E Fesoasoani le Atua i le Umia Faamaoni le Perisitua

Peresitene Henry B. Eyring

Fesoasoani Lua i le Au Peresitene Sili

Atonu e oo mai le savali i ni upu i lou mafaufau po o se lagona po o mea uma ia e lua. Peitai, o le a … avatu ai ia te oe se faamautinoaga ma le taitaiga i le mea e tatau ona e faia.

I le po nei, o o’u mafaufauga ua faatatau i se tamaitiiti i se mea o le lalolagi. O loo taumafaufau pe mafai ona ia faia mea e manaomia mai i se e umia le perisitua. Sa ia te au lena popolega ina ua tusa ma le 13 po o le 14 o’u tausaga.

Sa ou ola ae i se misiona, lea sa na o se paranesi laitiiti, lea sa tauaofia i lo matou fale mo sauniga. Ona siitia lea o lo matou aiga i le mea sa i ai ni siteki ma uarota tetele ma falelotu ma korama a tama sa foliga mai sa matua tele atu ni mea sa latou iloa i mea e faia e i latou e umia le perisitua, nai lo au. Sa i ai i lena uarota o se mamanu faigata tele mo le tufaina o le faamanatuga. Sa toetoe lava ina ou mautinoa o le a i ai so’u sasi ina ua oo mai le taimi ou te tufa ai pe saunia le faamanatuga.

I lo’u fefe ma lo’u popole, ou te manatua lo’u alu i fafo o le falelotu ina ia ou nofonofo ai na o au. Sa ou popole. Sa ou tatalo mo se fesoasoani ma mo sina faamautinoaga o le a ou le toilalo lava i le auauna atu i le Atua i Lana perisitua.

Ua tele nei ni tausaga talu ai. Ua silia ma le 50 tausaga talu ona ou umia le Perisitua Mekisateko. Ae i nai aso talu ai nei, sa ou tatalo ai ma lena lava augani mo se fesoasoani ma se faamautinoaga o le a ou le toilalo i le valaauga ua oo mai ia te au ina ia ou auauna atu i le Au Peresitene Sili. O loo i ai isi e sili atu lo latou gafatia e auauna atu ai, ma ua matua saunia lelei. Peitai, a o ou tatalo, o le taimi lenei, ua ou manatu sa mafai ona ou lagonaina se tali lea atonu sa na aumaia ia te au i fafo o le falelotu o le Uarota a Yalecrest. O le tali lava lea e tasi e te faamoemoe e maua, pe a e feagai ma se valaauga e auauna atu i le perisitua lea e foliga e le oo i ai lou malosi.

Atonu e oo mai le savali i ni upu i lou mafaufau po o se lagona po o mea uma ia e lua. Peitai, o le a aofia ai ni mea se tolu e avatu ai ia te oe se faamautinoaga ma le taitaiga i le mea e tatau ona e faia i lenei valaauga e mautinoa lava le lofituina.

Muamua, o le faamautinoaga o le a aumaia i le manatuaina o taimi sa fesoasoani ai le Tama Faalelagi ia te oe, i taimi matautia ma le faigata. Na tupu lena mea ia te au i nai aso ua tea atu.

A o ou laitiiti ma ou nofo pea i New Jersey, sa faapotopoto ai se motu o tagata sa feitai i luma o lo matou fale. Sa alu atu lo’u tina e faafeiloai ia i latou, ma sa tutu ai na o ia i lenei motu o tagata o e na foliga mai ia te au o ni tagata leaga. Ou te lei lagona atu ana tala sa fai, ae ina ua mavae ni nai minute sa latou o ese filemu. Ou te manatua lava pea na ou vaai i se vavega.

Mai le taimi ina ua ou matua teisi a’e, e lata mai lo’u manatua o se motu o tagata feitai lea sa tofia au e le Au Peresitene Sili ou te vaai i ai, o e sa faafuasei ma aunoa ma se faamalamalamaga, na pa’i atu i ai se agaga o le filemu ma le toe faalelei. Sa auina atu au e talanoa i taitai o lotu i le Iunaite Setete ma faifeau a na lotu o e sa fono i Minneapolis ina ia talanoaina ai le faafitauli o tauvaga i ekalesia.

