Amuia i Latou Uma O E Loto Mama
Tau ina ia faamanuia le Atua ia tatou taumafaiga faamaoni ia mama o tatou loto ma mafaufau, ina ia “[mafai] ona teuteuina o [tatou] manatu i le mama e le aunoa.”
O le savalivali ai i se matafaga i le Atu Keripeane i se tasi taeao lagilelei i ni nai tausaga ua mavae, na ma vaaia ai ma lo’u toalua ni nai vaa fagota laiti na toso mai i luga o le oneone. Ina ua ma tutu e matamata i vaa, na ou aoaoina ai se mea e uiga i le fagota e le’i galo lava ia te au. Nai lo le faaaogaina o upega, seleloi, po o matau, na faaaoga e faifaiva a le atunuu ni mailei faigofie na faia i uaea valavala. O mailei taitasi sa foliga i se atigipusa. Na ooti e le au faifaiva ni avanoa faalaumiumi pe tusa o le valu inisi le uumi i itu taitasi o le mailei, ona faapipio lea o uaea agai i totonu, e maua ai ni avanoa vaiti e mafai ona sao atu ai i’a.
Atonu e mafai ona outou mateina le auala e faaaoga ai le mailei. E ave e faifaiva se mailei ua i ai se maunu i le sami ona tuutuu ifo lea i lalo. A sōsō ane se i’a ua ono aina i talaane o le mailei ma sosogi i le maunu, na te sueina se avanoa i autafa o le mailei ma aau atu loa i totonu, e faavāvā atu lava i uaea ua uma ona otiina. Ma, a taumafai la le i’a e toe aau i fafo, na te iloa ai o le taumafai e faavāvā i uaea ua otiina ina ia oo i totonu o le mailei, e matuai ese lava ma le aau agai atu i na pito uaea maamaai ina ia sao i fafo—ona maua ai lea. A foi mai la le au faifaiva, latou te tosoina ae i luga le mailei ma o le i’a na maua i le mailei na vave ona avea ma se taumafataga o i’a fou.
E i ai se tala i le Feagaiga Tuai e faatatau i se tasi na pau atu i se mailei faapena. O lena alii o le Tupu tautaua o Tavita, ma o le mea na tupu o se tasi lea o tala sili ona faanoanoa i tusitusiga paia.
“Ua toe aulia mai … o ona po ia e o atu ai o tupu, ona auina atu lea e Tavita ia Ioapo, ma ana auauna faatasi ma ia, atoa ma Isaraelu uma; ona latou [tau lea ma Amoni]. A o Tavita sa nofo o ia i Ierusalema.
“Ua oo i le tasi afiafi ua tulai Tavita ai lona moega, ua fealuai i luga o le fale o le tupu: ona ia iloa atu ai lea ai luga o le fale o le fafine o loo taele; o le fafine ua matua lalelei lava” (2 Samuelu 11:1–2).
Na iloa e Tavita o le igoa o le fafine o Patisepa. O lana tane o Uria, o se fitafita, sa alu o ia e tau ma sa Amoni faatasi ma le autau, lea sa tatau ona i ai Tavita, lo latou tupu. Na faatonuina e Tavita ina ia aumai Patisepa i le maota o le tupu. Na la mulilulua ai, na to o ia [Patisepa], ma na amata ona fefe Tavita nei iloa la laua mulilulua. Na faamoemoe e ufiufi i lana agasala, o lea na poloaiina ai e Tavita e toe auina atu Uria i Ierusalema. Na toe foi mai Uria ae na musu e alu atu i lona fale e asi Patisepa ona o nisi itu na manatu i ai. Ona taupulepule lea o Tavita ia fasiotia Uria i le taua (tagai 2 Samuelu 11:3–17). O lenei faagasologa o filifiliga leaga na oo mai ai le oti ia Uria ma le faanoanoa ia Tavita, Patisepa, faapea foi i le malo atoa. Ma le silafia lelei o lenei tulaga, fai mai le Tusi Paia, “A ua leaga ia Ieova le mea ua faia e Tavita” (2 Samuelu 11:27).
