Kaligdong

Hangtud nga ako mamatay dili ko gyud isalikway ang akong kaligdong gikan kanako (Job 27:5).

Ako magbaton og moral nga kaisug sa paghimo sa akong mga lihok nga mahisubay sa akong kahibalo sa sakto ug sa sayop.

Gikinahanglan nga mga Kasinatian kabahin sa Mithi

Kompletoha ang mosunod nga tulo ka gikinahanglan nga mga kasinatian kabahin sa mithi. Papirmahi sa imong ginikanan o lider ug butangi og petsa ang matag kasinatian inig kahuman nimo.

1. Ang kaligdong mao ang kaandam ug tinguha sa pagsunod sa atong gituohan ug mga sumbanan. Basaha ang Moroni 10:30–33 ug hunahunaa unsa ang gipasabut sa “paglimud sa inyong mga kaugalingon sa tanan nga dili diosnon.” Basaha ang pamplet nga Alang sa Kalig-on sa mga Kabatan-onan. Palandonga kon sa unsa nga paagi nga ang mga sumbanan sa Ginoo lahi gikan sa mga sumbanan sa kalibutan. Isulat diha sa imong journal ang imong personal nga mga sumbanan alang sa mga linihokan, sininaan, ug sinultihan, ingon man usab sa literatura, salida, telebisyon, Internet, musika, mga cell phone, ug uban nga media. Isulat usab ang imong plano sa pagpabilin nga limpyo sa moral nga paagi ug takus nga makatambong sa templo. Human makasunod sa imong mga sumbanan sulod sa dili mominus usa ka bulan, isulat ang imong mga pagbati diha sa imong journal ug padayon sa pagtuman sa imong pasalig.

2. Paghimo og pagsusi sa imong personal nga kaligdong. Pangutan-a ang imong kaugalingon sa mosunod nga mga pangutana: Gilikayan ba nako ang tabi-tabi, dili maayo nga mga komedya, pagpamalikas ug pagpanamastamas, ug walay hinungdan nga panghunahuna mahitungod sa sagrado nga mga hilisgutan? Ako ba hingpit nga matinud-anon, limpyo sa moral nga paagi, matinuoron, mapiyalan, ug masaligan diha sa akong buluhaton sa eskwelahan ug sa ubang mga kalihokan? Pag-ampo matag adlaw alang sa kalig-on ug alang sa giya sa Espiritu Santo aron sa pagtabang kanimo nga magpuyo sa kaligdong. Isulat diha sa imong journal ang mga butang nga imong mahimo aron mapalambo ang imong personal nga kaligdong ug dili mominus usa ka bag-o nga kinaiya nga gusto nimong palamboon.

3. Ang Manluluwas mao ang hingpit nga ehemplo sa kaligdong; Iyang gibuhat ang unsay Iyang gisaad sa Amahan nga Iyang buhaton. Basaha ang 3 Nephi 11:10–11. Tun-i ang mga kinabuhi sa daghang mga tawo diha sa mga kasulatan kinsa nagpuyo uban sa kaligdong. Basaha ang Genesis 39; ang basahon ni Ester; Job 2:3; 27:3–6; Daniel 3 ug 6; Mga Buhat 26; Doktrina ug mga Pakigsaad 124:15; ug Joseph Smith—Kasaysayan 1:21–25. Sa imong journal ilha ang mga paagi nga kining mga tawhana nakapakita og kaligdong. Paghunahuna og usa ka panahon diin ikaw adunay kaisug sa pagpakita og kaligdong, ilabi na kon kini dili sayon o inila. Ipakigbahin ang imong kasinatian ug ang imong mga pagbati mahitungod niini diha sa usa ka miting sa pagpamatuod o leksyon o sa ginikanan o lider.

Dugang mga Kasinatian kabahin sa Mithi

Kompletoha ang tulo ka dugang nga mga kasinatian kabahin sa mithi. Ikaw mahimong mopili gikan sa mosunod nga mga opsyon o mosulat og hangtud sa duha nga imong kaugalingon. Ang imong ginikanan o lider kinahanglan gayud nga motugot sa imong mga gisulat sa dili ka pa magsugod. Papirmahi sa imong ginikanan o lider ug butangi og petsa ang matag kasinatian inig kahuman nimo.

4. Tan-awa ang pulong nga kaligdong diha sa diksyonaryo. Interbyuha ang imong inahan, apohan nga babaye, o laing babaye nga imong gitahud mahitungod sa iyang pagsabut ug paggamit sa pulong. Paghimo og lista sa mga paagi nga imong mahimo ang imong mga lihok nga mahisubay sa imong kahibalo sa husto ug sayop, ug ilista diha sa imong journal unsa ang gipasabut nganha kanimo sa pagbaton og kaligdong.

5. Pagkat-on kabahin sa pagbarug isip usa ka saksi. Basaha ang Mosiah 18:9. Dayon isulat sa imong journal kon sa unsang paagi nga ikaw makahimo gayud nga “mobarug isip [usa ka saksi] sa Dios sa tanan nga mga panahon ug diha sa tanan nga mga butang, ug diha sa tanan nga mga dapit.” Pagpili og usa ka personal nga kinaiya nga imong kinahanglan nga palamboon aron ikaw mamahimong usa ka mas maayo nga ehemplo. Palamboa ang kaligdong sa imong kinabuhi samtang ikaw nagpraktis sa imong bag-ong kinaiya sulod sa tulo ka semana. Isulat ang imong pag-uswag diha sa imong journal.

