Kinatibuk-ang Pasabut alang sa mga Ginikanan ug mga Lider

Katuyoan sa Personal nga Kauswagan

Ang Personal nga Kauswagan usa ka programa sa kalampusan nga gituyo aron sa pagtabang sa young women nga:

Mapalig-on ang ilang mga pagpamatuod kang Jesukristo.
Mapalig-on ang ilang mga pamilya karon ug sa umaabut.
Maandam nga mahimong takus sa paghimo ug pagtuman sa sagrado nga mga pakigsaad sa templo.
Maandam alang sa ilang umaabut nga mga tahas ug mga responsibilidad.

Ang young women magtrabaho uban sa ilang mga ginikanan, mga lider sa Young Women, ug sa uban nga mga babaye nga maayo og ehemplo sa pagpakita ug pagtuman sa mga tumong nga gibase sa walo ka mga mithi sa Young Women. Ang Personal nga Kauswagan makatabang sa mga ginikanan ug mga lider nga mapalambo ang ilang relasyon sa young women samtang sila manag-uban nga magtrabaho.

Mga Responsibilidad sa mga Ginikanan ug sa mga Lider sa Young Women

Ipaila ang Programa

Ang mga lider sa Young Women makighimamat sa matag usa ka batan-ong babaye kinsa mosulod sa programa sa Young Women ug sa iyang mga ginikanan. Usa ka sakop sa kapangulohan sa klase sa batan-ong babaye mahimo usab nga motambong. Ang mga lider mohatag sa batan-ong babaye og usa ka libro nga Personal nga Kauswagan sa Young Women, usa ka Personal nga Kauswagan nga journal, ug sulo nga pendant sa Young Women. Ilang ipasabut ang programa ngadto kaniya ug moawhag sa mga ginikanan sa pagtrabaho uban sa ilang anak nga babaye sa pagpili ug pagkompleto sa mga kasinatian ug mga proyekto sa Personal nga Kauswagan. Ang mga lider kinahanglan usab nga modapit sa mga ginikanan sa tanang espesyal nga mga kalihokan diin apil ang ilang anak nga babaye.

Siguroa ang Igo nga Suporta

Ang usa ka batan-ong babaye nagkinahanglan og suporta ug kanunay nga pag-awhag sa pagkompleto sa Personal nga Kauswagan. Mahimo kining maggikan sa mga ginikanan, mga lider, ubang mga hamtong, ug mas magulang nga mga batan-ong babaye kinsa nakakompleto sa Personal nga Kauswagan. Kon ang batan-ong babaye adunay limitado nga suporta sa panimalay sa pag-abag kaniya sa pagkompleto sa Personal nga Kauswagan, laing sister ang mahimong dapiton aron magsilbi kaniya nga tigtudlo ug motabang kaniya, sa pakigtambag uban sa mga lider sa priesthood. Kining hamtong nga sister mahimong moaprobar sa mga kasinatian ug mga proyekto kabahin sa mithi ug mopirma sa libro sa Personal nga Kauswagan sa batan-ong babaye kon makompleto na kini. Laing batan-on nga babaye kinsa nakakompleto sa Personal nga Kauswagan mahimo usab nga dapiton sa paghatag og tabang ug sa pag-awhag.

Irekord ug Ilha ang Kauswagan

Ang mga ginikanan ug mga lider mohatag og regular nga mga kahigayunan alang sa mga batan-ong babaye sa pagreport sa ilang kauswagan. Kon ang usa ka batan-ong babaye moreport kanunay, makahimo siya og usa ka subay sa iyang mga paningkamot ug mopakigbahin sa iyang nakat-unan ug sa unsang paagi nga nalig-on ang iyang pagpamatuod. Ang mga ginikanan ug mga lider mopahalipay sa iyang mga kalampusan, molig-on sa iyang panabut ug mogamit sa mga baruganan sa ebanghelyo, ug motanyag og pag-awhag alang sa padayon nga kauswagan. Kini nga mga pagbinayloay og mga hunahuna makatabang sa pagpalambo og maamumahon nga mga relasyon.

