Hi‘oraa na te mau metua e te feia faatere

Opuaraa o te Faahaereraa ia‘u iho i mua

Te Faahaereraa ia‘u iho i mua o te hoê ïa faanahoraa rave-faaoti-raa tei faatanohia no te tauturu i te feia apî tamahine :

Ia haapuai i to ratou iteraa papû no ni‘a ia Iesu Mesia.
Ia haapuai i to ratou utuafare i teie nei e amuri a‘e.
Ia faaineine ia riro e mea ti‘amâ no te rave e no te haapa‘o i te mau fafauraa mo‘a o te hiero.
Ia faaineine no to ratou ti‘araa no amuri iho e ta ratou mau hopoi‘a.

E ohipa te feia apî tamahine e to ratou mau metua, te feia faatere o te Feia Apî Tamahine, e te tahi atu mau vahine hi‘oraa maitai no te haamau e no te faatupu i te mau opuaraa tei niuhia i ni‘a na e va‘u peu maitai a te Feia Apî Tamahine. E nehenehe te Faahaereraa ia‘u iho i mua e tauturu i te mau metua e te feia faatere ia faananea’tu â i to ratou auraa e te feia apî tamahine a ohipa amui ai ratou.

Te mau hopoi‘a a te mau metua e a te feia faatere o te Feia Apî Tamahine

Te vavauraa i te faanahoraa

E farerei te feia faatere o te Feia Apî Tamahine i te tamahine apî tata‘itahi e tomo mai i roto i te faanahoraa a te Feia Apî Tamahine e to’na metua. Ia amui atoa mai hoê melo o te peresideniraa no te pŭpŭ a te tamahine apî. E pûpû te feia faatere i te tamahine apî te hoê buka Te Faahaereraa ia‘u iho i mua, te hoê buka aamu no Te Faahaereraa ia‘u iho i mua, e te faatautau rama o te Feia Apî Tamahine. E faataa ratou ia’na te faanahoraa e e faaitoito i te mau metua ia ohipa e ta ratou mau tamahine i roto i te ma‘itiraa e i te faaîraa i te mau iteraa rau e i te mau opuaraa o Te Faahaereraa ia‘u iho i mua. E ti‘a atoa i te feia faatere e ani manihini i te mau metua ia tae mai i te mau ohiparaa taa ê atoa i reira ta ratou tamahine e amui ai.

Haapapû no te hoê patururaa hinaarohia

E hinaaro te hoê tamahine apî i te patururaa e i te faaitoitoraa no te faaî au maitai i Te Faahaereraa ia‘u iho i mua. E nehenehe te reira e tae mai na roto mai i te mau metua, te feia faatere, te tahi atu mau taata paari, e te feia apî paari o tei faaoti i Te Faahaereraa ia‘u iho i mua. Mai te mea e mea iti roa te patururaa i te tamahine apî i te fare no te tauturu ia’na i roto i te faaotiraa i Te Faahaereraa ia‘u iho i mua, e nehenehe e ani manihini i te tahi atu tuahine ia riro ei hoê arata‘i e ia tauturu ia’na, ia anihia ra i te feia faatere o te autahu‘araa. E nehenehe teie tuahine paari e faati‘a i te mau iteraa rau e i te mau opuaraa o te peu maitai e ia tuurima i Te Faahaereraa ia‘u iho i mua a te tamahine apî ia oti ana‘e i te faaotihia. E nehenehe atoa e ani manihini i te tahi atu tamahine apî tei faaoti i Te Faahaereraa ia‘u iho i mua ia horo‘a i te hoê tauturu e te hoê faaitoitoraa.

A papa‘i e ite i te haereraa i mua

E horo‘a te mau metua e te feia faatere i te mau rave‘a ti‘a i te feia apî tamahine ia papa‘i i to ratou haereraa i mua. Ia tamau ana‘e te tamahine apî i te papa‘i, ua ite atoa ïa oia i te faaite i to’na mau tautooraa e ia faaite eaha ta’na i haapii mai e nahea to’na iteraa papû i te haapuai-raa-hia. E ti‘a i te mau metua e te feia faatere ia ite i ta’na mau faaotiraa, ia haapapû i to’na taa-maita-raa e to’na faaohiparaa i te mau parau tumu o te evanelia, e ia horo‘a i te faaitoitoraa no te haereraa tamau i mua. E tauturu te reira mau faaitereaa ia faatupu i te mau auraa aroha.

