Ou te Faamalosia Oe; Ou te Fesoasoani ia te Oe
O le fesoasoani sili o le a tatou maua i le faamalolosia o aiga o le iloa lea ma mulimuli i aoaoga faavae a Keriso.
O nai masina talu ai, na saunoa mai ai Sister Beck pe mafai ona ou lauga e uiga i aiga ma faamatala laitiiti e uiga i ou aafiaga i aiga. O au o se tamaitai nofofua ma e leai sa’u lava fanau. Ou te manatu na faapea Sister Beck ua ou agavaa e talanoa e uiga i aiga ona ou te lei faia se mea sese i soo se isi o sa’u lava fanau. E toatele tamaitai e le mafai ona latou tautino mai i lena mea.
O la’u galuega o se tasi lea e fesoasoani i tagata lautele ma e tele ni aiga na matou galulue faatasi i aluga o tausaga—o le tele lava o aiga e i ai faafitauli po o ni luitau tetele. Ua ou vaai i nisi o tulaga faamomoi loto na matuai mafatia ai tamaiti—i le faaletino ma le faalelagona. Ua ou vaai i tamaiti o e na tuulafoaiina ma faagaloina ona o le ogaoga o sauaga po o mea ua fai ma mausa a o latou matua. Ua ou vaai i tamaiti ua 18 tausaga o e na tausi e isi tagata ma ua nonofo nei na o i latou e aunoa ma se lagolago ma le fesoasoani a se aiga alolofa e fesoasoani ia i latou.
O le mea e faafetai ai, o le toatele o i tatou e le i ai ni sauaga po o le tuulafoai i o tatou aiga, ae o aiga uma lava o le a oo i soo se ituaiga o luitau—ma’i, maliu, le usiusitai, faafitauli tautupe, ma isi mea faapena.
O nei faafitauli e aliae mai ai ni fesili ogaoga. O le a le mea ua tupu i aiga? O le a le eseesega o se aiga mausali ma se aiga faaletonu? O a nisi o mea faatauvaa o le a fesoasoani i aiga? Ma o ai e mafai ona tuuina atu le toomaga i aiga?
O le asō, ou te fia tautala puupuu lava i nei fesili ma tuu atu ni nai iloiloga na ou faia i le aluga o tausaga ma le faamoemoe e fesoasoani atu ai.
O Le A Le Mea Ua Tupu I Aiga?
O loo galue malosi Satani e osofai le aiga. Ua ia tau mai ia i tatou e faapea, e le taua le faaipoipoga, ma e le manaomia e tamaiti se tama ma se tina, ma e le taua ni aiga malolosi. Ua ia tau mai ia i tatou o tulaga i amioga lelei o ni tulaga o aso la ua leva ma e faavalevalea. Pe a oo mai luitau, ua tau mai e Satani ia i tatou e lafoai o tatou talitonuga ae o faatasi ma ala a le lalolagi. Na te faatosinaina i tatou i le lauiloa ma oa, ma ta’u mai ia i tatou le mea e maua ai le olaga faigofie. Ua ia osofaia o tatou faatuatua i le Atua ma taumafai e faavaivai e oo lava i aiga malolosi ma sili ona alolofa. E fiafia Satani pe a tatou gauai atu [ia te ia]—e tusa lava pe o sina mea itiiti.
O Le A Le Eseesega i le va o se Aiga Mausali ma se Aiga Faaletonu?
O tagata o se aiga mausali latou te iloa pe o ai i latou, latou te iloa le mea o loo agai i ai ma le mea e mananao e ausia. O tagata o se aiga faaletonu latou te le iloa pe o ai i latou; e leai sa latou fuafuaga, leai se taula, ma leai ni mataupu po o ni tulaga faatauaina mautu e faatulaga ai o latou ala.
O nisi o matua o aiga faaletonu na aoaoina i tulaga faatauaina lelei ae ua oo atu i le ala sese ona o le ava malosi, fualaau faasaina, po o isi mea ua fai ma mausa ua aveesea ai a latou faautaga lelei ma lo latou tomai e fai filifiliga sa’o. I totonu o se aiga mausali, o matua alolofa e aoao atu e ala i faataitaiga ae le na o le ta’u atu ia latou fanau e fai se mea. Latou te faia faatasi ma faaali atu ia i latou le ala e fai ai.
O A Nisi O Mea Faigofie O Le A Fesoasoani Ai I Aiga?