Mga Responsibilidad sa mga Lider sa Priesthood

Kon ang usa ka batan-ong babaye makakompleto sa tibuok programa sa Personal nga Kauswagan, ang bishop mointerbyu kaniya, gamit ang mga sumbanan diha sa Alang sa Kalig-on sa mga Kabatan-onan isip giya. Iyang sutaon ang pagtambong niya sa sakrament miting, ang iyang pag-apil sa seminary, ug ang iyang pagbasa sa Basahon ni Mormon. Mahimo kining kabahin sa iyang tinuig o sa ikaunom nga bulan nga interbyu. Ang bishop motino sa katakus sa batan-ong babaye nga makadawat sa Pahalipay sa Batan-ong Pagkababaye ug mopirma sa iyang libro sa Personal nga Kauswagan aron sa pag-ila sa iyang pagkompleto sa gikinahanglan nga mga kinahanglanon. Mahimo siyang mohatag sa iyang Pahalipay sa Batan-ong Pagkababaye diha sa sakrament miting o sa laing miting.

Ang kalampusan sa usa ka batan-ong babaye sa Personal nga Kauswagan mahimo usab nga ilhon samtang iyang dawaton ang iyang mga sertipiko sa Beehive, Mia Maid, ug Laurel samtang mobalhin siya gikan sa usa ka klase ngadto sa laing klase.

Ang mga sakop sa bishopric mahimong mogamit sa ilang mga interbyu sa mga batan-ong babaye sa pagpahalipay ug pag-awhag sa kauswagan sa matag batan-ong babaye. Ang Palid sa Pagsubay sa Personal nga Kauswagan sa Young Women alang sa mga Lider, nga gihuptan sa kapangulohan sa Young Women, mahimong makatabang sa pag-abag sa mga sakop sa bishopric. Ang mga stake president kinahanglang mangutana kanunay sa mga bishop kalabut sa kaayohan ug kauswagan sa batan-ong mga babaye diha sa ilang mga ward.

Mga Sumbanan

Ang mga tumong ug mga kinahanglanon sa programa gilatid diha sa atubangan niini nga libro. Ang mosunod nga dugang nga mga sumbanan tingali makatabang sa mga lider.

Mga Kasinatian kabahin sa Mithi

Ang batan-ong babaye mahimong motrabaho sa mga mithi bisan unsa ang unahon.
Gawas sa mithi nga hiyas, ang batan-ong mga babaye giawhag usab sa pagkompleto sa gikinahanglan nga mga kasinatian kabahin sa mithi sa dili pa mobuhat sa proyekto alang niana nga mithi.

Proyekto kabahin sa Mithi

Ang proyekto kabahin sa mithi gituyo aron sa pagtabang sa usa ka batan-ong babaye nga mogamit sa unsay iyang nakat-unan gikan sa mga kasinatian kabahin sa mithi.
Ang batan-ong babaye kinahanglang mogahin og dili mominus napulo ka oras alang sa matag proyekto kabahin sa mithi. Ang samang napulo ka oras dili maihap nga sobra sa usa ka proyekto kabahin sa mithi.
Ang mga batan-ong babaye mahimong magtrabaho og dungan sa mga proyekto. Hinoon, ang usa ka batan-ong babaye kinahanglang mogahin og dili mominus napulo ka oras sa iyang kaugalingong panahon kon iyang gamiton kana nga proyekto aron sa pagtuman sa iyang kaugalingong kinahanglanon sa Personal nga Kauswagan.
Uban sa pagtugot daan sa mga ginikanan o mga lider sa Young Women, ang maayong mga butang nga nahimo sa batan-ong mga babaye diha sa panimalay, Simbahan, eskwelahan, seminary, ug sa komunidad makatuman sa mga kinahanglanon sa Personal nga Kauswagan.

