Kinatibuk-ang Pasabut alang sa Young Women

Katuyoan sa Personal nga Kauswagan

Ang Personal nga Kauswagan makatabang kanimo nga mapalig-on ang pagtuo ug pagpamatuod kang Jesukristo samtang magkat-on ka sa Iyang mga pagtulun-an ug kanunay nga mogamit niini sa imong kinabuhi. Makatabang kini nga malig-on ang imong pamilya karon ug ang imong umaabut nga pamilya. Makatabang kini kanimo nga maandam sa paghimo ug pagtuman sa sagrado nga mga pakigsaad ug sa pagdawat sa mga ordinansa sa templo. Ug moandam kini kanimo aron mahimong usa ka matinud-anon, tumatampo nga miyembro sa Ang Simbahan ni Jesukristo sa mga Santos sa Ulahing mga Adlaw.

Ang programa sa Personal nga Kauswagan migamit sa walo ka mga mithi sa Young Women aron sa pagtabang kanimo nga mas makasabut sa hingpit kon si kinsa ka, nganong ania ka sa yuta, ug unsa ang angay nimong buhaton isip usa ka anak nga babaye sa Dios aron sa pag-andam alang sa adlaw nga ikaw moadto sa templo sa paghimo og sagradong mga pakigsaad. Kini makatabang kanimo nga maandam alang sa imong umaabut nga mga tahas isip usa ka matinud-anong babaye, asawa, inahan, ug pangulo sa gingharian sa Dios. Ang imong pag-apil sa Personal nga Kauswagan nagtudlo kanimo sa paghimo og mga pasalig, sa pagbuhat niini, ug pagreport sa imong kauswagan ngadto sa usa ka ginikanan o lider. Ang mga sundanan nga imong naestablisar samtang nagtrabaho ka sa Personal nga Kauswagan—sama sa pag-ampo, pagtuon sa kasulatan, pagserbisyo, ug paghimo og journal—mamahimo nimong inadlaw nga mga kinaiya. Kini nga mga kinaiya makalig-on sa imong pagpamatuod ug makatabang kanimo nga makakat-on ug molambo sa tibuok nimong kinabuhi.

Mga Kinahanglanon

Sa pagkompleto sa programa sa Personal nga Kauswagan, ikaw kinahanglan nga:

Motambong kanunay sa sakrament miting (kutob sa mahimo).
Mosunod sa mga sumbanan nga anaa sa Alang sa Kalig-on sa mga Kabatan-onan.
Mokompleto sa mga kasinatian ug proyekto kabahin sa mithi alang sa matag usa sa walo ka mga mithi.
Mobuhat og personal nga journal.
Motambong og seminary o moapil sa kinaugalingon nga pagtuon (kon anaa).
Mobasa kanunay sa Basahon ni Mormon.
Morekord sa imong pagpamatuod mahitungod sa Manluluwas nga si Jesukristo.

Kon mahuman na kining mga kinahanglanon, ikaw angayan nang makadawat sa Pahalipay sa Batan-ong Pagkababaye pagkahuman sa usa ka interbyu sa katakus sa imong bishop o branch president.

Unsaon sa Pagsugod

Mahimo kang magsugod sa pagtrabaho sa programa sa Personal nga Kauswagan sa edad nga 12 o sa panahon sa imong bunyag kon anaa ka sa tunga-tunga sa edad nga 12 ug 18. Ang young women kinsa dili mga miyembro sa Ang Simbahan ni Jesukristo sa mga Santos sa Ulahing mga Adlaw welcome usab nga moapil.

Sa imong pagsugod, makadawat ka og kwentas nga adunay logo sa sulo sa Young Women diha niini. Ang pagsul-ob sa kwentas nagpakita sa imong pasalig sa pagpataas sa imong kahayag ug sa pagbarug alang sa kamatuoran ug pagkamatarung.

Dapita ang imong mga ginikanan sa pagtabang kanimo sa pagplano ug pagkompleto sa programa sa Personal nga Kauswagan. Ang pagpakigbahin niini nga mga kasinatian makapalig-on sa imong relasyon uban kanila. Ang imong inahan o laing babaye nga maayo og ehemplo mahimong makig-uban kanimo og trabaho sa Personal nga Kauswagan, ug mahimo ninyong maangkon og dungan ang inyong Pahalipay sa Batan-ong Pagkababaye. Ikaw mahimong mopahiangay sa mga kasinatian ug mga proyekto sumala sa imong personal nga mga kahimtang, mga tinguha, ug mga panginahanglan uban sa pagtugot sa usa ka ginikanan, o usa ka lider sa Young Women, o sa laing hamtong.

Ang Personal nga Kauswagan mamahimong kabahin sa maayong mga butang nga imong gipanghimo sa panimalay, simbahan, eskwelahan, seminary, ug sa komunidad. Gamita ang indeks sa hilisgutan diha sa luyo niini nga basahon aron makakita og pihong mga hilisgutan nga ikaw adunay interes ug aron makakat-on kon unsaon kini paggamit isip kabahin sa Personal nga Kauswagan. Hinumdumi ang paghatag sa imong kaugalingon og pahalipay alang sa maayong mga butang nga imong nabuhat matag adlaw. “Pinaagi sa gagmay ug yano nga mga butang ang mga dagko nga butang ipahinabo” (Alma 37:6).

Mga Sumbanan

Ikaw mokompleto og unom ka mga kasinatian (tulo nga gikinahanglan ug ang tulo opsyonal) ug usa ka proyekto nga napulo ka oras sa matag usa sa unang pito ka mga mithi sa Young Women. Alang sa mithi nga hiyas, ikaw mokompleto sa upat ka gikinahanglan nga mga kasinatian ug sa gikinahanglan nga proyekto sa pagbasa sa Basahon ni Mormon. Mahimo kang magsugod sa bisan unsa nga mithi ug motrabaho bisan unsa ang unahon.

