Manava i te tomoraa mai i roto i te Faahaereraa ia‘u iho i mua

E tamahine herehia oe e te Metua i te Ao ra, i faaineinehia no te haere mai i te ao nei i teie nei tau taa ê no te hoê opuaraa mo‘a e te hanahna. E hopoi‘a teitei ta oe no te faaohipa i to oe puai e i te faaururaa no te maitai Ua haamaitai mai to oe Metua here i te Ao ra ia oe i te mau taleni e i te mau ite o te tauturu ia oe ia faaoti i ta oe misioni hanahana. A haapii ai oe i te farii e i te rave i te mau peu maitai a te Feia Apî Tamahine i roto i to oe oraraa, e haamau oe no oe iho i te mau peu no te pure, te tuatapaparaa i te papa‘iraa mo‘a, te haapa‘oraa i te mau faaueraa e te taviniraa ia vetahi ê. E haapuaihia teie mau peu no oe iho no te mau hanana atoa i to oe faaroo e i te iteraa papû no Iesu Mesia. E horo‘a’toa mai te reira ia oe ia ite e ia faananea’tu i to oe mau horo‘araa otahi.

A faaohipa tamau noa i to oe mana no te faateitei e no te haamaitai i to oe utuafare, te tahi atu feia apî tamahine, e te feia apî tamaroa o ta oe i matau. A faatura i te ti‘araa vahine, a paturu i te autahu‘araa, e a poihere i te mau metua vahine e te mau metua tane faaroo.

A faaô ai oe i roto i te Faahaereraa ia‘u iho i mua, te amui nei ïa oe i te rahiraa tauatini feia apî tamahine o te tamata nei i te haere i te Mesia e ia « ti‘a ei ite o te Atua i te mau mahana atoa, e i te mau mea atoa, e i roto i te mau vahi atoa » (Mosia 18:9). A tau‘a parau e to oe na metua, e na roto i te pure a ma‘ti i te mau opuaraa o te tauturu ia oe ia faarahi i te mau peu maitai o te auvahineraa, ia haapuai i to oe iteraa papû, e ia rae‘ahia ia oe to oe huru hanahana. A faaohipa maite i to oe taime i roto i te Feia Apî Tamahine na roto i te faaineineraa no te farii i te mau oro‘a mo‘a o te hiero, ia riro ei vahine faaipoipo e ei metua vahine haapa‘o, e ia haapuai i to oe nohoraa e te utuafare.

Te Peresideniraa Matamua