Kahibalo

Pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo (D&P 88:118).

Ako magpadayon sa pagpangita og mga kahigayunan alang sa pagkat-on ug pagtubo.

Gikinahanglan nga mga Kasinatian kabahin sa Mithi

Kompletoha ang mosunod nga tulo ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

1. Pagkat-on mahitungod sa kamahinungdanon sa pag-angkon og kahibalo pinaagi sa pagbasa sa Mga Proverbio 1:5; 4:7; 2 Nephi 28:30; ug Doktrina ug mga Pakigsaad 88:78–80, 118; 90:15; 130:18–19; 131:6. Hunahunaa pag-ayo nganong ikaw kinahanglan nga makaangkon og kahibalo ug panabut mahitungod kon sa unsang paagi nga ang mga baruganan sa ebanghelyo mahimong magamit sa imong kinabuhi karon ug sa umaabut nga panimalay ug pamilya. Isulat diha sa imong journal unsa ang imong nakat-unan mahitungod sa kahibalo, ug hisguti kini uban sa usa ka sakop sa pamilya o lider sa Young Women.

2. Sa imong journal ilista ang mga talento nga anaa kanimo ug ang uban nga imong gustong palamboon. Basaha ang Mateo 25:14–30. Pagkat-on og bag-ong kahanas o talento nga makatabang kanimo sa pag-atiman sa imong kaugalingong umaabut nga pamilya o panimalay (pananglit, pagtugtog sa piano, pagkanta, pagbadyet, pagdumala sa oras, pagpangluto, pagpanahi, o pag-atiman sa bata). Ipakigbahin uban sa imong pamilya, klase, o lider sa Young Women unsa ang imong nakat-unan.

3. Memoryaha ang Artikulo sa Hugot nga Pagtuo numero trese ug i-recite kini ngadto sa usa ka ginikanan, usa ka lider, o sa laing hamtong. Dayon bisitaha ang usa ka museum o exhibit o tambong og usa ka pasundayag nga naglangkob og sayaw, musika, speech, o drama. Gamit kini nga artikulo sa hugot nga pagtuo isip giya, timbang-timbanga ang unsay imong nakita ug nadungog. Isulat ang imong mga hunahuna diha sa imong journal kon sa unsa nga paagi nimo magamit kini nga artikulo sa hugot nga pagtuo isip giya alang sa tanan nimong gibuhat aron ang Espiritu Santo mahimo nimong kanunay nga kauban. Ipakigbahin kadto nga mga hunahuna ngadto sa usa ka ginikanan o lider.

Dugang mga Kasinatian kabahin sa Mithi

Kompletoha ang tulo ka dugang nga mga kasinatian kabahin sa mithi. Ikaw mahimong mopili gikan sa mosunod nga mga opsyon o mosulat og hangtud sa duha nga imong kaugalingon. Ang imong ginikanan o lider kinahanglan gayud nga motugot sa imong mga gisulat sa dili ka pa magsugod. Papirmahi sa imong ginikanan o lider ug butangi og petsa ang matag kasinatian inig kahuman nimo.

4. Pagpili og usa ka baruganan sa ebanghelyo nga imong gustong masabtan pag-ayo (pananglitan, hugot nga pagtuo, paghinulsol, gugma nga putli, mahangturong mga pamilya, o mga pakigsaad sa bunyag). Basaha ang mga kasulatan ug ang mga pulong sa mga propeta sa ulahing mga adlaw nga may kalabutan sa baruganan. Pag-andam og lima ka minuto nga pakigpulong kabahin niana nga hilisgutan ug ihatag ang pakigpulong diha sa sakrament miting, sa usa ka miting sa Young Women, ngadto sa imong pamilya, o nganha sa imong klase. Isulat diha sa journal kon unsaon nimo sa paggamit kini nga baruganan sa ebanghelyo diha sa imong kinabuhi.

5. Pagkat-on mahitungod sa usa ka dapit sa trabaho o pagserbisyo nga makapainteresado kanimo. Pakigsulti ngadto sa tawo nga nagtrabaho niana nga natad ug susiha kon unsa ang mga responsibilidad niana nga tawo sa trabaho, unsa nga pagbansay o edukasyon ang gikuha sa tawo aron sa paghimo sa trabaho, ug unsa nga mga kontribusyon ang nahimo sa trabaho niining tawhana ngadto sa katilingban. Isulat ang imong mga nakuha nga impormasyon diha sa imong journal.