Pagkompleto sa Personal nga Kauswagan

Kon ang usa ka batan-ong babaye makakompleto sa mga kinahanglanon sa Personal nga Kauswagan sa dili pa mobiya sa Young Women, kinahanglan siyang dapiton sa pagtabang sa ubang batan-ong mga babaye kinsa nagtrabaho pa sa Personal nga Kauswagan. Kinahanglan usab siyang awhagon sa pag-angkon og Honor Bee o sa pagsugod og usab sa programa.
Kon ang usa ka batan-ong babaye wala pa makakompleto sa tanang mga kinahanglanon sa Personal nga Kauswagan sa dili pa mobiya sa Young Women, kinahanglan siyang awhagon sa pagpadayon sa pagtrabaho paingon sa pagdawat sa Pahalipay sa Batan-ong Pagkababaye. Ang mga inahan, mga lider, ug ubang mga babaye nga maayo og ehemplo mahimong dapiton sa pagsuporta kaniya sa pagtuman niini.

Pagsubay ug Gipaspason

Ang Palid nga Talaan sa Personal nga Kauswagan, nga makita sa pahina 77) niini nga libro, nag-summarize sa trabaho sa matag batan-ong babaye diha sa Personal nga Kauswagan.
Ang Palid sa Pagsubay sa Personal nga Kauswagan sa Young Women alang sa mga Lider anaa usab aron sa pag-abag sa mga lider nga masubay ang kauswagan sa matag batan-ong babaye (36655). Mahimo kining gamiton aron sa pag-abag sa mga lider sa Young Women ug sa priesthood sa pakigtambayayong ug pag-ila sa matag batan-ong babaye.
Ang mga batan-ong babaye mahimong magtrabaho sa kaugalingon nilang gipaspason diha programa sa Personal nga Kauswagan; hinoon, girekomendar kini nga ang usa ka batan-ong babaye mokompleto og dili mominus sa usa ka kasinatian kabahin sa mithi matag bulan ug usa ka proyekto kabahin sa mithi matag unom ka bulan (duha sa usa ka tuig). Kon magsugod siya sa pagtrabaho sa dihang mosulod siya sa Young Women sa edad nga 12 ug magpadayon niining gisugyot nga gipaspason, mahuman siya inig edad niya og 16. Siya adunay duha ka tuig sa pag-angkon og Honor Bee o magsugod og usab sa programa sigun sa gisugyot sa pahina 83.

Pag-ila sa Indibidwal nga Kauswagan

Kon ang usa ka batan-ong babaye makakompleto sa mga kasinatian ug mga proyekto alang niana nga mithi, makadawat siya og usa ka simbolo (36654) ug laso sa kasulatan nga kauban niana nga mithi. Iyang ibutang ang simbolo diha sa Kalampusan sa Personal nga Kauswagan kabahin sa Mithi nga pahina sa iyang libro (pahina 78). Iyang gamiton ang laso isip bookmark diha sa iyang mga kasulatan. Kini nga pahalipay sa iyang kauswagan mahimong ihatag panahon sa usa ka miting sa Young Women.
Kada tuig, sa Young Women in Excellence, ang batan-ong mga babaye kinahanglang pahalipayan alang sa ilang mga kalampusan.
Ang kalampusan sa usa ka batan-ong babaye sa Personal nga Kauswagan mahimo usab nga ilhon samtang iyang dawaton ang iyang mga sertipiko sa Beehive, Mia Maid, ug Laurel samtang mobalhin siya gikan sa usa ka klase ngadto sa laing klase. Kini nga mga sertipiko (Beehive, 08563; Mia Maid, 08565; Laurel, 08564) ihatag ubos sa direksyon sa bishop. Ilhon nila ang pagbalhin sa batan-ong babaye gikan sa usa ka grupo sa mga kaedad ngadto sa lain.

