Welkam long Progres blong Miwan

Yu wan gel blong Papa long Heven, we Hem i lavem yu tumas, we yu rere blong kam long wol ia long stret taem ia blong wan stamba tingting we i tabu mo i gat glori long hem. Yu gat wan hae responsabiliti blong yusum paoa blong yu mo gudfala fasin blong yu blong mekem ol gudfala samting. Papa blong yu long Heven we i lavem yu, i bin blesem yu wetem ol talen mo sam nara samting we yu save mekem blong i save helpem yu blong yu fulfilim misin blong yu we i kam long God. Taem yu stap lan blong akseptem mo mekem samting folem ol valiu blong ol Yang Woman long laef blong yu, bae yu developem ol fasin blong yuwan blong prea, skripja stadi, fasin blong obei long ol komanmen, mo seves long ol narafalawan. Ol wanwan fasin ia blong evri dei bae oli mekem fet blong yu long Jisas Kraes mo testemoni abaot Jisas Kraes i kam moa strong. Bae oli helpem yu tu blong luksave mo developem ol kaen presen ia.

Oltaem yusum ol gudfala fasin blong yu blong leftemap mo blesem famle blong yu, ol narafala yang woman, mo ol yang man we yu stap go wetem olgeta. Givim ona long yu olsem wan woman, sapotem prishud, mo glad gud long fasin we woman i stap olsem wan fetful mama mo long fasin we man i stap olsem wan fetful papa.

Taem yu stap tekem pat long Progres blong Miwan, bae yu joen wetem taosen narafala yang woman we oli stap traehad blong kam long Kraes mo “stanap olsem ol witnes blong God long evri taem mo long evri samting, mo long evri ples” (Mosaea 18:9). Kaonsel wetem papa mo mama blong yu, mo wetem prea, jusum ol gol we bae i helpem yu blong yu save developem ol fasin blong ol woman, mekem testemoni blong yu i kam moa strong, mo kasem ol paoa we yu save kasem, we oli kam long God. Yusum gud taem blong yu long ol Yang Woman taem yu stap rere blong kasem ol tabu odinens blong tempol, blong kam wan fetful waef mo mama, mo blong mekem hom mo famle i kam moa strong.

Fas Presidensi