Hugot nga Pagtuo

Ang hugot nga pagtuo dili ang pagbaton sa usa ka hingpit nga kasayuran sa mga butang; busa kon kamo adunay hugot nga pagtuo kamo molaum alang sa mga butang diin dili makita, diin mga tinuod (Alma 32:21).

Ako anak nga babaye sa Langitnong Amahan, kinsa nahigugma kanako. Ako adunay hugot nga pagtuo sa Iyang mahangturong plano, nga nagpunting diha kang Jesukristo, ang akong Manluluwas.

Gikinahanglan nga mga Kasinatian kabahin sa Mithi

Kompletoha ang mosunod nga tulo ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

Ang unang baruganan sa ebanghelyo mao ang hugot nga pagtuo diha ni Ginoong Jesukristo. Pagkat-on kabahin sa hugot nga pagtuo gikan sa mga kasulatan ug sa buhi nga mga propeta. Basaha ang Mga Hebreohanon 11; Alma 32:17–43; Ether 12:6–22; ug Joseph Smith—Kasaysayan 1:11–20. Pagbasa og duha ka mga pakigpulong sa kinatibuk-ang komperensya mahitungod sa hugot nga pagtuo. Gamita ang imong kaugalingong hugot nga pagtuo pinaagi sa paghimo og usa ka kinaiya sa pag-ampo sa imong kinabuhi. Sugdi pinaagi sa imong makanunayong mga pag-ampo sa buntag ug gabii. Human sa tulo ka semana sa pagsunod niini nga sundanan, hisguti uban sa usa ka ginikanan o lider unsa ang imong nakat-unan mahitungod sa hugot nga pagtuo ug sa unsang paagi nga ang inadlaw nga personal nga pag-ampo nakapalig-on sa imong pagtuo. Sa imong journal ipahayag ang imong mga pagbati mahitungod sa hugot nga pagtuo ug sa pag-ampo.
Kaplagi ang mga baruganan sa hugot nga pagtuo nga gitudlo sa mga inahan sa batan-ong mga kasundalohan ni Helaman. Basaha ang Alma 56:45–48 ug 57:21. Ribyuha unsa ang gisulti sa “Ang Pamilya: Usa ka Pamahayag ngadto sa Kalibutan” (tan-awa sa pahina 101) mahitungod sa tahas sa usa ka inahan. Kauban ang inahan, apohang babaye, o lider, hisguti ang mga kinaiya sa usa ka babaye nga kinahanglang itudlo ngadto sa mga anak aron makabaton og hugot nga pagtuo ug sa pagbase sa ilang mga desisyon diha sa mga kamatuoran sa ebanghelyo. Sa unsang paagi nga kini nga mga baruganan makatabang kanimo sa imong kinabuhi karon ug makatabang kanimo sa pag-andam nga mahimong usa ka matinud-anong babaye, asawa, ug inahan? Isulat ang imong mga hunahuna ug mga pagbati diha sa imong journal.
Ang pagsunod sa mga baruganan sa ebanghelyo nagkinahanglan og hugot nga pagtuo. Basaha ang mahitungod sa hugot nga pagtuo diha sa Ang Giya ngadto sa mga Kasulatan o sa Matinud-anon sa Tinuohan. Ang hugot nga pagtuo diha sa Manluluwas nga si Jesukristo moresulta ngadto sa paglihok. Pagpili og usa ka baruganan sama sa pag-ampo, ikapulo, pagpuasa, paghinulsol, o pagbalaan sa adlaw nga Igpapahulay. Sa imong kaugalingong panimalay o sa laing kahimtang, pagplano ug ipresentar ang usa ka leksyon sa family home evening kalabut kon sa unsang paagi nga ang hugot nga pagtuo nakatabang kanimo sa pagsunod niana nga baruganan sa ebanghelyo. Kon mahimo, hangyoa ang usa ka sakop sa pamilya sa pagpakigbahin og usa ka kasinatian nga nakapalig-on sa iyang hugot nga pagtuo. Ipakigbahin usab ang imong kaugalingong mga kasinatian. Sa imong journal isulat ang usa niadtong kasinatian ug ihulagway ang imong mga pagbati kalabut sa hugot nga pagtuo.

Dugang mga Kasinatian kabahin sa Mithi

Kompletoha ang tulo ka dugang nga mga kasinatian kabahin sa mithi. Ikaw mahimong mopili gikan sa mosunod nga mga opsyon o mosulat og hangtud sa duha nga imong kaugalingon. Ang imong ginikanan o lider kinahanglan gayud nga motugot sa imong mga gisulat sa dili ka pa magsugod. Papirmahi sa imong ginikanan o lider ug butangi og petsa ang matag kasinatian inig kahuman nimo.

