Mrs. Patton—ua Toe Faaauau le Tala
Ou te mautinoa sa manatu mai lo tatou Tama Faalelagi i ona manaoga ma sa finagalo ina ia faalogoina e ia ia upumoni faamafanafana o le talalelei.
Ua ou misia la’u uo o James E. Faust i lenei aso ma e faailoa atu lou alofa i lona faletua pele ma le aiga, ma ou te mautinoa o loo auauna o ia i le Alii i se isi nofoaga. Ou te faafeiloai atu i Au Pulega Aoao fou ua lagolagoina, Peresitene Eyring, Elder Cook ma Elder Gonzales, ma tautino atu ia i latou ua latou maua lau lagolago atoa.
I le tolusefulu ma le valu tausaga talu ai, i se konafesi aoao sa faia i le Tapeneko i le Lotoa o le Malumalu, sa ou talanoa ai e uiga i se tasi o a’u uo ao o’u laitiiti, o Afa Patton, na maliu a o talavou. Sa faaulutalaina le lauga “Mrs. Patton, O Loo Ola Afa.”1 Sa tuuina atu o’u manatu i le tina o Afa, o Mrs. Patton, e le o se tagata o le Ekalesia. Sa laitiiti lava so’u faamoemoe o le a lagona mai e Mrs. Patton la’u lauga, sa ou manao e faasoa atu ia i latou uma o e sa lagonaina mai lo’u leo le savali o le talalelei mamalu o le faamoemoe ma le alofa. Talu ai nei sa ou lagona ai le faagaeetia e toe faatatau tasi lava ia Afa ma faailoa atu ia te outou le mea na tulai mai ina ua mavae la’u uluai savali.
Muamua, ou te fia tauina atu ia te outou e uiga ia Afa. E enaena migimigi lona lauulu, ma e laumata fiafia. E umī ai lava o ia i soo se tamaitiiti i le vasega. Ou te matea o le auala lenei, i le 1940, a o tele fevesiaiga lea na iu ina avea ma Taua Lona II o le Lalolagi lea sa aveina ai le tele o vaega o Europa, sa mafai ai e Afa ona faavalea ia taitai sa taliaina fitafita ma tusia ai lona igoa i le neivi i le na o le 15 o ona tausaga. Ia Afa ma le toatele o tamaiti, o le taua o se suesuega maoae. Ou te manatuaina lona aulelei i lana togiga a le neivi. Sa ia moomoo maimau pe a na matou matutua, po o le tau uumi teisi ae, ina ia mafai foi ona tusia o matou igoa.
O le talavou o se taimi faapitoa lea o le olaga. E pei ona tusia e Longfellow:
E maeu le matagofie o le talavou! e maeu lona susulu,
Faatasi ai ma ona moomooga, manaoga, ma miti!
O le tusi o Amataga, O tala e leai se Mutaaga,
O tamaitai uma o ni toa manumanu, ae o alii uma o se uo!2
Sa mimita tele le tina o Afa i le fetu lanumoana sa teuteu ai le faamalama o lona potu malolo. E faailoa atu ai i soo se tasi e sopoia luma o lona fale e faapea o lana tama o loo i le militeli a lona malo ma o loo tautua lelei ai. Afai ou te sopoia luma o le fale, e masani ona ia tatalaina mai le faitotoa ma valaaulia atu au i totonu ina ia faitau le tusi sili ona lata mai na aumai ia Afa. E faatumulia ona mata i loimata; ona talosagaina lea o au e faitau leotele. E matuai taua lava Afa i lenei tina ua oti lana tane.
O loo mafai lava ona ou manatuaina le tuuina faalelei e lima talatala o Mrs. Patton le tusi i totonu o lona teutusi. O lima galulue malosi nei; o Mrs. Patton o se tamaitai teufale mo se tasi o ofisa i le taulaga. O aso uma lava o lona olaga sei vagana ai Aso Sa e mafai ai ona vaaia o ia o savali atu i le auala, o le paelo ma le pulumu i lona lima, o lona lauulu sinasina ua faapatu lelei i luga, o ona tauau ua vaivai mai le galuega ma ua faanounou ona o lona matua.
Ia Mati o le 1944, a o vevela lena o le taua, sa toe siitia atu ai Afa mai le USS Dorsey, o se vaatau, agai i le USS White Plains, o se vaa e feaveai ai vaalele tau. A o latou i ai i Saipani i le Pasefika i Saute, sa osofaia ai le vaa. O Afa le isi sa i ai i luga o le vaa na fano ai i le vasa.
