O Le Mea Sili e Faia e Tamaitai o le Au Paia o Aso e Gata Ai: Tutu Malosi ma le Mausali

Julie B. Beck

Peresitene Aoao o le Aualofa

E tatau ona tatou tutu malosi ma le mausali i le faatuatua, malosi ma le mausali i le aiga; ma malosi ma le mausali i le fesoasoani atu.

O’u uso pele, ou te taulimaina lenei tiutetauave musuia ma se tatalo i lo’u loto. E i ai sa’u molimau i le talalelei toefuataiina moni a Iesu Keriso. O le Faaola o lo tatou taitai ma le faaa’oa’o, o lo tatou papa, o lo tatou malosi, ma lo tatou puluvaga. Soo se vaega e mafai ona ou faia e fesoasoani ai ia te Ia ma Lana perofeta faauuina o se faamanuiaga lea i lo’u olaga. E i ai pea lava pea lo’u alofa tele ma le faaaloalo mo uso o lenei Sosaiete ma ou te talitonu o tamaitai o lenei Ekalesia o ni tamaitai aupito sili ona lelei, ma tomai i le lalolagi. Faamolemole ia outou silafia lo’u alofa mo outou—o tamaitai maoae o lenei Ekalesia.

Na saunoa Peresitene Hinckley i se fonotaga faaleaoaoga a taitai i le lalolagi atoa, “Ua ou talitonu e leai se isi faalapotopotoga i soo se mea e faatusatusa i le Aualofa a lenei Ekalesia. Ua silia ma le lima miliona ia tamaitai o loo auai ai i le salafa o le lalolagi. Afai o le a latou lotogatasi ma tautatala atu ma le leo e tasi, o le a le mafaatusalia lo latou malosi… . E matuai taua lava le tutu mausali o tamaitai o le Ekalesia mo le mea sao ma tonu e tusa ma le fuafuaga a le Alii.”¹

Sa ou mafaufau loloto ma suesue i lenei tiute musuia, ma sa ou sailia ni tali e faatatau i auala e mafai ai e tamaitai o lenei Ekalesia ona faataunuu le lu’i ma le folafolaga a Peresitene Hinckley. E mafai faapefea ona latou tautatala i le leo e tasi ma tutu malolosi ma le mausali mo mea e sao ma tonu? O totonu o le fuafuaga a le Alii o loo i ai mea patino e tatau i tamaitai o le Au Paia o Aso e Gata Ai ona fai, aua o i latou o afafine o le Atua, ua filifilia mai le lalolagi i se taimi ua ta’ua “o se vaitau sili ona faigata i le Talafaasolopito o le lalolagi.”²

Ina ia mafai ona fai la tatou vaega o ni tamaitai i lalo o le fuafuaga a le Alii, e tatau ona tatou tutu malolosi ma le mausali i le faatuatua, malolosi ma le mausali o se aiga, ma malolosi ma le mausali i le fesoasoani. E tatau ona tatou tulaga ese i vaega taua nei e tolu lea ua vavaeese ai i tatou o ni soo o le Alii. O le Aualofa tatou te faaa’oa’o ai e avea ma soo o Keriso. E mafai ona tatou aoaoina mea e finagalo o ia ia tatou iloa, tatou te faia ai mea e finagalo o Ia tatou te faia, ma avea ai i tatou o tagata e finagalo o Ia e avea ai i tatou. A tatou potopoto ma taulai atu i mea ia, e taua le galuega a le Aualofa tusa lava pe o le a lou tulaga—pe 18 pe 88 ou tausaga, nofofua pe ua faaipoipo, ua i ai se fanau pe leai, pe o e nofo i Nuumau, i Iuta, po o Bangalore, i Initia.

Tu Malosi ma le Mausali i le Faatuatua

Muamua, e tatau ona malolosi ma mausali tamaitai o le Au Paia o Aso e Gata Ai i lo latou faatuatua. E mafai ma e tatau lava ona tulaga ese i latou i le ola ai ma faasoa a latou molimau e uiga i le Alii o Iesu Keriso ma Lana talalelei toefuataiina. Tatou te faia lenei mea pe a tatou:

Osia feagaiga ma Ia ma tausia.
Agavaa ma tapuai i Ona malumalu.
Suesue Ana aoaoga faavae i tusitusiga paia ma upu a perofeta.
Ia agavaa mo le Agaga Paia, iloa, ma mulimuli ai.
Faasoa atu ma puipuia Lana talalelei.
Faia tatalo faamaoni faaletagata lava ia ma faaleaiga.
Fai afiafi faaleaiga.
Ola i mataupu faavae o le ola faalagolago o le tagata ia te ia lava ma le ola magafagafa mo le lumanai.

