Elder Quentin L. Cook
O Le Korama a Aposetolo e Toasefululua

E ui ina saunoa mai o ia o le valaauga e avea o se uso o le Korama a Aposetolo e Toasefululua sa lei faamoemoeina e ia, ae sa aoao e Elder Quentin La Mar Cook e ola e avea o se molimau o le Faaola o Iesu Keriso a o laitiiti lava o ia.

“O lo’u olaga atoa lava sa siomia e i latou o e alolofa i le Faaola,” o le saunoaga lea a Elder Cook.

Na soifua mai o ia i le aso 8 o Setema, 1940, i Logan, Iuta, ia J. Vernon ma Bernice Cook, ma e matua faafetai lava Elder Cook i se tama alofa, ma malosi le auai, faapea foi se tina e “alofa i le Faaola. Sa la faia mea uma la te mafaia ina ia tausia ai i matou i le ala sa’o.”

Na te talisapaia lona uso ma lona tuafafine ma na te manatuaina o le 15 o ona tausaga i se taimi o la la’ua talanoaga ma lona uso matua, o Joe, na ia iloa ai o se molimau i le Faaola e i ai taunuuga maoae. Sa tatau ia Joe ona filifili pe tatau ona tolopo le aoga faafomai ae alu e ave se misiona. “Ina ua maea lena talanoaga, o le faamautinoaga na ou mauaina e ala i tatalo, e uiga i le moni o le Ekalesia ma le paia o Iesu Keriso, o se mea taua tele lea ia te au.”

Na iu ina faamisiona lona uso, e pei foi o Elder Cook, i le Misiona a Peretania. O ona peresitene o le misiona, e aofia ai Elder Marion D. Hanks, o lē sa avea ma se uso o le Aufono Sili o Fitugafulu, sa i ai ni aafiaga maoae mo ia.

“E matua taua tele le i ai o se molimau i le Faaola ma fegalegaleai ma tagata e alolofa i le Faaola,” na saunoa ai Elder Cook. Sa ia mauaina se isi tagata faapena, e suafa ia Mary Gaddie, lea na ia faaipoipo atu i ai i le Malumalu o Logan Utah i le aso 30 o Novema, 1962.

Ina ua maea ona faauu mai o ia mai le Iunivesite o le Setete o Iuta ma sona faailoga i saienisi faapolokiki po o faiga upufai, sa siitia atu loa i la’ua i Kalefonia lea na maua ai e Elder Cook se faailoga o le fomai o le tulafono i le Iunivesite o Stanford. A o tausia se la fanau e toatolu, sa faigaluega Elder Cook i tulafono faapisinisi, ma avea ai ma pule faapaaga o se ofisa loia a le Eria o le Faga o San Francisco, ona avea ai lea ma peresitene ma pule sili o le Ofisa o le Tausiga o le Soifua Maloloina a Kalefonia, ma mulimuli ane avea ma sui taitaifono o le Sutter Health Systems.

I lena taimi sa avea o ia ma se epikopo, peresitene o le siteki ma se fesoasoani, sui Risone, ma Pule Eria. A o i ai o ia i le au peresitene o le siteki, sa ia te ia se tiutetauave e le gata i uarota e fenanui, ae o aulotu foi e faa-Sipaniolo, Toga, Samoa, Takaloka, ma Meniterini ma Kenitonisia.

“Sa ma alolofa lava i tagata eseese o le ekalesia ma lo latou naunau i le talalelei a Iesu Keriso. Sa avea lava i latou ma se uunaiga lelei i lo’u olaga.”

E ui i lea, i lona soifua galue faapolofesa, sa tele lava ina galulue Elder Cook ma tagata e le auai i le Ekalesia. Sa ia aoaoina ai “e toatele naua tagata i fafo atu o le Ekalesia, e alolofa i le Faaola. O le toatele o i latou sa i ai foi la latou uunaiga lelei mo au. O lea, a ou talanoa atu i lou fegalegaleai ma tagata lelei, ou te le o talanoa atu i le tavavaeese mai o oe mai le lalolagi.”

Ina ua mavae ona tofia o ia i le Korama Lona Lua a Fitugafulu i le aso 6 o Aperila, 1996, ma faapea ma lona valaauga na sosoo ai i le Korama Muamua i le aso 4 o Aperila, 1998, sa galue auauna Elder Cook i le Au Peresitene o le Eria a Filipaina/ Maikolonesia, ma sa avea foi ma Peresitene o Eria a le Pasefika ma Amerika Matu i Matusisifo o le Ekalesia.

O lana auaunaga o se Pulega Aoao ua toe faamalosia ai lona talitonuga “e mafai ona e mauaina tagata lelei o e alolofa i le Faaola i soo se mea lava e te i ai.” Ua talitonu Elder Cook o le ala e te mauaina ai i latou, o le ola lea i le talalelei ma le lotomaulalo ae ia aunoa ma le ma.

“Ou te manatu o le mea sese aupito silisili o loo faia e le toatele o le Au Paia o Aso e Gata Ai, o le nana lea o o latou faasinomaga,” o lana saunoaga lea. “E toatele tagata o le ekalesia latou te le ta’uina i a latou uo ma paaga, pe o ai i latou ma pe o a foi mea latou te talitonu i ai, ma ua latou oo atu ai lava i tulaga e matuai faigata. O i latou e faailoa atu i latou o tagata o le Au Paia o Aso e Gata Ai ma faamanino atu mea ua latou talitonu ai, e matua itiiti lava o latou faafitauli.”

Na ia silafia ai foi, o i latou o ni faifeautalai sili atu, a o avea ma Faatonu Sili o le Matagaluega o Faifeautalai a o lei tofia i le Au Peresitene o Fitugafulu ia Aokuso i le 2007.

I lana uluai saunoaga i le konafesi ina ua maea ona lagolagoina e avea ma se Aposetolo i le aso 6 o Oketopa, 2007, na saunoa ai Elder Cook e uiga i le faafitauli o tagata o loo “nana” lo latou avea ma tagata o le ekalesia, ma sa ia uunaia i latou ina ia ola “i le faatuatua ae le o le fefe.”

“E toatele tagata ua ‘taofia mai le upumoni ona ua latou le iloa le mea e maua mai ai’” na ia saunoa ai. (MFF 123:12). “Ma a i ai se tagata e tautala sa’o i se ala faapalepale, ma le agalelei, e maofa lava i le toatele o tagata o le a tali mai.”

O loo faamoemoe Elder Cook o le a tali mai faapea tagata ia te ia i lona valaauga fou, i le silafia ai e ui lava ina lagona e ia lona le gafatia, e tatau lava ona soifua i le faatuatua ae le o le fefe, a o ia faailoa atu i tagata pe o ai o ia ma le mea ua ia talitonu i ai, i le avea ai o se molimau ia Keriso.

“Ou te alofa i le Faaola,” na ia ta’ua ai. “Ua ou olioli i le avanoa e tuuina atu ai se molimau ia Iesu Keriso i le lalolagi uma.”