Sa aveeseina le fetu lanumoana mai lona nofoaga mamalu i luma o le faamalama o le fale o le aiga o Patton. Sa suia i le lanu auro, e faailoa ai o le sa fai ma sui o le fetu lanumoana ua maliufasia i le taua. Na mou atu se malamalama mai le olaga o Mrs. Patton. Sa lofituina o ia i le faanoanoa ma le lotovaivai.
Faatasi ai ma se tatalo i lo’u loto, sa ou oo atu ai i le auala savali masani i le aiga o Patton, ma tau mafaufau po o a ni upu faamafanafana e mafai ona sau mai laugutu o se tamaitiiti.
Sa matala le faitotoa, ma fusi atu au e Mrs. Patton e pei lava o sana tama. Na avea le fale ma se falesa a o tootutuli ai se tina loto mafatia ma se tamaitiiti faatauvaa i le tatalo.
Ina ua ma toe tulai a’e i luga, sa faatausisila mai Mrs. Patton i o’u mata ma fai mai: “Tommy, ou te le auai i se ekalesia, a o oe e te auai. Ta’u mai ia te au, e toe ola ea Afa?” I le malosi sili sa ia te au, sa ou molimau atu ai ia te ia, e moni o le a toe ola ia Afa.
I le Konafesi Aoao i na tausaga e tele ua alu, a o o’u faamatalaina atu lenei tala, sa ou taua ai e faapea ma te le’i toe feiloai lava ma Mrs. Patton ae sa ou manao lava e toe tali tasi atu i lana fesili, “E toe ola mai ea Afa?”
Ou te faatatau i le Faaola o le lalolagi, o le sa femaliuai i ala pefu o nuu ia ua tatou faaigoaina nei ma le migao o le Nuu Paia; o le na faapupulaina ia tauaso, na faafaalogo i e tutuli, faasavavali pipili, ma faatuina e ua oti; o Ia o le na faamautinoa mai ma le alofa ia i tatou, “O au nei le ala, upu moni, ma le ola.”3
Sa ou faamatalaina atu o le fuafuaga o le olaga ma se faamalamalamaga o lona auala e faavavau na oo mai ia i tatou mai le Matai o le lagi ma le lalolagi, o Iesu Keriso le Alii. Ina ia malamalama i le uiga o le oti, e tatau ona tatou talisapaia le faamoemoega o le olaga.
Na ou faailoa atu e faapea o lenei tisipenisione, na folafola mai ai e le Alii: “O lenei, e moni ou te fai atu ia te outou, sa ou i le amataga faatasi ma le Tama, o a’u foi o le Ulumatua.”4 “Sa i ai foi tagata faatasi ma le Atua i le amataga.”5
Na tusia e Ieremia le perofeta:
“Na oo mai ia te au le afioga a Ieova, ua faapea mai,
“Na a’u iloa oe a o lei faia oe; na a’u faapaiaina oe … ae lei fanau mai oe, na Au tofia oe e fai ma perofeta i nuu.”6
Mai lena lalolagi mamalu o agaga na tatou ulufale mai ai i se tulaga maoae o le olaga ina ia faamaonia ai lo tatou usiusitai i mea uma ua poloaiina ai e le Atua. I le gasologa o le olaga faitino tatou te tuputupu ae ai mai le le iloa o se mea seia oo i le avea ma tamaiti fiailoa e oo atu i le avea ma tagatamatua. Tatou te oo i le olioli ma le faanoanoa, faamalieina ma le le fiafia, faamanuiaina ma le toilalo. Tatou te tofo i le suamalie, ae tatou te tofo foi i le oona. O le olaga faaletino lenei.
Ona oo mai lea i olaga taitasi le aafiaga lea ua lauiloa o le oti. E leai se tasi e sao mai ai. E tatau ona sopoia uma atu le oti.
I le toatele, o loo i ai se mea taufaamata’u ma le faalilolilo e uiga i lenei mālō asiasi e le taliaina ua faaigoaina o le oti. Atonu o se fefe i mea e le mailoa o loo mafua ai ona faatu le toatele i lona oo mai.