Te mau hopoi‘a a te feia faatere o te autahu‘araa

Ia faaoti te hoê tamahine i te taatoaraa o te faanahoraa o Te Faahaereraa ia‘u iho i mua, e farerei te episekopo ia’na, ma te faaohipa i te mau faatureraa i roto No te Puai o te Feia Apî ei arata‘i. E hi‘o oia i to’na taeraa mai i te pureraa oro‘a, to’na amuiraa i roto i te haapiiraa evanelia, e to’na tai‘oraa i te Buka a Moromona. E tuhaa te reira no ta’na anei farereiraa matahiti e aore râ te ono ava‘e. Na te episekopo e faataa i te ti‘amâraa o te tamahine apî ia farii i te Feti‘a no te tamahine haapa‘o e ia tuurima i ta’na buka Te Faahaereraa ia‘u iho i mua no te faaiteraa i to’na faaotiraa i te mau titauraa i anihia. E faaite oia ia’na e te Feti‘a no te tamahine haapa‘o i roto i te hoê pureraa oro‘a e aore râ te tahi atu pureraa.

Te manuïaraa o te tamahine apî i roto i te Faahaereraa ia‘u iho i mua e faite-atoa-hia te reira i te taime a farii ai oia i ta’na mau parau faahanahanaraa no te Tebure, te Roti e te Tarona a tauiui ai oia i te pŭpŭ.

E faaohipa te mau melo o te episekoporaa i ta ratou mau farereiraa e te feia apî tamahine no te iteraa e no te faaitoitoraa i te haereraa mua o te tamahine apî tata‘itahi E mea faufaa te Parau Hi‘opo‘araa no te Faahaereraa ia‘u iho i mua a te Feia Apî Tamahine na te feia faatere, e tape‘ahia ra e te peresideniraa o te Feia Apî Tamahine, no te tauturu i te mau melo o te episekoporaa. E mea ti‘a i te mau peresideni tĭtĭ ia ui tamau i te episekopo no ni‘a i te au maitai e te haereraa i mua o te feia apî tamahine i roto i ta ratou mau paroita.

Te mau arata‘iraa

Ua tatarahia te mau opuaraa e te mau titauraa o te faanahoraa i te haamataraa o teie buka. E riro teie mau arata‘iraa hau atu i muri nei ei mea faufaa na te feia faatere.

Te mau iteraa rau o te peu maitai

E nehenehe te tamahine apî e ohipa i te mau peu maitai na roto i te ana‘iraa o ta’na e hinaaro.
E faaitoitohia te feia apî tamahine ia faaoti na mua i te mau iteraa rau e te mau opuaraa o te peu maitai, eiaha râ te peu maitai o te viivii-ore a rave ai ratou i te opuaraa o taua peu maitai ra.

Te mau opuaraa o te peu maitai

Ua faataahia te opuaraa o te peu maitai no te tauturu i te tamahine ia faaohipa i te mea o ta’na i haapii mai na roto mai i te mau iteraa rau o te peu maitai.
E mea ti‘a ia roaahia i te tamahine te hoê faito e ahuru a‘e hora no te opuaraa o te peu maitai tata‘itahi. Eita e tai‘ohia taua ahuru hora ra ia hau atu i te hoê opuaraa o te peu maitai.
E nehenehe te feia apî tamahine e ohipa amui i roto i te mau opuaraa. Tera râ, e mea ti‘a i te tamahine apî ia horo‘a e ahuru a‘e hora no to’na iho taime mai te mea e faaohipa oia i taua opuaraa ra no te faatupu i to’na iho haereraa i mua i titauhia.
Na roto i te parau faati‘a a te mau metua e aore râ, a te feia faatere o te Feia Apî Tamahine, te mau ohipa maitai tei ravehia e te feia apî tamahine i te fare, i te fare pureraa, i te fare haapiiraa, i te haapiiraa evanelia, e i roto i te oire e riro ïa ei faaotiraa no te mau titauraa o te Faahaereraa ia‘u iho i mua.