Ua outou silasila i le auala na maua ai Tavita i lenei mailei? Sa i ai o ia i luga o lona maota, ma tilotilo ifo i lalo i se fanua tuaoi, na ia vaaia ai se tulaga sa le tatau ona ia vaai i ai. O le maunu lena a le fili. O le tauagafau, legavia, ma le faamasinoga poto sa tatau ai ia Tavita ona vave liliuese ae aua le tilotilo i ai, peitai, na te lei faia se mea o na mea. Nai lo lena, sa ia faatagaina lona mafaufau e liliu atu i tuinanau faasāina, o na mafaufauga sa taitai atu ai i amioga, ma na vave lava ona oo ifo i lalo mai le leaga i le sili atu ona leaga seia oo i le matautia. Na maileia Tavita, ma o ona taunuuga na oo atu i le faavavau.
O loo i ai se mailei faaleagaga i aso nei e tau o ponokarafi, ma o le toatele, e tosina atu i ana savali inosia ua ulu atu i lenei mailei matautia. E pei lava o soo se mailei, e faigofie ona ulu atu i ai ae faigata ona toe sola ese mai ai. Fai mai nisi e mafai lava ona latou matamata ae le ano tele i ponokarafi e aunoa ma le pagatia ai i ona aafiaga leaga. E amata ona latou faapea mai, “E le leaga tele,” po o le, “O ai e popole i ai? E leai lava se eseesega,” po o le, “E na o lo’u fia iloa lava.” Peitai ua faaseseina i latou. Ua lapatai mai le Alii, “O lē vaai atu foi i se fafine ina ia manao i ai o le a faafitia le faatuatua, ma o le a le maua le Agaga; ma afai na te le salamo o le a lafoaiina o ia i fafo” (MFF 42:23). O le mea tonu lava lena na tupu ia Tavita: na vaai o ia i a Patisepa, ma tuinanau ia te ia, ma aveese ai le Agaga. Semanu e tele se eseesega o le olaga na totoe o Tavita pe ana faapea lava e tilotilo ese.
Faatasi ai ma le alu ese o le Agaga, o i latou e faaaogaina ponokarafi e aveesea foi mafaufauga ma manatu lelei e filifili ai. E pei o le Tupu o Tavita, latou te taumafai e ufiufi a latou agasala, ae galo ai e leai se mea e lilo i le Alii (tagai 2 Nifae 27:27). E amata ona faaputuputu ia taunuuga moni [o ponokarafi] a o alu ese atu le faaaloalo o le tagata ia te ia lava, o mafutaga na lelei ua masesei, e faaleagaina faaipoipoga, ma e toatele tagata le sala e manunua ai. O le iloa mulimuli ane o mea na latou matamata ai ua le maua ai se faamalieina, latou te faataitai ai i ata e sili atu ona leaga. E faifai lemu lava ona fai ma o latou mausa, e tusa lava pe latou te le iloaina pe latou te teena foi, ma e pei foi o Tavita, e faateteleina le leaga o a latou amioga, ao mou ese o latou tulaga faatauaina o amioga lelei.
A o faasolo i lalo ia aganuu lauiloa o le lalolagi, ua atili faateleina mea leaga i ala o faasalalauga, faafiafiaga, faalauiloaga, ma le Initoneti. Ae peitai, o le lauiloa e tusa ai ma tulaga o loo i ai nei le lalolagi, o se fua faatatau ua sili ona matautia ua faaaoga e fuaina ai le mea sa’o po o le mea e le leaga. O se ata tifaga po o se faafiafiaga i le televise, atonu e sili ona lauiloa ma sili ona fiafia i ai le toatele o le au maimoa ae peitai, o loo faaalia ai ni ata ma ni amioga faaponokarafi. Afai o se vaega o le ata tifaga “e le leaga tele,” o lona uiga, e otometi lava ona le lelei foi. O lea la, o le mea moni e faapea, e matamata isi i ata tifaga po o Uepi saite e le talafeagai, e le o se ‘alofaga lea mo i tatou. O olaga o i latou ua umia le perisitua e tatau ona faaalia ai tulaga faatauaina o le Faaola ma Lana Ekalesia, ae le o tulaga o le lalolagi.
