O Le Taimi Lenei
O le a le mea o tatou faia i le asō ina ia tusia ai i o tatou loto ia mataupu faavae o le talalelei ia o le a lagolagoina ai i tatou i taimi o faigata?
Ina ua faailoa mai e Peresitene James E. Faust ia i maua ma lo’u toalua o le a ma siitia i Lima, Peru, sa matua o ma le iloa lava o le aso 15 o Aokuso, 2007, na o ni nai aso talu ona ma taunuu, o le a ma molimauina ai se mafuie faataumaoi. E silia ma le 52,000 fale sa faatamaia e lona malosi matautia. Ae e sili atu ona leaga, e silia ma le 500 na maliliu ai. O le toaiva o i latou o ni tagata o le Ekalesia. Sa pagatia tagata o siteki a Ica ma Pisco ma itu a Cañete ma Chincha i aafiaga mulimuli ane o le mafuie.
Sa vave ona tuuina atu e le Ekalesia ia fesoasoani i ona tagata ma i latou o isi faatuatuaga. O le taeao ina ua mavae le mafuie, sa maua e o tatou tagata i vaega sa aafia i le faalavelave, ia meaai ma lavalava, ma a o lei oo i le aoauli, a ua ofo atu e le Ekalesia fesoasoani i le puipuiga faalemalo a le atunuu. E toatele tagata o le Ekalesia na leai ni fale, sa nonofo i o tatou falelotu. E ui lava e lei faamoemoeina le i ai o se mala, ae sa matua lelei ona faagaoioia le faalapotopotoga a le au perisitua i le aveina atu o le fesoasoani ia i latou sa mafatia.
Sa malaga atu peresitene o siteki ma itu faatasi ai ma epikopo e fesoasoani i o latou tagata ina ua mavae ni nai minute o le mafuie. O le tulaga matautia sa malaga atu ai nei taitai perisitua, ua alagatatau lava ona faalauiloa: o le po na o atu ai; sa pepe moli; sa matua tele le faatafunaga; sa lei uma foi le gatete o le laueleele. Sa tuua e nei taitai ofoofogia o le perisitua o latou aiga o loo malupuipuia, ae savavali atu i le pogisa, ma o atu ai i tagata sa fetagisi, ua siomia e fale ua faatamaia. Na o atu o tatou taitai i le po ma aso na sosoo ai, ma feagai ma ni gatete faafuasei malolosi ma le faalausosoo faapea ma se lapataiga o se galulolo. Sa latou sailia faaputuga o mea ua faaleagaina, i le gaogaosa, ma lamatia ai lo latou lava soifua ina ia oo atu i tagata uma o le Ekalesia. Sa ta’ua e se epikopo, “E aunoa ma se mafaufau i le tulaga matautia, sa ou tamoe e saili o’u uso ma tuafafine ma taitai o le Ekalesia.” Sa ia mauaina i latou. O le mea lena sa ia faaalu ai le tele o le po.
O le a le mea na faaosofia ai nei taitai e o atu e fesoasoani i isi, tusa lava pe na lamatia ai o latou lava soifua? O le mea moni, o lo latou faatuatua tele i le Faaola ma Lana Ekalesia. O lo latou malamalama i o latou valaauga o ni taitai i le perisitua. O mataupu faavae o le talalelei ua mausali i o latou olaga a o lei oo mai le mafuie, ae le o le taimi o le puapuaga—e le i tusia foi i le vaitusi a o le Agaga i papatusi aano o le loto (tagai 2 Korinito 3:3.)
O le mafai ona i ai o se mafuie sa i ai pea lava iina. O le taimi e oo mai ai ma le auala e oo mai ai, e leai se tasi na iloa. Ina ua oo mai, o se matuai faatafunaga lava. Peitai i lalo o le taitaiga a le perisitua, sa taulimaina ai le luitau o lena lava taimi. O le tele lava, ina ua le mafai e le au paia, sa faia e le Alii mea sa latou le mafaia. Sa faamatala e nisi tagata lo latou vaaia o ni alii e ofu papae sa fesoasoani e laveai o latou ola. O isi sa faalogoina ni leo taiala. O le tele o tausaga e auauna ai i le Ekalesia, o se a’oga sauniuni lena ina ia avea ma tagata e faatulagaina lelei ma fesoasoani ai le tasi i le isi.
O le mea foi lena e tupu i o tatou olaga. Tatou te le iloa po o le a le taimi ae pe faapefea foi ona taia i tatou i mafuie. Atonu e le o se luluina moni o le fogaeleele, e pei ona sa tupu i Peru, ae o le luluina e faaosoosoga, agasala, po o tofotofoga, e pei o le leai o se galuega po o se ma’i tuga. O le taimi nei o le taimi lea e sauniuni ai mo le taimi e luluina ai faapena—ae le [faatoa fai] i le taimi o le puapuaga. O le a le mea o tatou faia i le asō ina ia tusia ai i o tatou loto ia mataupu faavae o le talalelei ia o le a lagolagoina ai i tatou i taimi o faigata?
Mo se faataitaiga, o le a le mea na toto i le loto o Iosefa lea na faatauina atu i Aikupito ina ia tali atu ai “Pe faapefea ona ou faia lenei mea leaga tele, ma ou agasala ai i luma o le Atua?” (Kenese 39:9) ina ua ia teena le faatauanau mai o le toalua o Potifara e soli le tulafono o le legavia? O le a le mea na muamua toto e Nifae i lona loto ina ia oo ai i le taimi e feagai ai ma se poloaiga a le Atua ae o loo ia mafai ona tali atu, “Ou te alu ma fai… . aua ua ou iloa”? (1 Nifae 3:7).