Pagkat-on og dugang mahitungod sa sakrament. Basaha ang mahitungod sa Katapusang Panihapon diha sa Mateo 26:26–28; Marcos 14:22–24; ug Lucas 22:17–20. Paghimo og usa ka sundanan sa pagpamalandong sa panahon sa sakrament pinaagi sa pagpaminaw pag-ayo sa himno ug mga pag-ampo sa sakrament. Hunahunaa kon nganong kita moambit sa pan ug tubig. Human sa tulo ka semana sa pagsunod niini nga sundanan, isulat sa imong journal ang pipila sa mga saad nga imong himoon samtang ikaw moambit sa sakrament ug mohinumdom sa imong mga pakigsaad sa bunyag ug unsay imong buhaton aron matuman kadtong mga saad. Isulat sa imong journal kon sa unsang paagi nga ang imong pagsabut niini nga mga saad nakapalig-on sa imong pagtuo diha sa Manluluwas.
Palamboa ang imong pagsabut mahitungod sa Pag-ula ni Jesukristo pinaagi sa pagbasa sa Isaias 53:3–12; Juan 3:16–17; Mga Taga-Roma 5; 2 Nephi 9:6–7, 21–26; Alma 7:11–13; 34:8–17; ug Doktrina ug mga Pakigsaad 19:15–20. Sa imong journal isulat ang imong mga pagbati mahitungod sa Manluluwas ug unsa ang Iyang nahimo alang kanimo. Ipakigbahin ang imong mga pagbati panahon sa miting sa pagpamatuod.
Dugangi ang imong pagsabut sa plano sa kaluwasan. Mga kapanguhaan alang sa pagtuon naglakip sa 1 Mga Taga-Corinto 15:22; Pinadayag 12:7–9; 2 Nephi 9:1–28; 11:4–7; Doktrina ug mga Pakigsaad 76:50–113; 93:33–34; Moises 4:1–4; ug Abraham 3:24–27. Pagdrowing o pagkuha og usa ka hulagway nga nagpakita sa plano sa kaluwasan, lakip na ang kinabuhi sa wala pa dinhi sa yuta, pagkatawo, mortal nga kinabuhi, kamatayon, paghukom, ug kinabuhi human sa paghukom. Gamit kini nga hulagway, ipasabut ang plano sa kaluwasan nganha sa imong klase, sa imong pamilya, o sa usa ka higala. Hisguti kon sa unsang paagi nga ang kahibalo mahitungod sa plano sa kaluwasan nakaapekto sa imong mga aksyon, nakatabang kanimo nga masabtan ang imong pagkatawo, ug nakapalig-on sa imong pagtuo.
Ang Ginoo misugo kanato sa pagbayad sa ikapulo. Basaha ang Doktrina ug mga Pakigsaad 119 ug Malaquias 3:8–12. Tungod kay ang pagsunod sa balaod sa ikapulo usa ka ebidensya sa imong hugot nga pagtuo, pagbayad og hingpit nga ikapulo. Human sa tulo ka bulan isulat sa imong journal kon sa unsang paagi nga ang pagbayad sa ikapulo nakatabang sa imong hugot nga pagtuo nga motubo. Ilista ang mga panalangin sa imong kinabuhi, dagko man ug gagmay, nga miabut tungod sa imong hugot nga pagtuo sa baruganan sa ikapulo.

Kinaugalingon nga mga Kasinatian kabahin sa Mithi

Proyekto kabahin sa Mithi

Human nimo makompleto ang unom ka kasinatian kabahin sa mithi sa hugot nga pagtuo, paghimo og usa ka proyekto nga makatabang kanimo sa paggamit sa unsay imong nakat-unan. Kini kinahanglan nga usa ka mahinungdanon nga paningkamot nga molungtad og dili mominus napulo ka oras sa pagkompleto. Sa mainampoong paagi tinguhaa ang giya sa Espiritu Santo sa pagpili og usa ka makahuluganon nga proyekto.

Paaprubahi sa imong ginikanan o sa lider ang proyekto sa dili ka pa magsugod. Pagsulat og usa ka pagtimbang-timbang inig kahuman nimo. Sa ubos mao ang pipila ka mga ideya alang sa usa ka proyekto kabahin sa mithi.

Memoryaha ang “Ang Buhi nga Kristo” (tan-awa sa pahina 102). Samtang ikaw mohimo, hunahunaa ang impluwensya sa Manluluwas diha sa imong kinabuhi ug sa unsang paagi nga ang imong hugot nga pagtuo diha Kaniya milambo. Praktisa ang pagsunod sa ehemplo sa Manluluwas.
Basaha ang Alma 32:28–43. Hunahunaa ang hugot nga pagtuo isip usa ka liso samtang ikaw nagtabang sa pagtanom, pag-amuma, ug pag-ani sa usa ka tanaman sa utanon. Isulat sa imong journal kon sa unsang paagi ka makaatiman, makaamuma, ug makapalig-on sa imong hugot nga pagtuo.
Tambong og klase sa family history diha sa imong ward o branch. Pangolekta og mga istorya sa imong mga paryente o sa uban kinsa nagpakita og hugot nga pagtuo, o panginterbyu og mga sakop sa pamilya o sa uban ug irekord ang ilang mga istorya.
Ihulagway ang panalangin sa hugot nga pagtuo pinaagi sa pagsulat og orihinal nga istorya, balak, o kanta o pinaagi sa paghuman og biswal nga proyekto sa arts nga nagpakita sa imong hugot nga pagtuo kang Jesukristo.

Ang akong proyekto mao ang:

Ang akong plano sa pagbuhat sa akong proyekto mao ang:

Pagtugot

Gibana-bana nga petsa nga mahuman

Ang akong pagtimbang-timbang sa proyekto mao ang (ilakip kon unsa ang imong gibati ug sa unsang paagi nga ang imong pagsabut sa hugot nga pagtuo nadugangan):

Pirma sa ginikanan o lider

Petsa

Mga oras nga gigahin