Ina ua ou taunuu, na ou iloaina ai sa tofia au ou te lauga. O la’u autu o le: Aisea na i ai ai se tulaga manaomia mo se toefuataiga o le Ekalesia moni e ala ia Iosefa Samita. O au o se sui momoe faafuasei mo Elder Neal A. Maxwell.

Ina ua ou taunuu i le aai i le po a o lumanai le fonotaga ma tilotilo i le polokalama, sa ou telefoni ia Peresitene Hinckley. Sa ou faamatala atu ia te ia e tolu aso o le fonotaga, ma e tele tautalaga e tatau ona fofogaina i le taimi e tasi, e mafai foi e le potopotoga ona filifili po o le fea vaega e auai. Sa ou fai atu ia te ia, sa ou manatu, afai ou te tauina le sa’o, ou te popole o le a leai se tasi e fia sau i la’u vaega lona lua, ma atonu o le a ou vave foi atu ai i le fale. Sa ou fesili atu ia te ia po o le a sona finagalo i le mea e tatau ona ou fai. Fai mai a ia, “Faaaoga i ai lau faautautaga sili.”

Sa ou tatalo i le po atoa. I le latalata i le tafa o ata, sa ou mautinoa ai e tatau ona ou faamatala atu e uiga i le Toefuataiga e le o le, “O le mea lenei ua matou talitonu na tupu ia Iosefa Samita ma le mafuaaga matou te talitonu na ala ai ona tupu,” ae “O le mea lenei na tupu ia Iosefa Samita, ma o le mafuaaga lenei na faia ai e le Alii.” I le taimi o le po, e lei tuuina mai ia te au se faamautinoaga o le taunuuga, sa na o se taitaiga manino lava—ia agai i luma.

Sa ou maofa, i le uma ai o la’u tautalaga sa lolofi mai faifeau e fia talanoa mai ia te au. O le tala lava e tasi sa faamatala mai e i latou uma taitoatasi, e sosoo mai lava le isi i le isi. Na i ai se taimi i o latou olaga sa latou feiloai taitoatasi ai i se tagata o le Ekalesia sa latou faamemelo i ai. O le toatele o i latou na fai mai sa latou nonofo i se nuu lea na fesoasoani atu ai le peresitene o se siteki e le gata i tagata o lana aulotu ae faapea foi i le alaalafaga i le taimi o se faalavelave. Sa latou talosaga mai pe mafai ona ou momoli maia la latou faamalo ma la latou faafetai i tagata e le gata ou te lei iloaina ae na leai foi se faamoemoe ou te feiloai i ai.

Ina ua maea aso e tolu o fonotaga, ua atili ona toatele ai tagata e faalogologo i le savali o le Toefuataiga o le talalelei ma le Ekalesia moni a Iesu Keriso e le faapea ona ua latou talitonu i le savali, ae ona ua latou vaaia le agalelei i olaga o tagata—o fua o lena toefuataiga.

A o ou tatalo i nai nei po na sei mavae atu nei, sa ou toe manatuaina na mea ma nisi foi faatasi ai ma se faamautinoaga o se mea faapea: “Pe ou te le’i leoleoina ea oe i taimi uma? Mafaufau i taimi sa ou taitai ai oe i tafatafa o vai e tafe lemu. Manatua taimi sa ou laulau atu ai mea e ai i luma o e ita mai. Manatua ma aua lava e te fefe i se mea leaga e tasi” (tagai Salamo 23).

