Peresitene Henry B. Eyring
Fesoasoani Lua i le Au Peresitene Sili

Ina ua toe tomanatu Peresitene Henry Bennion Eyring i le ala e lei faamoemoeina ua oo nei i ai lona soifua, na soisoi o ia i lona silafia e mafai ona faia e le Atua vavega i olaga o Lana fanau, tusa lava po o le a lo latou fefefe ma lagona o le le gafatia.

Ua ia maua le malosi mai lena silafia, a o ia manatunatu i le mea ua ia faaigoaina o le “tiutetauave taua tele” ua oo mai faatasi ma lona tofiga i le Au Peresitene Sili. Ua seei nei Peresitene Eyring i le avanoa ua tulai mai ona o le tuumalo o Peresitene James E. Faust i le aso 10 o Aokuso, 2007.

E ui lava i le naunau atu i se mafutaga faateleina ma Peresitene Gordon B. Hinckley ma Peresitene Thomas S. Monson, ae na te misia lava Peresitene Faust.

“Ou te taumafai ia aua nei ou mafaufau ua ou suitulaga ia Peresitene Faust, aua e le mafai,” o lana saunoaga lea. “O ia o se Fesoasoani Lua sa tulaga ese lona saunia ma faataunuuina ona tiute i le Au Peresitene Sili. Sa ia te ia ni meaalofa tulaga ese.”

I se fonotaga ma le au faasalalau ina ua maea le fofogaina mai o lona valaauga i le aso 6 o Oketopa, sa toe ta’ua ai e Peresitene Eyring le valaauliaina o ia i le ofisa o Peresitene Faust, ina ua faatoa uma ona tofia o ia i le Korama a Aposetolo e Toasefululua i le aso 1 o Aperila, 1995. Nai lo le tuuina atu ia te ia o le faamalosiauga sa ia faamoemoeina, sa tusi le aao o Peresitene Faust agai i le lagi, ma soisoi, ma faapea atu, “Aua e te talanoa mai ia te au. Talanoa ia te Ia.” Sa faamatala e Peresitene Eyring, “Nai lo lona taumafai e fesoasoani mai ia te au e foia o’u faafitauli uma, sa ia faasino atu au i le Atua. E ia te ia lena meaalofa o lagona maaleale ma le agalelei—o se uo aupito pele ma le silisili ma o se faufautua sili e mafai ona e maua.”

I le faaalia o lona lotofaafetai i le Alii mo Lona faatuatuaga ma Peresitene Hinckley mo lona talitonuina o ia, sa saunoa ai Peresitene Eyring, “O se avanoa … maoae le galulue faatasi ma ni tamalii ua ou alofa i ai, ma ou te lagolagoina o ni perofeta, tagatavaai, ma talifaaaliga, ma o ni Aposetolo moni a le Alii o Iesu Keriso.”

I le faailoaina o le aao lagolago o le Alii, na ia faaopoopo mai ai, “E saunoa pea lava pea Peresitene Hinckley, ‘O le a lelei mea uma.’ Ua ia te au foi lena faatuatua i lo’u feagai ai ma lenei tiutetauave taua tele.”

Na soifua mai Henry B. Eyring i le aso 31 o Me, 1933, i Princeton, New Jersey, ma o ia o le lona lua o atalii e toatolu o Henry ma Mildred Bennion Eyring. O lona tama, o se kemisi lauiloa i le lalolagi, sa uunaia ona atalii ina ia tulitulimatai galuega faasaienisi. Sa maea galuega o le tikeri muamua o Peresitene Eyring i le fisiki, peitai ina ua maea tausaga e lua na tautua ai i le Fuavaa i le Ea a le Iunaite Setete, sa lesitala loa o ia i le Aoga Faapisinisi mo le Tikeri Maualuga i le Iunivesite a Harvard, lea na maua ai ona tikeri maualuluga i le pulega o pisinisi.

