Aua le Faatalia mo Taeao le Mea e Mafai Ona E Faia i le Asō

Elder Claudio R. M. Costa

O Le Au Peresitene o le Au Fitugafulu

O le taimi lenei e faataunuu ai o tatou tiute mai le Atua e faatatau i le aiga.

I le aso 23 o Setema, 1995, sa folasia mai ai e le Au Peresitene Sili ma le Korama a Aposetolo e Toasefululua i le Ekalesia ma le lalolagi se faamatalaga tusitusia ua ta’ua “O Le Aiga: O Se Folafolaga i le Lalolagi.” Ou te sii maia le parakalafa lea e faitauina faapea, “O le tane ma le ava ua i ai le tiutetauave paia e alofa ma tausi e le tasi le isi ma a la fanau.”¹ O loo tatou ola i se taimi ma se vaitau ua matua taua ai lava lenei fautuaga. E toatele matua ua fai mai, e leai so latou taimi mo o latou aiga. O le saoasaoa o le ituaiga olaga ua soifua ai i nei ona po ma le anoanoai o galuega ua faaitiitia ai le gauai atu o matua i le mea e aupito sili ona taua: o le faaavanoa o le taimi, faaavanoa le taimi o le tagata mo lona aiga.

Na aoaoina i tatou e le Alii ua i ai i alii uma le tiutetauave o le saunia o mea e manaomia mo lona aiga² ae le faapea la e na o le pau lona uiga o le saunia o meaai ma isi mea e manaomia mo le aiga. E tatau foi ona i ai so tatou taimi e saunia ai ni aoaoga mo o tatou aiga. O a mea e tatau ona tatou aoao atu?

Na aoao mai i tatou e lo tatou Tama ua i ai i matua le matafaioi e aoao atu ai le talalelei i a latou fanau.³ Na malamalama lelei lava le perofeta o Liae i lona tiutetauave e aoao lana fanau. Na tautino mai e Nifae na aoaoina o ia “i le poto uma o [lona] tama.”⁴

Na aoaoina i tatou e le Alii i le auala e tausia ai o tatou aiga ina ua Ia fetalai mai ia i tatou e ala i Ana perofeta i le folafolaga i lalolagi: “Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaai, ia tausia poloaiga a le Atua ma avea ma tagatanuu usiusitai i tulafono i soo se mea e nonofo ai.”⁵

Ua tatou iloa ua tele seneturi o aoao mai i tatou e le Atua i le auala e puipui ma tausia ai o tatou aiga. Ua tatou iloa foi, ma mafai ona tatou vaai ua osofaia e le tiapolo le aiga. O le taimi lenei e faaaoga ai na aoaoga uma. O le taimi lenei e faataunuu ai o tatou tiute mai le Atua e faatatau i le aiga.

Na tuuina mai e Peresitene James E. Faust ia te i tatou ni mea taua se tolu e mafai ona tatou faia e puipui ma faamalolosia ai o tatou aiga:

Tatalo faaleaiga. E tatau i matua ona aoao a latou fanau o i latou o fanau a le Atua ma o lea e manaomia ai ona tatalo atu ia te Ia i aso taitasi.
Afiafi faaleaiga. E pei ona aoao mai i tatou e Peresitene Faust, o le afiafi faaleaiga e mo i tatou uma lava tusa lava po o le a le tulaga o le olaga o loo tatou i ai. E tatau lava ona faaavanoa po o Aso Gafua mai isi gaoioiga uma e ono taofia ai i tatou mai le faapotopoto faatasi o se aiga.
O le suesueina o tusitusiga paia e le aiga ma le tagata lava ia. E manaomia lo tatou fesoasoani i a tatou fanau e faamalolosia lo latou faatuatua ma molimau e ala i lenei mausa faavae.⁶

A tatou mulimuli i le fautuaga poto a Peresitene Faust, o le a tatou puipuia le aiga mai osofaiga a Satani ma faamalolosia ai foi lo latou faatuatua ma molimau i le Alii o Iesu Keriso.

I le folafolaga i aiga ua tatou aoao ai foi “i le fuafuaga paia, e tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O uluai matafaioi a tina o le faafaileleina lea o a latou fanau. O nei matafaioi paia, e ao i tama ma tina ona fesoasoani le tasi i le isi o se paaga tutusa.”⁷

O totonu o le aiga e aoao ai e le auaiga ma faaaoga mataupu faavae o le talalelei. E tatau ona i ai le alofa tele ina ia mafai ona aoao atu ai ma taiala se aiga. E aoao e tama ma tina alolofa a latou fanau e tapuai i le Atua i o latou fale. A tumu le fale i le uiga ma le agaga tapuai, o le a sosolo atu lena uiga ma le agaga i olaga o tagata taitoatasi o le aiga. O le a saunia ai i latou e osia po o le a lava le taulaga e tatau ai ina ia mafai ona toe foi atu ma nonofo faatasi o se aiga i le faavavau.

Ua fesoasoani le folafolaga i le aiga tatou te malamalama ai i le tele o le alofa o loo faasino i ai le Faaola ina ua Ia fetalai mai e tatau ona tatou “fealofani.”⁸ Na Ia tuuina mai ia te i tatou le faaaoaoga maoae o le alofa ina ua Ia tautino mai, “E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo.”⁹ Na Ia togiolaina mulimuli ane mo a tatou agasala uma ma i’u ai ina ofoina atu Lona soifua mo i tatou uma.

