Tagsa-tagsa nga Bili

Hinumdumi ang bili sa mga kalag mahinungdanon sa panan-aw sa Dios (D&P 18:10).

Ako adunay walay katapusan nga bili uban sa akong kaugalingong balaan nga misyon, nga akong paningkamutan nga matuman.

Gikinahanglan nga mga Kasinatian kabahin sa Mithi

Kompletoha ang mosunod nga tulo ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

Ikaw anak nga babaye sa Langitnong Amahan, kinsa nakaila kanimo ug nahigugma kanimo. Basaha ang Salmo 8:4–6; Jeremias 1:5; Juan 13:34; Doktrina ug mga Pakigsaad 18:10; Abraham 3:22–23; ug Joseph Smith—Kasaysayan 1:1–20. Isulat diha sa imong journal kon sa unsang paagi nga kining mga kasulatan nagtudlo kanimo nga ang Langitnong Amahan nakaila kanimo, nahigugma kanimo, ug naghunahuna kanimo.
Pagkat-on kalabut sa kamahinungdanon sa patriyarkal nga mga panalangin pinaagi sa pagtuon kalabut niini diha sa Matinud-anon sa Tinuohan ug sa bag-ohay nga mga pakigpulong sa komperensya. Susiha nganong gihatag kini ug kinsa ang makahatag niini. Hisguti uban sa usa ka ginikanan o lider sa Simbahan kon unsaon sa pagpangandam aron makadawat og patriyarkal nga panalangin ug sa unsa nga paagi kini makatudlo kanimo mahitungod sa imong bili ug pagkatawo ug mahimong usa ka giya sa tibuok nimong kinabuhi. Kon ikaw wala pa makadawat sa imong panalangin, pangandam sa pagdawat niini.
Basaha ang Doktrina ug mga Pakigsaad 18:10 ug 121:45. Buhata ang tanan nga imong mahimo sa pagdasig sa uban ug sa pagpabati kanila nga sila bililhon. Matag adlaw sulod sa duha ka semana matikdi ang mahinungdanong mga kinaiya ug mga hiyas sa uban. Ilha kini pinaagi sa pagsulti o sa pagsulat. Sa imong journal isulat unsa ang imong nakat-unan mahitungod sa bili sa tagsa-tagsa ka mga tawo ug sa unsang paagi nga ang imong kaugalingong pagsalig mitubo sa dihang ikaw midasig sa uban.

Dugang mga Kasinatian kabahin sa Mithi

Kompletoha ang tulo ka dugang nga mga kasinatian kabahin sa mithi. Ikaw mahimong mopili gikan sa mosunod nga mga opsyon o mosulat og hangtud sa duha nga imong kaugalingon. Ang imong ginikanan o lider kinahanglan gayud nga motugot sa imong mga gisulat sa dili ka pa magsugod. Papirmahi sa imong ginikanan o lider ug butangi og petsa ang matag kasinatian inig kahuman nimo.