Manatua, o fanau e taua tele. O i latou o fanau agaga a le Atua. Ua ou vaai i le vave ona iloa o le toe fiafia o le tagata mai faafitauli, i taimi ou te le mafaufauina pe mafai faapefea ona ola ma manuia ai se tamaitiiti.
Uso pele, ia alolofa ma faafailele a outou fanau. Tau atu ia i latou e te alofa ia i latou. Ia faauouo mai i latou. O uiga faaalia talafeagai faaletino o le alofa o le a ausia ai vavega. Ia fai atu upu alofa. Ia faaali atu ia i latou e ala i faataitaiga le galue. Aoao i latou e tatalo. Na saunoa Peresitene James E. Faust, “O le tatalo faatasi o se aiga o se aafiaga e fusia faatasi ai. O tamaiti laiti e mafai ona aoao e tatalo a o latou faalogo i tatalo a o latou matua ma tei matutua… . O tatalo a le tagata lava ia ma tatalo faaleaiga e taua tele i le fiafia o le tagata lava ia ma le aiga.”1
Faitau atu i lau fanau. Faitau mai tusitusiga paia. Fesoasoani ia latou iloa o tusitusiga paia o le a taitaiina ai i latou i o latou olaga atoa. Fai faatasi ma i latou ia afiafi faaleaiga. Faailoa atu ia i latou o taimi faatasi mo le aiga e taua tele ia te oe.
O tamaiti e masani lava ona malamalama gofie i o latou matua ma mea sese e fai e matua. E masani ona latou faamagalo, faagalo, ma vave atu ona agai i luma nai lo tagata matutua. Aua nei i ai ni ou lagona tausalaina. Faamalie ia i latou pe afai ua e faia se mea sese. Saili mo le faamagaloga a le tamaitiiti. Sui ou ala ma agai pea i luma.
Manatua e tele se onosai e manaomia i le tausiga o se tamaitiiti. E ui i le pele o i latou, ae o tamaiti e mafai ona faaoso ita, faavaivai tagata, ma o nisi taimi e tautalaiti. E manaomia ai se vaega tele o le onosai ma le pulea ina ia mafai ona aloese ai mai le faia po o le tautala foi i mea e toe salamo ai mulimuli. O nisi taimi e tatau i matua ona “o ese mai ma le fanau” ina ia mafai ona aloese mai le faia o ni mea sese ogaoga. O lou aluese mai le potu mo se minute ina ia mafai ona e toe maua le pulea e masani lava ona fesoasoani tele.
E leai se fautuaga e sili atu ona lelei e mafai ona maua nai lo le fautuaga ua tuuina mai i le “O Le Aiga: O Se Folafolaga i le Lalolagi.”2 Faitau i ai. Suesue i ai. Faaaoga e avea o se tulaga faatonuina o lou aiga. Ia avea ma autu o ni lesona o le afiafi faaleaiga, ina ia leai se tasi o le aiga e malamalama sese i le ala e faatautaia ai lou aiga.
O Ai E mafai Ona Tuuina Atu le Toomaga i Aiga?
O le mea moni, o le matafaioi muamua lava mo le aoaoina o fanau ma le faamalolosia o le aiga e fitoitonu lava i matua. Peitai, e toatele isi e mafai ona fesoasoani atu. O loo i ai ni o’u matua lelei, peitai la te lei faia na o i laua.
Sa ou i ai i le Tapeneko i le taimi muamua lava na fofogaina ai e Peresitene Gordon B. Hinckley le folafolaga i le aiga i le sauniga aoao a le Aualofa ia Setema o le 1995. O se sauniga maoae lena sauniga. Na ou lagonaina le taua o le savali. Na ou mafaufau ai e faapea, “O se taiala maoae lenei mo matua. O se matafaioi tele foi mo matua.” Sa ou mafaufau mo se taimi e faapea, e le i ai tele sona faatatauga ia te au ona ou te lei faaipoipo ma leai sa’u fanau. Ae e pei foi ona vave ona ou mafaufau, “Ae e faatatau foi ia te au, o au o se tagata o se aiga. O au o se afafine, o se uso, o se tamaitai matua, o se tausoga, o se tama a se uso/tuagane, ma se tama a ni matua o matua. E i ai au matafaioi—ma faamanuiaga—aua o au o se tagata o se aiga. E tusa lava pe na o au le tagata o loo ola o lo’u aiga, o au lava o se tagata o le aiga o le Atua, ma e i ai sa’u matafaioi e fesoasoani e faamalosi isi aiga.”