Pahalipay sa Batan-ong Pagkababaye

Kon ang usa ka batan-ong babaye makakompleto sa iyang trabaho sa walo ka mga mithi ug nainterbyu na sa bishop, makadawat siya sa Pahalipay sa Batan-ong Pagkababaye. Kini nga pahalipay naglangkob og usa ka sertipiko (36651) ug usa ka medalyon nga bulawan o pilak (bulawan, 08602; pilak, 08603). Usa ka sakop sa bishopric ang mohatag sa Pahalipay sa Batan-ong Pagkababaye diha sa usa ka miting sa sakrament.
Human makakompleto sa Pahalipay sa Batan-ong Pagkababaye, ang usa ka batan-ong babaye mahimong mopadayon sa pag-uswag pinaagi sa pag-angkon og Honor Bee charm (bulawan, 08562; pilak, 08578; tan-awa sa pahina 83). Kini nga pahalipay sa iyang kauswagan mahimong ihatag diha sa usa ka miting sa Young Women.
Ang mga ganti ug mga sertipiko mahimong makuha pinaagi sa distribution center sa Simbahan gamit ang mga pundo sa ward, nga dili bayaran sa mga batan-ong babaye o sa ilang mga ginikanan.

Mga Kinahanglanon sa Personal nga Kauswagan alang sa mga Lider

Ang mga lider giawhag sa pagtrabaho sa Personal nga Kauswagan kauban ang batan-ong mga babaye. Kadtong kinsa miapil mismo sa programa sa Personal nga Kauswagan mas makasabut sa programa ug makapakita og maayong ehemplo nga angayang sundon sa batan-ong mga babaye. Mahimo silang makaangkon sa Pahalipay sa Batan-ong Pagkababaye human sila:

Makaserbisyo sulod sa usa ka tuig isip lider sa Young Women.
Makakompleto sa gikinahanglan nga mga kasinatian kabahin sa mithi sa matag usa sa walo ka mga mithi.
Makakompleto og tulo ka proyekto kabahin sa mithi, lakip na ang proyekto alang sa hiyas.

Pag-apil sa mga Inahan

Ang mga inahan welcome nga moapil uban sa batan-ong mga babaye sa pag-angkon sa Pahalipay sa Batan-ong Pagkababaye. Magtrabaho ang mga inahan sa ilang kaugalingong libro sa Personal nga Kauswagan ug mahimong makaangkon sa pahalipay kauban sa ilang anak nga babaye. Girekomendar nga ang usa ka anak nga babaye makaangkon sa iyang pahalipay sa dili pa o kauban sa iyang inahan.

Ang mga inahan mahimong mokompleto sa sama nga mga kinahanglanon pareha sa ilang mga anak nga babaye, lakip sa:

Pagtambong kanunay sa sakrament miting (kutob sa mahimo).
Pagsunod sa mga sumbanan diha sa Alang sa Kalig-on sa mga Kabatan-onan.
Pagkompleto sa mga kasinatian ug proyekto kabahin sa mithi alang sa matag usa sa walo ka mga mithi.
Pagbuhat og usa ka personal nga journal.
Pagbasa sa Basahon ni Mormon kanunay.
Pagrekord sa iyang pagpamatuod mahitungod sa Manluluwas nga si Jesukristo.

Ang mga inahan mahimong mopili og lain-laing mga opsyon alang sa opsyonal nga mga kasinatian ug mga proyekto kabahin sa mithi gikan sa ilang mga anak nga babaye. Ang mga kasinatian ug mga proyekto mahimong pirmahan ug petsahan sa ilang anak nga babaye, ilang bana, usa ka lider sa Young Women, o sa laing hamtong. Ang bishop mosuta nga ang mga kinahanglanon nakompleto. Ang pahalipay ug ang pagpalit sa mga materyal alang sa pahalipay kinahanglang ihan-ay uban sa mga lider sa Young Women ug sa bishopric.