O lea la, ia te outou na tiakono fou: ia manatua. Sa Ia tausia lava outou mai lo outou laiti. Ia te outou na peresitene fou o korama: ia manatua. Ia te outou na tama ma fanau o e ua fai ma luitau ia te outou: ia manatua, ma ia aua lava nei e fefe i se mea e tasi. O mea e te le mafaia, e mafai i le fesoasoani mai o le Atua i Lana galuega. Ma e tusa lava pe na e laitiiti lava, ma i tausaga talu mai lena taimi, na afio ai o Ia faatasi ma Lona mana ma Lona Agaga i ou luma ma lou itu tauagavale ma lou itu taumatau, ina o e i ai i Lana galuega (tagai MFF 84:88). E mafai ona e mauaina le faamautinoaga o le a leoleo oe e le Atua pe afai e te tatalo mo lena mea i le faatuatua. Ua ou iloa lena mea.

O le vaega lona lua o le savali o le a e mauaina a o e tatalo mo se fesoasoani i le feagai ai ma se tofiga faigata, na oo mai ia te au i le taeao po o le Aso Faraile. Sa ou tatalo, e pei foi ona e faia, i ni le atoatoa lofituina. Sa matuai manino le tali ma sa tuusa’o ma o le mea moni o se aoaiga ao ou tatalo. “Faagalo ia te oe lava—amata ona e tatalo e uiga i tagata o le a e auauna i ai.” E mafai ona ou molimau atu, e matua mataalia lena mea i le aumaia ai o le Agaga Paia.

Peitai, ia saunia o le a galoma le taimi a o e tatalo. O le a e lagonaina le alofa i tagata o le a e auauna atu i ai. O le a e lagonaina o latou manaoga, o o latou faamoemoega, o o latou mafatiaga, ma o latou aiga. Ma a o e tatalo, o le a tupu tele le li’o o au uunaiga nai lo le mea e te manatu i ai, atonu i tagata e le o lau korama po o lou aiga, ae o i latou ua latou alolofa i ai i le salafa o le lalolagi. A e faagaloina oe lava ina ia e tatalo mo le toatele o isi, o le a mafai e lau auaunaga ona pai atu i lou loto. O le a le gata ina suia ai lau auaunaga ae faapea foi i lou loto. E mafua lena mea ona o le Tama ma Lona Alo Pele, o e ua tofia oe e te auauna i ai, ua silafia le anoanoai o tagata o le a oo atu i ai lau auaunaga, e ui ina utiuti i nisi ma foliga mai ai foi ia te oe.

O le savali lona tolu ma o le toe savali foi lea e mafai ona e mataituina pe a e tatalo mo se fesoasoani i se tofiga faigata o le perisitua o le mea lenei—na ou maua foi lenei savali—o le alu lea e galue. Ua tuuina atu ia te oe le mana o le perisitua e faamanuia ai isi. Ma o lona uiga, e tatau ona e alu ma faia se mea i taimi uma, e masani lava o le faia o se mea faigata. O lea e mafai ai ona e faamoemoe, e le gata o le faamautinoaga o le fesoasoani a le Atua ma le poloaiga e faagalo oe lava, a o le uunaiga manino a le Agaga Paia e alu ma faia se mea o le a faamanuiaina ai le olaga o se tasi. E mafai ona manino lena mea a o e alu ma le loto tatalo e asiasi i se tagata po o se aiga po o se tagata o le korama ua tofi i ai oe e auauna atu i ai. Mo se tama, atonu o le faasa’o o se tasi o lana fanau.

Pe o le mea o e faia e sa’o po o le aoao atu o le talalelei a Iesu Keriso, o le a sili atu lou faiga pe afai e te manatua le manuia o le a i ai. E tatau ona e fesoasoani i le Tama Faalelagi ma Lona Alo, o Iesu Keriso, ia maua le ola e faavavau e i latou e te auauna i ai. Ina ia faia lena mea, e tatau i le Agaga ona ia aveina atu se molimau i o latou loto. Ma o lena molimau e tatau ona taitaiina ai i latou e filifili e tausia poloaiga a le Atua, tusa lava po o a faigata ma tofotofoga e oo mai.

