Welcome sa Personal nga Kauswagan

Ikaw usa ka pinalanggang anak nga babaye sa Langitnong Amahan, giandam sa pag-anhi sa yuta niining maong panahon alang sa usa ka sagrado ug mahimayaon nga katuyoan. Ikaw adunay halangdong responsibilidad sa paggamit sa imong kusog ug impluwensya alang sa maayo. Ang imong mahigugmaong Langitnong Amahan mipanalangin kanimo og mga talento ug mga abilidad nga makatabang kanimo sa pagtuman sa imong balaanong misyon. Samtang nagkat-on ka sa pagdawat ug pagbuhat sa mga mithi sa Young Women diha sa imong kinabuhi, makahimo ka og personal nga mga kinaiya sa pag-ampo, pagtuon sa kasulatan, pagsunod sa mga sugo, ug pagserbisyo sa uban. Kining inadlaw nga personal nga mga kinaiya makapalig-on sa imong pagtuo ug pagpamatuod kang Jesukristo. Motugot usab kini kanimo nga makaila ug makapalambo sa imong talagsaong mga gasa.

Gamita kanunay ang imong impluwensya sa pagbayaw ug pagpanalangin sa imong pamilya, sa ubang batan-ong mga babaye, ug sa batan-ong mga lalaki nga imong ikauban. Tahura ang pagkababaye, suportahi ang priesthood, ug mahala ang matinud-anong pagka-inahan ug pagka-amahan.

Samtang ikaw moapil sa Personal nga Kauswagan, ikaw miapil uban sa liboan ka mga babaye kinsa naningkamot sa pagduol ngadto kang Kristo ug “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Pakigtambag sa imong mga ginikanan, ug sa mainampoong paagi pagpili og mga tumong nga makatabang kanimo sa pag-ugmad og binabaye nga mga hiyas, makapalig-on sa imong pagpamatuod, ug makakab-ot sa imong balaanong potensyal. Gamita ang imong panahon diha sa Young Women pinaagi sa pagpangandam aron sa pagdawat sa sagrado nga mga ordinansa sa templo, aron mamahimong matinud-anong asawa ug inahan, ug aron sa paglig-on sa imong panimalay ug sa pamilya.

Ang Unang Kapangulohan