O mea taua nei e tatau ona faia a o lei faia mea e le taua. O faiga faigofie nei, ma le taua e toetoe lava o ni mea masani pe a tatou talanoa ai. E ui i lea, o faailoga ia o uiga o se soo, ia e avea pea ma faavae mo uso o le Aualofa. E leai se tasi e mafai ona faia nei mea mo i tatou—o faiga ma tu masani patino nei ua ese ai lo tatou malolosi ma le mausali i mea e sa’o.

O le a ese le lalolagi ma le Ekalesia pe afai e matuai lelei uso uma o le Au Paia o Aso e Gata Ai i le osia, faafouina, ma tausia feagaiga; pe a agavaa uso uma mo se pepa faataga ma saga tapuai atili i Malumalu; pe afai e suesue uso uma i tusitusiga paia ma aoaoga faavae a Keriso ma iloa lelei ina ia mafai ona ia aoao atu ma puipuia na aoaoga faavae i soo se taimi ma soo se nofoaga. Mafaufau i lo tatou malosi tuufaatasi, pe afai e tofu uso uma ma se tatalo faamaoni i taeao ma po taitasi po o le, sili atu foi, e tatalo e le aunoa e pei ona poloaiina ai e le Alii. Afai e faia tatalo faaleaiga a aiga taitasi i aso taitasi, ma faia se afiafi faaleaiga e taitasi i le vaiaso, o le a tatou malolosi atu. Afai e lava ona faalagolago uso taitasi ia te ia lava ina ia mafai e ia ona foai atu ma le le ta’uta’ua o lona malamalama, taleni, ma punaoa ma afai e atagia uiga faalesoo o uso uma i ana upu e fai ma ona laei ma uiga na te faaalia, o le a tatou mausali i mea e sa’o.

Tu Malosi ma Mausali i le Aiga

Lona lua, e tatau i tamaitai o le Au Paia o Aso e Gata Ai ona malolosi ma mausali i le aiga. E mafai ma e tatau lava ona latou foafoaina ma tausia ni aiga e sili atu nai lo se isi lava. O i tatou, i le avea ai o ni soo o Keriso, e mafai ma e tatau ona avea ma ni ē aupito sili i le lalolagi i le tausiga, faafailele, ma le puipuia o aiga. Tatou te faia lenei mea pe a tatou:

Malamalama ma puipuia matafaioi paia a tamaitai.
Opogi mai faamanuiaga o le perisitua.
Faatuina ni aiga faavavau.
Tausisia faaipoipoga malolosi.
Fanauina ma tausia ni fanau.
Faaali atu le alofa ma faafailele tagata o le aiga.
Talia le tiutetauave e saunia se tupulaga faia’e amiotonu.
Iloa, ola, ma puipuia aoaoga faavae o le aiga.
Sailia ma faia sauniga faalemalumalu mo tagata o aiga lautele.

I le avea ai ma se soo o Iesu Keriso, ua tuuina mai i tamaitai uma o lenei Ekalesia le tiutetauave mo le tausiga, faafailele, ma le puipuia o aiga. Ua i ai i tamaitai ni tofiga tulaga ese na tuuina atu ia te i latou a o le’i faavaeina le lalolagi. Ma i le avea ai ma se tamaitai o le Au Paia o Aso e Gata Ai e tausia feagaiga, ua e silafia o le sii ae o lou leo i le puipuia o le aoaoga faavae o le aiga³ e taua mo le malosiaga o aiga i le lalolagi atoa.