O le manatua o na mea, o le a taialaina oe e le Agaga i le aoaoina atu ma le faasa’oina faatasi i le mana o le perisitua. O le a e tausisia oe lava i le mama ina ia e aoao atu i le Agaga. O le a e tatalo mo le Agaga e ta’u atu ia te oe le taimi e faasa’o ai ma pe faapefea foi ona faasa’o, ma pe faapefea ona faaali atu se faasiliga o le alofa (tagai MFF 121:43–44). Po o le a lava le mea e te faia i lau auaunaga faale-perisitua, e mafai ona taialaina ma fuaina i le tele o le lelei po o le fesoasoani i le tagata e faavaeina ai se molimau o le upumoni i lona lava olaga ma lona lava loto, ia lava mo le Togiola e galue ai ma saga galue ai pea lava.

E mafai ona e maua le faamautinoaga i lau auaunaga. E mafai ona e faagalo oe lava ae amata ona tatalo ma alofa mo i latou o le a e auauna atu i ai. Ma e mafai ona e filifili le mea e fai ma fuaina le manuia, e ala i le maualuga e suia ai loto o tagata e te auauna i ai.

Peitai o le a le faigofie lava mo oe po o i latou foi e te auauna i ai. O le a i ai pea lava le tiga i le galuega, ma le salamo e tatau ai ina ia aumaia ai le mana o le Togiola e suia ai loto. Ua i ai lena mea i le natura o le mea ua tofia oe e fai. Mafaufau i le Faaola, o Le ona ia le galuega o loo e i ai. Pe i ai ea se taimi i Lona soifua faaletino o mafai ai ona e vaaia se taimi na faigofie ai mo Ia? Pe na Ia talosagaina ea ni mea faigofie mai Ona soo? Aisea la o le a faigofie ai i Lana galuega po o Ona soo foi?

O loo ta’u mai le mafuaaga o lena mea i se fasi fuaitau, “o se loto momomo,” lea ua matuai lelei le aoaoina ai o outou i le aso. E i ai nisi taimi o loo talanoa ai tusitusiga paia i loto o tagata ua faamaluluina, ae e tele lava taimi o upu e faamatalaina ai le tulaga o loo tatou sailia mo i tatou lava ma i latou tatou te auauna i ai, o ni “loto momomo.” E ono mafai ona fesoasoani lenei tulaga tatou te talia ai faapea, o lo tatou valaauga e auauna atu ma le salamo tatou te manaomia ma sailia o le a le faigofie. Ma e fesoasoani ai ia i tatou e malamalama atili ai i le mafuaaga e manaomia ai ona oo atu a tatou molimau i loto o o tatou tagata. O le faatuatua o Iesu Keriso na togiolaina mo a latou agasala e tatau lava ona oo ifo i totonu o le loto—o se loto momomo.

Ia, i le po nei, ina tatou faia ia faatasi o se tonu po o le a la tatou mea a fai. O i tatou uma lava, po o le a lava o tatou valaauga, e feagai ma matafaioi e le oo i ai lo tatou malosi. O au faapena ma outou. E moni lena mea mai se vaaiga moni e faapea, o le manuia o le faavaeina lea o se molimau i loto o tagata. E le mafai ona tatou faatupuina lena mea. E oo lava i le Atua na te le faamalosia lena mea i se tagata.

O lea, o le manuia e manaomia ai tagata tatou te auauna i ai, ia latou talia le molimau a le Agaga i o latou loto. Ua saunia le Agaga. Peitai e toatele tagata e lei saunia e valaaulia le Agaga. O la tatou matafaioi, lea tatou te mafaia, o le valaaulia lea o le Agaga i o tatou olaga ina ia mafai ai e tagata tatou te auauna i ai, ona mananao ia latou maua fua o le Agaga i o latou olaga—o fua ia o loo mafai ona vaaia i o tatou olaga.

O lenei mea ua taitaiina atu ai i nisi o fautuaga i mea e mafai ona tatou filifili e fai, pe le faia foi. O nisi o mea e mafai ona tatou fai e valaaulia ai le Agaga. O nisi foi e uunaia ai le Agaga ina ia alu ese. Ua outou silafia lena mea mai mea na outou oo i ai.