Na vave le maliu o Afa Patton. E tuai lava ona maliliu isi. Ua tatou iloa, e ala i le afioga faaalia a le Atua, e faapea “pe a tetea agaga o tagata ma lenei tino oti, … e aveina atu i latou e nonofo i le maota o le Atua, o Le na foai mai le ola ia te i latou.”7
Sa ou faamautinoa atu ia Mrs. Patton ma isi uma o e sa faalogologo i ai, o le a le tuulafoaiina lava i latou e le Atua—sa Ia auina mai Lona Alo Pele e Toatasi i le lalolagi e aoao i tatou e ala i faataitaiga i le ituaiga olaga e tatau ona tatou ola ai. Na maliu Lona Alo i luga o le satauro ina ia togiolaina tagata uma. O Ana afioga i le faavauvau o Mareta faapea ma Ona soo i aso nei e aumaia ai ia i tatou le faamafanafanaga:
“O au nei o le toetu ma le ola: o le faatuatua mai ia te au, e ui lava ina oti, a e ola lava ia:
“O tagata ola uma foi o e faatuatua mai ia te au, e le oti lava e oo i le faavavau.”8
“E tele mea e nonofo ai i le fale o lo’u Tama: a na leai, po ua ou fai atu ia te outou; ou te alu e sauni se mea e nonofo ai outou.
“… Ou te toe sau, ou te talia foi outou ia faatasi ma au; ina ia i ai outou i le mea e i ai au.”9
Ou te toe aumaia ia molimau a Ioane le Talifaaaliga ma Paulo le Aposetolo. Na tusia e Ioane:
“Na au iloa foi o e na oti, o tagatanuu atoa ma alii, o tutu i luma o le Atua; …
“Ua avae foi e le sami e na oti sa i ai.”10
Na folafola mai e Paulo: “Aua faapei ona oti uma ia Atamu, e faapea foi ona faaolaina uma ia Keriso.”11
Sa ou faamalamalamaina atu seiloga lava e oo i le taeao mamalu o le Toetutu, e ao ona tatou savavali pea i le faatuatua. “Aua o ona po nei tatou te vaavaai ai faanenefu i le faaata; a o ia ona po tatou te fesagai ai.”12
Sa ou toe faamautinoa atu ia Mrs. Patton, ua valaaulia o ia faapea foi ma isi tagata uma e Iesu:
“Ia outou o mai ia te au, o outou uma o e tigaina ma mafatia i avega, o au foi e malolo ai outou.
“Ia outou amoina la’u amo, ma ia outou faaaoao ia te au; aua o a’u le agamalu ma le lotomaulalo: ona maua lea e outou o le malologa mo outou agaga.”13
O se vaega o la’u savali, sa ou faamalamalamaina atu ai ia Mrs. Patton e faapea o se ituaiga malamalama faapena o le a lagolagoina ai o ia i lona lototiga—ina ia aua ne’i oo o ia i le tulaga matautia o se tagata le talitonu, o le na maliu sana tama, sa faalogoina o faapea atu a o ia vaavaai atu i le tuuina malie ifo o le pusa maliu i le eleele: “Tofa, la’u tama. Tofa e faavavau.” Ae, ia ea i luga le ulu, ia lototele, ma le faatuatua e le maluelue, e mafai ai ona ia sii a’e ona mata a o ia vaavaai i talaatu o le fafati o galu o le lanumoana o le Pasefika ma musumusu, “Tofa, Afa, la’u tama faapelepele. Tofa—sei ta toe feiloai.”
Ou te sii maia upu a Tennyson, e pei o loo tautala atu ia te ia e lana Afa:
O le goto ifo o le la ma le fetu o leapai,
O se valaauga manino lea ua oo mai!
Ia ‘aua nei i ai se faanoanoa e oo i se agaga,
Pe a ou tuuvaa atu i luga o le vasa, …
O le tauafiafi ma le logo ua ta mai,
Sosoo mai ai ma le pogisa atoa o le aai!
Aua nei i ai se faamavaega faanoanoa,
Pe a ou folau atu i le vasaloloa;
Aua e ui ina tatou tuua lenei olaga
Ma mamao le ala e alu ai la’u malaga,
Ou te faamoemoe lava o le a ou vaai i lo’u Tautai
Pe a ou sopoia atu lena ituvai.14
A o o’u faaiuina la’u savali i na tausaga e tele ua alu, sa ou tuuina atu ia Mrs. Patton la’u lava molimau patino i le avea ai ma molimau faapitoa, ma tau atu ia te ia o loo manatu mai le Atua lo tatou Tama ia te ia—o le tatalo faamaoni e mafai ai ona ia fesootai atu ia te Ia; sa i ai foi Sona Alo na maliu, o Iesu Keriso le Alii; o Ia o lo tatou fautua i le Tama, o le Alii o le Filemu, lo tatou Faaola ma le Togiola paia, ma e i ai se aso o le a tatou feiloai fesagai ai ma Ia.
Sa ou faamoemoe o la’u savali ia Mrs. Patton o le a oo atu ma pai atu i isi o e ua maliliu nisi e pele.
