iloaina foi o a’u o lo la tama faalelalolagi, a o ou tilotilo atu i o laua mata ma ta’u atu i ai ou te alofa ia te i laua. O le perisitua lenei, ua mafai ai ona ou vaai, i le paia o le malumalu, i le auala o loo faaalia ai le mana o le amioatua i tagata uma, o e—pe a uma ona faaalia lo latou faatuatua ia Keriso, salamo i a latou agasala, ma sailiili ma le faamaoni mo lo latou fiafia—ua o mai e osia feagaiga paia ma lo tatou Tama Faalelagi ma maua Ana sauniga paia, ia e fusifusia ai i le lalolagi, ma faapea foi ona fusifusia i le lagi.
Ou te fiafia lava i galuega faalemalumalu. Ou te iloa o loo soifua le Atua, o Iesu Keriso o lo’u Faaola ma o Peresitene Gordon B. Hinckley o se perofeta moni lava o ia. I le suafa o Iesu Keriso, amene.