Faaaliga Faaletagata: O Aoaoga ma Faataitaiga a Perofeta
O faaaliga faaletagata o le auala lea tatou te iloa ai mo i tatou lava ia upumoni e sili ona taua o lo tatou ola ai.
A o tatou amataina le sauniga faaiu o lenei konafesi logologoa, ou te auai faatasi ma outou i le faailoaina atu o le agaga faafetai mo le avanoa e lagolago ai Peresitene Henry B. Eyring e avea ma se fesoasoani i le Au Peresitene Sili, o Elder Quentin L. Cook i le Korama a le Toasefululua, ma Elder Walter F. Gonzalez i Peresitene e toafitu o Fitugafulu. Ou te ofoina atu ia i latou o’u alofaaga ma le lagolago ma molimau atu ua valaauina i latou e le Atua e se perofeta soifua, o Peresitene Gordon B. Hinckley, “e tusa ai ma le agaga o faaaliga ma valoaga.”1
O mea na tutupu o nei aso e lua ua tuanai ua aoaoina ai i tatou i le moomia o faaaliga i le galuega a le Alii ma faaaliga faaletagata i o tatou lava olaga. O faaaliga faaletagata o le auala lea tatou te iloa ai mo i tatou lava ia upumoni e sili ona taua o lo tatou ola ai: o le soifua moni ai o le Atua, lo tatou Tama Faavavau, ma Lona Alo, o Iesu Keriso; o le moni o le talalelei toefuataiina; ma le faamoemoega ma le taitaiga a le Atua mo i tatou.
O le tele o mea ua ou iloa e uiga i faaaliga faaletagata sa ou aoaoina mai faataitaiga a perofeta, e le gata i e anamua ae faapea foi i ona po nei. O le afiafi nei ou te fia faasoa atu ai nisi o nei faataitaiga faaletagata ma tatalo ina ia musuiaina ai i tatou taitoatasi e saili faamanuiaga o faaaliga faaletagata lava ia i o tatou olaga.
I le avea ai ma se sui risone talavou, sa tofia ai au e fesoasoani ia Elder Marion G. Romney i le toe faatulagaina o se au peresitene o se siteki. I le taimi umi ma le paganoa a o ma tietie atu i le konafesi, sa oo atu ai a ma talanoaga i tulaga faaleagaga o lo ma tofiga. Na aoaoina ai au e Elder Romney i le auala e faamanuiaina ai i tatou e le Alii i faaaliga. “Robert,” na ia saunoa ai, “ua ou aoaoina afai tatou te i ai i le galuega a le Alii, ua tatou maua Ana faamanuiaga ina ia faataunuuina ai soo se mea ua talosagaina i tatou e fai.” Na toe faamalamalama mai e Elder Romney e faapea o le a ma taunuu atu i le aai taumamao, tootutuli i le tatalo, faatalanoa le au perisitua, ona toe tootutuli lea, ma o le a faaali mai e le Agaga Paia ia i maua le tagata o le ua filifilia e le Alii e avea ma peresitene fou o le siteki. Na ia folafola mai ia te au e faapea o le a avea ma se tasi o aafiaga silisili faaleagaga o lo’u olaga, ma sa faapena lava.
Ua tofu auina mai i tatou uma i le lalolagi e lo tatou Tama Faalelagi ina ia faamaonia lo tatou agavaa e maua le ola faavavau: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”2 E faapefea ona tatou iloa e i tatou lava ia le Tama ma le Alo? E ala i faaaliga faaletagata. O faaaliga faaletagata o le auala lea e fesoasoani mai ai le Tama Faalelagi ia i tatou ina ia iloa o Ia ma Lona Alo, aoao ma ola i le talalelei, tumau i le amiotonu seia oo i le iuga, ma agavaa mo le ola faavavau—ia toe foi atu i lo Laua afioaga.
