Diosnong Kinaiya

Himoa nga mag-aambit ka sa diosnong kinaiya. … Mohatag sa tanang paningkamot, ipuno sa inyong hugot nga pagtuo ang hiyas; ug sa hiyas ipuno ang kahibalo; ug sa kahibalo ipuno ang pagpugong sa kaugalingon; ug sa pagpugong sa kaugalingon ipuno ang pagpailub; ug sa pagpailub ipuno ang pagkadiosnon; ug sa pagkadiosnon ipuno ang pagbati nga inigsoon; ug sa pagbati nga inigsoon ipuno ang gugmang putli (2 Pedro 1:4–7).

Ako nakapanunod sa diosnong mga kinaiya, nga akong paningkamutan nga palamboon.

Gikinahanglan nga mga Kasinatian kabahin sa Mithi

Kompletoha ang mosunod nga tulo ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

Unsa ang pipila ka diosnong mga kinaiya sa usa ka anak nga babaye sa Dios? Basaha ang “Ang Pamilya: Usa ka Pamahayag ngadto sa Kalibutan” (tan-awa sa pahina 101); 2 Pedro 1; Alma 7:23–24; ug Doktrina ug mga Pakigsaad 121:45. Sa imong kaugalingong mga pulong, ilista ang diosnong mga kinaiya nga gihisgutan sa imong pagbasa. Hunahunaa kon unsaon nimo sa pagkaplag ug pagpalambo ang matag usa niini nga mga kinaiya. Isulat ang imong mga ideya diha sa imong journal.
Isip usa ka batan-ong babaye gipanalanginan ka og diosnong mga kinaiya sa pagkababaye. Dugangi ang imong pagsabut ug pagtamud alang sa pagkababaye. Basaha ang Mga Proverbio 31:10–31 ug ang duha ka mga pakigpulong mahitungod sa pagkababaye gikan sa usa ka isyu sa komperensya sa mga magasin sa Simbahan. Ribyuha unsa ang gisulti sa “Ang Pamilya: Usa ka Pamahayag ngadto sa Kalibutan” (tan-awa sa pahina 101) mahitungod sa pagka-asawa ug sa pagka-inahan. Dayon pangutan-a ang imong inahan o laing inahan nga imong gidayeg kon unsa sa iyang hunahuna ang mahinungdanong mga hiyas sa pagka-inahan. Ilista ang mga hiyas diha sa imong journal. Dayon pagpili og usa nianang mga hiyas ug paningkamot sa pagpalambo niini. Human sa duha ka semana ireport ang imong kalampusan ngadto sa usa ka ginikanan o sa lider.
Himoa ang imong kinabuhi sa panimalay nga mas maanindot. Sulod sa duha ka semana paghimo og usa ka espesyal nga paningkamot sa paglig-on sa imong relasyon diha sa usa ka sakop sa pamilya sa pagpakita og gugma pinaagi sa imong mga binuhatan. Likayi ang paghukom, pagpanaway, o pagsulti og dili maayo, ug tan-awa ang positibo nga mga kinaiya niana nga sakop sa pamilya. Paghimo og mga sulat sa pagdasig, pag-ampo alang niini nga sakop sa pamilya, pangita og mga paagi nga magmatinabangon, ug isulti ang imong gugma. Ipakigbahin ang imong mga kasinatian ug ang diosnong mga kinaiya nga imong nadiskubrihan niana nga sakop sa pamilya o sa ginikanan o sa lider.

Dugang mga Kasinatian kabahin sa Mithi

Kompletoha ang tulo ka dugang nga mga kasinatian kabahin sa mithi. Ikaw mahimong mopili gikan sa mosunod nga mga opsyon o mosulat og hangtud sa duha nga imong kaugalingon. Ang imong ginikanan o lider kinahanglan gayud nga motugot sa imong mga gisulat sa dili ka pa magsugod. Papirmahi sa imong ginikanan o lider ug butangi og petsa ang matag kasinatian inig kahuman nimo.