A o i ai o ia i Harvard i le taumafanafana o le 1961, sa la feiloai ai ma Kathleen Johnson, o lē sa aoga i le taumafanafana i Boston. Sa tafafao faamasani i la’ua i lena taumafanafana, ma fetusia’i ina ua toe taliu [Kathleen] i lona aiga i Kalefonia, ma sa la faaipoipo ai i le Malumalu o Logan Iuta ia Iulai i le 1962. O le tausaga lava lena na avea ai Peresitene Eyring ma polofesa fesoasoani i le Aoga Faapisinisi mo Faailoga Maualuluga a le Iunivesite a Stanford, lea sa faiaoga ai o ia mai le 1962 i le 1971.

E faamatalaina e Peresitene Eyring lona faletua “o se tagata e manao i taimi uma ia te au ia avea ma tagata e matuai silisili e mafai ona ou oo i ai.” Na faaalia lena uiga i se vaeluapo i le 1971 ina ua ia fafaguina lana tane ma fesili, “Pe ua e mautinoa ea o e faia le mea sa’o i lou olaga?” Ona fesili lea [o lona faletua] pe le tatau ona la galulue ma Neal A. Maxwell, o lē sa avea ma Komesina o Aoga a le Ekalesia i lena taimi.

Sa fiafia lava Peresitene Eyring e faiaoga i Stanford, sa latalata ai foi i matua o lona faletua, ma sa avea ai ma epikopo o le Uarota Muamua a Stanford, peitai sa amata ona tatalo o ia e uiga i le fesili a lona faletua. E lei masani le aiga o Eyring ma le Komesina o Maxwell, ae e lei umi ni nai aso ae telefoni mai ma valaaulia Peresitene Eyring i le Aai o Sate Leki, lea na talosaga atu ai ia te ia e avea ma peresitene o le Kolisi o Ricks, lea ua faaigoa nei o le BYU-Idaho. Sa talia e Peresitene Eyring le ofo, ma e lei pine ae siitia atu ma lona aiga—lea ua aofia ai i le taimi nei ni atalii se to’a 4, o afafine e to’a 2, ma fanau a fanau e 25—i Rexburg, Idaho.

Na avea o ia ma sui Komesina o Aoga a le Ekalesia i le ono tausaga mulimuli ane, ma Komesina o le CES i le tolu tausaga ina ua maea lena, ma sa tautua ai seia oo ina ua valaauina o ia i le masina o Aperila i le 1985 e avea ma Fesoasoani Muamua i le Au Epikopo Pulefaamalumalu. I le masina o Setema i le 1992, sa toe tofia o ia e avea ma Komesina o le CES, ma sa galue o ia i lena tofiga ma avea foi ma se uso o le Korama Muamua a Fitugafulu i le taimi lava lena, ina ua tofia i ai i se masina mulimuli ane.

Na saunoa Peresitene Eyring, o lē ua lauiloa i ana saunoaga faamomoiloto ma le agaga mu’amu’a, o le 12 o tausaga o lana tautua i le Korama a Aposetolo e Toasefululua ua aoaoina ai o ia i se lesona taua e uiga i le fesoasoani atu i fanau a le Tama Faalelagi.

“Ona o lo’u aafiaga i le Toasefululua, ua tele atu ai lo’u talitonuga afai e mafai ona tatou faaogatusa i tatou lava ma mea e finagalo i ai le Tama Faalelagi ma le Faaola, e mafai ona tatou faia e matua sili atu nai lo mea ua tatou faia,” na ia saunoa ai. “O le a pa’i atu le Atua i olaga o tagata e ala ia i tatou i se ala e sili atu ona ta’uaogaina nai lo le mea tatou te faamoemoeina, ma o le a tele atu mea Na te faaaoga i ai o tatou olaga nai lo mea e mafai ona tatou mafaufauina.”

E ui lava i lo tatou fefefe ma le le gafatia, na ia faaopoopo mai ai, o le a taialaina lava i tatou e le Tama Faalelagi. “Afai tou te agai atu i luma ma le faatuatua ma pe afai e te lotomaulalo, o le a e faafofogaina Lona siufofoga,” o lana saunoaga lea.