Te faaîraa i te Faahaereraa ia‘u iho i mua

Ia faaî te tamahine apî i te mau titauraa o te Faahaereraa ia‘u iho i mua, na mua‘e i to’na vaiihoraa mai i te Feia Apî Tamahine, ia ani-manihini-hia oia ia tauturu i te tahi atu feia apî tamahine o te ohipa ra i te Faahaereraa ia‘u iho i mua. E faaitoito-atoa-hia oia ia farii i te « Honor Bee » e aore râ, ia haamata apî faahou te faanahoraa.
Mai te mea e aita te tamahine apî i faaoti i te mau titauraa atoa o te Faahaereraa ia‘u iho i mua na mua‘e i te faarueraa mai i te Feia Apî Tamahine, ia faaitoitohia oia ia tamau â i te ohipa no te fariiraa i te Feti‘a no te tamahine haapa‘o. Ua ani-manihini-hia te mau metua vahine, te feia faatere, e te tahi atu mau vahine hi‘oraa maitai ia paturu ia’na ia faaoti roa i te reira.

Te hi‘opo‘araa e te vitivitiraa

Te Parau Hi‘opo‘araa o te Faahaereraa ia‘u iho i mua, i te api 77 o teie buka, e haapotoraa ïa no te ohipa a te tamahine apî tata‘itahi i roto i te Faahaereraa ia‘u iho i mua.
Te vai atoa ra te Parau Hi‘opo‘araa no te Faahaereraa ia‘u iho i mua na te feia faatere ei api parau taa ê no te tauturu i te feia faatere i roto i te hi‘opo‘araa i te haereraa i mua o te tamahine apî tata‘itahi (36655). E faaohipahia te reira no te tauturu i te feia faatere o te Feia Apî Tamahine e te autahu‘araa i te ohiparaa e te iteraa i te tamahine apî tata‘itahi.
E nehenehe te tamahine apî e ohipa ia au te vitiviti ta’na e hinaaro i roto i te faanahoraa o te Faahaereraa ia‘u iho i mua, tera râ, ua faauehia i te tamahine apî ia faaoti hoê a‘e iteraa rau o te peu maitai i te ava‘e, e hoê opuaraa o te peu maitai i te ono ava‘e atoa (piti i te matahiti). Mai te mea e haamata oia i te ohipa a tomo ai oia i roto i te Feia Apî Tamahine i te 12raa o to’na matahiti e ia tamau noa i te reira tere, e faaoti oia i te 16raa o to’na matahiti. E piti ïa matahiti no’na i te titauraa i te « Honor Bee » e aore râ, i te haamata apî faahou i te faanahoraa mai tei anihia i te api 83.

Te iteraa i te haereraa mua o te taata

A faaoti ai te tamahine apî i te mau iteraa rau e te mau opuaraa o te peu maitai tata‘itahi, e farii oia i te hoê taipe (36654) e te ripene no te papa‘iraa mo‘a tuatihia i te peu maitai. E tuu atu oia i te taipe i ni‘a i te api o te Peu Maitai i Rave-Faaoti-hia o te Faahaereraa ia‘u iho i mua o ta’na buka (api 78) E faaohipa oia i te ripene ei tapa‘oraa apî i roto i ta’na mau papa‘iraa mo‘a. Te reira faaiteraa o to’na haereraa i mua e nehenehe ïa e horo‘ahia i roto i te pureraa a te Feia Apî Tamahine.
I te mau matahiti atoa, i roto i te putuputuraa te Titauraa ia Maitai roa, e faaitehia te feia apî tamahine no ta ratou mau faaotiraa.
E faaitehia te manuïaraa o te tamahine apî i roto i te Faahaereraa ia‘u iho i mua i te taime a farii ai oia i ta’na mau parau faahanahanaraa no te Tebure, te Roti e te Tarona a tauiui ai oia i te piha. E horo‘ahia teie mau parau faahanahanaraa (Tepure, 08563 ; Roti, 08965 ; Tarona, 08564) i raro a‘e i te arata‘iraa a te episekopo. E faaiteraa te reira mau parau no te tauiuiraa o te tamahine apî mai te tera pŭpŭ matahiti i te tahi atu.