Memoryaha ang mga pag-ampo sa sakrament diha sa Doktrina ug mga Pakigsaad 20:77, 79. Panahon sa sakrament, paminaw pag-ayo sa mga pag-ampo ug hunahunaa unsa ang gipasabut sa pagdala nganha sa imong kaugalingon sa ngalan ni Jesukristo ug sa unsang paagi nga ang paghimo niini makaapekto sa imong mga lihok ug mga desisyon. Pagpraktis sa pagtuman sa imong mga pakigsaad sa bunyag. Pagsugod pinaagi sa paghimo og pipila ka butang matag adlaw sa pag-ila ug sa dugang nga pagpalambo sa imong diosnong mga kinaiya ug sa pagtabang kanimo kanunay sa paghinumdom ni Ginoong Jesukristo. Human sa duha ka semana isulat ang imong kasinatian diha sa imong journal.
Ang pagkamasulundon usa ka hiyas sa Manluluwas. Paningkamot nga mahimong mas masulundon ngadto sa imong mga ginikanan. Basaha ang Lucas 2:40–51 ug Juan 6:38. Pagpalambo og usa ka sundanan sa pagkamasulundon samtang ikaw mohimo og espesyal nga paningkamot sa pagtratar sa imong mga ginikanan uban sa pagtahud ug pagkamabination ug buhata unsa ang ipabuhat sa imong mga ginikanan nga dili na kinahanglan nga pahinumduman pa. Human sa duha ka semana isulat diha sa imong journal kon sa unsang paagi nga ang pagkahimong mas masulundon nakaaghat kanimo nga ganahang mopadayon sa pagbuhat sa ingon ug sa unsang paagi nga nakatabang kini kanimo nga masabtan ang imong diosnong kinaiya ug ang balaanong mga tahas sa mga inahan ug mga amahan.
Palamboa ang imong diosnong mga kinaiya. Basaha ang Mateo 5:9; Juan 15:12; Mga Taga-Galacia 5:22–23; Mga Taga-Colosas 3:12–17; 1 Juan 4:21; ug Moroni 7:44–48. Memoryaha ang imong paborito nga bersikulo gikan sa usa niini nga mga tudling. Ilha ang diosnong mga kinaiya nga gihisgutan niining tanang mga kasulatan ug ilista kini sa imong journal. Pagpili og usa ka kinaiya, ug sulod sa duha ka semana paningkamot sa paghimo niini nga kabahin sa imong matag adlaw nga kinabuhi. Isulat ang imong kauswagan ug mga kasinatian diha sa imong journal.
Pagkat-on sa kahulugan sa pulong nga tigpasiugda sa kalinaw. Dayon pangitaa ug basaha ang lima ka mga kasulatan nga nagtudlo mahitungod sa mga tigpasiugda sa kalinaw. Magmahimong usa ka ehemplo sa tigpasiugda sa kalinaw diha sa inyong panimalay ug sa eskwelahan samtang ikaw maglikay sa pagpanaway, pagreklamo, o pagsulti og dili maayong butang ngadto o bahin sa uban. Pag-ampo matag buntag ug gabii ngadto sa Langitnong Amahan alang sa panabang sa paghimo niini. Human sa duha ka semana isulat diha sa imong journal kon unsa nga bag-ong mga kinaiya ang gusto nimong palamboon, kon sa unsang paagi nga ang pagkahimong tigpasiugda sa kalinaw nahimong kabahin sa imong diosnong kinaiya, ug unsaon nimo sa pagpadayon nga mahimong tigpasiugda sa kalinaw.

Kinaugalingon nga mga Kasinatian kabahin sa Mithi

Proyekto kabahin sa Mithi

Human nimo makompleto ang unom ka kasinatian kabahin sa mithi sa diosnong kinaiya, paghimo og usa ka proyekto nga makatabang kanimo sa paggamit sa unsay imong nakat-unan. Kini kinahanglan nga usa ka mahinungdanon nga paningkamot nga molungtad sa dili mominus napulo ka oras sa pagkompleto. Sa mainampoong paagi tinguhaa ang giya sa Espiritu Santo sa pagpili og usa ka makahuluganon nga proyekto.

Paaprubahi sa imong ginikanan o sa lider ang proyekto sa dili ka pa magsugod. Pagsulat og usa ka pagtimbang-timbang inig kahuman nimo. Sa ubos mao ang pipila ka mga ideya alang sa usa ka proyekto kabahin sa mithi.

Pagpalambo og usa ka kahanas nga imong magamit sa imong umaabut nga panimalay, sama sa pagluto, pagpanahi, pagpang-ayo, paghan-ay o pagdesinyo. Itudlo kana nga kahanas ngadto sa usa ka tawo, ug ipasabut kon sa unsang paagi nga ang pagtukod og balay sa kahusay (tan-awa sa D&P 109:8) maoy usa sa imong diosnong mga tahas.
Alang sa dugay-dugay nga tagal sa panahon, pagserbisyo og usa ka tawo nga nanginahanglan, sama sa usa ka batan-ong inahan, usa ka tawo nga may kakulangan, o usa ka tigulang nga tawo. Isulat sa imong journal kon sa unsang paagi nga ang imong pagserbisyo nakatabang kanimo nga maila ang diosnong kinaiya diha sa imong kaugalingon ug sa uban.
Ilista ang diosnong mga hiyas ug mga tahas sa mga babaye ingon nga gitudlo diha sa “Ang Pamilya: Usa ka Pamahayag ngadto sa Kalibutan” (tan-awa sa pahina 101), ug pagbuhat og usa ka proyekto nga makatabang kanimo nga makat-on og dugang mahitungod sa usa niini nga mga tahas.
Gamit ang kahanas sa arts o handicraft nga imong nakat-unan, paghimo og butang alang sa imong panimalay sa karon ug sa umaabut. Isulat diha sa imong journal kon sa unsang paagi nga ang pagkamamugnaon nahimong bahin sa imong diosnong kinaiya ug sa unsa nga paagi nga ang pagpakigbahin sa imong pagkamamugnaon nakapanalangin sa uban.
Ang pagtrabaho nga nahiuyon sa uban usa ka diosnong kinaiya (tan-awa sa D&P 38:27). Pagbuhat og usa ka proyekto nga makapasiugda sa panaghiusa sa imong mga paryente, sa imong eskwelahan, o sa imong komunidad. Isulat diha sa imong journal kon sa unsang paagi nga ikaw makahimo og kalainan kon makighiusa ka og trabaho sa uban.

Ang akong proyekto mao:

Ang akong plano sa pagbuhat sa akong proyekto mao:

Pagtugot

Gibana-bana nga petsa nga mahuman

Ang akong pagtimbang-timbang sa proyekto mao ang (ilakip kon unsa ang imong gibati ug sa unsang paagi nga ang imong pagsabut sa diosnong kinaiya nadugangan):

Pirma sa ginikanan o lider

Petsa

Mga oras nga gigahin