E mafai ona e fesili, “E faapefea ona tatou sailia ia faaaliga faaletagata?” Na fautuaina e Paulo le Au Paia ina ia faalagolago i le Agaga, nai lo le poto o le lalolagi.3 Ina ia mauaina le Agaga, tatou te amata i le tatalo. Sa suesueina e Peresitene Lorenzo Snow le talalelei i ni tausaga se tele a o lei auai lena o ia i le Ekalesia. Ae na faatoa ia maua se molimau i le lua po o le tolu vaiaso talu ona maea lona papatisoga ina ua alu atu o ia e tatalo na o ia. “Na oo ifo le Agaga o le Atua i o’u luga,” na ia saunoa ai. “E maeu, le olioli ma le fiafia sa ou faalogoina [aua] sa ou mauaina ai se malamalama atoatoa faapea o loo soifua le Atua, o Iesu Keriso o le Alo o le Atua, faapea le toefuataiina mai o le Perisitua paia, ma le atoatoaga o le Talalelei.”4
Sa ou aoaoina ai o le tatalo e maua ai se faavae mautu mo faaaliga faaletagata. Ae tele atu isi mea e manaomia. A o avea pea ma se sui risone, sa ou maua ai le avanoa e aoao ai mai se isi Aposetolo, o Elder Boyd K. Packer. Sa tofia i ma’ua e toe faatulaga se siteki ma sa amata ona tootutuli e tatalo faatasi. Ina ua maea ona faatalanoaina ia taitai perisitua ma faia se tatalo sa fautua mai loa Elder Packer ma te o ma te savalivali faataamilo i le fale. A o ma savalivali, sa ia faataitaia mai se mataupu faavae taua o le sailia o faaaliga faaletagata—le mataupu faavae lea na aoao atu e le Alii ia Oliva Kaotui: “Faauta, … e ao ina e filifili maea ai i lou mafaufau.”5 Sa ma mafaufau loloto i lo ma tofiga, fefautuaai faatasi, ma faalogo i le leo o le Agaga. Ina ua ma toe foi, sa ma toe tatalo ma suesue atili, ona ma saunia ai lea e tali se faaaliga.
O faaaliga e oo mai e tusa ma le finagalo o le Alii, lea e masani o lona uiga e tatau ona tatou agai i luma i le faatuatua, e tusa lava pe tatou te le’i mauaina uma tali sa tatou manaomia. I le avea ai ma se Pulega Aoao, sa tofia au ou te fesoasoani i le toefaatulagaina o se au peresitene o se siteki i lalo o le taitaiga a Elder Ezra Taft Benson. Ina ua mavae le tatalo, faatalanoaga, suesuega, ma toe tatalo foi, sa fesili mai loa ia Elder Benson ia te au pe ua ou iloaina le peresitene fou. Sa ou tali atu i ai ou te le’i mauaina lena musumusuga. Sa ia tilotilo mai ia te au mo se taimi umi ma tali mai na te le’i mauaina foi. Ae peitai, sa musuia i ma’ua e talosagaina ni perisitua agavaa se toatolu ina ia saunoa i le sauniga i le afiafi o le Aso Toonai o le konafesi. I sina taimi talu ona amata ona saunoa le failauga lona tolu, sa amata loa ona uunaia au e le Agaga faapea e tatau ona avea o ia ma peresitene fou o le siteki. Sa ou tilotilo atu ia Peresitene Benson ma iloa ai le maligi ifo o loimata i ona fofoga. Sa tuuina mai le faaaliga ia i ma’ua uma—ae sa faatoa tuuina mai i le faaauau pea ona sailia o le finagalo o lo tatou Tama Faalelagi a o ma agai pea i luma i le faatuatua.
I popofou o la’u auaunaga i le Ekalesia, sa aoao mai ai e Elder Harold B. Lee lenei lesona ina ua ia oo mai e faatulaga se siteki fou i le itu sa matou nonofo ai. Sa fesili mai Elder Lee ia te au, i le avea ai ma se epikopo fou faatoa lagolagoina, pe mafai ona ma faatasi ma ia i se fonotaga ma le au tusitala. O iina, na luitauina ai e se tusitala talavou ma le malosi ia Elder Lee. Sa ia fesili atu ia te ia, “Ua e ta’ua oe o se perofeta. O anafea le taimi mulimuli na e maua ai se faaaliga, ae o le a le mea sa faatatau i ai?” Sa faatali teisi ia Elder Lee, ma pulatoa sao atu lea ia te ia, ma tali atu i se auala malu, “O le aoauli ananafi, pe tusa o le ta o le tolu. Sa ma tatalo po o ai e tatau ona avea ma peresitene o le siteki fou, ma sa faailoa mai ia i ma’ua lena tagata e tatau ona i ai.” Na suia le loto o le tusitala. O le a le galo lava ia te au le Agaga na oo atu i totonu o lena potu a o tuuina atu e Elder Lee lana molimau malosi i faaaliga ia e mafai ona maua e i latou o e sailia ma le faamaoni le finagalo o le Alii.
