O Se Loto Momomo ma se Agaga Salamo
O i latou ua i ai se loto momomo ma se agaga salamo e naunau e fai soo se mea e fetalai mai ai le Atua ia i latou.
E ese lo’u alofa i le Susuga ia Elder Joseph B. Wirthlin! Na tusi e le tusisolo o Rudyard Kipling ia upu nei i le 1897, o se lapataiga i le Malo o Peretania e uiga i le faamaualuga:
E mou atu le vevesi ma le tuualaga;
O kapeteni foi ma tupu e tuuvaa.
Ae tumau pea lau taulaga anamua,
O se lotomaulalo ma le loto momomo.
(“God of Our Fathers, Known of Old,” Hymns, no. 80).
Ina ua tautala Kipling e uiga i le loto momomo o se “taulaga anamua” atonu sa mafaufau o ia i upu a le Tupu o Tavita i le Salamo e 51: “O taulaga i le Atua o le loto momomo lea: le loto momomo ma le nutimomoia” (f. 17). Ua faaalia i upu a Tavita e oo lava foi i taimi o le Feagaiga Tuai, na iloa e le nuu o le Atua e tatau ona tuuina atu o latou loto i le Atua, aua o taulaga mu, sa le lava lea.
O taulaga na faamalosia i le tisipenisione o Mose e faatusa i le taulaga togiola a le Mesia, o le e toatasi e mafai ona lelei ai le tagata agasala ma le Atua. E pei ona aoao mai Amoleka, “Faauta foi, o le uiga atoatoa lenei o le tulafono, ua faasino atu mataitusi uma lava i lena taulaga sili e faaiu ai taulaga; … le Alo o le Atua” (Alema 34:14).
Ina ua mavae Lona Toetu, na tautino atu e Iesu Keriso i tagata i le Lalolagi Fou:
“E mavae atu a outou taulaga, ma a outou taulaga mu, aua ou te le talia se tasi o [ia mea]… .
“Ia outou fai ma taulaga ia te au le loto momomo ma le agaga salamo. Ai se sau foi ia te au ma le loto momomo … , ou te papatisoina o ia i le afi ma le Agaga Paia” (3 Nifae 9:19–20).
O a se loto momomo ma se agaga salamo? Ae aisea ua ta’ua ai i latou o se taulaga?
E pei o mea uma lava, o le soifuaga o le Faaola ua tuuina mai ai ia i tatou le faataitaiga ua atoatoa: e ui lava o Iesu o le Nasareta sa matuai aunoa ma se agasala, sa femaliuai o Ia i le olaga ma se loto momomo ma se agaga salamo, e pei ona faaalia i Lona gauai atu i le finagalo o le Tama. “Aua ou te lei alu ifo mai le lagi e fai lo’u lava loto, a o le finagalo o le ua auina mai a’u” (Ioane 6:38). I Ona soo sa Ia fetalai atu ai, “Ia outou faaaoao ia te a’u; aua o a’u le agamalu ma le loto maulalo” (Mataio 11:29). Ma ina ua oo i le taimi e totogi ai le taulaga sili o se vaega na tatau ai o le Togiola, sa le’i musu Keriso e inu i le ipu oona ae na gauai atoatoa atu i le finagalo o Lona Tama.
O le gauai atoatoa atu o le Faaola i le Tama Faavavau, o le uiga tonu lea o se loto momomo ma se agaga salamo. O faataitaiga a Keriso ua aoao mai ai ia i tatou o le loto momomo o se uiga e faavavau o le tulaga faaleatua. A momomo o tatou loto tatou te nofouta lelei i le Agaga o le Atua ma iloa lo tatou faalagolago ia te Ia, i mea uma ua tatou maua ma o tatou tagata uma. O le taulaga e oo mai i lenei tulaga, o se taulaga o le faamaualuga i ona tulaga uma. E pei o le omea e mamanu gofie i lima o se faiipu atamai, e mafai ona galueaiina ma faaleleia se tagata loto momomo i aao o le Matai.