O lenei, o’u uso e ma tuafafine pele, o le a ou faasoa atu ia te outou le atoaga o lenei tala. Sa ou tuuina atu la’u savali o le konafesi i le aso 6 o Aperila, 1969. Sa tau leai so’u faamoemoe o le a lagona e Mrs. Patton le lauga. Ou te le’i mafaufauina o le a ia faalogo i le konafesi aoao. E pei ona ou ta’ua, e le o ia o se tagata o le Ekalesia. Ona ou iloaina lea o se mea e pei o se vavega sa tupu. I le leai ma se manatu po o ai o le a lauga i le konafesi, ae po o a foi mataupu latou te lauga i ai, sa valaaulia Mrs. Terese Patton e ona tuaoi o le Au Paia o Aso e Gata Ai i Kalefonia, lea sa ia siitia atu i ai, ina ia alu atu i lo latou fale e faalogologo faatasi ma i latou i se sauniga o le konafesi. Sa ia taliaina le valaaulia ma sa faalogologo i le sauniga tonu lava lea sa ou tuuina atu ai o’u manatu e faatatau tonu lava ia te ia.
I le gasologa o le vaiaso muamua o Me 1969, sa ou ofo ma le olioli, i lo’u mauaina o se tusi sa lafo mai Pomona, Kalefonia, na tusia i le aso 29 Aperila, 1969. Sa aumai ia Mrs. Terese Patton. Ou te faasoaina atu se vaega o lena tusi ia te outou:
“Le Pele Tommy,
“Ou te faamoemoe e te le amanaiaina lo’u valaauina o oe ia Tommy, e pei ona sa ou masani ona mafaufau ai ia te oe. Ou te le iloa pe faapefea ona faafetai atu ia te oe mo lena lauga faamafanafana sa e tuuina mai.
“Sa 15 tausaga o Afa ina ua tusia lona igoa i le neivi. Na maliufasia o ia ae toe tasi le masina aulia lona aso fanau lona 19 i le aso 5 o Iulai, 1944.
“O se mea matagofie tele lou mafaufau mai ia i matou. Ou te le iloa pe faapefea ona faafetai atu ia te oe mo au upu faamafanafana, e le gata i le taimi na maliu ai Afa ae faapea i lau lauga. Sa tele ni a’u fesili sa i ai i le tele o tausaga, ae o lea ua e taliina. Ua ou maua nei le filemu e faatatau ia Afa… . Ia faamanuia ma tausia pea oe e le Atua.
“Alofa atu,
“Terese Patton”15
O’u uso e ma tuafafine, ou te le talitonu sa faafuaseia ona ou tuuina atu lena savali faapitoa i le konafesi aoao ia Aperila 1969. Ou te le talitonu foi sa faafuaseia ona valaaulia ia Mrs. Terese Patton e ona tuaoi ina ia auai faatasi ma i latou i lo latou fale mo lena sauniga patino o le konafesi. Ou te mautinoa sa manatu mai lo tatou Tama Faalelagi i ona manaoga ma sa finagalo ina ia faalogoina e ia ia upumoni faamafanafana o le talalelei.
E ui lava ua leva ona mavae atu ia Mrs. Patton mai le olaga faaletino, ae sa ou lagonaina se faalogona malosi ina ia faasoa atu ia te outou le auala sa faamanuia ma tali atu ai lo tatou Tama Faalelagi ia te ia, o se tina ua oti lana tane, i ona manaoga. Faatasi ai ma le malosi atoa o lou agaga ou te molimau atu ai e alofa lo tatou Tama Faalelagi ia i tatou uma taitoatasi. Na te faafofogaina ia tatalo a e loto faamaulalo; Na te faafofogaina a tatou tagi mo le fesoasoani, e pei ona Ia faafofogaina ia Mrs. Patton. O Lona Alo, lo tatou Faaola ma le Togiola, o loo fetalai mai ia i tatou taitoatasi i le aso nei: “Faauta, ou te tu atu i le puipui, ma tuitui atu; ai se tasi e faalogo mai i lo’u leo, ma tatala mai le puipui, ou te ulufale atu ia te ia.”16
Pe o le a tatou faalogo atu ea mo lena tuitui? Pe o le a tatou faalogo atu ea i lena leo? Pe o le a tatou tatala atu ea le faitotoa i le Alii, ina ia mafai ona tatou maua le fesoasoani ua Ia saunia e tuuina mai? Ou te tatalo o le a tatou faia, i le suafa paia o Iesu Keriso, amene.