I le avea ai ma fanau iti, talavou, matua, faiaoga, ma taitai faamaoni, e mafai foi ona tatou mauaina soo ia faaaliga faaletagata nai lo le mea tatou te iloaina. O le tele lava ona tatou mauaina ma faailoa atu ia faaaliga faaletagata, o le faateleina foi lena ona tuputupu ae o a tatou molimau. I le avea ai ma epikopo, e faatupulaia la’u molimau i taimi taitasi ou te mauaina ai se faaaliga e tuuina atu ni valaauga i tagata o le uarota. O lena molimau sa faamalosia i taimi taitasi e valaauina ai le Au Pulega Aoao ma taitai, o Fitugafulu Eria, ma peresitene o siteki pe tuuina atu i ai ni tofiga fou. O le mea e sili ona taua, sa faamalosia ai au e ala i faaaliga faaletagata na ou mauaina i la’u matafaioi i le avea ai ma se atalii o le Atua, o se tane, ma se tama. Ou te faafetai mo le taiala ma le taitaiga a le Agaga i lo matou aiga a o matou sailia le taitaiga mo mataupu faaleaiga.
Mo i tatou uma, o a tatou faaaliga faaletagata e mulimuli lava i le faatulagaga lea e maua ai e perofeta ia faaaliga, e pei ona tusia i tusitusiga paia. Na valaau atu Atamu ma Eva i le suafa o le Alii ma mauaina ia faaaliga faaletagata, e aofia ai le malamalama i le Faaola.6 Sa sailia e Enoka, Aperaamo, ma Mose le manuia o o latou nuu ma sa tuuina atu i ai ni faaaliga ofoofogia e pei ona tusia i le Penina TauTele.7 O faaaliga faaletagata a Elia na oo atu e ala i se leo malu, ma le itiiti;8 o Tanielu na auala atu i se miti.9 O faaaliga faaletagata na oo ia Peteru na tuuina atu ai ia te ia se molimau o Iesu o le Keriso.10 Na maua e Liae ma Nifae ni faaaliga e uiga i le Faaola ma le ata o le faaolataga, na faapea foi ona maua e perofeta uma o le Tusi Paia ma le Tusi a Mamona ia faaaliga ina ia lapatai, aoao, faamalosi, ma faamafanafana ia i latou ma o latou tagata.11 Ina ua mavae le tele o talosaga i le malumalu, sa maua ai e Peresitene Spencer W. Kimball le faaaliga i le perisitua.12 Ma ina ua mavae ona tatalo e uiga i le tuuina atu o faamanuiaga o le malumalu i ni tagata se toatele o le Ekalesia, sa maua ai e Peresitene Hinckley le faaaliga e uiga i le fausiaina o malumalu laiti.13
E maua e perofeta ia faaaliga faaletagata ina ia fesoasoani ai ia i latou i o latou lava olaga faapea le taitaiga o mataupu faalelalolagi a le Ekalesia. O lo tatou tiutetauave o le sailia lea o faaaliga faaletagata mo i tatou lava faapea ma tiutetauave ua tuuina mai e le Alii ia i tatou.
O nei vaiaso ua tuanai atu sa sailia ai e Peresitene Hinckley ia faaaliga e uiga i valaauga lea e faasilasilaina mai i lenei konafesi. Pe tusa ma se masina talu ai i le matou fonotaga i le Aso Tofi a le Au Peresitene Sili ma le Korama a le Toasefululua i le malumalu, sa ou faalogo ai a o fofogaina e Peresitene Hinckley se tatalo faigofie ma le faamaoni mo le taitaiga faaleagaga. O le tali i lana tatalo faatauanau lea ua tuuina mai nei ia i tatou uma.
Pe o tatou vaai atu ea i faataitaiga o faaaliga i soifuaga o perofeta? Pe o avea ea na faataitaiga ma se vaega o o tatou olaga?