6. Ang pagsunod sa balaod sa puasa usa ka oportunidad sa paggamit sa kaligdong. Sa usa ka gigahin nga Dominggo sa puasa, ayaw pagkaon ug pag-inom sulod sa duha ka nagsunod nga kan-anan ug moamot ngadto sa halad sa puasa sa imong pamilya. Paghimo og piho nga katuyoan diha sa hunahuna samtang ikaw magpuasa. Ikaw mahimong magpuasa alang sa usa ka masakiton nga higala, sa pagbuntog sa usa ka dili maayo nga kinaiya, sa pag-angkon og espesyal nga panalangin alang sa imong kaugalingon o sa laing tawo, o sa pagpasalamat. Sugdi ug tapusa ang imong puasa uban sa usa ka pag-ampo.

7. Ilista ang mga isyu, mga dagan sa panghitabo, ug mga problema nga makahuyang sa pamilya. Basaha ang mensahe sa Unang Kapangulohan sa pahina 1 niini nga basahon, “Ang Pamilya: Usa ka Pamahayag ngadto sa Kalibutan” (tan-awa sa pahina 101), ug sa seksyon kabahin sa pamilya diha sa Alang sa Kalig-on sa mga Kabatan-onan. Dayon siksika diha sa mga magasin sa Simbahan ang tambag niadtong kinsa atong gipaluyohan isip mga propeta, mga manalagna ug mga tigpadayag. Isulat diha sa imong journal ang imong plano sa paglig-on sa imong pamilya karon ug ang mga mithi ug mga tradisyon nga gusto nimong i-establisar sa imong umaabut nga pamilya.

Kinaugalingon nga mga Kasinatian kabahin sa Mithi

Proyekto kabahin sa Mithi

Human nimo makompleto ang unom ka kasinatian kabahin sa mithi sa kaligdong, paghimo og usa ka proyekto nga makatabang kanimo sa paggamit sa unsay imong nakat-unan. Kini kinahanglan nga usa ka mahinungdanon nga paningkamot nga molungtad sa dili mominus napulo ka oras sa pagkompleto. Sa mainampoong paagi tinguhaa ang giya sa Espiritu Santo sa pagpili og usa ka makahuluganon nga proyekto.

Paaprubahi sa imong ginikanan o lider ang proyekto sa dili ka pa magsugod. Pagsulat og usa ka pagtimbang-timbang inig kahuman nimo. Sa ubos mao ang pipila ka mga ideya alang sa usa ka proyekto kabahin sa mithi.

• Irekord ang mga ehemplo sa mga paagi nga gipakita sa mga sakop sa pamilya sa kalidad sa kaligdong diha sa ilang mga kinabuhi.

• Ang pagbaton og kaligdong nagpasabut sa pagtuman sa imong mga pasalig. Tinoa ug tumana ang imong mga pasalig ngadto sa uban samtang ikaw moapil isip usa ka sakop sa team o organisasyon o diha sa katungdanan sa pagpangulo sa imong eskwelahan o komunidad.

• Gamit ang 1 Timoteo 4:12 isip imong giya, pag-organisar ug pagpahigayon og kalihokan nga makatabang kanimo nga makabuhat nga mahimong “usa ka ehemplo sa mga tumutuo.”

• Ang paghimo ug pagtuman sa mga pakigsaad sa templo nagkinahanglan og kaligdong. Pag-andam sa paghimo og mga pakigsaad sa templo pinaagi sa paghimo ug pagsul-ob og usa ka butang sa sinina nga nahisubay sa mga sumbanan sa tarung nga sininaan ingon nga gipasabut diha sa pamplet nga Alang sa Kalig-on sa mga Kabatan-onan ug sa mga pulong sa buhi nga mga propeta.

• Diha sa mga pakigpulong nga gihatag sa General Authorities, siksika ang mga hilisgutan kabahin sa kaligdong ug kamatinuoron. Pagkat-on kon nganong kini nga mga baruganan mahinungdanon kaayo sa imong kalipay ug pagpangandam sa templo. Paghimo og usa ka butang (sama sa usa ka hulagway, usa ka basahon sa mga kinutlo, o binurdahan nga butang) nga makapahinumdom kanimo matag adlaw sa imong pasalig nga magmatinuoron ug magmatinud-anon sa tanang panahon ug pagailhon alang sa imong personal nga kaligdong.

Ang akong proyekto mao ang:

Ang akong plano sa pagbuhat sa akong proyekto mao ang:

Pagtugot

Gibana-bana nga petsa nga mahuman

Ang akong pagtimbang-timbang sa proyekto mao ang (ilakip kon unsa ang imong gibati ug sa unsang paagi nga ang imong pagsabut sa kaligdong nadugangan):

Pirma sa ginikanan o lider

Petsa

Mga oras nga gigahin