Pagpili ug Pagkamay-tulubagon

Magpili kamo niining adlawa kon kinsa ang inyong alagaran; … apan alang kanako ug sa akong balay, kami magaalagad sa Ginoo (Josue 24:15).

Ako mopili sa maayo kay sa dautan ug manubag sa akong mga desisyon.

Gikinahanglan nga mga Kasinatian kabahin sa Mithi

Kompletoha ang mosunod nga tulo ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

1. Ang usa ka anak nga babaye sa Dios makahimo og maalamon nga mga desisyon ug makasulbad sa mga problema. Basaha ang 1 Nephi 15:8; 2 Nephi 32:3; Alma 34:19–27; Ether 2–3; ug Doktrina ug mga Pakigsaad 9:7–9. Pagsunod og usa ka sundanan sa regular nga pagtuon sa kasulatan ug pag-ampo aron makadawat og tabang sa paghimo og personal nga mga desisyon sama sa pagpili og maayong mga higala, pagkamabination ngadto sa uban, pagmata og sayo, o ubang mga desisyon. Hisguti uban sa usa ka ginikanan o lider kon sa unsang paagi nga ang kanunayng pagtuon sa kasulatan ug pag-ampo nakatabang kanimo sa paghimo og sakto nga mga desisyon.

2. Basaha ang pamplet nga Alang sa Kalig-on sa mga Kabatan-onan. Ilista sa imong journal ang matag sumbanan sa matarung nga kinaiya nga gilatid sa pamplet ug irekord ngano nga mahinungdanon ang pagsunod niadto nga mga sumbanan. Pagpraktis sa pagsunod sa matarung nga mga sumbanan pinaagi sa pagpili og tulo ka mga sumbanan nga imong kinahanglan nga palamboon. Ikaw mahimong mopili nga mas mapilion mahitungod sa telebisyon, musika, mga libro, o ubang media, o ikaw mahimong mopalambo sa imong kaligdong, sinultihan, o pagkamatinuoron. Human sa tulo ka semana, ipakigbahin ang imong kalamboan uban sa imong pamilya, sa imong klase, o sa usa ka lider.

3. Ang kabubut-on, o ang abilidad sa pagpili, usa sa labing mahinungdanon nga mga gasa sa Dios ngadto sa Iyang mga anak. Basaha ang mahitungod sa kabubut-on diha sa Josue 24:15; 2 Nephi 2; ug Doktrina ug mga Pakigsaad 82:2–10. Uban sa usa ka ginikanan o lider, hisguti ang mga panalangin ug mga responsibilidad sa kabubut-on. Isulat sa imong journal ang imong pagsabut sa kabubut-on ug sa mga sangputanan sa mga pagpili ug mga aksyon.

Dugang mga Kasinatian kabahin sa Mithi

Kompletoha ang tulo ka dugang nga mga kasinatian kabahin sa mithi. Ikaw mahimong mopili gikan sa mosunod nga mga opsyon o mosulat og hangtud sa duha nga imong kaugalingon. Ang imong ginikanan o lider kinahanglan gayud nga motugot sa imong mga gisulat sa dili ka pa magsugod. Papirmahi sa imong ginikanan o lider ug butangi og petsa ang matag kasinatian inig kahuman nimo.

4. Basaha ang mahitungod sa paghinulsol diha sa Isaias 1:18; Alma 26:22; 34:30–35; Moroni 8:25–26; ug Doktrina ug mga Pakigsaad 19:15–20; 58:42–43. Isulat diha sa imong journal unsa ang gipasabut sa paghinulsol nganha kanimo. Tun-i ang proseso sa paghinulsol, pag-ampo alang sa giya, ug gamita ang mga baruganan sa paghinulsol diha sa imong kinabuhi.

5. Ang Espiritu Santo motabang kanimo sa paghimo og sakto nga mga pagpili. Uban sa usa ka ginikanan, lider, o higala, pagkat-on og dugang mahitungod sa Espiritu Santo pinaagi sa pagbasa ug paghisgut sa Ezequiel 36:26–27; Juan 14:26; 16:13; Mga Taga-Galacia 5:22–25; 2 Nephi 32:5; Moroni 10:4–5; ug Doktrina ug mga Pakigsaad 11:12–14. Dayon isulat diha sa imong journal kon sa unsang paagi nga ang Espiritu Santo makatabang kanimo sa paghimo og maayong mga desisyon sa matag adlaw nimong kinabuhi. Pag-ampo ug pagpuyo nga takus sa pagpakig-uban sa Espiritu Santo.