Mga Kinahanglanon sa Personal nga Kauswagan alang sa Uban Kinsa Nagtinguha nga Magtrabaho diha sa Programa

Ang ubang mga babaye kinsa nagtinguha nga moapil ug mokompleto sa Personal nga Kauswagan mahimong mobuhat sa ingon pinaagi sa pagkompleto sa samang mga kinahanglanon isip batan-ong mga babaye ug pinaagi sa pag-abag og usa ka batan-ong babaye sa usa ka bahin sa iyang Personal nga Kauswagan. (Tan-awa ang mga kinahanglanon alang sa mga inahan diha sa pahina 92.)

Paglakip sa Personal nga Kauswagan diha sa mga Leksyon sa Dominggo ug atol sa Mutual

Ang dungan nga pagtrabaho sa kasinatian sa Personal nga Kauswagan isip usa ka bahin sa leksyon sa Dominggo makahatag sa mga lider ug sa batan-ong mga babaye og kahigayunan sa paghisgut sa mga baruganan nga gitudlo ug sa paggamit niini diha sa mga kinabuhi sa batan-ong mga babaye. Mga pakisayran sa Personal nga Kauswagan mahimong makita diha sa kurikulum nga mga materyal sa Young Women.

Ang mga kalihokan sa Personal nga Kauswagan mahimo usab nga kabahin sa Mutual. Pananglitan, ang tanang batan-ong mga babaye mahimong moabag sa usa ka proyekto sa mithi sa batan-ong babaye. Ang dungan nga pagtrabaho sa usa ka proyekto makatabang sa pagdasig sa batan-ong mga babaye aron padayon nga mouswag. Ang ingon nga mga kalihokan sa grupo kinahanglan nga planohon sa mainampoon ug mapilion nga paagi aron sa pagsiguro nga ang programa sa Personal nga Kauswagan mapabilin nga personal alang sa matag batan-ong babaye.

Pagpahiangay ngadto sa Indibidwal ug Lokal nga mga Panginahanglan

Ang mga kasinatian ug mga proyekto kabahin sa mithi mahimong ipahiangay sumala sa personal o lokal nga mga kahimtang, mga tinguha, ug mga panginahanglan uban sa pagtugot daan sa usa ka ginikanan ug mga lider. Kon maghimo og bisan unsa nga mga kausaban o mga eksepsyon alang sa usa ka tawo, ang mga lider kinahanglang maghunahuna sa epekto nga mahimo niadtong mga kausaban diha sa ubang batan-ong mga babaye. Human sa paghunahuna og maayo sa mga ginikanan ug mga lider, ang mga pagpahiangay mahimong buhaton aron matubag ang mga panginahanglan sa mga batan-ong babaye nga adunay mga kakulangan o mga limitasyon sa edukasyon, aron matubag ang kultural o indibidwal nga mga panginahanglan, o aron motugot sa mga batan-ong babaye kinsa dili mga miyembro nga makaapil.

Kon ang usa ka batan-ong babaye mopasakop sa Simbahan o mahimong aktibo diha sa Young Women human sa edad nga 16, ang iyang mga kinahanglanon alang sa pagkompleto sa programa sa Personal nga Kauswagan mao ang:

Pagtambong kanunay sa sakrament miting (kon mahimo).
Pagsunod sa mga sumbanan diha sa Alang sa Kalig-on sa mga Kabatan-onan.
Pagkompleto sa gikinahanglan nga mga kasinatian kabahin sa mithi sa matag usa sa walo ka mga mithi. (Dili kinahanglan nga iyang kompletohon ang opsyonal nga mga kasinatian.)
Pagkompleto sa usa ka proyekto kabahin sa mithi sa matag usa sa walo ka mga mithi.
Pagtambong sa seminary (kon anaa).
Pagbasa sa Basahon ni Mormon kanunay.
Pagrekord sa iyang pagpamatuod mahitungod sa Manluluwas nga si Jesukristo.

Kini nga mga kinahanglanon mahimo usab nga magamit ngadto sa young women diha sa lain nga mga kahimtang sigun sa gitino sa lokal nga mga lider sa Young Women.