Feti‘a no te tamahine haapa‘o

Ia faaoti te tamahine apî i ta’na ohipa i roto na peu maitai atoa e va‘u e ua uiuihia e te episekopo, e farii oia i te Feti‘a no te tamahine haapa‘o. Teie feti‘a o te hoê ïa parau faahanahanaraa (36651) e hoê feti‘a auro e aore râ moni (auro, 08602 ; moni, 08603) E faaite te hoê melo no te episekoporaa i te Feti‘a no te tamahine haapa‘o i roto i te hoê pureraa oro‘a
I muri iho i te faaotiraa i te Feti‘a no te tamahine haapa‘o, e nehenehe te tamahine apî e tamau noa i te haere i mua na roto i te titauraa i te « Honor Bee » (auro, 08562 ; moni, 08578 ; a hi‘o i te api 83). E horo‘ahia teie feti‘a no to’na haereraa i mua i roto i te hoê pureraa a te Feia Apî Tamahine.
E roaa te mau feti‘a e te mau parau faahanahanaraa i te Pû Hooraa Buka a te Ekalesia na roto i te faaohiparaa i te moni a te paroita, aita ta te tamahine apî e aore râ ta te mau metua e haamauaraa.

Te mau titauraa no te Faahaereraa ia‘u iho i mua na te feia faatere.

Ua faaitoitohia te feia faatere ia ohipa i te Faahaereraa ia‘u iho i mua e tae noa’tu te feia apî tamahine. Te feia e amui mai i roto i te faanahoraa o te Faahaereraa ia‘u iho i mua e taa maitai ratou iho i te faanahoraa e ia horo‘a i te hoê hi‘oraa tano i te feia apî tamahine no te pee. E nehenehe ratou e titau i te Feti‘a no te tamahine haapa‘o i muri iho i to ratou :

Taviniraa ei feia faatere no te Feia Apî Tamahine no te hoê roaraa e hoê matahiti.
Ia faaoti i te mau iteraa rau i titauhia i roto i na peu maitai tata‘itahi e va‘u.
Ia faaoti e toru opuaraa, tei roto atoa te opuaraa o te viivii-ore.

Te amuiraa mai te mau metua vahine

E farii-poupou-hia te mau metua vahine ia amui mai e te feia apî tamahine no te titauraa i te Feti‘a no te tamahine haapa‘o. E ohipa te mau metua vahine i ta ratou iho buka te Faahaereraa ia‘u iho i mua e ia titau atoa i te feti‘a e ta ratou tamahine. Ua anihia i te hoê tamahine ia titau i ta’na feti‘a na mua‘e e aore râ hoê â taime e to’na metua vahine.

E nehenehe te mau metua vahine e rave hoê â mau titauraa e ta ratou mau tamahine, oia ho‘i :

Haere pinepine i te pureraa oro‘a atoa (mai te mea e nehenehe).
Ora i te mau faatureraa i roto No te Puai o te Feia Apî
Faaî i te mau iteraa rau e te opuaraa o te peu maitai no na peu maitai tata‘iatahi e va‘u.
Tape‘a i ta oe iho buka aamu.
Tai‘o tamau noa i te Buka a Moromona.
Papa‘i i to oe iho iteraa papû no ni‘a i te Faaora o Iesu Mesia.

E nehenehe te mau metua vahine e ma‘iti i te mau ma‘itiraa taa ê no te mau iteraa rau e te opuaraa peu maitai mai roto mai i ta ratou mau tamahine. E nehenehe te mau iteraa rau e te mau opuaraa e tuurimahia e ta ratou iho mau tamahine, to ratou mau hoa faaipoipo, te taata faatere o te Feia Apî, e aore râ te tahi atu taata paari. E hi‘opo‘a te episekopo e ua faaotihia te mau titauraa. Te faahanahanaraa e te hooraa mai i te mau tao‘a no te faahanahanaraa, na te feia faatere o te Feia Apî Tamahine e te episekopo te reira e faaau.

Te mau titauraa no te Faahaereraa ia‘u iho i mua no te feia e hinaaro nei e ohipa i roto i te faanahonahoraa.