6. Tun-i ang tema sa Young Women ug unsay gitudlo niini kanimo kon kinsa ka, unsay imong angay nga buhaton, ug nganong kinahanglan nga imo kining buhaton. Ilista diha sa imong journal kon unsa ang imong buhaton matag adlaw kabahin sa kaligdong, pakig-date, ug sa media aron mahimong limpyo sa moralidad ug takus nga mosulod sa templo. Isulat sa imong journal kon sa unsang paagi nga kini nga mga pagpili makatabang kanimo sa pagpabilin nga gawasnon ug malipayon.

7. Ang paghimo og mga pagpili usa ka bahin sa plano sa Langitnong Amahan alang kanato. Basaha ang Moises 4:1–4; 7:32; ug 2 Nephi 9:51. Paghimo og usa ka sundanan sa maalamong pagdumala sa kwarta pinaagi sa paghimo og badyet alang sa pagtigum ug paggasto sa kwarta, lakip na sa pagbayad sa ikapulo. Gasto sumala sa imong badyet sulod sa dili mominus tulo ka bulan. Paghimo og mga prayoridad nga makapahimo kanimo sa pagtubag sa imong labing importante nga mga panginahanglan sa dili pa magtagbaw sa imong mga gusto. Isulat diha sa imong journal kon unsay imong nakat-unan ug kon sa unsang paagi nga ang pagsunod niini nga mga sundanan mopadayon sa pagpanalangin sa imong kinabuhi.

Kinaugalingon nga mga Kasinatian kabahin sa Mithi

Proyekto kabahin sa Mithi

Human nimo makompleto ang unom ka kasinatian kabahin sa mithi sa pagpili ug pagkamay-tulubagon, paghimo og usa ka proyekto nga makatabang kanimo sa paggamit sa unsay imong nakat-unan. Kini kinahanglan nga usa ka mahinungdanon nga paningkamot nga molungtad sa dili mominus napulo ka oras sa pagkompleto. Sa mainampoong paagi tinguhaa ang giya sa Espiritu Santo sa pagpili og usa ka makahuluganon nga proyekto.

Paaprubahi sa imong ginikanan o lider ang proyekto sa dili ka pa magsugod. Pagsulat og usa ka pagtimbang-timbang inig kahuman nimo. Sa ubos mao ang pipila ka mga ideya alang sa usa ka proyekto kabahin sa mithi.

• Gamit ang Alang sa Kalig-on sa mga Kabatan-onan ug ubos sa direksyon sa imong mga ginikanan o mga lider, pag-organisar o apil sa usa ka grupo sa paghisgut-hisgut, fashion show, o laing kalihokan sa pagtabang kanimo ug sa ubang kabatan-onan sa pagsunod sa mga sumbanan sa Ginoo.

• Ubos sa direksyon sa inyong mga ginikanan o mga lider, tabang sa pagplano ug sa pagdumala og usa ka sayaw sa kabatan-onan o laing kalihokan nga naghatag og tukmang mga instruksyon sa pagsayaw ug sa maayo nga musika, suga, ug kahimtang.

• Timbang-timbanga ang imong paggamit sa media ug teknolohiya. Paghimo ug pagpatuman og usa ka plano aron mapugngan ang dili maayo nga mga media nga makasulod sa imong panimalay. Siguroha nga ang imong plano nag-awhag og maayo nga paggamit sa telebisyon, mga salida, musika, mga computer, Internet, mga cell phone, ug uban pang mga matang sa media diha sa panimalay. Ipakigbahin ang imong ideya uban sa imong pamilya ug sa uban.

• Pagkat-on og yano nga pag-usab sa sinina ug mga teknik sa pagpang-ayo samtang ikaw mopahiangay sa imong tanang mga sinina ngadto sa mga sumbanan sa tarung nga sininaan.

• Pagkat-on nga mahimong mas hapsay diha sa imong panimalay pinaagi sa pagkompleto og usa ka proyekto sa pagpanglimpyo o pag-organisar. Isulat diha sa imong journal kon sa unsang paagi nga kini nakatabang kanimo sa ubang mga bahin sa imong kinabuhi.

Ang akong proyekto mao ang:

Ang akong plano sa pagbuhat sa akong proyekto mao ang:

Pagtugot

Gibana-bana nga petsa nga mahuman

Ang akong pagtimbang-timbang sa proyekto mao ang (ilakip kon unsa ang imong gibati ug sa unsang paagi nga ang imong pagsabut sa pagpili ug pagkamay-tulubagon nadugangan):

Pirma sa ginikanan o lider

Petsa

Mga oras nga gigahin