O se loto momomo ma se agaga salamo o tulaga manaomia foi ia o le salamo. Na aoao mai Liae:
“O lea, e oo mai ai le togiola talu le Mesia Paia… .
“Faauta, e avae o ia e ia lava e fai ma taulaga ona o agasala, e faaatoatoa ai iuga o le tulafono, ia te i latou uma o e o i ai le loto momomo ma le agaga salamo, a e leai se tasi e mafaia ona faaatoatoaina ai iuga o le tulafono” (2 Nifae 2:6–7).
A tatou agasala ma manaomia le faamagaloga, o le uiga o le loto momomo ma le agaga salamo o le oo i le “tiga e tusa i le atua” [e] “tupu ai le salamo” (2 Korinito 7:10). E oo mai lenei mea pe afai o lo tatou manao ia mamā mai agasala e matuai malosi lea e tiga ai o tatou loto i le faanoanoa ma tatou mananao ai e faalelei ma lo tatou Tama oi le Lagi. O i latou ua i ai se loto momomo ma se agaga salamo e naunau e fai soo se mea e fetalai mai ai le Atua ia i latou, e aunoa ma le tetee pe le fiafia. Ia tuu lo tatou faia o mea i a tatou ala, ae aoao e faia i le ala a le Atua. I se tulaga faapena o le gauai atu, e mafai ona aoga ai le Togiola ma tupu mai ai le salamo moni. Ona lagona lea e le tagata agasala le mana faamamaina o le Agaga Paia, o le a faapea ona faatumulia ai i latou i le filemu o le mafaufau ma le olioli o le toe lelei ma le Atua. I se toe faatasia ofoofogia o uiga faaleatua, o lena lava Atua e tasi na aoao mai ia i tatou ina ia savavali ma se loto momomo ma valaauina i tatou ia olioli ma ia loto tetele.
Pe a tatou maua se faamagaloga o agasala, e avea le loto momomo ma se tali pupuni paia i faaosoosoga. Sa tatalo Nifae, “Sei punitia pea ea i o’u luma o faitotoa o seoli, aua ua momomo lo’u loto ua salamo lo’u agaga!” (2 Nifae 4:32). Na aoao atu le Tupu o Peniamina i lona nuu e faapea, afai o le a latou savavali i le matuā faamaulalo, e olioli pea outou, “e faatumuina foi outou i le alofa o le Atua, tou te taofi pea le faamagaloina o … agasala” (Mosaea 4:12). A faamatuu atu o tatou loto i le Alii, e te’a ese le feilafi o faatosinaga a le lalolagi.
O loo i ai foi se isi uiga o le loto momomo—o lo tatou agaga faafetai loloto lea mo le puapuagatia o Keriso e fai ma o tatou sui. I Ketesemane, na “alu ifo [le Faaola] i lalo o mea uma” (MFF 88:6) a o Ia tauaveina le mamafa o agasala mo tagata uma. I Kolokota, sa Ia “sasaa atu lona ola ia oti” (Isaia 53:12), ma o le mea moni na matuai momomo Lona loto ona o le alofa naunau i le fanau a le Atua. Pe a tatou manatua le Faaola ma Ona puapuaga, o le a momomo foi o tatou loto i le agaga faafetai mo Le ua Faauuina.
A o tatou fai taulaga atu ia te Ia i mea uma ua tatou maua ma o tatou tagata uma, o le a faatumuina e le Alii o tatou loto i le filemu. O le a Ia “fusifusi i e loto momomo” (Isaia 61:1) ma faamanuiaina o tatou olaga i le alofa o le Atua, “ua sili ona suamalie i mea uma ua suamalie, … ua sili ona mama i mea uma ua mama” (Alema 32:42). Ou te molimau atu ai i nei mea, i le suafa o Iesu Keriso, amene.