Ua aoao mai le Faaola, “Amuia i latou uma o e loto mama, aua latou te iloa atu le Atua” (3 Nifae 12:8). O folafolaga o le talalelei e faagaeetia ma faamamaluina, e faapea foi ona faaeaina. Tatou te maua na folafolaga e ala i feagaiga lea e manaomia ai lo tatou ola i ni olaga mama ma le legavia. A tatou ola amiotonu ma saili e faamama o tatou loto, tatou te latalata atili atu ai i le Atua ma le Agaga. O le tulaga o o tatou loto e iloa ai le tele o le faamaoniga o le Atua o loo tatou vaaia i le lalolagi i aso nei ma tatou agavaa ai ma iloa ai le folafolaga o i latou uma e loto mama “latou te iloa atu le Atua.” O la tatou sailiga e mo le mama. E pei ona tusia e le Aposetolo o Ioane:
“Le au pele, o le fanau i tatou a le Atua i nei ona po, ae lei faaalia mai nei le uiga o i tatou a amuli: a ua tatou iloa, pe a faaali mai o ia, ona foliga ai lea o i tatou ia te ia; aua tatou te iloa tino ai lava o ia.
“O i latou uma foi o i ai lenei faamoemoe ia te i latou, ua taitasi ma faamamaina o ia e ia, faapei ona mama o ia” (1 Ioane 3:2–3).
Afai ua maua oe i le taimi nei i le mailei o ponokarafi, o le taimi lenei e faasaoloto ai oe lava faatasi ai ma le fesoasoani a le Faaola. O loo i ai se auala e alu ese ai, ae o le a e manaomia Lana fesoasoani e sola ese ai. O lou manuia atoatoa e faalagolago lea i lou salamo atoatoa. Alu vave i lou epikopo. Saili mo lana taitaiga musuia. O le a fesoasoani o ia i a te oe e faatulaga se fuafuaga o le salamo, o le a faapea ona toefuatai ai lou talitonu ia te oe lava ma toe aumai ai le Agaga i lou olaga. O le mana faamalolo o le Togiola a le Alii o Iesu Keriso e oo atu i puapuaga uma, e oo lava i le mea lenei. Afai o le a e liliu atu i le Faaola ma lou loto atoa ma mulimuli i le fautuaga a lou epikopo, o le a e maua le faamalologa o loo e manaomia. O le a fesoasoani le Faaola ia te oe ia maua le malosi e tetee ai i faaosoosoga ma le mana e faatoilalo ai le mausa. E pei ona aoao mai Moronae:
“Ia outou o mai ia Keriso, ma fetagofi atu i mea alofa lelei uma, a e aua le papai atu i le mea alofa leaga po o le mea ua le mama… .
“Ioe, o mai ia i a Keriso, ina ia faaatoatoaina outou e ia, ma ia teena e outou le amioletonu uma; ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea lona alofa tunoa mo outou, ina ia atoatoa ai outou ia Keriso i lona alofa tunoa” (Moronae 10:30, 32).
Tau ina ia faamanuia le Atua ia tatou taumafaiga faamaoni ia mama o tatou loto ma mafaufau, ina ia “[mafai] ona teuteuina o [tatou] manatu i le mama e le aunoa.” (MFF 121:45). Ou te molimau atu i le alofa laveai o le Faaola ma le mana faamama o Lona Togiola i le suafa o Iesu Keriso, amene.