Hiyas

Kinsay makakaplag og usa ka babaye nga mahiyason? kay ang iyang bili labaw pa kay sa mahal nga mga bato (Mga Proverbio 31:10).

Ako mangandam sa pagsulod sa templo ug magpabiling putli ug takus.

Ang akong mga hunahuna ug mga binuhatan ibase sa taas nga matarung nga mga sumbanan.

Gikinahanglan nga mga Kasinatian kabahin sa Mithi

Kompletoha ang mosunod nga upat ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

Ang hiyas mao ang sundanan sa hunahuna ug pamatasan ug gibase sa taas nga matarung nga mga sumbanan. Kini naglakip sa kaputli ug kalunsay. Ang gahum sa paglalang og mortal nga kinabuhi maoy usa ka nahimaya nga gahum nga gihatag sa Dios ngadto sa Iyang mga anak. Siya misugo nga kining gahum pagagamiton lamang tali sa usa ka lalaki ug usa ka babaye, nga legal nga naminyo isip bana ug asawa. Tun-i ang kahulugan ug ang kamahinungdanon sa kaputli ug hiyas pinaagi sa pagbasa sa Jacob 2:28; “Ang Pamilya: Usa ka Pamahayag ngadto sa Kalibutan” (tan-awa sa pahina 101); ug sa seksyon kabahin sa sekswal nga kaputli diha sa Alang sa Kalig-on sa mga Kabatan-onan. Basaha usab ang Artikulo sa Hugot nga Pagtuo numero trese ug Mga Proverbio 31:10–31. Sa imong journal, isulat ang gisaad nga mga panalangin sa sekswal nga pagkalimpyo ug pagkalunsay ug sa imong pasalig nga mahimong putli.
Ang mahiyason nga pagpuyo “diha sa tanan nga mga panahon, ug diha sa tanan nga mga butang, ug diha sa tanan nga mga dapit” mopasarang kanimo alang sa makanunayon nga pakig-uban sa Espiritu Santo. Sa diha nga ikaw gibunyagan ug nakumpirmahan, ikaw gihatagan og gasa sa Espiritu Santo aron sa paggiya kanimo sa tanang mga aspeto sa imong kinabuhi. Tungod kay ang Espiritu Santo dili mopuyo sa mahugaw nga mga tabernakulo, ang pagpuyo og mahiyason nga kinabuhi mao ang gikinahanglan sa pagbaton sa pagpakig-uban sa Espiritu Santo ug pagdawat og mga panalangin sa mga ordinansa sa templo. Basaha ang mosunod nga mga pakisayran sa kasulatan ug ilha ang gisaad nga mga panalangin: Juan 14:26–27; 15:26; 2 Nephi 32:1–5; ug Doktrina ug mga Pakigsaad 45:57–59; 88:3–4; 121:45–46. Sa imong journal, isulat unsa ang imong nakat-unan, ug pagsulat kabahin sa usa ka panahon diin ikaw mibati sa paggiya sa Espiritu Santo.
Pangandam aron mahimong takus nga mosulod sa templo ug moapil diha sa mga ordinansa sa templo. Basaha ang Alma kapitulo 5. Paghimo og lista sa mga pangutana nga gipangutana ni Alma. Tubaga ang mga pangutana sa imong kaugalingon, ug paghimo og lista sa mga butang nga imong mahimo ug buhaton aron sa pag-andam sa imong kaugalingon nga mahimong putli ug takus nga mosulod sa templo ug makadawat sa tanang mga panalangin nga gisaad sa atong Langitnong Amahan alang sa Iyang pinalanggang anak nga mga babaye.
Tungod kay ang Manluluwas nahigugma kanimo ug mihatag sa Iyang kinabuhi para kanimo, ikaw mahimong maghinulsol. Ang paghinulsol maoy usa ka buhat sa hugot nga pagtuo kang Jesukristo. Basaha ang Moroni 10:32, ang basahon ni Enos, ug ang seksyon kabahin sa paghinulsol diha sa Alang sa Kalig-on sa mga Kabatan-onan. Ang maulaong sakripisyo sa Manluluwas nakahimo niini nga posible alang kanimo nga mapasaylo sa imong mga sala. Basaha ang mga pag-ampo sa sakrament diha sa Doktrina ug mga Pakigsaad 20:77, 79. Tinguhaa nga moambit sa sakrament sa takus nga paagi matag semana ug pun-a ang imong kinabuhi uban sa mahiyason nga mga kalihokan nga magdala og espiritwal nga gahum. Samtang ikaw naghimo niini, ikaw motubo nga mas lig-on sa imong abilidad sa pagbatok sa pagtintal, paghupot sa mga sugo, ug mahimong mas sama kang Jesukristo. Tinguhaa kon unsa ang imong mahimo sa matag adlaw aron magpabilin nga putli ug takus, ug isulat ang imong plano diha sa imong journal.

Proyekto kabahin sa Mithi

Mahimo kang magsugod niining gikinahanglan nga proyekto kabahin sa mithi bisan unsang orasa.

Ang Manluluwas mipili sa pagpuyo og mahiyason nga kinabuhi. Sunda ang Iyang pahimangno sa “pagkat-on kanako” (D&P 19:23) pinaagi sa pagbasa sa tibuok Basahon ni Mormon: Lain nga Tugon ni Jesukristo. Ipahisama ang mga kasulatan sa imong kinabuhi ug mga kahimtang. Samtang ikaw nagbasa, isulat ang imong mga hunahuna diha sa imong journal. Tan-awa ang ehemplo sa Manluluwas. Unsa man ang gihimo Niya ug niadtong kinsa misunod Kaniya aron sa pagpuyo og mahiyason nga mga kinabuhi? Pagkahuman sa imong pagbasa, isulat ang imong pagpamatuod.

“Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon” (Joseph Smith, sa Pasiuna sa Basahon ni Mormon).

Ang Akong Pagpamatuod kabahin sa Basahon ni Mormon

Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo (Moroni 10:4).

Pirma sa ginikanan o lider

Petsa

Mga oras nga gigahin