Kon ikaw nakahuman og usa ka kasinatian o proyekto kabahin sa mithi, ribyuha kini uban sa usa ka ginikanan, usa ka lider, o sa laing hamtong. Papirmahi niana nga tawo ang nahuman nga kasinatian diha sa imong libro sa Personal nga Kauswagan. Paghimo og rekord sa imong pag-uswag diha sa Palid nga Talaan sa Personal nga Kauswagan (tan-awa sa pahina 77).

Mga Kasinatian kabahin sa Mithi

Girekomendar nga ikaw mohuman sa gikinahanglan nga mga kasinatian sa usa ka mithi sa dili pa mopadayon sa opsyonal nga mga kasinatian niana nga mithi.
Gamit ang opsyonal nga mga kasinatian kabahin sa mithi, ikaw mahimong mosulat og hangtud sa duha sa imong kaugalingong mga kasinatian sa matag mithi o mopahiangay sa gihatag nga mga kasinatian aron mohaum sa imong personal nga mga tinguha, mga tumong, o mga kahimtang. Paaprubahi kini sa usa ka ginikanan, usa ka lider, o sa laing hamtong sa dili pa ikaw magsugod.

Mga Proyekto kabahin sa Mithi

Kompletoha ang gikinahanglan nga mga kasinatian sa usa ka mithi sa dili pa magsugod sa proyekto diha niana nga mithi, gawas sa mithi nga hiyas. Mahimo kang magsugod og basa sa Basahon ni Mormon bisan unsang orasa.
Paaprubahi sa usa ka ginikanan, usa ka lider, o sa laing hamtong ang matag proyekto kabahin sa mithi sa dili pa ikaw magsugod.
Mahimo kang modapit sa uban sa pagtabang kanimo sa imong proyekto kabahin sa mithi, apan ang matag proyekto kinahanglang gayud nga magahinan og dili mominus og napulo ka oras sa imong kaugalingong panahon.

Gipaspason ug Pahalipay

Mahimo kang motrabaho sa imong kaugalingong gipaspason, apan kinahanglan gayud nga kanunay kang magtrabaho sa dili mominus sa usa ka kasinatian o proyekto. Ang mosunod girekomendar:
- Kompletuha og dili mominus usa ka kasinatian sa usa ka bulan ug usa ka proyekto matag unom ka bulan (duha ka proyekto sa usa ka tuig).
- Tambong kanunay sa sakrament miting ug apil sa seminary (kutob sa mahimo).
- Pakigkita sa usa ka sakop sa inyong bishopric dili mominus kausa sa usa ka tuig aron hisgutan ang imong kalampusan diha sa Personal nga Kauswagan, ang imong mga paningkamot sa pagsunod sa mga sumbanan diha sa Alang sa Kalig-on sa mga Kabatan-onan, ug ang bisan unsa nga mga pangutana nga ikaw aduna.
Kon ang tanan nga mga kasinatian ug proyekto sa usa ka mithi makompleto, ang imong lider mopahalipay sa imong kalampusan diha sa usa ka miting sa Young Women ug mohatag kanimo og timaan nga ibutang diha sa pahina sa imong Kalampusan sa Personal nga Kauswagan kabahin sa Mithi niini nga libro (tan-awa sa pahina 78) ug usa ka laso nga ibutang sa imong mga kasulatan.
Makaangkon ka sa oportunidad sa pagpakigbahin sa imong mga kalampusan sa Personal nga Kauswagan matag tuig sa Young Women in Excellence.
Ang imong kalampusan diha sa Personal nga Kauswagan mahimo usab nga mapahibalo kon imong madawat ang imong mga sertipiko sa Beehive, Mia Maid, ug Laurel samtang mobalhin ka gikan sa usa ka klase ngadto sa laing klase.

Pagkompleto sa Personal nga Kauswagan

Kon makompleto na nimo ang tanang mga kasinatian ug mga proyekto kabahin sa mithi sa Personal nga Kauswagan, irekord ang imong pagpamatuod mahitungod sa Manluluwas nga si Jesukristo diha sa pahina 79. Ribyuha ang seksyon nga “Pahalipay sa Batan-ong Pagkababaye” niini nga libro uban sa usa ka ginikanan, usa ka lider, o sa laing hamtong (pahina 76). Dayon pakig-eskedyul og interbyu sa imong bishop aron makapirma siya sa rekomendasyon diha sa pahina 82 ug masabutan ang paghatag sa imong sertipiko ug medalyon sa Pahalipay sa Batan-ong Pagkababaye.
Girekomendar nga imong trabahoon ang Personal nga Kauswagan sa tibuok nimong panahon diha sa Young Women, bisan nahuman na nimo og dawat ang Pahalipay sa Batan-ong Pagkababaye. Ang mga sugyot kon unsaon sa pagpadayon nga mouswag anaa sa seksyon nga “Unsay Akong Buhaton Kon Akong Makompleto ang Personal nga Kauswagan?” (pahina 83). Ribyuha kini uban sa usa ka ginikanan, usa ka lider, o sa laing hamtong. Mahimo kang mopili nga moangkon og Honor Bee charm aron ibutang sa imong kwentas uban sa imong medalyon, o mahimo kang magsugod og usab sa tibuok programa. Giawhag usab ikaw sa pagtabang sa ubang mga batan-ong babaye sa ilang Personal nga Kauswagan. Pinaagi sa pagpadayon sa imong pag-uswag, magpabilin ka diha sa dalan padulong sa templo ug makapalambo og mga kinaiya nga makatabang kanimo sa tibuok nimong kinabuhi.