Eaha ta‘u e rave ia faaoti au i te faaî i te Faahaereraa ia‘u iho i mua ?

Te faaotiraa i te faanahonahoraa o te Faahaereraa ia‘u iho i mua o te hoê ïa tuhaa faufaa roa i roto i te haapuairaa i to oe faaroo e te iteraa papû e te faaineineraa no te mau fafauraa o te hiero. Ua haapii mai oe i te rave i te mau titauraa, te ohiparaa, e te faaiteraa i to oe haereraa i mua. Ia tamau noa te reira raveraa a faaea noa ai oe i ni‘a i te e‘a o te hiero e te faananea-tamau-raa i te mau maitai o te tauturu ia oe i roto i to oe oraraa. E tamau noa oe i te haere i mua na roto i te titauraa i te hoê « Honor Bee » e aore râ, na roto i te haamata-apî-faahou-raa i te Faahaereraa ia‘u iho i mua.

Titauraa i te « Honor Bee »

I roto i te aamu mau e horo‘ahia te « Honor Bee » i te mau tamahine apî o tei ineine i te rave hau atu i tei anihia. No to oe haere-tamau-raa i mua, e nehenehe oe e titau i te hoê « Honor Bee » no te apiti atu i ta oe Feti‘a no te tamahine haapa‘o. E nehenehe oe e farii i te « Honor Bee » i muri iho i to oe faaîraa i na titauraa e piti i muri nei :

1. Tai‘o faahou i te Buka a Moromona. Te hoê peu i te mau mahana atoa no te tuatapaparaa i te papa‘iraa mo‘a e haapuai te reira i to oe faaroo e e tauturu ia oe ia farii i te faaururaa no oe iho e te arata‘iraa i roto i to oe oraraa. Mai te mea e tai‘o oe e pae minuti i te mahana, e nehenehe oe e faaoti te taato‘araa o te Buka a Moromona i roto hoê matahiti.

2. Taviniraa ia vetahi ê e 40 hora ia amuihia. Mai te mea e nehenehe, te tahi nau hora i faaitehia e nehenehe e tuu-atoa-hia no te tahi atu tamahine apî e ta’na Faahaereraa ia‘u iho i mua. Ia ravehia te reira i raro a‘e i te arata‘iraa a te peresedeniraa o te Feia Apî Tamahine no te paroita e aore râ, amaa. A tauturu ai oe i te tahi atu tamahine apî, te hinaaro nei oe e :

   • Riro ei hoa no’na.

   • Riro ei hi‘oraa maitai mai te hoê tamahine maitai a te Atua.

   • Faaitoito ia’na ia ohipa e to’na na metua i roto i te ma‘itiraa i te mau iteraa rau tano e te mau opuaraa o te peu maitai.

   • Tauturu ia pee ia’na na roto i te mau iteraa rau e te mau opuaraa o te peu maitai.

   • Tauturu ia’na ia papa‘i i te mau iteraa rau e te mau opuaraa o te peu maitai.

   • Tauturu ia’na ia taa-maitai i te mau parau tumu o te evanelia o ta te mau iteraa rau e o ta te mau opuaraa e haapii mai.

   • Faaitoito ia’na ia tai‘o i te Buka a Moromona, e ia aparau ia’na i te mea o ta’na i tai‘o.

   • Faaitoito ia’na ia faaite i te mau iteraa rau e te mau opuaraa o te peu maitai i to’na utuafare.

Haamata-apî-faahou-raa te Faahaereraa ia‘u iho i mua

E nehenehe oe e haamata-apî-faahou te faanahoraa o te Faahaereraa ia‘u iho i mua e ia titau te pitiraa o te Feti‘a no te tamahine haapa‘o.