Ua tatou iloa o le faatulagaga o loo faaautu i le Togiola.14 Tatou te maua ia faamanuiaga o le Togiola pe a tatou salamo i a tatou agasala ma tausia ia poloaiga. Tatou te osifeagaiga e faia lenei mea pe a tatou papatiso, ma e tatou te faafouina i vaiaso taitasi pe a tatou taumamafa i le faamanatuga. A o tatou faaauau ai i le amiotonu, tatou te faaagavaaina ai i tatou e faapea atu faatasi ma Samuelu, “Fetalai maia, [le Alii e]; aua o loo faalogologo atu lau auauna.”15 Ma e tali mai le Alii, “Amuia o outou mata, aua ua vaavaai: ma o outou taliga, aua ua faalogo.”16
Tatou te saunia e maua faaaliga faaletagata e pei ona faia e perofeta, e ala i le suesue i tusitusiga paia, anapogi, tatalo, ma fausia le faatuatua. O le faatuatua o le ki lea. Manatua le sauniuniga a Iosefa mo le Uluai Faaaliga:
“Ae afai ua leai se poto i so outou, ina ole atu ia i le Atua …
“A ia ole atu ma le faatuatua, aua lava ne’i masalosalo.”17
O le faatuatua e le maluelue, tatou te aoaoina ai mo i tatou lava “o le faatuatua lea e fai ai vavega.”18
E masani lava, o na vavega o le a le o ni faatinoga faaletino o le mana o le Atua—vaeluaina o le Sami Ulaula, faatuina o e ua oti, soloia i lalo o puipui o le falepuipui, po o le faaali mai o ni avefeau faalelagi. O le fuafuaga, o le tele o vavega o ni faatinoga faaleagaga ia o le mana o le Atua—e oo ifo le agalelei e ala i lagona, manatu, lagona o le mautinoa, tali i faafitauli, malosi e faafetaiaia ai luitau, ma le faamafanafanaga e tauaveina ai tiga ma faanoanoaga.
O nei vavega e oo mai ia i tatou a o tatou tutumau ai i le mea o loo ta’ua e tusitusiga paia o se “tofotofoina o lo [tatou] faatuatua.”19 O nisi taimi o lena tofotofoga e muamua oo mai a o lei mauaina se tali. A o vaaia e Peresitene Tavita O. MaKei le lafupovi a o talavou, sa ia sailia se molimau, ae na faatoa oo mai a o ia auauna ai i se misiona i Sikotilani. Sa fai mai o ia, “O se faaaliga na oo mai a o o’u talavou, sa ou tatalo faalilolilo ai ma le pulunaunau … i tafāmauga o le lotoa manu. O se faamautinoaga mai ia te au, o tatalo faamaoni, ‘e i ai le taimi, e i ai foi le nofoaga e tali mai ai.’”20
O le tali e mafai ona faapea “E le o nei—ia onosai ma faatali.”
Ou te molimau atu faapea pe o tafāmauga po o le lotoa manu, i le togavao po o se afeafe, o le taimi nei, po o le faavavau a sau, o le a faataunuuina lava afioga a le Faaola ia i tatou taitoatasi: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou.”21 E ui ua poloaiina i tatou ia aua ne’i saili atu i ni faailoga, ua poloaiina i tatou ina ia “matua … saili atu i meaalofa sili.”22 O nei meaalofa e aofia ai le Agaga Paia ma faaaliga faaletagata. O lena faaaliga o le a oo mai “o lea upu ma lea upu, o le fuaiupu ma le fuaiupu,” e pei ona fetalai le Faaola, ma “o le talia o le a foai atili atu i ai [e le Alii].”23
A o tatou agai i luma mai lenei konafesi, ou te talosagaina i tatou uma taitoatasi ina ia tatou saga saili ma saga maua atili le Agaga o le Atua. Sa tatalo le Faaola ina ia maua e Ona soo i le Lalolagi Fou lena Agaga. Ma, o se faataitaiga ia i tatou uma, sa Ia tuumuliese mai Ona soo ma tatalo atu e faafetai atu i le Tama Faalelagi mo le tuuina mai.24 Ia tatou mulimuli i Lana faataitaiga ma tatalo mo le Agaga o le Atua, ia tuuina atu le faafetai mo faamanuiaga ofoofogia i o tatou olaga.
Ou te tuuina atu la’u molimau faapitoa o loo soifua Iesu Keriso ma o loo taitaia Lana ekalesia e ala i se perofeta soifua, o Peresitene Gordon B. Hinckley. Ou te iloa—ou te iloa—o loo taitaia lenei Ekalesia e Peresitene Hinckley e ala i faaaliga. I upu a Alema, “Faauta, ua ou fai atu ia te outou [o nei mea] ua faailoa mai ia te au e le Agaga Paia o le Atua. Faauta, ua ou anapogi ma tatalo mo aso e tele… . O lenei ua ou iloa e au lava ia ua moni; aua ua faaalia mai e le Alii le Atua ia te au … ma o le agaga lenei o faaaliga o loo ia te au.”25
Ia maua e i tatou uma lena Agaga, ia mauaina faamanuiaga o faaaliga faaletagata, ma iloa mo i tatou lava e moni nei mea, o la’u tatalo faamaoni lea i le suafa o Iesu Keriso, amene.