O le iloaina ma le puipuia o matafaioi paia a tamaitai, e matua taua i se lalolagi ua lofia ai pea lava pea tamaitai i savali sese e uiga i o latou faasinomaga. Ua i ai tagata lauiloa i faasalalauga i leitio ma televise ua fai mai o i latou o taitai ma sui sooupu mo tamaitai. E ui atonu o nei savali faasalalau e i ai ni elemene o mea moni, ae o le tele lava e tala’ia se tala o mea e faataunuu e le tagata lava ia ma viia ai ia lava, ma e tele ai lava ina taitai sese ai tamaitai e tusa ai ma o latou faasinomaga moni ma le taua. O nei leo e aumaia ai se fiafia e le moni, ma o lona taunuuga e toatele tamaitai e faanoanoa, faaesea, ma fememeai.

Na pau le nofoaga o le a aoao ai e tamaitai o le Au Paia o Aso e Gata Ai le upumoni mama ma le atoatoa e uiga i la latou matafaioi tatau ai i le fuafuaga o le fiafia, o le Ekalesia lenei ma ana aoaoga faavae. Ua tatou iloa, i le taua tele i le muai olaga, sa tatou ‘au ai ma lo tatou Faaola, o Iesu Keriso, e puipui lo tatou tulaga gafatia e avea o ni aiga e faavavau. Ua tatou iloa o i tatou o afafine o le Atua, ma ua tatou iloa mea e tatau ona tatou faia. E maua e tamaitai le fiafia moni pe a latou malamalama ma olioli i la latou matafaioi tulaga ese i totonu o le ata o le faaolataga. O mea e mafai e tamaitai ma e tatau lava ona aupito silisili ona faia, e lagolagoina ma aoaoina e aunoa ma se tau faapoipoi. Tatou te talitonu i le faatulagaina o aiga e faavavau. O lona uiga, ua tatou talitonu e tatau ona faaipoipo. Ua tatou iloa o le poloaiga o le fanafanau ma uluuluola ia faatumulia ai le lalolagi ua faamalosia ma faatumauina. O lona uiga, ua tatou talitonu i le i ai o fanau. Ua tatou faatuatua, o le fesoasoani mai o le Alii e mafai ai ona tatou manuia i le tausiga ma le aoaoina o fanau. O tiutetauave taua nei i le fuafuaga o le fiafia, ma a oo ina opogi mai e tamaitai ma o latou loto atoa na matafaioi, e fiafia i latou! O le iloaina ma le puipuia o le upumoni e uiga i aiga, o le aia tatau lea a uso uma o lenei Ekalesia.

Ona e faavavau aiga, e le tatau ai ona tatou faatauagavale pe le manatu mamafa foi i na sootaga. O le tele o le galuega maoae a lenei Sosaiete i le taimi ua fano, sa taulai atu i le fesoasoani i tamaitai o le Au Paia o Aso e Gata Ai ia faamalolosia aiga ae faamamafa le faaleleia o tomai faafailele—tomai faatausi aiga, tomai faamātua, ma tomai faalefaaipoipoga. O aiga e manaomia ai le galue, ae o aiga o la tatou galuega tele lena—tatou te le fefefe foi i le galulue. O le mea lea o loo sili lo tatou faiga; e leai se tasi e sili atu ona lelei i le faiga ma le tausiga o aiga nai lo uso o le Aualofa. Tatou te tausia, faafailele, ma puipuia i latou.

Tu Malosi ma Mausali i le Faamama Avega

Lona tolu, e tatau i tamaitai o le Au Paia o Aso e Gata Ai ona malolosi ma mausali i le faamama avega. O i tatou o se Sosaiete Fesoasoani, ma e tatau ona avea i tatou ma tamaitai silisili i le lalolagi i le saunia o le faamama avega. O le eria faapitoa lea sa tatou mafuli i ai mai le amataga. O le upu faamama avega o lona uiga “ia sii a’e, ia faamāmā.” O lona uiga “faatula’i [i luga].” “O le manatu ‘ia faatula’i a’e (se tagata) mai se mafatiaga.’”⁴ O la tatou auaunaga ma le fesoasoani tatou te ofoina atu, o ni faailoga ia o i tatou o soo o le Alii, ma o i tatou o nisi o Lana Ekalesia moni toefuataiina. O se faamanuiaga le avea ma nisi o lenei faalapotopotoga i le salafa o le lalolagi mo tamaitai, o lona igoa ua faamatala mai ai le mea e tatau ona tatou faia: saunia o le fesoasoani.