E mafai ona tatou ofoina atu o tatou ola mo i latou o e tatou te alolofa i ai e le faapea o le a tatou feoti mo i latou ae ia ola mo i latou—ia faaavanoa i ai lo tatou taimi; ia i ai pea i o latou olaga; tautuaina i latou; ia faaaloalo, agaalofa, ma faaali atu le alofa moni mo i latou o o tatou aiga ma tagata uma—e pei ona aoao mai e le Faaola.

Tatou te le iloa le mea e ono tupu a taeao ia i tatou, ma o le ala lena o le asō o le taimi lea e amata ai ona faaalia lou alofa e ala i nai faatinoga laiti e pei o le fusi mai ma se fai atu “Ou te alofa ia te oe” i lou toalua ma le fanau, ma i latou o loo siomia oe.

Sa ou faitau talu ai nei i se solo sa ta’u mai ai le faanatinati o le aua le faatalia mo taeao le mea e mafai ona e faia i le asō. I le masina o Iulai i le tausaga nei, sa molimauina ai i Pasila le faalavelave tauvaalele aupito matautia i lona talafaasolopito. E 199 tagata sa maliliu ai e aofia ai le pasese, aufaigaluega o le vaalele, auvaa, ma isi sa i ai i lena nofoaga ina ua tupu le faalavelave. O le faamatalaga sa ou ta’ua na faapea sa faapipii i le laupapa o fesootaiga a le vaalele, e le tane a se tasi o le aufaigaluega o le vaalele na maliu i le faalavelave. E faaulutalaina “E Le Oo Mai lava le Taeao” ma e faavae i se solo na tusia e Norma Cornett Marek.

Pe a na ou iloa o le toe taimi mulimuli lea ou te vaavaai atu ai a o e moe,
Semanu ou te fusimauina oe. Semanu ou te aioi atu i le Alii e puipui oe.
Pe a na ou iloa o le toe taimi lea ou te vaaia ai oe o savali atu i fafo o le faitotoa,
Semanu ou te opoina oe ma sogi atu ma toe valaau atu e te toe sau se’i opo ma sogi tasi atu.
Pe a na ou iloa o le toe taimi lea ou te faalogoina ai lou leo o tatalo,
Semanu ou te pu’eina taga uma, o lau pupula, o lau ataata, ma au upu taitasi uma,
Ina ia mafai ona ou toe faalogologo ai mulimuli, i lea aso ma lea aso.
Pe a na ou iloa o le toe taimi lenei,
Semanu ou te faaaluina se isi minute pe lua e ta’u atu ai “Ou te alofa ia te oe” nai lo le faapea ua uma lava ona e iloa.
Pe a na ou iloa o lo ta toe taimi lenei, lo ta taimi mulimuli,
Semanu ou te i ai i ou tafatafa, e faaalu lo’u aso ma oe nai lo le mafaufau faapea
“Ia ou te mautinoa o le a i ai isi avanoa, o le a faapasi lenei aso.”
O le a i ai se aso e toe faatonutonu ai mea uma,
O le a i ai foi se avanoa lona lua e faasa’o ai lea ma lea.
Oi, e sa’o o le a i ai se isi aso tatou te fai atu ai, “Ou te alofa ia te oe.”
E moni lava o le a i ai se isi avanoa e fai atu ai le tasi i le isi, “E i ai se mea e mafai ona ou fesoasoani atu ai?”
Ae o a’u, ua leai se isi avanoa!
Ua ta le faatasi, ma o le asō lo ta aso mulimuli—o la ta faamavaega.
O lea ou te fia ta’u atu ai le tele o lo’u alofa ia te oe,
Ou te faamoemoe o le a le galo lava ia te oe.
E leai se tasi na te iloa o le a vaai i le aso taeao, laitiiti pe matua.
Atonu o le asō o lou toe avanoa e te uumau ai le lima o lē ua e alofa i ai ma faailoa atu i ai ou lagona.
Afai o e faatalitali mo a taeao, aisea e le fai ai i le asō?
Aua afai e le oo mai lava a taeao, o aso uma o totoe o lou ola, o le a e salamo.
I le leai o se isi taimi mo sina ataata atu, sina talanoaga, se opo, po o se sogi,
Si ona toe manao ua le mafai ona avatu aua ua e pisi tele ua leai se ofi.
Ona opo mau mai nei loa i le asō le ua pele ia te oe, au uo, lou aiga, ma musumusu atu e te alofa tele ia i latou ma lou manao ia latalata atu ia te oe.
Faaaoga lou taimi e fai atu ai ou manatu faafoe,
“Ua ou sese,”
“Faamolemole,”
“Faamagalo au,”
“Faafetai,”
Po o le,
“E te le tau faafetai mai,”
“E le afaina,”
Aua afai lava e le oo mai le aso a taeao, e te le tau salamo i le asō.
E le toe foi mai ananafi, ae ono le oo mai foi le aso a taeao! 10

Ia faaali atu lo tatou alolofa i o tatou taitoalua ma fanau ma o tatou uso ma tuafafine i le asō. Ua ou iloa o loo soifua le Atua. Ua ou iloa o Iesu o le Keriso, o lo tatou Faaola ma le Togiola. Ua ou iloa o Iosefa Samita o se perofeta a le Alii ma o Gordon B. Hinckley o le perofeta soifua a le Atua i luga o lenei fogaeleele. I le suafa o Iesu Keriso, amene.