6. Memoryaha ang duha sa imong paborito nga mga himno gikan sa hymnbook. Pagkat-on sa husto nga sundanan sa pag-conduct sa mga himno (tan-awa sa Hymns, 383–85) ug dayon pag-conduct niini sa dili mominus sa duha ka higayon atol sa family home evening, sa Young Women o sa laing miting sa Simbahan, o sa seminary. Basaha ang mga kasulatan nga gilista sa ubos sa matag himno.

7. Sa Young Women camp makakat-on ka og mga kahanas sa first aid, kasiguroan, sanitasyon, ug pagpakabuhi. Ribyuha kini nga mga panudlo diha sa imong Young Women Camp Manual ug isulat diha sa imong journal kon unsaon nimo sa paggamit niini diha sa imong panimalay aron sa pagpabilin sa imong pamilya nga luwas. Paghimo og usa ka lista sa nag-unang mga suplay nga gikinahanglan sa imong pamilya sa higayon nga adunay usa ka emerhensya. Pagtudlo og usa ka leksyon sa family home evening o pagpakigbahin sa usa ka lider sa Young Women kon unsay imong nakat-unan ug unsa nga dugang nga mga kahanas nga ganahan nimong makat-unan aron mahimong andam alang sa mga emerhensya.

Kinaugalingon nga mga Kasinatian kabahin sa Mithi

Proyekto kabahin sa Mithi

Human nimo makompleto ang unom ka kasinatian kabahin sa mithi sa kahibalo, paghimo og usa ka proyekto nga makatabang kanimo sa paggamit sa unsay imong nakat-unan. Kini kinahanglan nga usa ka mahinungdanon nga paningkamot nga molungtad sa dili mominus napulo ka mga oras sa pagkompleto. Sa mainampoong paagi tinguhaa ang giya sa Espiritu Santo sa pagpili og usa ka makahuluganon nga proyekto.

Paaprubahi sa imong ginikanan o lider ang proyekto sa dili ka pa magsugod. Pagsulat og usa ka pagtimbang-timbang inig kahuman nimo. Sa ubos mao ang pipila ka mga ideya alang sa usa ka proyekto kabahin sa mithi.

• Pagkat-on unsaon sa pag-organisar, paglimpyo, ug pag-atiman og usa ka panimalay gikan sa imong inahan, apohang babaye, o laing babaye nga imong gidayeg. Dayon gamita ang unsay imong nakat-unan diha sa imong panimalay.

• Pangandam alang sa mas taas nga edukasyon ug pag-angkon og mga kahanas nga pinangita pinaagi sa pagkat-on mahitungod sa mga kinahanglanon sa pagsulod sa kolehiyo o trade nga eskwelahan, mga scholarship, bayranan sa eskwelahan ug ubang mga galastohan. Aplay alang sa pagsulod kon angay.

• Basaha ang Doktrina ug mga Pakigsaad 89. Hunahunaa kon unsay imong mahimo aron mas himsog sa pisikal. Pauswaga ang imong kahimsog pinaagi sa pagpalambo ug pagpatuman sa usa ka regular nga programa sa pangpaugnat sa kusog ug sa pagkat-on sa pagluto ug kaon og mga pagkaon kabahin sa usa ka makapahimsog nga dyeta.

• Pagkat-on kalabut sa husto nga pag-atiman sa sinina, lakip na kon unsaon sa paglaba, pagplantsa, ug paghimo og yano nga mga pag-ayo ug mga pag-usab. Gamita ang mga kahanas nga imong nakat-unan pinaagi sa pag-atiman sa imong sinina.

• Pagtrabaho uban sa imong inahan, apohan nga babaye, o sa usa ka babaye diha sa imong ward o branch, bansaya pag-ayo ang mga kahanas sa pag-atiman sa panimalay nga iyang gitudlo kanimo.

Ang akong proyekto mao:

Ang akong plano sa pagbuhat sa akong proyekto mao ang:

Pagtugot

Gibana-bana nga petsa nga mahuman

Ang akong pagtimbang-timbang sa proyekto mao ang (ilakip kon unsa ang imong gibati ug sa unsang paagi nga ang imong pagsabut sa kahibalo nadugangan):

Pirma sa ginikanan o lider

Petsa

Mga oras nga gigahin