Maayong mga Buhat

Busa, himoa nga ang inyong kahayag mohayag sa atubangan niini nga mga katawhan, aron sila makakita sa inyong maayo nga mga buhat ug himayaon ang inyong Amahan kinsa anaa sa langit (3Nephi 12:16).

Ako motabang sa uban ug motukod sa gingharian pinaagi sa matarung nga pagserbisyo.

Gikinahanglan nga mga Kasinatian kabahin sa Mithi

Kompletoha ang mosunod nga tulo ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

1. Pagkat-on ngano nga ang pagserbisyo usa ka sukaranan nga baruganan sa ebanghelyo. Basaha ang Mateo 5:13–16; 25:34–40; Mga Taga-Galacia 6:9–10; Santiago 1:22–27; Mosiah 2:17; 4:26; ug 3 Nephi 13:1–4. Ang uban sa kasagaran mohatag og serbisyo nga dili nimo mamatikdan, sama sa pag-andam og pagkaon, pagbasa o pagpaminaw sa mas manghod nga mga bata, pagsursi sa mga sinina, o pagtabang og usa ka igsoon. Sulod sa duha ka semana isulat sa imong journal ang wala namatikdi nga mga buhat sa pagserbisyo nga gihimo sa imong mga sakop sa pamilya ug sa uban. Pasalamati ang ilang pagserbisyo sa makahuluganon nga paagi.

2. Ang pagserbisyo usa ka mahinungdanong baruganan diha sa pagpuyo sa pamilya. Tabang sa pagplano sa mga menu sa pamilya, pagkuha sa pagkaon, ug pag-andam sa ubang mga pagkaon sulod sa duha ka semana. Nianang higayona tabangi ang imong pamilya nga magkapundok sa pagpangaon. Ireport sa imong klase unsa ang imong nakat-unan.

3. Basaha ang Mosiah 18:7–10, ug sa imong journal paglista og tulo ka mga paagi nga ikaw makahupay sa uban o makatabang kanila sa ilang mga gisagubang. Buhata ang mga butang diha sa imong listahan, ug sultihi ang usa ka sakop sa pamilya o lider mahitungod sa kasinatian ug sa unsang paagi nga nausab ang imong kinaiya ug panabut.

Dugang mga Kasinatian kabahin sa Mithi

Kompletoha ang tulo ka dugang nga mga kasinatian kabahin sa mithi. Ikaw mahimong mopili gikan sa mosunod nga mga opsyon o mosulat og hangtud sa duha nga imong kaugalingon. Ang imong ginikanan o lider kinahanglan gayud nga motugot sa imong mga gisulat sa dili ka pa magsugod. Papirmahi sa imong ginikanan o lider ug butangi og petsa ang matag kasinatian inig kahuman nimo.

4. Pagtudlo og leksyon mahitungod sa pagserbisyo diha sa family home evening o sa laing kahimtang. Gamita ang mga hulagway, musika, mga ehemplo, o mga pasundayag diha sa imong leksyon. Mahimo usab nimong gamiton ang manwal nga Pagtudlo, Walay Labaw ka Mahinungdanon nga Tawag isip usa ka kapanguhaan.

5. Basaha ang Doktrina ug mga Pakigsaad 58:26–28. Paghunahuna og mga paagi nga ang usa ka batan-ong babaye, ingon man usab ang usa ka asawa ug inahan, makagamit niini nga kasulatan diha sa iyang pamilya. Pagpalambo og usa ka sundanan sa pagserbisyo diha sa imong kinabuhi pinaagi sa pagpili og usa ka sakop sa pamilya nga imong matabangan. Sebisyohi kanang tawhana sulod sa dili mominus usa ka bulan. Isulat diha sa imong journal ang imong mga binuhatan ug mga pagbati kon sa unsang paagi kini makapalambo sa imong relasyon niana nga tawo.