Nag-andam ka na karon sa pagtuman og usa ka talagsaon nga misyon dinhi sa yuta. Basaha ang Doktrina ug mga Pakigsaad 88:119. Sa imong journal paghimo og lista sa imong mga pangandoy ug mga damgo alang sa imong umaabut nga panimalay, pamilya, ug edukasyon ug pipila ka mahinungdanong mga butang nga imong gustong makab-ot sa imong kinabuhi, lakip ang pagkahimong asawa ug inahan. Dayon pagsulat og usa ka plano nga makatabang kanimo nga makab-ot ang imong mga tumong. Ipakigbahin kini nga plano uban sa usa ka sakop sa pamilya, lider, o higala.
Apil sa usa ka pasundayag sa sayaw, speech, musika, o drama sa eskwelahan, diha sa inyong komunidad, o sa simbahan. Sa unsang paagi nga ang imong pag-apil niini nga kalihokan nakapalig-on sa imong mga pagbati kabahin sa tagsa-tagsa nga bili ug pagsalig sa kaugalingon? Isulat ang imong mga hunahuna diha sa imong journal.
Kon moapil ka sa family history, makasabut ka sa imong pagkatawo ug sa tagsa-tagsa nga bili. Bisitaha ang inyong buhi nga mga paryente aron makahibalo og daghang mga impormasyon mahitungod sa imong family history kutob sa mahimo. Dayon kompletoha ang pedigree chart sa imong pamilya ug ilista ang mga ordinansa sa templo nga nahuman na alang sa matag tawo.
Ang Langitnong Amahan mihatag kanimo og espesyal nga mga gasa. Basaha ang 1 Mga Taga-Corinto 12:4–12; 13; Moroni 7:12–13; 10:8–18; ug Doktrina ug mga Pakigsaad 46:11–26. Hangyoa ang usa ka sakop sa pamilya, usa ka lider sa Young Women, ug usa ka higala sa pagsulat og positibo nga mga kinaiya nga gihatag sa Ginoo kanimo. Ilista ang imong mga gasa diha sa imong journal, ug isulat kon unsaon nimo nga makapadayon sa pagpalambo niini nga mga gasa ug mogamit niini sa pagserbisyo sa imong pamilya ug sa uban.

Kinaugalingon nga mga Kasinatian kabahin sa Mithi

Proyekto kabahin sa Mithi

Human nimo makompleto ang unom ka kasinatian kabahin sa mithi sa tagsa-tagsa nga bili, paghimo og usa ka proyekto nga makatabang kanimo sa paggamit sa unsay imong nakat-unan. Kini kinahanglan nga usa ka mahinungdanon nga paningkamot nga molungtad og dili mominus napulo ka mga oras sa pagkompleto. Sa mainampoong paagi tinguhaa ang giya sa Espiritu Santo sa pagpili og usa ka makahuluganon nga proyekto.

Paaprubahi sa imong ginikanan o lider ang proyekto sa dili ka pa magsugod. Pagsulat og usa ka pagtimbang-timbang inig kahuman nimo. Sa ubos mao ang pipila ka mga ideya alang sa usa ka proyekto kabahin sa mithi.

Ikaw adunay talagsaon ug balaan nga misyon nga ipahigayon dinhi sa yuta ug napanalanginan og mga talento aron sa pagtuman niini nga misyon. Sa imong pagkompleto sa usa sa mosunod nga mga proyekto, imong masaksihan ang bili ug ang kontribusyon sa uban ug makita usab ang impluwensya nga imong mahimo diha sa mga kinabuhi sa uban. Ipahayag ang imong pasalamat ngadto niadtong imong gikauban og trabaho, ug isulat ang imong mga kasinatian diha sa imong journal.

Hapniga ang imong personal o family history gamit ang mga sinulat diha sa journal, mga litrato, ug mahinungdanong mga papeles.
Ipakigbahin ang usa sa imong mga gasa pinaagi sa paghatag og instruksyon o pagtudlo sa usa ka tawo sa akademik nga subject, musika, sport, o sa usa ka kahanas sa arts.
Pagbuhat og usa ka proyekto sa pagpalambo sa kahimtang sa pagpuyo sa usa ka tawo nga nanginahanglan.
Pagdumala o apil sa usa ka choir sa mga kabatan-onan, usa ka dula, usa ka pasundayag sa talento, o sa usa ka exhibit sa arts.
Pagkat-on og kahanas nga pinangita aron makatabang kanimo karon o sa umaabut nga trabaho.

Ang akong proyekto mao ang:

Ang akong plano sa pagbuhat sa akong proyekto mao ang:

Pagtugot

Gibana-bana nga petsa nga mahuman

Ang akong pagtimbang-timbang sa proyekto mao ang (ilakip kon unsa ang imong gibati ug sa unsang paagi nga ang imong pagsabut sa tagsa-tagsa nga bili nadugangan):

Pirma sa ginikanan o lider

Petsa

Mga oras nga gigahin