E nehenehe te tahi mau vahine e hinaaro nei e amui mai e e ohipa i te Faahaereraa ia‘u iho i mua na roto i te rave-faaoti-raa i te mau titauraa mai ta te feia apî tamahine e na roto i te tautururaa i te hoê tamahine apî no te tahi tuhaa o ta’na Faahaereraa ia‘u iho i mua. (A hi‘o i te mau titauraa a te mau metua vahine i te api 92)

Te faaôraa i te Faahaereraa ia‘u iho i mua i roto i te mau haapiiraa i te sabati e te pô feia apî.

E horo‘a te ohipa-amui-raa i ni‘a i te hoê iteraa rau o te Faahaereraa ia‘u iho i mua i roto i te hoê haapiiraa i te sabati i te feia faatere e i te feia api tamahine te hoê rave‘a no te aparauraa i te mau parau tumu tei haapiihia e to ratou faaohiparaa i roto i te oraraa o te feia apî tamahine. E itehia te mau faahororaa o te Faahaereraa ia‘u iho i mua i roto i te mau materia tauturu haapiiraa a te Feia Apî Tamahine.

E nehenehe atoa te mau faaoaoaraa o te Faahaereraa ia‘u iho i mua e riro ei hoê tuhaa no te pô feia apî. Ei hi‘oraa, e nehenehe te mau feia apî tamahine atoa e tauturu i te hoê opuaraa o te peu maitai a te hoê tamahine apî. E nehenehe te ohipa-amui-raa i ni‘a i te hoê opuaraa e faaitoito i te feia apî tamahine ia tamau noa i te haere i mua. E faanahohia te reira huru faaoaoaraa tapŭpŭ na roto i te pure e te ma‘itiraa e ia papû maitai e te faanahoraa o te Faahaereraa ia‘u iho i mua e vai noa no’na iho no te tamahine apî tata‘itahi.

Ia faatanohia i te mau hinaaro o te taata e i te vahi.

Ia faatanohia te mau iteraa rau e te mau opuaraa o te peu maitai ia au i te faanohoraa a te taata iho e i te vahi, te mau titauraa e te mau hinaaro na roto i te parau faati‘a a te mau metua e te feia faatere. Ia rave outou i te mau tauiuiraa e aore râ te mau faaoreraa no te hoê taata, e mea ti‘a i te feia faatere ia hi‘opo‘a i te tupuraa o te reira mau tauiuiraa i ni‘a i te tahi feia apî tamahine I muri iho i te hi‘opo‘araa maitai a te mau metua e te feia faatere, e nehenehe te mau tauiuiraa e ravehia no te pahono i te mau hinaaro o te feia apî tamahine huma e aore râ ua taoti‘ahia i te pae haapiiraa, no te pahono i te mau hinaaro i te pae iho tumu e aore ra i te pae o te taata iho, e aore râ no te vaiiho i te feia apî tamahine melo ore ia amui mai.

Mai te mea e ŏ mai te hoê tamahine apî i roto i te Ekalesia e aore râ e itoito mai i muri a‘e i te 16raa o to’na matahiti, teie ïa ta’na mau titauraa no te faaotiraa i te Faahaereraa ia‘u iho i mua:

Haere pinepine i te pureraa oro‘a atoa (mai te mea e nehenehe).
A ora i te mau faatureraa i roto No te Puai o te Feia Apî.
Faaoti i te mau iteraa rau o te peu maitai i titauhia i roto i na peu maitai tata‘itahi e va‘u. (Aita oia e titauhia ia faaoti i te mau iteraa rau ma‘iti.)
Faaoti hoê opuaraa o te peu maitai i roto i na e va‘u peu maitai tata‘itahi.
Ia haere i te haapiiraa evanelia (mai te mea te vai ra)
Tai‘o tamau noa i te Buka a Moromona.
Papa‘i i to’na iteraa papû no ni‘a i te Faaora o Iesu Mesia.

E faaohipa-atoa-hia teie mau titauraa na te feia apî tamahine i roto te tahi atu mau huru mai tei faaitehia e te feia faatere o te Feia Apî Tamahine i te vahi iho.