6. Paggahin og dili mominus tulo ka mga oras sa paghatag og serbisyo sa dili nimo kapamilya. Hangyoa ang imong presidente sa Relief Society sa ward o branch o sa usa ka lider sa komunidad alang sa mga sugyot sa pagserbisyo. Pananglitan, ikaw mahimong moatiman sa mga bata samtang ang mga ginikanan manambong sa templo; mangolekta, manghimo, o mang-ayo sa mga dulaan o mga kadulaan alang sa nursery; modawat og buluhaton sa paglimpyo sa meetinghouse; o mohimo og mga buluhaton o mobasa ngadto sa tawo nga naglubog na lang o sa uban nga nanginahanglan. Isulat diha sa imong journal ang mga reaksyon sa tawo nga imong giserbisyohan ug ang posible nga mga tumong alang sa umaabut nga mga oportunidad sa pagserbisyo.

7. Pinaagi sa imong maayong mga buhat, ang uban makakita sa imong ehemplo ug tingali gusto nga makat-on pa og dugang mahitungod sa ebanghelyo. Pag-ampo alang sa usa ka misyonaryo nga kasinatian. Basaha ang Mateo24:14; 28:19; ug Doktrina ug mga Pakigsaad 88:81. Pagdapit og usa ka higala kinsa dili miyembro sa Simbahan o usa ka tawo kinsa dili kaayo aktibo sa pag-uban kanimo ngadto sa miting o kalihokan sa Simbahan. Ipaila-ila ang imong higala ngadto sa uban, ug siguroha nga siya maapil sa kalihokan. Ipakigbahin ang imong pagpamatuod sa ebanghelyo, ug dapita siya sa pagbalik pag-usab.

Kinaugalingon nga mga Kasinatian kabahin sa Mithi

Proyekto kabahin sa Mithi

Human nimo makompleto ang unom ka kasinatian kabahin sa mithi sa maayong mga buhat, paghimo og usa ka proyekto nga makatabang kanimo sa paggamit sa unsay imong nakat-unan. Kini kinahanglan nga usa ka mahinungdanon nga paningkamot nga molungtad sa dili mominus napulo ka oras sa pagkompleto. Sa mainampoong paagi tinguhaa ang giya sa Espiritu Santo sa pagpili og usa ka makahuluganon nga proyekto.

Paaprubahi sa imong ginikanan o lider ang proyekto sa dili ka pa magsugod. Pagsulat og usa ka pagtimbang-timbang inig kahuman nimo. Sa ubos mao ang pipila ka mga ideya alang sa usa ka proyekto kabahin sa mithi.

• Tabang sa pagplano ug pag-apil sa usa ka proyekto sa pagpanglimpyo o pagpaanindot sa imong komunidad.

• Pangandam nga mahimong usa ka tigpaanindot sa panimalay (homemaker) pinaagi sa pagkolekta og mga resipe, pagpamalit og pagkaon, ug pag-andam og pagkaon alang sa imong pamilya.

• Trabaho uban sa usa ka sakop sa pamilya sa pagkolekta sa mga pangalan sa ubang patay nga mga paryente kinsa dili mga sakop sa Simbahan. Pangitaa ang mga petsa sa ilang pagkatawo ug sa pagkamatay ug iandam ang ilang mga pangalan aron dad-on ngadto sa templo. Tabang sa pagplano og biyahe ngadto sa templo ug ipahigayon ang mga bunyag alang niadtong mga paryente.

• Pangandam sa pagserbisyo sa uban pinaagi sa pagdawat og pagbansay alang sa usa ka kahanas nga magamit sa mga sitwasyon nga emerhensya, sama sa first aid, pagpabalik sa panimuot, o mga kahanas sa pagluwas sa kinabuhi.

• Pagserbisyo sa uban. Boluntaryo diha sa komunidad, pagpangolekta og mga butang aron matubag ang mga tabang nga gikinahanglan, paggahin og sobrang panahon sa pagtabang og bata o pag-atiman sa tigulang, o pagtudlo sa eskwelahan o diha sa imong komunidad.

Ang akong proyekto mao ang:

Ang akong plano sa pagbuhat sa akong proyekto mao ang:

Pagtugot

Gibana-bana nga petsa nga mahuman

Ang akong pagtimbang-timbang sa proyekto mao ang (ilakip kon unsa ang imong gibati ug sa unsang paagi nga ang imong pagsabut sa maayong mga buhat nadugangan):

Pirma sa ginikanan o lider

Petsa

Mga oras nga gigahin