E leai se tasi e umia le perisitua o loo manao ia manuia, o le a faatamala i mea e ono ave i ai ona mata. O le filifili e matamata i ata e amoti ai le tuinanau o le a aluese ai le Agaga. Ua lapataia lelei outou e Elder Clayton i le lelei e mafai ona lapataia ai outou e uiga i le matautia o le Initoneti ma ala faasalalau i le aumai o ata faaponokalafi i o tatou luma. Peitai, ua matua avea ma tulaga masani le le tauagafau ma ua manaomia ai lava i le olaga i aso faisoo le a’oa’ia—o se filifiliga faautauta, ina ia soia le matamata i mea e ono faatupuina ai ia i tatou ni lagona e tuliesea ai le Agaga.

O le faautautaga lava lena e manaomia i mea tatou te tautatala ai. E le mafai ona tatou faamoemoe e tautala atu mo le Alii sei vagana ua tatou faaeteete i a tatou upu ma tala. O le gagana masoa ma le palauvale e faatiga ai i le Agaga. E pei lava ina foliga mai ua taatele le le tauagafau, ua faapena foi le gagana masoa ma le palauvale. Sa masani na o ni nofoaga faapitoa ma ni vaega patino o tagata tatou te faalogo ai i le ta’ufua o le suafa o le Alii, pe faalogo i upu masoa, ma tausuaga paaa. A o lea ua foliga mai ua maua i soo se mea, ma ua tele ina talia e tagata lautele, ae sa lei i ai muamua.

E mafai ona e filifili—ma e tatau lava ona e filifili—e suia au tala e ui lava ina le mafai ona e pulea upu ma tala a isi tagata. Peitai ou te iloa mai o’u aafiaga, e oo lava i se tulaga e sili ona leaga, e mafai ona e faalagolago i le fesoasoani mai o le Atua. I le tele o tausaga ua mavae, sa avea au o se alii ofisa o le fuavaa o le ea mo le lua tausaga i se ofisa sa i ai se kolone o le malini, ma se taitai au neivi lauulu sina. Sa la aoao e tautatala i taua faapea foi i le toafilemu i se ala sa ou tiga ai, ma ou te iloa sa tuliese ai le Agaga Paia. Sa avea au i le taimi lena o se faifeautalai i le itu, sa [ou] taumafai i afiafi ou te alu e saili tagata ma aoao i latou i lalo o le uunaiga a le Agaga Paia. Sa faigata tele. Sa na o au o se liutena. E sinia tele i la’ua ia te au. Sa ou le iloa se auala e suia ai la laua gagana. Ae sa ou tatalo mo se fesoasoani. Ou te le iloa pe na faapefea ona faia e le Atua, peitai na oo ina suia la la’ua gagana. Sa faifai malie ona mou atu le palauvale ma sosoo atu ai ma le gagana masoa. Sa na o le taimi lava e inu ai a la’ua pia e toe foi mai ai, ae o afiafi na, ma sa mafai ai ona ou faanoia mai a’u lava mai le galuega faafaifeautalai.

E mafai ona ia te oe ni manatua faapena e lagolago ai lou faatuatua pe a tuu oe e le olaga i nofoaga faigata. E fesoasoani le Atua ia i latou e umia le perisitua ma le faamaoni, o e filifili e le vaai pe tautala foi i ni mea leaga, e oo lava i se lalolagi ua tumu i mea leaga. O le a le faigofie. E le faigofie lava. Ae e mafai ona e faataunuuina le folafolaga mo oe e pei ona ou iloa e mafai mo au: “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma totō ifo i lou agaga le mataupu faavae o le perisitua e pei o le sau mai le lagi” (MFF 121:45).

Ou te molimau atu ou te iloa ua umia e oe ma au le perisitua a le Atua, ma o le a tali mai o Ia i a tatou tatalo ma se faamautinoaga matagofie ma faatasi ma le fesoasoani tatou te auauna lelei atu ai ia te Ia. Ou te tautino ma molimau atu ai i le suafa o Iesu Keriso, amene.