Onosaia Faatasi

Epikopo Richard C. Edgley

Fesoasoani Muamua i le Au Epikopo Pulefaamalumalu

Ua faatulagaina le uarota ina ia auauna atu ai i manaoga o i latou e feagai ma tofotofoga e aupito sili ona faigata ma momomo ai le loto.

I ni nai tausaga talu ai, sa tusia ai e se tusitala malie o se nusipepa i le lotoifale e uiga i se mataupu matuia sa lagā ai ni manatu. Ou te sii maia i lea tusiga: “O le avea ma se Mamona e toaga i le lotu i aso uma i Iuta o lona uiga, o le ola vavalalata tele lea i tagata o le uarota, e faalētele ni mea e tutupu e le iloa e le faapotopotoga atoa i le lima minute.”

Na ia faaauau: “O lenei ituaiga o le ola-felata’i e ono avea ma faalavefau… . E avea foi ma se tasi o o tatou malosiaga silisili.”

Na faaauau le tala a le tusitala: “I le galuega i le Aso Lua, sa ou matamata ai i le faasalalauga o talafou i le televise. Sa molali se veni i se faalavelave tau taavale. Sa faanatinati atu se tina talavou ma se fanau laiti e toalua e le helikopa ma se taavale a le falemai i potu mo faalavelave faafuasei… . I ni nai itula mulimuli ane, sa ou iloaina ai o le veni a se ulugalii talavou e nonofo i le isi ituala o le mea ou te nofo ai i Herriman, o Eric ma Jeana Quigley.

“E le gata ou te vaai i le au Quigley i le lotu, … ae sa matou aai faatasi foi i se pati i le matou pitonuu i le po a o lumanai le faalavelave. E taaalo le fanau a la’u fanau ma le la fanau teine o Bianca ma Miranda… .

“Sa mafatia Miranda e sefulufa masina le matua i ni manu’a tuga i le ulu, ma maliu ai lava i le tolu aso mulimuli ane i le Falemai o Tamaiti o le Peraimeri.

“O i la e aoga ai … le isuisu. E ui ina sa mamao mai le fale le mea na tupu ai le faalavelave, ae na faatu e se tasi mai le uarota le taavale sa malaga ai ma saili ai loa lava le taavale ua malepe. Sa iloa e le uarota uma a o lei taunuu atu leoleo ma le au fesoasoani mo faalavelave faafuasei.

“Sa o atu tagata o le uarota i falemai uma e tolu, ma faafesootai Eric i le galuega, ma faatulaga le au galulue. O tagata na le mafai ona fesoasoani i lea taimi, sa i ai i le mea na tupu ai le faalavelave na matua popole e saili se auala e fesoasoani atu ai.

“I totonu o le 48 itula, ua uma ona moa le fanua o le au Quigley, ua mama le fale, ua uma ona fai tagamea, ua faatumu le pusaaisa, ua fafaga tagata o le aiga ma ua faavae se teugatupe i le faletupe mo le aiga. Semanu matou te faataeleina foi sa latou taifau pe ana faapea e i ai.”

Sa faaiu le tusiga e le tusitala i le faamatalaga malamalama lenei: “E i ai se itu lelei i le fiailoa e tagata Kirby o olaga o isi i la’u uarota… . O le mea e tupu i isi e tupu foi i tagata uma” (“Well-Being of Others Is Our Business,” Salt Lake Tribune, July 30, 2005, p. C1).

O le alofa ma le auaunaga sa tuuina atu e tagata alolofa o le uarota ona o lenei faalavelave matautia, e le faapea e tulaga ese i lenei faalavelave patino. O loo faamatala mai e le perofeta o Alema i le Tusi a Mamona ia i latou ua mananao e mulimuli ia Keriso: “O lenei foi ua outou fia o mai i le lafu mamoe a le Atua, ma ia ta’ua o lona nuu, ma ua loto ina fesui i a outou avega e ave ina ia mama ai; ioe, ma ua loto ina faanoanoa faatasi ma e faanoanoa; ioe, ma faamafanafana i e ua tatau i ai le faamafanafanaga” ma, e pei ona faamatalaina e Alema, ona latou saunia ai lea mo le papatisoga (tagai Mosaea 18:8–9). O lenei mau ua faataatia ai le faavae mo le tausiga ma le loto fesoasoani i se auala e sili atu ona agalelei.

Ua faatulagaina le uarota ina ia auauna atu ai i manaoga o i latou e feagai ma tofotofoga e aupito sili ona faigata ma momomo ai le loto. O le epikopo, e masani lava ona manatu i ai o le “tama” o le uarota, e i ai o ia iina e avatu ai le fautuaga ma punaoa. Ae o loo saunia foi ma naunau ia taitai o le Perisitua Mekisateko ma le Arona, o le au peresitene o le Aualofa, faiaoga o aiga, faiaoga asiasi, ma tagata o le uarota—o taimi uma lava o tagata o le uarota. Ua i ai uma i latou iina e tuuina atu le faamafanafanaga ma faaalia le alolofa i taimi e manaomia ai.

I le pitonuu matou te sosoo, e tele mafatiaga faamomoiloto sa matou feagai. Ia Oketopa i le 1998, sa maliu ai Zac Newton e 19 ona tausaga, o lē e tolu fale i le itu i sasae matou te va ai, i se faalavelave matautia tau taavale.