Na saunoa mai Iosefa Samita ua faatulagaina tamaitai o lenei Ekalesia e saunia ai mo “le fesoasoani mo e matitiva, o ē le tagolima, o le fafine ua oti lana tane ma lē ua matuaoti, ma le faia o galuega agalelei uma”⁵ ma “e le gata ina fesoasoani ai i e matitiva, ae ia laveaiina ai foi agaga.”⁶ O lena taumafaiga faamama avega sa faamalamalama atili mai e Elder John A. Widtsoe o le “fesoasoani i e matitiva, fesoasoani i e mama’i, fesoasoani i e masalosalo, aveesea o le poimalae—ma le aveesea o mea uma e taofia ai le fiafia ma le alualu i luma o tamaitai.”⁷

E ui i taumafaiga fesoasoani taua i aso ua tuanai, o le galuega aupito sili ma le taua mo tamaitai o lenei Ekalesia, o loo faamalumalu mai pea i luma. E tatau ona saunia le lalolagi e faatalitali ai le Alii o Iesu Keriso, ma e tatau ona tatou fesoasoani i lenei sauniuniga i le lotolotoi o taua, fevesiaiga, mala faalenatura, ma le faateleina o le amioleaga. E lei i ai se taimi i le talafaasolopito o le lalolagi sa sili ona manaomia tele ai ni taumafaiga fesoasoani. Ona o i tatou o soo o Iesu Keriso, ma ua uma ona tatou osi feagaiga ma Ia, ua uma ona tatou tautino atu e ala i le feagaiga o le a tatou auai i le faatinoina o lena galuega fesoasoani.

E tulaga ese ma e taua outou taitoatasi. E tofu outou ma a outou avega ma luitau, lea tou te maua ai le faamanuiaga o le liliu atu i le Alii mo se fesoasoani. Ua ia i tatou foi le avanoa e fesoasoani ai i le Alii e ala i le tuuina atu o le fesoasoani mo isi, lea ua avea ma vaifofo sili, ma le vave mo le faaesea ma le leai o se faamoemoe, ma o se ala mautinoa e maua ai le mafutaga ma le Agaga. Na pau lava le mea e manaomia ona tatou faia e amata ai ona ofoina atu le fesoasoani, o lo tatou o ifo lea i o tatou tulivae ma fesili “O ai o manaomia la’u fesoasoani?” E manaomia uso uma—o e ua faaipoipo pe nofofua, talavou pe matua—i lenei galuega fesoasoani, ma o le mea e tatau ona sili atu lo tatou faiga nai lo se isi lava.

Taitai Malolosi ma le Mausali

Ia, o ni nai manatu mo outou au peresitene maoae o le Aualofa, o ē o loo galulue ma le matua faamaoni lava. Ua ia te outou se tiutetauave sagisagi ma ua outou umia se faatuatuaga paia a o outou tauaveina le galuega a le Aualofa. O la outou matafaioi o le fesoasoani ia tulaga ese tamaitai o le Au Paia o Aso e Gata Ai i le faatuatua, aiga, ma le fesoasoani. O le a outou fesoasoani i le talalelei e avea ma se mea e sili ona fiafia ma uunaia ai tamaitai o le Ekalesia. O le a outou fesoasoani i le faaatoatoaina o tomai o tamaitai i le faatausiaiga, faamātua, ma faalefaaipoipoga ina ia mafai ai ona latou ola atoatoa i le talalelei i o latou lava aiga.

O taitai uma ua tofia ma vaetofia o le Aualofa, ua i ai le aia tatau ma le pule ina ia taialaina ai i le faataunuuina o lona tofiga musuia, ina ia faafetaia’ia ai i le mea silisili manaoga o i latou na te tautuaina.⁸ O le a e maua le fesoasoani a le Agaga Paia pe a e taulai atu i mataupu taua, ma o le a tuuina atu le lototele e aloese ai mai le faia o mea e le taua.