Na saunoa Elder Robert D. Hales, “O le faamalolosia o aiga o la tatou tiute paia lea o ni matua, fanau, aiga lautele, taitai, faiaoga, ma tagata taitoatasi o le Ekalesia.”3
I le avea ai o ni uso o le Aualofa, e mafai ona tatou fesoasoani atu le tasi i le isi e faamalolosia aiga. Ua tuuina mai ia i tatou avanoa e tautua ai i le tele o tulaga. Tatou te feiloai pea ma tamaiti ma le autalavou atonu o loo manaomia le mea tonu e mafai ona tatou ofoina atu. O outou na uso matutua o loo i ai ni fautuaga e sili atu ona lelei ma le poto masani e faasoa atu i tina laiti. O nisi taimi e ta’u mai pe fai e se taitai o Tamaitai Talavou po o se faiaoga o le Peraimeri ia le mea tonu o loo manaomia e faamalosia ai se mea o loo taumafai se matua e aoao atu. Ma e mautinoa lava, tatou te le manaomia se isi valaauga faapitoa e aapa atu ai i se uo po o se tuaoi.
O le fesoasoani sili o le a tatou maua i le faamalolosia o aiga o le iloa lea ma mulimuli i aoaoga faavae a Keriso, ma faalagolago ia te Ia e fesoasoani mai ia i tatou. E masani lava, a o ou galue faatasi ma aiga e i ai faafitauli, e oo ina ou moomoo maimau pe ana iloa e nei aiga le Faaola ma aoaoina a latou fanau i aoaoga faavae a Iesu Keriso.
“Faauta, e onosai o ia i tofotofoga, ma le tigaina o le tino, o le matelaina, ma le fia inu, ma le lailoa, e sili i mea e mafai ona onosai ai tagata, vagana ona ua oo i le oti.”4
Na puapuagatia Keriso i mea uma e mafai ona tatou mafaufau i ai. Na te silafia o tatou lagona. E malamalama o Ia. O le a Ia fesoasoani mai.
Ua tumu tusitusiga paia i faataitaiga o tulaga na fesoasoani ma o le a fesoasoani mai ai Keriso. O nisi e sili ona ou fiafia i ai o:
“Ia outou o mai ia te au, o outou uma o e tigaina ma mafatia i avega, o au foi e malolo ai outou.”5
“O e faalagolago i le Atua e lagolagoina i latou i o latou tofotofoga, ma o latou tiga, ma o latou puapuaga, e faaeaina foi i latou i le aso gataaga.”6
“Ia e loto maulalo; ona taitaiina ai lea o oe e le Alii lou Atua, ma tali atu i au talosaga.”7
“O aso uma lava na e ole mai ai na e maua faatonuga mai lo’u Agaga.”8
“Ia faamaoni ma filiga i le tausiga o poloaiga a le Atua, ma o le a ou fusia oe i lo’u alofa.”9
Na saunoa Peresitene Hinckley, “E taua tele lo tatou le tuulafoaiina o o tatou aiga. E leai se isi mea o ia te outou e sili atu ona taua… . A oo mai le iuga, o le sootaga faaleaiga lenei tatou te o ma i tatou i le olaga a sau.”10
Manatua le alofa tele o lo tatou Faaola. Na fetalai o ia i le Isaia 41:10, “Aua e te fefe; aua ou te ia te oe: aua le fetepatepaai, aua o au o lou Atua: ou te faamalosia oe; e moni, ou te fesoasoani ia te oe.” Ona toe fetalai lea o Ia i le fuaiupu e 13, “Ou te fesoasoani ia te oe” Ma faapea foi i le fuaiupu e 14 na Ia fetalai ai, “Ou te fesoasoani ia te oe.”
Talitonu i le Faaola. O le a Ia fesoasoani mai ia i tatou. E alofa o Ia ia i tatou. E finagalo ina ia tatou fiafia.
Ou te molimau atu o loo soifua lo tatou Alii ma le Faaola. Ou te molimau atu o le a Ia fesoasoani ia i tatou. Ua fesoasoani mai o Ia ia te au i le tele o taimi ma o le a Ia fesoasoani atu ia te oe. Ua ou iloa lena mea. I le suafa o Iesu Keriso, amene.