O le mea na fai e nei taitai maoae, o le faatagaina lea o le Agaga e tusia mataupu faavae o le talalelei i o la’ua loto. O lea tusiga e le faia i sina taimi puupuu. O le matuai faalofiaina o o tatou loto i mataupu faavae o le amiotonu, o le a faia ai se eseesega i a tatou sauniuniga mo taimi e luluina ai faaleagaga. O lea faalofiaina e mafai ona faalautele e ala i le manatunatu loloto ma le motusiaina o faatosinaga leaga.
O le a mauaa mataupu faavae o le faavavau i o tatou loto pe a faaavanoa o tatou taimi e le gata e faitau ai aoaoga a perofeta ma tusitusiga paia, ae manatunatu loloto foi i ai i le agaga o le tatalo. Mo se faataitaiga, na faaalu e Nifae se taimi e nofo ai ma manatunatu loloto. O le faia o lena mea, na folasia mai ai ia te ia penina faaleaoaoga faavae (tagai 1 Nifae 11:1). Faaavanoa se taimi e fai ai mea ua poloaiina i tatou e le Alii e fai: “Ia teu nei mea i o outou loto, ma ia faatumauina i o outou mafaufau uiga paia loloto o le faavavau” (MFF 43:34). I se lalolagi e faatupulaia le tagisa mai i le tele o o tatou taimi, e taua lava lo tatou faaavanoaina o se taimi e manatunatu loloto ai i o tatou aiga, ina ia mafai ai ona tatou malamalama i aoaoga faavae paia ma ona mataupu faavae. E pei ona fetalai le Faaola, “Ia outou o atu ai i o outou aiga, ma mafaufau i nei mea ina ia malamalama ia te outou, ma sauniuni o outou manatu mo le aso a taeao” (3 Nifae 17:3).
O le faia o lea, o le a atili faalauteleina ai lo tatou iloa o aoaoga faavae ma ona mataupu faavae pe a tatou gauai atu foi i apoapoaiga a le Alii e uiga i faatosinaga leaga. Atonu lava e i ai tagata o loo uunaia i tatou e galulue pe mafaufau foi i se tulaga e oo mai ai faigata i le lumanai ma maua mai i tatou e le o saunia lelei. E faatatau i lenei mea, sa aumai ai e le Faaola se ki o le a fesoasoani tatou te saunia lelei ai mo suiga e le o mailoa. Na Ia fetalai, “O le mea lea, afai e tausuai lou lima ia te oe, ina vavae ese ia; pe afai foi e tausuai lou uso ia te oe ae le ta’uta’u atu ma lē lafoaia foi, e faate’aeseina o ia.” (Faaliliuga a Iosefa Samita, Mareko 9:40.)
O le mea e lelei ai, o le Faaola lava ia na aoao mai le uiga o le vavae ese o le lima. E le o le tipiese e faamanu’a ai, ae o le aveesea mai o tatou olaga i le taimi nei, o faatosinaga na e taofiofia ai i tatou mai le saunia mo mafuie o a taeao. Afai o i ai ni a’u uo ua avea ma faatosinaga leaga ia te au, ua manino lava le fautuaga: “E sili atu ia te oe ona e ulufale atu e aunoa ma lou uso, nai lo le lafoina o oe ma lou uso i seoli” (Faaliliuga a Iosefa Samita, Mareko 9:41). Sa faatatau foi e le Alii lea lava mataupu faavae ina ua lapataia Nifae e alu ese mai ona uso o ē ua avea ma faatosinaga matautia (tagai 2 Nifae 5:5).
O lena foi vavae ese ua le na o uo o loo faasino i ai ae o faatosinaga leaga uma lava, e pei o ata le talafeagai i televise, o saite i le Initoneti, ata tifaga, tusitusiga, taaloga po o musika. O le tusia i o tatou loto o lenei mataupu faavae, o le a fesoasoani ai tatou te teenaina le faaosoosoga e gauai atu i soo se uunaiga leaga.
O le faalauteleina o lo tatou iloa o aoaoga faavae ma ona mataupu faavae, o le a loloto ai ona mauaa i tatou le au perisitua i mea taua o le talalelei. O le a sili atu ona tatou saunia e feagai ma faalavelave o le a oo mai e aunoa ma se lapataiga, pe a le o mafaufauina. I le avea ai ma e umia le perisitua, o le a tatou lagonaina le folafolaga lea na fai i le perofeta o Ieremia ua tuu mai foi ia te i tatou: “Faauta foi, o a’u nei, ua ou faia oe i le aso nei ma aai nofo ‘olo ma pou uamea, ma pa ‘apa memea e teteeina ai le nuu uma” (Ieremia 1:18).
Ona mafai ai lea ona tatou faailoa atu lo tatou agaga faafetai e faapei ona faia e Sister Linda Cruzado i Ica. Ina ua mavae le po atoa o faafesagai ma elemene, sa ia tusia, “I le tafa mai o ata o le taeao na sosoo ai, sa faaalia e lo tatou Tama Faalelagi Lona alofa e ala mai i le la matagofie na vave ona oso a’e, a o le po sa Ia faamafanafanaina i matou i se po sa matua susulu ai fetu.”
O lo tatou taimi lenei e lotototoa ai ma fai se tonu ina ia matua faalofia a’ia’i o tatou loto i aoaoga a lo tatou Faaola. Ua ou iloa o loo soifua o Ia, ma a uma ona tatou faia o mea uma tatou te mafai, ona Ia faia lea o mea tatou te le mafaia. Ou te molimau atu ai i le suafa o Iesu Keriso, amene.