Ua silafia e taitai uma, ua taugā le taia o aiga e matagi malolosi o lenei lalolagi, o matagi malolosi e pei o mea ua fai ma vaisū, aitalafu, lē faamaoni, ma le lē usitai. Na silafia e le Faaola o tatou aso “o le amataga ia o puapuaga”⁹ o le a faapea ona toatele tagata e faaseseina ai. Na ia fetalai e uiga i taua ma tala i taua, oge, mafuie, ma faama’i. O lenei tulaga ua faamatalaina ai le lalolagi o loo tatou ola ai i aso nei, ma o lea e taua ai i tamaitai o lenei Ekalesia ona uumau la latou matafaioi ia saunia i mea uma.

I le avea ai ma taitai o le Aualofa, e mafai ona outou fesoasoani atu i uso uma i aiga uma i uarota ma paranesi uma ia faalagolago le tagata ia te ia lava. Ua tatau ona latou tuueseina se teugatupe, meaai, ma tomai, o le a faapea ona fesoasoani ia i latou ma o latou aiga i taimi faigata. Ua tuuina atu e le Ekalesia ia te outou ni fesoasoani maoae, e pei o tamaitusi o le faalagolago o le tagata ia te ia lava, e te amata ai. O se vaega lenei o la outou galuega.

Ua ia te outou le avanoa tou te fefautuaa’i ai i le lotogatasi faatasi ma taitai perisitua e fuafua ai se ‘olo ma se sulufaiga mai na matagi malolosi ma mamanu ai se galuega fesoasoani mo manaoga patino a o outou tagata. O le faauoga ma le mafutaga lea e matua suamalie ai le olaga, o se taunuuga lava lea o a tatou taumafaiga. O le taulai atu i le fesoasoani o le a fausia ai i taimi uma mafutaga, ae o le taulai atu i le mafutaga atonu o le a le aumaia ai i taimi uma le fesoasoani.

A tatou potopoto mo soo se faamoemoega i lalo o le fu’a a le Aualofa, e tatau ona tatou faaaluina o tatou taimi taua ma tupe paia mo le faamoemoega e fesoasoani ai i uso latou te faia mea silisili e tatau ona latou faia. I a tatou sauniga a le Aualofa i Aso Sa, e tatau ona pupuu sauniga amata ma ia valaaulia ai le Agaga ia mafuta ma i tatou. Tatou te manaomia minute taitasi uma, e suesue faatasi ai le talalelei ina ia tatou faia ai le mea sili i o tatou tiutetauave. O konafesi uma a le Aualofa, gaoioiga, faapotopotoga, ma fonotaga e tatau lava ona taulai atu i le fesoasoani i uso ia latou faia mea e tatau ona latou faia i le mea silisili. O le augani a Peresitene Hinckley ia i tatou:

“O loo i ai so tatou luitau e tele atu nai lo le mea o loo tatou iloaina… .

“… ‘Fai le mea sili tou te mafai.’ Ae ou te fia faamamafa atu, e tatau lava ona silisili… . E mafai e i tatou ona sili atu le mea tatou te faia… .

“… E tatau ona tatou o ifo i o tatou tulivae ma aioi atu i le Alii mo le fesoasoani ma le malosi, ma le taitaiga. Ona tatau lea ona tatou tutu i o tatou vae ma fetuleni atu i luma.”¹⁰

O’u uso pele, ua saunoa mai lo tatou perofeta, o lē ou te lagolagoina ma lo’u loto atoa, e i ai se ala e sili atu nai lo le ala a le lalolagi. Ua ia talosaga atu i tamaitai uma o le Ekalesia ina ia tutu faatasi mo le amiotonu. Ua ia saunoa mai, afai tatou te lotogatasi ma tautatala atu ma le leo e tasi, o le a le mafaatusalia lo tatou malosi. Ua ou faailoa atu ia te ia lo’u talitonuga, o le a tutu malosi ma le mausali tamaitai o lenei Ekalesia i lo tatou faatuatua ia Iesu Keriso ma Lana talalelei toefuataiina; malosi ma le mausali i le tausiga, faafaileleina, ma le puipuiga o o tatou aiga; ma malosi ma le mausali i le tuuina atu o le fesoasoani. Ia faamanuia mai le Alii ia i tatou, a o tatou faia lenei galuega aupito sili ona taua a tamaitai, o la’u tatalo lea i le suafa o Iesu Keriso, amene.