E lei atoa se lua tausaga mulimuli ane, ia Iulai, sa maliu ai foi Andrea Richards e 19 ona tausaga, o lē sa nofo i le isi ituala e faafesagai tonu ma le au Newton, i se faalavelave tau taavale.

I se tasi aoauli o le Aso Toonai ia Iulai 2006, na maliliu ai foi Travis Bastian, o se faifeautalai ua maea lana misiona ma e 28 tausaga le matua, ma lona tuafafine e 15 tausaga o Desiree, o ē sa nonofo i le isi ituala ma e lua fale i le itu i matu o matou, i se faalavelave tau taavale matautia.

I le tasi le masina mulimuli ane, ia Aokuso 2006, ae maliu faafuasei Eric Gold e 32 tausaga, o lē sa ola ae i le fale matou te tuaoi. Ma e i ai foi isi o le matou pitonuu na feagai ma aafiaga faamomoiloto ma onosai ai lava na o i latou ma le Atua na silafia.

O le maliliu o le toalima o tagata talavou, atonu e manatu se isi o se fuainumera e le masani ai o tofotofoga mo se pitonuu laitiiti e tasi. Ua ou filifili ou te mafaufau e foliga ua telē le fuainumera ona o se uarota e felata’i, ma alolofa ua iloa e ona tagata le taimi ua i ai se tulaga manaomia. O se uarota ua i ai tagata o ē mulimuli i le apoapoaiga a Alema ma le Faaola—o tagata o ē alolofa ma mananao e fesui i avega a isi, o tagata o e ua loto e faanoanoa faatasi ma i latou e faanoanoa, o tagata o e ua naunau e faamafanafana i e ua manaomia le faamafanafanaga, o tagata e onosai faatasi.

I nei tulaga uma taitasi, sa matou vaaia ai le masaa mai o le alofa, auaunaga, ma le agalelei lea sa faagaeetia ai tagata uma. Sa taunuu mai Epikopo, sa galulue faiaoga o aiga ma faiaoga asiasi, ma sa faatulagaina korama a le Perisitua Mekisateko ma le Arona faapea foi le Aualofa e vaaia manaoga faaleagaga ma le faaletino. Sa faatutumuina pusaaisa, faamama ia fale, moa le vao, sala pa laau, vali papuipui, tuu atu faamanuiaga, ma sa i ai tauau alolofa e fetagisi ai. Sa i ai tagata o au paia i soo se mea.

I nei tulaga uma taitasi, sa faateleina ai le faatuatua o aiga sa maliu se e pele, sa faateleina le alolofa mo le Faaola, faateleina le lotofaafetai mo le Togiola, ma le faafetai tele mai ta’ele o loto i se faalapotopotoga sa tali atu i manaoga o’oo’o o lagona ma le faaleagaga o ona tagata. Ua talanoa nei ia aiga e uiga i le ala na latou iloa ai le Alii e ala i o latou puapuaga. Ua latou faamatalaina le tele o aafiaga matagofie na tutupu mai i o latou mafatiaga. Ua latou tautino mai e mafai ona tula’i mai faamanuiaga i se lotonutimomoia. Latou te viia le Alii ma toe taua upu a Iopu, “Na foaiina mai e Ieova, ua aveeseina foi e Ieova; ia faamanuina le suafa o Ieova” (Iopu 1:21).

O le tauaveina o avega a le tasi ma le isi o ni tagata o le uarota, ua matou aoaoina ai le tele o lesona:

1. Ua matuai lava ma totoe le faalapotopotoga a le Alii e iloa ma manatu alofa mo i latou e i ai manaoga faalelagona ma faaleagaga e sili ona faanatinati.

2. O puapuaga e mafai ona tatou latalata atili atu ai i le Atua ma se agaga talisapaia faafouina ma le faagaeetia mo le tatalo ma le Togiola, lea e aofia ai le tiga ma le puapuagatia i soo se itu.

3. O tagata o le ekalesia e feagai tonu ma mafatiaga, e masani ona iloaina se malosi faateleina o le alofa, agalelei, ma le malamalama. E avea i latou ma tagata muamua, ma mulimuli, e tali atu ma sili atu ona tauaogaina e tali atu i le tuuina atu o le faamafanafanaga ma faaalia le agalelei i isi.

4. O se uarota, faapea foi se aiga, e atili ona vavalalata pe a onosaia faatasi—o le mea e tupu i le toatasi e tupu foi i tagata uma.

5. Ma atonu o le mea e aupito sili ona taua, e mafai ona sili atu lo tatou loto fesoasoani ma le alolofa, aua ua tofu i tatou ma tofotofoga faaletagata ma aafiaga e aoao mai ai. E mafai ona tatou onosaia faatasi.

Ou te fiafia lava ona o au o se tasi o lea faalapotopotoga alolofa ma le agalelei. E leai se tasi e sili atu lona iloa pe faapefea ona fesui i avega a isi, faanoanoa faatasi ma i latou e faanoanoa, ma faamafanafana ia i latou e manaomia le faamafanafanaga. Ua ou filifili e faaigoa o le “onosaia faatasi.” O le mea e tupu i se tagata e toatasi e tupu foi i tagata uma. Tatou te onosaia faatasi.

Tau ia ina ia avea i tatou ma meafaigaluega i le faamāmāina o avega a isi, ou te ole atu ai i le suafa o Iesu Keriso, amene.